To Abò de mẹ to Petlezìn Ji

YỌNNUZANGBE (jeudi) zánmẹ die, to azán awe godo. Jesu po apọsteli 12 etọn lẹ po wá abò daho ehe mẹ to petlezìn de ji nado dù núdùdù Juwayi tọn. Dawe he a mọ bọ e tọ́n jei enẹ wẹ Juda Iskaliọti. Ewọ jei nado yì dọna yẹwhenọ lẹ lehe yé na wle Jesu do.

Nujijọ lọ pò osọ wẹ Juda yì yé dè bo kanse yé dọmọ: ‘Etẹwẹ mì na na mi eyin yẹn gọalọna mì nado wle Jesu?’ Yé sọ dọmọ: ‘Fataka-kuẹ gbàn.’ Todin, Juda jei yé dè nado plan yé wá fihe Jesu te. Be e ma yin nuylankan de wẹ enẹ ya?

Núdùdù Juwayi tọn lọ ko wá vivọnu. Ṣigba todin, Jesu sọ bẹ núdùdù vonọtaun devo jẹeji. E yí akla de na apọsteli etọn lẹ bo dọmọ: ‘Mì dù i, na ehe nọtena agbasa ṣie he yè na yí na mì.’ Enẹgodo, e sọ yí kọfo vẹnhàn tọn de na yé bo dọmọ: ‘Mì nù in, na ehe nọtena ohùn ṣie he yè na kọ̀n dai na mì.’ Biblu ylọ nujijọ ehe dọ, ‘Tenu-Núdùdù Oklunọ tọn.’

Islaelivi lẹ nọ dù núdùdù Juwayi tọn nado flin whenue angẹli Jiwheyẹwhe tọn ‘juwayi’ gbọn owhé yetọn lẹ ji to Egipti, bo hù viplọnji lẹ to owhé Egiptinu lẹ tọn gbè. Ṣigba todin, Jesu jlo dọ hodotọ emitọn lẹ ni nọ flin emi, po lehe emi ze ogbẹ̀ emitọn jo na yé do po. Enẹwutu wẹ e do dọna yé nado nọ basi hùnwhẹ núdùdù vonọtaun ehe tọn to whemẹwhemẹ.

To whenue yé ko dù Tenu-Núdùdù Oklunọ tọn lọ godo, Jesu dọna apọsteli etọn lẹ nado yin adọgbotọ bo lodo to yise mẹ. Enẹgodo, yé jihàn hlan Jiwheyẹwhe bosọ tọ́nyi. Ozán ko kú taun todin, ogàn wiawe zánmẹ tọn na ko hò wayi. Gbọ mí ni pọ́n fihe yé yì.