Wẹndagbe Jijọho Tọn Jẹ Aigba He Yiaga Chiapas Tọn lẹ Ji
“To mẹhuhu he ylan hugan he mẹdepope sọgan flin to ayimatẹn Chiapas tọn mẹ, glesi 45 he ma tindo adánwanu depope lẹ, he mẹ ovivu 13 tin te, yin hùhù gbọn pipli sunnu he sọawhànnu . . . lẹ dali.” Mọwẹ linlinnamẹwe “El Universal” tọn na linlin do nuhe jọ to Acteal, to Ayimatẹn Chiapas tọn, to 22 décembre 1997 tọn ji do.
CHIAPAS wẹ yin ayimatẹn he tin to hùwaji-pete Mexique tọn, he pé dogbó hẹ Guatemala. Po whenuho ojlẹ gaa ohẹ́n gọna nuhòyí sọn mẹsi tọn de po, pipli tòvi Maya Indianu delẹ wleawuna gufinfọn awhànfunfun tọn de to janvier 1994, to yinkọ lọ Ejército Zapatista de Liberación (EZLN, Awhànpa Mẹdekannujẹ Akọta Zapatista tọn) glọ. Hodọdopọ na pọngbọ jijọho tọn de ko dọngbàn. Mẹgbeyinyan po awhàn-tọ́nmẹ lẹ po, gbọn gufọntọ lẹ dali podọ gbọn awhànfuntọ gandudu tọn lẹ dali, ko dekọtọn do hùnsọndai po okú po mẹ. Hunyanhunyan lọ hẹn susu glesi he tin to lẹdo lọ mẹ lẹ nado họnyi nado mọ hihọ́.
To ninọmẹ todido matindo tọn mọnkọtọn lẹ ṣẹnṣẹn, pipli owanyina jijọhotọ lẹ tọn dopo tin he ko gbọṣi kada na nuhe dù avùnhiho tonudidọ tọn lọ. Po zohunhun po, yé deanana ayidonugo hlan Ahọluduta Jiwheyẹwhe tọn ji taidi todido dopo akàn lọ he na didẹ̀ nuhahun he pannukọn gbẹtọ lẹ, otò yetọn tọn podọ lẹdo globu pé. (Daniẹli 2:44) Mẹnu lẹ wẹ yé yin? Kunnudetọ Jehovah tọn lẹ wẹ. To tonusise mẹ na gbedide Jesu tọn, yé to vivẹnudo nado hẹn wẹndagbe Ahọluduta Jiwheyẹwhe tọn jẹ aigba Chiapas tọn he yiaga he to olá hugan lẹ ji. (Matiu 24:14) Etẹwẹ kunnudide nọ taidi to ninọmẹ mọnkọtọn lẹ glọ, podọ etẹwẹ kọdetọn etọn lẹ yin?
“Yẹn Yin Dopo to Kunnudetọ Jehovah Tọn lẹ Mẹ”
Adolfo, sunnu jọja he ko ṣẹṣẹ lẹzun wẹnlatọ Ahọluduta tọn de, to azọ́nwa to azọ́nwatẹn ladio tọn de to Ocosingo to gbèdopo. To ajiji mẹ, ohọ̀n lọ yin húhú po zingidi po. Pipli sunnu he sọawhànnu lẹ tọn de biọ ohọ̀ lọ mẹ bosọ dlẹn osò yetọn lẹ do ota na ẹn. Yé yawu yì fie yè nọ dọho te lọ po zingidi po, hò azọ́nwanu hodidọ tọn lẹ yí, bosọ lá to ladio mẹ dọ yé ko tọ́nawhàn gandudu lọ.
To kọlilẹ hlan Adolfo mẹ, sunnu he sọawhànnu lọ lẹ degbè na ẹn nado kọnawudopọ hẹ pipli yetọn. “Yẹn yin dopo to Kunnudetọ Jehovah tọn lẹ mẹ,” wẹ Adolfo gblọn dọ, dile etlẹ yindọ ewọ ma ko yí baptẹm. E basi zẹẹmẹ dọ todido dopo akàn lọ na jijọho wẹ Ahọluduta Jiwheyẹwhe tọn, podọ e gbẹ́ awhànfun-vọ̀ po osò he yé zedonukọnna ẹn lọ po dai gbidigbidi. To teninọ nujikudo tọn etọn mimọ mẹ, yé jo e do e ni yì. To nujijọ lọ finflin mẹ, Adolfo dọmọ: “Nujijọ enẹ hẹn yise ṣie lodo na taun tọn.”
