Otò He Tin to Osó Ji De

“MÌ WẸ hinhọ́n aihọn tọn. Otò he yè doai do osó ji, ma sọgan yín whiwhla gba,” wẹ Jesu dọna devi etọn lẹ to Yẹwhehodidọ diyin Osó ji tọn etọn mẹ.—Matiu 5:14.

Tòpẹvi Judé po Galili tọn susu po yin didoai do osó lẹ ji kakati ni yin do agbàdo lẹ mẹ to odò. Hihọ́ tintindo wẹ yin whẹwhinwhẹ́n tangan he wutu yé do de nado nọ nọ̀ osó lẹ ji. Gbọnvona awhànpa mẹgbeyantọ lẹ, jaguda-gbẹ́ lẹ nọ gbà lẹdo he mẹ Islaelivi lẹ sawhé do. (2 Ahọlu lẹ 5:2; 24:2) Tovi adọgbotọ lẹ sọgan hoavùn nado basi hihọ́na ohọ̀ heyin gbigbá dopọ do osó ji lẹ po awubibọ po hugan otò he tin to agbàdo mẹ de, he nọ biọ adó daho lẹ na hihọ́.

To whenuena e yindọ Juvi lẹ nọ saba sá osẹ̀n wéwé do adó yetọn lẹ, ohọ̀ susu he tin topọ to osó ji he yè sá onú wéwé dó ehelẹ sọgan yin mimọ hlan sọn fidindẹn po awubibọ po. (Owalọ lẹ 23:3) To owhè ṣádada Palestine tọn glọ, otò heyin gbigbá do osó ji ehelẹ nọ sẹ́ taidi ohọ̀ he nọ tá hinhọ́n de, kẹdẹdile otò Méditerranée tọn delẹ gbẹ́ nọ wà do to egbehe.

Jesu yí adà ayidego lẹdo Galili po Jude po tọn ehe zan nado plọn hodotọ etọn lẹ azọngban he Klistiani nugbo lẹ tindo. E dọna yé dọmọ: “Mọkẹdẹ wẹ mì ni gbọ hinhọ́n mìtọn ni họnwun to gbẹtọ lẹ nukọn do, na yé nido mọ azọ́n dagbe mìtọn lẹ bo pagigona Otọ́ mìtọn he tin to olọn mẹ.” (Matiu 5:16) Dile etlẹ yindọ Klistiani lẹ ma nọ wazọ́n dagbe lẹ nado yin pipà gbọn gbẹtọ lẹ dali, walọ dagbe yetọn nọ yin ayidego.—Matiu 6:1.

Azọ́n dagbe mọnkọtọn lẹ nọ sọawuhia taun to plidopọ agbegbe Kunnudetọ Jehovah tọn lẹ tọn whenu. To alọdindlẹndo plidopọ agọe tọn de mẹ, linlinnamẹwe de to Espagne, na linlin dọmọ: “Dile etlẹ yindọ ojlo tintindo to nuplọnmẹ sinsẹ̀n tọn mẹ to didepo to sinsẹ̀n devo lẹ mẹ, whẹho lọ mayin mọ na Kunnudetọ Jehovah tọn lẹ gba. Na yé ma jlo dọ Biblu ni hẹn nujọnu-yinyin etọn bu wutu, yé nọ basi yizan Ohó Jiwheyẹwhe tọn tọn.”

Thomas, he nọ penukundo aihundatẹn he Kunnudetọ lẹ nọ yizan gbọzangbọzan to agewaji-whèyihọ Espagne tọn de go, duvivi tintin hẹ mẹhe nọ yí Ohó Jiwheyẹwhe tọn do yizan mẹ lẹ tọn. E sisẹ gbọjẹ gaa yíyí etọn do nukọn na osẹ susu na e nido sọgan tin to finẹ na plidopọ agbegbe de he Kunnudetọ Jehovah tọn lẹ jlo na basi. E jẹ avi vi ji to whenuena afọzedaitọ susu, he bẹ jọja lẹ hẹn, dọnsẹpọ ẹ to plidopọ lọ godo nado dopẹna ẹn na gbekọndopọ etọn to owhe he wayi lẹ mẹ podọ nado dọnudo e na gbọjẹ gaa etọn. “Yinyọ́n mì omẹ ehelẹ ko yin dopo to numimọ tangan gbẹzan ṣie tọn lẹ mẹ,” wẹ e dọ.

