“Mì Dike Hinhọ́n Mìtọn Ni Họnwun”
1. Etẹwẹ mí tindo lẹblanulọkẹyi nado má hẹ mẹdevo lẹ?
1 Sọn afọnnu fuu kakajẹ whèjai, whanpẹ hinhọ́n owhè tọn nọ to gigopana Jehovah Jiwheyẹwhe. Ṣigba, hinhọ́n wunmẹ devo sọ tin he Jesu basi oylọna devi etọn lẹ nado tindo—enẹ wẹ “hinhọ́n ogbẹ̀ tọn.” (Joh. 8:12) Lẹblanulọkẹyi vonọtaun de wẹ e yin nado tindo hinhọ́n gbigbọmẹ tọn ehe, podọ e bẹ azọngban titengbe lẹ hẹn. Jesu na ayinamẹ dọmọ: “Mì dike hinhọ́n mìtọn ni họnwun,” bo gbọnmọ dali hẹn ale wá na mẹdevo lẹ. (Mat. 5:16) To zinvlu gọ́ngọ́n gbigbọmẹ tọn egbehe tọn mẹ, mí dona má hinhọ́n lọ hẹ mẹdevo lẹ, podọ mẹsusu wẹ tindo nuhudo ehe hugan gbede pọ́n! Taidi Klisti, nawẹ mí sọgan dike hinhọ́n mítọn ni họnwun gbọn?
2. Nawẹ Jesu do nujọnu-yinyin hinhọ́n gbigbọmẹ tọn mimá hẹ mẹdevo lẹ tọn hia gbọn?
2 Gbọn Yẹwhehodidọ Dali: Jesu yí whenu, huhlọn, po nutindo etọn lẹ po zan nado hẹn hinhọ́n nugbo lọ tọn zun yinyọnẹn na gbẹtọ lẹ to owhé yetọn lẹ gbè, to nọtẹn pọmẹ tọn lẹ, podọ to osó lẹ ji—yèdọ fidepope he yé sọgan yin mimọ te. E yọnẹn dọ nuhọakuẹ taun wẹ e yin nado na yé hinhọ́n nugbo gbigbọmẹ tọn. (Joh. 12:46) Nado sọgan jẹ mẹsusu dè, Jesu wleawuna devi etọn lẹ nado yin “hinhọ́n aihọn tọn.” (Mat. 5:14) Yé nọ dike hinhọ́n yetọn ni họnwun gbọn dagbe wiwà na kọmẹnu yetọn lẹ po nugbo gbigbọmẹ tọn mimá hẹ yé po dali.
3. Nawẹ mí sọgan do pinpẹn-nutọn-yinyọnẹn nujọnu tọn hia na hinhọ́n nugbo lọ tọn gbọn?
3 Omẹ Jiwheyẹwhe tọn lẹ nọ yí nukun nujọnu tọn do pọ́n azọngban lọ nado “to zọnlinzin taidi ovi hinhọ́n tọn lẹ,” podọ yé nọ dọyẹwheho to fidepope he gbẹtọ lẹ sọgan yin mimọ te. (Efe. 5:8) Biblu kavi owe mítọn lẹ hihia to fihe gbẹtọ lẹ sọgan mọ mí te to gbọjẹ whenu to azọ́nmẹ kavi to wehọmẹ sọgan hùn dotẹnmẹ dote nado dọhodo Owe-wiwe ji. Mọwiwà zọ́n bọ mẹmẹyọnnu jọja de bẹ plọnmẹ Biblu de jẹeji bo do owe lẹ gbonu na klasigbẹ́ etọn 12!
4. Naegbọn mí dona tindo walọyizan dagbe eyin mí na ‘dike hinhọ́n mítọn ni họnwun’?
4 Gbọn Azọ́n Dagbe lẹ Dali: Eyin mí na dike hinhọ́n mítọn ni họnwun, mí sọ dona payi walọyizan egbesọegbesọ tọn mítọn lẹ go. (Efe. 5:9) Walọ Klistiani lẹ tọn nọ saba yin ayidego to azọ́nmẹ, wehọmẹ, po nọtẹn gbangba tọn devo lẹ po, ehe nọ hùn dotẹnmẹ dotena yé nado má nugbo Biblu tọn lẹ. (1 Pita 2:12) Di apajlẹ, walọ dagbe visunnu owhe atọ́n mẹvi de tọn whàn mẹplọntọ etọn nado ylọ mẹjitọ etọn lẹ to alokan ji. E dọmọ: “N’ma ko mọ yọpọvu he tindo walọ dagbe sọle pọ́n!” Mọwẹ, lizọnyizọn po walọyizan mítọn po nọ dọ̀n gbẹtọ lẹ wá “hinhọ́n ogbẹ̀ tọn” lọ kọ̀n bo nọ hẹn pipà wá na Jiwheyẹwhe mítọn.