To godo mẹ ninọmẹ lọ yido, ṣigba lẹdo lọ gbẹsọ tin to anademẹ awhànfuntọ lẹ tọn glọ. Mahopọnna enẹ, Adolfo kẹalọyi oylọ basinamẹ mẹho agun lẹdo lọ mẹ tọn lẹ tọn po homẹhunhun po nado yì wazọ́n hẹ pipli kando Klistiani lẹ tọn de to lẹdo lọ mẹ. To aligbotẹn ponọ lẹ tọn he e dona gbọn bo dín lẹ, awhànfuntọ lọ lẹ nọ na ẹn sisi to whenuena e do ede hia taidi dopo to Kunnudetọ Jehovah tọn lẹ mẹ. Ewọ yin bibaptizi to godo mẹ bo ko sọ tindo pekọ to alọgigọna pipli kando enẹ tọn nado lẹzun agun Kunnudetọ Jehovah tọn lẹ tọn de mẹ. “Todin he yẹn ko yí baptẹm,” wẹ Adolfo dọ, “yẹn sọgan dọ po nujikudo mlẹnmlẹn po dọ yẹn yin dopo to Kunnudetọ Jehovah tọn lẹ mẹ!”
“Jehovah Hẹn Mí Lodo”
To madẹnmẹ he EZLN lẹ ko lá awhàn sọta gandudu lọ to ladio mẹ godo, mẹhe nọ nọ̀ otò lọ mẹ lẹ jẹ hinhọnyi ji. Francisco, heyin lizọnyizọnwatọ whenu-gigọ́ tọn, kavi gbehosọnalitọ de, basi zẹẹmẹ lehe Jehovah hẹn ewọ po asi etọn po lodo to nuhe yé dona doakọnna lẹ mẹ gbọn.
“Mí basi dide nado dín fibẹtado to lẹdo de mẹ he dẹn na zọnlinzinzin ganhiho atọ̀n tọn. Agun de tin to finẹ, enẹwutu mí na tin hẹ mẹmẹsunnu lẹ. To madẹnmẹ ojlẹ wá na plidopọ lẹdo tọn mítọn he na yin bibasi to Palenque. Asi ṣie po yẹn po ma jlo na gbọ̀ opli vonọtaun gbehosọnalitọ lẹ tọn go gba, ṣigba mí sè dọ aliho he yì plidopọ lọ tẹnmẹ ko yin súsú gbọn EZLN lẹ dali. Mí basi dide nado gbọ̀n aliho zungbo mẹ tọn, he hẹn mí na ganhiho ṣinẹnẹ. Mí jẹ finẹ do ganmẹ na opli gbehosọnalitọ lẹ tọn, he mí duvivi etọn tlala, gọna tito-to-whinnu blebu plidopọ lọ tọn.
“To whenuena mí lẹkọwa whégbè, mí mọdọ owhé mítọn ko yin mimẹ̀ bọ kanlin mítọn lẹ ko yin finfin. Nuhe yin jijodo lẹpo wẹ saki pẹvi avọ̀ tọn de. Mí blawu gando nuhẹnbu mítọn go, ṣigba mẹmẹsunnu he tin to Ocosingo lẹ gbọn homẹdagbe dali yí mí do whégbè. Yé sọ plọn mí lehe mí na nọ wazọ́n do yèdọ nude he míwlẹ taidi glesi lẹ ma ko nọ wà dai pọ́n gbede. Mẹmẹsunnu dopo plọn mi fọtodide, devo plọn mi afọpa jijlado. Lehe yẹn po asi ṣie po ko penugo nado penukundo mídelẹ go gbọn niyẹn kakajẹ din, to ma doalọtena sinsẹ̀nzọn gbehosọnalitọ tọn mẹ. To nulinlẹnpọn do nuhe ko jọ lọ ji, mí sọgan mọdọ dile e ma tlẹ bọawu na mí nado doakọnna ẹn do, Jehovah hẹn mí lodo.”
Sinsẹ́n Azọ́n Yẹwhehodidọ Tọn Lẹ
Kunnudetọ he tin to Ayimatẹn Chiapas tọn mẹ lẹ ma na dotẹnmẹ awusinyẹnnamẹnu po owù lọ po nado glọnalina yé sọn mahẹ tintindo to vivẹnudido vonọtaun de mẹ nado hẹn wẹndagbe lọ jẹ gbẹtọ lẹ dè to lẹdo lọ mẹ gba. Di apajlẹ, yigodo jẹ avril po mai 1995 po, yé kọnawudopọ hẹ Klistiani hatọ yetọn lẹ lẹdo aihọn pé to nujijla de mẹ nado má Linlin Ahọluduta Tọn Sọha 34, he tindo hosọ he sọgbe tlala lọ heyin Naegbọn Ogbẹ̀ do Gọna Nuhahun lẹ Sọmọ?
