Sinsẹ̀n Nugbo Kọ̀n Whẹndo de Dopọ

MARIA tindo owhe 13 to whenuena ewọ po nọviyọnnu etọn, Lucy po, sè ohó dogbọn Jehovah dali sọn hẹnnumẹ de dè. E sọ basi zẹẹmẹ todido Paladisi aigba ji tọn na yé. Nuhe yé sè fọnjlodotena yé sọmọ bọ yé hodo e yì Plitẹnhọ Ahọluduta tọn Kunnudetọ Jehovah tọn lẹ tọn mẹ. Nuplọnmẹ họnwun heyin nina to finẹ whàn Maria tlala. E gbọnvo pete na ṣọṣi he yé nọ yì, fie ohàn nọ saba yin jiji hugan te! To madẹnmẹ ovi lọ lẹ jẹ Biblu plọn ji hẹ Kunnudetọ Jehovah tọn de.

Mẹdaho yetọn Hugo, tindo ojlo to tamẹnuplọnmẹ po nuplọnmẹ nulẹ tin yededenu tọn po mẹ. E dọ dọ emi ma yise dọ Jiwheyẹwhe tin gba. Ṣigba to awhànzọ́n pinplọn etọn whenu, e hia owe lọ La vie: Comment est-elle apparue? Évolution ou création? a E mọ gblọndo kanbiọ he sinsẹ̀n devo depope ma sọgan na lẹ tọn. To awhànzọ́n pinplọn etọn fifo godo, e jẹ yise yọyọ etọn to Jiwheyẹwhe mẹ hẹn lodo ji gbọn Biblu pinplọn po opli lẹ yìyì hẹ nọviyọnnu etọn lẹ po dali. Maria po Lucy po yin bibaptizi to 1992, yèdọ owhe awe godo he yé sè nugbo lọ to tintan whenu, podọ mẹdaho yetọn yí baptẹm to owhe awe devo godo.

Nalete mẹjitọ yetọn lẹ gbẹ́ tẹdo aṣa Katoliki tọn lẹ go, bo ma tindo ojlo to nugbo lọ mẹ sọmọ. Dile etlẹ yindọ yé yiwanna jijọ dagbe po aṣọdido jlẹkaji jọja Kunnudetọ he ovi yetọn lẹ nọ basi oylọna wá whégbè lẹ tọn po, yé nọ pọ́n Kunnudetọ Jehovah tọn lẹ hlan taidi tukladomẹtọ lẹ. Humọ, to whenuena ovi lọ lẹ to hodọdo nuhe yé ko plọn to opli lẹ ji to núdùdù whenu, enẹ nọ fọ́n tlintlindo-dindin mẹjitọ yetọn lẹ tọn dote.

Etomọṣo, mẹjitọ lọ lẹ tindo ojlo to nuwiwa azé tọn lẹ mẹ. Otọ́ lọ yin ahànnumunọ bo nọ hò onọ̀ lọ. Whẹndo lọ tin to bẹbẹnu gbakija tọn mẹ. Taidi kọdetọn ahàn-nùnù otọ́ lọ tọn, e yí osẹ awe zan to ganpamẹ. To whenuena e tin to ganpamẹ, e jẹ Biblu hia ji. Dile e to hihia ẹ, e doayi hogbe Jesu tọn lẹ go gando ohia azán godo tọn lẹ go. Ehe fọ́n kanbiọ susu dote to ayiha otọ́ lọ po onọ̀ lọ po tọn mẹ bọ yé yì Plitẹnhọ Ahọluduta tọn mẹ bosọ kẹalọyi plọnmẹ Biblu whégbè tọn. To nugbo lọ pinplọn godo, yé bẹ owe he yé tindo do azé ji lẹpo kọnyingbe bo mọ kọgbọ sọn mẹgbeyinyan aovi lẹ tọn si gbọn awhádido ylọ oyín Jehovah tọn dali. Yé jẹ diọdo ayidego tọn lẹ basi ji to gbẹtọ-yinyin yetọn lẹ mẹ.

Be hiẹ sọgan yí nukun homẹ tọn do pọ́n lehe e hẹn homẹhun Maria po Lucy po do sọ nado mọ bọ mẹjitọ yetọn lẹ to yinyin bibaptizi gbọn Hugo dali to plidopọ agbegbe tọn de ji to Bolivie to 1999 ya? Nudi owhe ṣinẹnẹ delẹ ko juwayi sọn whenue gbọ́n Maria po Lucy po sè ohó dogbọn Jehovah po opagbe etọn lẹ po dali to tintan whenu. To pọmẹ hẹ Hugo, yé tin to lizọnyizọn whenu-gigọ́ tọn mẹ todin. Lehe homẹ yetọn hùn dọ sinsẹ̀n-bibasi nugbo hẹn pọninọ wá whẹndo yetọn mẹ do sọ!

[Nudọnamẹ Odò Tọn]