Kanbiọ lẹ sọn Wehiatọ lẹ Dè

Nawẹ hùnwhẹ Oflin okú Klisti tọn dona nọ yin bibasi gbọzangbọzan sọ?

To whenuena Paulu to alọdlẹndo didoai hùnwhẹ Oflin okú Jesu tọn, e wlan dọmọ: “Whedepopenu he mì to akla he dù bosọ to kọfo he nù, mì to okú Oklunọ tọn lá, kaka e nado wá.” (1 Kọlintinu lẹ 11:25, 26, NW) Mẹdelẹ lẹndọ hùnwhẹ okú Klisti tọn dona nọ yin bibasi gbọzangbọzan, to linlẹn whlasusu tọn mẹ. Enẹwutu, yé nọ basi hùnwhẹ lọ gbọzangbọzan hugan whladopo to owhe mẹ. Be nuhe dọ Paulu te niyẹn ya?

E ko dibla pé owhe 2 000 todin sọn whenue gbọ́n Jesu ze Oflin okú etọn tọn dai. Enẹwutu, hùnwhẹ Oflin lọ tọn bibasi etlẹ yin whladopo to owhe mẹ zẹẹmẹdo dọ e ko yin bibasi gbọzangbọzan sọn owhe 33 W.M. gbọ́n. Etomọṣo, to lẹdo hodidọ 1 Kọlintinu lẹ 11:25, 26 tọn mẹ, Paulu ma to hodọdo lehe hùnwhẹ lọ dona nọ yin bibasi gbọzangbọzan do ji gba, ṣigba lehe hùnwhẹ Oflin lọ tọn dona nọ yin bibasi do. To Glẹki dowhenu tọn mẹ, e ma yí hogbe lọ pol·laʹkis zan gba, he zẹẹmẹdo “whlasusu” kavi “gbọzangbọzan.” Kakatimọ, e yí hogbe lọ ho·saʹkis zan, he zẹẹmẹdo “whedepopenu,” kavi “whelẹponu he.” Nuhe Paulu to didọ lọ wẹ: ‘Whelẹponu he mì to ehe wà, mì to okú Oklunọ tọn lá.’

Eyin mọwẹ, nawẹ hùnwhẹ Oflin okú Jesu tọn dona nọ yin bibasi gbọzangbọzan sọ lo? Nuhe sọgbe wẹ e yin nado basi hùnwhẹ lọ whladopo gee to owhe mẹ. Na nugbo tọn, oflin de wẹ e yin podọ hùnwhẹ oflin tọn lẹ nọ saba yin bibasi to whemẹwhemẹ. To yidogọmẹ, Jesu kú to azán hùnwhẹ Juwayi Juvi lẹ tọn gbè, he nọ yin bibasi whladopo to owhe mẹ. Po gbesisọ po, Paulu dlẹnalọdo Jesu taidi ‘Klisti juwayi mítọn,’ na okú avọ́sinsan Jesu tọn hùn aliho ogbẹ̀ tọn dote na Islaeli gbigbọmẹ tọn, kẹdẹdile avọ́sinsan Juwayi tintan lọ tọn whlá ogbẹ̀ viplọnji Islaelivi jọwamọ tọn lẹ to Egipti bo hùn aliho dote na akọta lọ nado yin tuntundote sọn kanlinmọgbenu do. (1 Kọlintinu lẹ 5:7; Galatianu lẹ 6:16) Kọndopọ ehe hẹ hùnwhẹ Juwayi whemẹwhemẹ Juvi lẹ tọn yin kunnudenu devo dọ hùnwhẹ Oflin okú Jesu tọn dona nọ yin bibasi whladopo gee to owhe mẹ.

Humọ, Paulu blá okú Jesu tọn dopọ hẹ hùnwhẹ whemẹwhemẹ Juvi lẹ tọn devo, yèdọ Azán Ovẹsè tọn. To Heblu lẹ 9:25, 26, mí hia dọmọ: “Na e masọ yin dọ [Jesu] nido to ede yí do to avọ́ sán whẹwhẹ gba, dile yẹwhenọ daho lẹ nọ biọ fiwiwe mẹ do to whemẹwhemẹ, [to Azán Ovẹsè tọn gbè] po ohùn mẹdevo tọn po to alọ mẹ gba; . . . ṣigba dinvie e sọawuhia whladopo to aihọn pòdo nado de ylando sẹ gbọn avọ́sinsan ede tọn dali.” To whenuena e yindọ avọ́sinsan Jesu tọn diọ avọ́sinsan whemẹwhemẹ Azán Ovẹsè tọn lọ, hùnwhẹ Oflin okú etọn tọn nọ yin bibasi po gbesisọ po to whemẹwhemẹ. Whẹwhinwhẹ́n Owe-wiwe tọn depope matin nado basi hùnwhẹ Oflin lọ tọn gbọzangbọzan hugan mọ gba.

To kọndopọmẹ hẹ ehe, whenuho-kàntọ John Laurence von Mosheim na linlin dọ Klistiani owhe kanweko awetọ tọn lẹ to Asia Pẹvi tindo aṣa lọ nado nọ basi hùnwhẹ Oflin okú Jesu tọn tọn “to azán wiẹnẹtọ osun tintan [Nisan] Juvi lẹ tọn gbè.” To owhe he bọdego lẹ mẹ wẹ e wá lẹzun aṣa to Mẹylọhodotọklisti mẹ nado nọ basi hùnwhẹ lọ gbọzangbọzan hugan whladopo to owhe mẹ.