To nujijla lọ whenu—to fihe nọ yin yiylọdọ Pueblo Nuevo—gbehosọnalitọ whepoponu tọn de, he yin Ciro mọ whẹndo de he do ojlo hia. To kọlilẹ yì to azán atọ̀n godo, e penugo nado bẹ plọnmẹ Biblu de jẹeji hẹ yé. Ṣigba to whenuena Ciro po gbẹdohẹmẹtọ de po lẹkọyi nado zindonukọn to oplọn lọ mẹ hẹ whẹndo lọ, whétọ lọ ma to whégbè gba. Kakatimọ, pipli sunnu he sọawhànnu lẹ tọn de wẹ to tenọpọn ẹn nado gbleawuna ẹn. Yé kanse Ciro po gbẹdohẹmẹtọ etọn po nuhe yé to dindin bosọ dobuna yé nado hù yé. To odẹ̀ abọẹ tọn de hihò hlan Jehovah godo, Klistiani awe lọ lẹ yí adọgbigbo do basi zẹẹmẹ dọ yé wá nado plọn Biblu whẹndo lọ wẹ. Po enẹ po, sunnu he sọawhànnu lọ lẹ jo yé do nado yì. Na whẹwhinwhẹ́n delẹ wutu, whétọ lọ ma lẹkọwa whégbè to gbenẹgbe gba.
To gbèdopo to diblayi owhe atọ̀n godo, e paṣa Ciro nado mọ dawe lọ wá owhé etọn gbè. Lehe homẹ Ciro tọn hùn do sọ nado sè dọ whẹndo lọ blebu ko yin bibaptizi podọ dọ yemẹpo wẹ to awukọndopọ hẹ agun de todin to Guatemala! Dopo to viyọnnu lọ lẹ mẹ tlẹ to sinsẹ̀nzọnwa taidi gbehosọnalitọ whepoponu tọn.
Pinpẹn-Nutọn-Yinyọnẹn na Núdùdù Gbigbọmẹ Tọn
Mahopọnna awusinyẹnnamẹnu he to nukọnzindo to Chiapas, nugopọntọ agbegbe tọn de na linlin dọ Kunnudetọ lẹdo lọ mẹ tọn lẹ yọ́n pinpẹn pipli dopọ tọn nugbonugbo. (Heblu lẹ 10:24, 25) E basi zẹẹmẹ nuhe jọ to azán plidopọ vonọtaun tọn de he wayi to agọe ji, heyin titobasina nado bẹjẹeji to afọnnu fuu na mẹhe wá lẹ nido penugo nado lẹkọyi whégbè do mẹwhenu to whenuena okle na gbẹ́ pò to ote. Dile etlẹ yindọ delẹ to yé mẹ dona zinzọnlin na nuhe hugan ganhiho atọ̀n gbọn zungbo mẹ nado jẹ nọtẹn plidopọ lọ tọn, mẹlẹpo wẹ ko tin to aisinsin to ogàn 7:00 afọnnu tọn mẹ. To mẹplidopọ lẹ mẹ wẹ hagbẹ 6 pipli EZLN tọn lẹ tin te, he to todoai bosọ to pẹho, he dohia hezeheze dọ yé to vivi tito-to-whinnu lọ tọn dù. Yé lọsu ko zinzọnlin na ganhiho atọ̀n nado wá plidopọ lọ. Omẹ 20 to hagbẹ lọ lẹ mẹ sọ wá Oflin okú Klisti tọn, heyin bibasi to Plitẹnhọ Ahọluduta lẹdo lọ tọn mẹ.
Sunnu jọja devo heyin hagbẹ gufọntọ lẹ tọn yin azọ́ndena gbọn ogán etọn lẹ dali nado to hihọ́ basina lẹdo zungbo de tọn. To whenuena e jẹ agbegbe enẹ mẹ, e mọdọ tòmẹnu lọ lẹpo, he suhugan yetọn yin Kunnudetọ Jehovah tọn lẹ, ko họnyi. Enẹwutu e sinai do owhé he ko yin jijodo lọ lẹ dopo gbè. Na e ma tindo nususu nado wà wutu, e ṣinyan owe delẹ he e mọ to lẹdo owhé lọ tọn lẹ bosọ jẹ hihia ji. Ehelẹ wá sọawuhia nado yin owe Watch Tower tọn lẹ heyin jijodo gbọn Kunnudetọ lẹ dali. To ṣokẹdẹninọ etọn mẹ, dawe jọja lọ tindo whenu nado lẹnayihamẹpọn do nuhe e to hihia ji. E basi dide dọ emi dona diọ gbẹzan emitọn bo ze awhànfunnu etọn lẹ dai. Dile e yawu yọnbasi na ẹn sọ, e dín Kunnudetọ lẹ mọ bosọ jẹ Biblu plọn ji. To osun ṣidopo gblamẹ, e ko to wẹndagbe lọ dọ na mẹdevo lẹ. Ewọ po hagbẹ whẹndo etọn tọn atọ̀n devo lẹ po he nọ nọgodona nuwiwa gufọntọ lẹ tọn dai ko yin Klistiani he ko yí baptẹm lẹ todin.