Otò he tin to osó ji de nọ dọ̀n ayidonugo nupọntọ lẹ tọn na e nọ họnwun hezeheze podọ na ohọ̀ wéwé he tin to e ji lẹ nọ sẹ́ to hinhọ́n owhè tọn nù wutu. Mọdopolọ, Klistiani nugbo lẹ nọ gbọnvo na yé nọ dovivẹnu nado hodo nujinọtedo yiaga Owe-wiwe tọn he gando nugbodidọ, walọ dagbe, po awuvẹmẹ po go wutu.

Dogọ, Klistiani lẹ nọ de hinhọ́n nugbo lọ tọn tọ́n gbọn yẹwhehodidọ yetọn dali. Apọsteli Paulu dọ gando Klistiani owhe kanweko tintan whenu tọn lẹ go dọmọ: “Le míwlẹ tindo devizọn he, dile mí mọ lẹblanu yí do, mí ma yọ́n nudikọ . . . ṣigba gbọn awusọhia nugbo tọn dali mí to míde pà hlan ayiha omẹ dopodopo tọn to nukọn Jiwheyẹwhe tọn.” (2 Kọlintinu lẹ 4:1, 2) Dile etlẹ yindọ yé pehẹ homẹkẹn to fidepope he yé dọyẹwheho te, Jehovah dona lizọnyizọn yetọn, bọ to nudi owhe 60 W.M., apọsteli Paulu sọgan wlan dọ wẹndagbe lọ ko yin yẹwheho etọn dọ “hlan mẹhe tin to olọn glọ lẹpo.”—Kọlọsinu lẹ 1:23.

To egbehe, Kunnudetọ Jehovah tọn lẹ lọsu nọ yí nukun nujọnu tọn do pọ́n azọngban yetọn nado ‘dike hinhọ́n yetọn ni họnwun to gbẹtọ lẹ nukọn,’ dile Jesu degbè do. Gbọn ohó po owe lẹ po dali, Kunnudetọ Jehovah tọn lẹ má wẹndagbe Ahọluduta tọn to aigba 235 ji lẹdo aihọn pé. Na hinhọ́n Biblu tọn nido sọgan jẹ mẹsusu dè dogọ, yé ko hẹn owe sinai do Biblu ji yetọn lẹ tin-to-aimẹ to ogbè 370 delẹ mẹ.—Matiu 24:14; Osọhia 14:6, 7.

To fisusu, Kunnudetọ lẹ ko wazọ́n sinsinyẹn nado plọn ogbè mẹhe sẹtẹn sọn otò yetọn lẹ mẹ to fie azọ́n kunnudide tọn tin te kavi ko yin alọhẹndotena te lẹ. Di apajlẹ, mẹsusu ko sẹtẹn yì tòdaho Agewaji Amelika tọn delẹ mẹ sọn Chine po Russie po. Kunnudetọ lẹdo lọ mẹ tọn lẹ ko tẹnpọn nado plọn ogbè Chine po Russie tọn po, gọna ogbè devo lẹ nado sọgan dọyẹwheho wẹndagbe lọ tọn na jonọ he wá lẹ. Na nugbo tọn, azọ́n mẹpinplọn tọn to yìyì to alọnu to ogbè delẹ mẹ nado hẹn mẹhe jlo lẹ lẹzun mẹplọntọ he pegan lẹ nado deanana nuplọnmẹ niyaniya tọn lẹ na wẹndagbe lọ nido sọgan yin didọ hlan mẹdevo lẹ ‘dile jijẹ lọ whẹ́n na jibẹwawhé.’—Johanu 4:35.

Yẹwhegán Isaia dọ dọdai dọmọ: “To enẹgodo to azán podo gbè, yè na yí yonu owhé OKLUNỌ tọn hẹnai to aga osó daho lẹ tọn ji, yè nasọ ze e yì ojí hú osó pẹvipẹvi lẹ; akọta lẹ nasọ lìn biọ e mẹ.” Gbọn walọyizan po lizọnyizọn yetọn po gblamẹ, Kunnudetọ Jehovah tọn lẹ to alọgọna gbẹtọ lẹ to filẹpo nado wá ‘osó owhé Jehovah tọn ji’ nado yin pinplọn gando aliho Jiwheyẹwhe tọn lẹ go podọ nado plọn nado zinzọnlin to omọ́ Jiwheyẹwhe tọn ji. (Isaia 2:2, 3) Dile Jesu dọ do, kọdetọn ayajẹnọ lọ wẹ yindọ yé to ‘gigopana Otọ́ olọn mẹ tọn yetọn,’ Jehovah Jiwheyẹwhe to pọmẹ.—Matiu 5:16; 1 Pita 2:12.