Lilatọ Ahọluduta Tọn lẹ Na Linlin
‘Ohó Jiwheyẹwhe Tọn Tindo Huhlọn’
SUHUGAN gbẹtọ lẹ tọn wẹ jẹakọ hẹ Biblu to lopo owhè ṣadada Caraïbe tọn ji to Jamaïque. Na nugbo tọn, King James Version, sọgan yin mimọ to diblayin owhé lẹpo gbè, bọ mẹdelẹ ko tindo numimọ etọn dọ “ohó Jiwheyẹwhe tọn tin to ogbẹ̀, e do huhlọn.” (Heblu lẹ 4:12) Huhlọn ehe sọgan diọ gbẹzan lẹ, dile numimọ he bọdego dohia do.
Dawe de he nọ yin Cleveland ṣẹṣẹ gọ̀ sọn azọ́n mẹ wẹ to whenuena Kunnudetọ Jehovah tọn dopo dla ẹ pọ́n. To nuagokun delẹ mimá hẹ ẹ sọn Biblu mẹ godo, Kunnudetọ lọ jo owe Biblu pinplọn tọn heyin Oyọnẹn He Nọ Planmẹ Sọyi Ogbẹ̀ Madopodo Mẹ do na ẹn. Cleveland ma yọnẹn to bẹjẹeji dọ Ohó Jiwheyẹwhe tọn na tindo huhlọn do gbẹzan emitọn ji sọmọ gba.
Cleveland nọ saba hodẹ̀ whlaatọ̀n to gbèdopo, bo nọ biọ dọ Jiwheyẹwhe ni gọalọna emi nado mọ aliho he sọgbe nado sẹ̀n Ẹn lọ. Cleveland yin nujikudonọ dọ mẹjitọ etọn lẹ ma to sinsẹ̀n-basi to aliho he sọgbe mẹ gba, ṣigba e jẹflumẹ to whenuena e ko dindona sinsẹ̀n devo lẹ godo. Dile etlẹ yindọ e ko se gando Kunnudetọ Jehovah tọn lẹ go, e tindo ayihaawe dọ vlavo wẹ yé tindo nugbo lọ. Mahopọnna ayihaawe tintindo etọn, e yigbe nado plọn Biblu hẹ Kunnudetọ he dla ẹ pọ́n lọ. Etẹwutu? Na e jlo na dohia dọ Kunnudetọ lẹ ma to nugbo dọ wutu!
To madẹnmẹ, e plọn dọ kọndopọ mawé tọn he e to tintindo hẹ yọnnu voovo awe ma hẹn homẹ Jiwheyẹwhe tọn hùn gba. (1 Kọlintinu lẹ 6:9, 10) To oplọn awe poun godo, e wleawuna adọgbigbo lọ nado doalọtena kọndopọ etọn hẹ yọnnu lọ lẹ. E sọ jẹ opli Klistiani tọn lẹ yì ji to Plitẹnhọ Ahọluduta tọn mẹ. Ṣigba ehe yin whlepọn devo.
Cleveland ko tlọ̀ ede do bọlu-hogbẹ́ lẹdo etọn tọn mẹ sisosiso, podọ bọlu-hihò to aliglọnna opli yìyì etọn. Etẹwẹ e na wà? Mahopọnna kọgbidinamẹ sinsinyẹn sọn bọlu-hotọgbẹ́ etọn lẹ, ogán yetọn, po họntọn lẹ po dè, Cleveland basi dide nado tọ́n sọn bọlu-hogbẹ́ lọ mẹ. Mọwẹ, Ohó Jiwheyẹwhe tọn jẹ huhlọn tindo ji, bo yinuwadeji to aliho dagbe mẹ!
Huhlọn Ohó Jiwheyẹwhe tọn sọawuhia whladopo dogọ to whenuena Cleveland jẹ oyọnẹn Biblu tọn má hẹ mẹdevo lẹ ji. (Owalọ lẹ 1:8) Taidi kọdetọn de, awe to mẹhe e nọ hò bọlu hẹ dai lẹ mẹ jẹ opli Kunnudetọ Jehovah tọn lẹ tọn yì ji. To godo mẹ, Cleveland pegan nado lẹzun wẹnlatọ wẹndagbe lọ tọn de, podọ e nọ mọ ayajẹ susu to lizọnyizọn lọ mẹ, bo to Ohó Jiwheyẹwhe tọn yí do gọalọna mẹdevo lẹ.
Na huhlọn Ohó Jiwheyẹwhe tọn to whinwhàn ẹn yinukọn dogọ wutu, Cleveland basi dohia klandowiwe etọn tọn hlan Jehovah gbọn baptẹm osin tọn dali bosọ yin nina lẹblanulọkẹyi lọ nado sẹ̀n taidi lizọnyizọnwatọ whenu-gigọ́ tọn de podọ taidi devizọnwatọ lizọnyizọnwiwa tọn de to agun lọ mẹ.
To Jamaïque podọ lẹdo aihọn pé, omẹ fọtọ́n susu wẹ ko wá plọn dọ, na nugbo tọn, Ohó Jiwheyẹwhe tọn “tin to ogbẹ̀, e do huhlọn.”
[Yẹdide otò tọn to weda 8]
JAMAÏQUE
[Asisa Yẹdide tọn]
Map and globe: Mountain High Maps® Copyright © 1997 Digital Wisdom, Inc.