Adà Dagbe de Mimọ
Dile etlẹ zẹẹmẹdo awusinyẹnnamẹnu daho de do, nudindọn lọ tindo nuyiwadomẹji dagbe do walọyizan gbẹtọ lẹ tọn ji hlan azọ́n yẹwhehodidọ tọn na taun tọn. Mẹho dopo to tòdaho he mẹ avùnhiho lọ bẹsọn dọmọ: “To nudi azán atọ́n godo he avùnhiho lọ ko bẹjẹeji, mí basi titona azọ́n yẹwhehodidọ tọn to tòdaho lọ mẹ podọ to gbonu etọn. Gbẹtọ lẹ tin to jejeji nado dotoaina mí. Mí do owe susu gbonu bosọ bẹ plọnmẹ Biblu susu jẹeji. To lẹdo dopo mẹ, mẹsusu wẹ ko nọ jẹagọdo nugbo lọ, ṣigba na nudindọn lọ tọn wutu, todin yé nọ dotoai, plọn Biblu, bosọ nọ yì opli po plidopọ lẹ po.”
Homẹ mẹmẹsunnu lẹ tọn hùn dọ yé penugo nado dike nuwiwa yẹwhehọluduta tọn lẹ ni zindonukọn mahopọnna ninọmẹ hunyanhunyan tọn sinsinyẹn lẹ. Yé zindonukọn nado to plidopọ yetọn lẹ basi dile etlẹ yindọ awhànpa gandudu tọn lẹ po EZLN po yọnẹn dogbọn ehe dali, bọ enẹ ko hẹn yé lodo to gbigbọ-liho tlala. Dlapọn lẹ gbọn nugopọntọ tomẹyitọ lẹ dali ko sọ yin mẹwhinwhàn huhlọnnọ de nado zindonukọn to azọ́n yẹwhehodidọ tọn mẹ. Po awuvivi po, tulinamẹ nọ wá etlẹ yin sọn mẹhe to awhànfun lọ lẹ dè, mẹhe nọ dotuhomẹna Kunnudetọ lẹ gbọzangbọzan nado zindonukọn to azọ́n yẹwhehodidọ tọn yetọn mẹ.
Dile etlẹ yindọ whlepọn po awusinyẹnnamẹnu po he mẹhe tin to Chiapas lẹ dona doakọnna lẹ ko depò jẹ obá de mẹ dile ojlẹ to yìyì, yé ma ko wá vivọnu gba. Mahopọnna enẹ, onú dopo họnwun—Kunnudetọ Jehovah tọn lẹ magbe nado zindonukọn matin nuṣikọ to vivẹnudido yetọn lẹ mẹ nado hẹn wẹndagbe jijọho tọn sọn Ohó Jiwheyẹwhe tọn, yèdọ Biblu mẹ, yì na gbẹtọ lẹ. (Owalọ lẹ 10:34-36; Efesunu lẹ 6:15) Dile yẹwhegán Jẹlemia dọ do, yé yọnẹn dọ “aliho gbẹtọ tọn ma tin to ewọ lọsu mẹ gba; e ma tin to mẹhe to zọnlinzin mẹ nado do afọdide etọn lẹ gba.” (Jẹlemia 10:23) Ahọluduta Jiwheyẹwhe tọn kẹdẹ to alọ Visunnu etọn, Jesu Klisti tọn lẹ mẹ, wẹ sọgan hẹn pọngbọ wá na whẹdida mawadodo tọn po ohẹ́n po he tin to aihọn mẹ.—Matiu 6:10.
[Yẹdide Otò Tọn to weda 9]
Agewaji Ohù Mexique tọn
CHIAPAS
GUATEMALA
Ohù Pacifique tọn
[Asisa Yẹdide Tọn]
Mountain High Maps® Copyright © 1997 Digital Wisdom, Inc.
[Yẹdide to weda 9]
Kunnudetọ he jlo na biọ lizọnyizọn lọ mẹ to aigba he yiaga Chiapas tọn ji lẹ