Be Hiẹ Flin Ya?

Be hiẹ ko duvivi zinjẹgbonu agọe Atọ̀họ̀-Nuhihọ́ Lọ Tọn lẹ hihia tọn ya? Eyọn, pọ́n vlavo eyin hiẹ sọgan na gblọndo na kanbiọ he bọdego helẹ:

• Aliho tẹlẹ mẹ wẹ Luti yin apajlẹ dagbe te?

E yin apajlẹ dagbe to owanyi etọn na Jehovah mẹ, to owanyi nugbo tọn etọn hlan Naomi mẹ, podọ to jẹhẹnu azọ́n sinsinyẹn wiwà po whiwhẹ po tọn didohia mẹ. Abajọ, gbẹtọ lẹ pọ́n ẹn hlan taidi “yọnnu walọ dagbenọ de.” (Luti 3:11)—15/4, weda 23-6.

• Nawẹ mí wagbọn do yọnẹn dọ Jehovah nọ hò gbẹtọ paa lẹ tọn pọ́n?

E dọna Islaelivi, he ko yin hunylando to Egipti lẹ, ma nado ylanhùn do agbátọnọ lẹ go. (Eksọdusi 22:21-24) Jesu, he hodo apajlẹ Otọ́ etọn tọn, do ojlo nujọnu tọn hia to gbẹtọ paa lẹ mẹ, bo ṣinyan sunnu ‘he ma sewé bosọ yin gbẹtọ paa lẹ’ taidi apọsteli etọn lẹ. (Owalọ lẹ 4:13; Matiu 9:36) Mí sọgan hodo apajlẹ Jiwheyẹwhe tọn gbọn mẹdevo lẹ, taidi jọja lẹ tọn hihopọn dali.—15/4, weda 28-31.

• Nawẹ mí sọgan deji dọ Jehovah nọ doayi nuhe mí wà lẹ go gbọn?

Kandai Biblu tọn lẹ dohia dọ Jehovah nọ doayi nuhe gbẹtọ lẹ wadotana go. E doayi avọ́sinsan Abẹli tọn go, bosọ nọ doayi ‘avọ́sinsan pipà tọn, heyin sinsẹ́n nùflo’ mílọsu tọn lẹ tọn go ga. (Heblu lẹ 13:15) Jehovah yọnẹn dọ Enọku dovivẹnu taun nado hẹn homẹ emitọn hùn gbọn gbẹzan dagbe, wiwe de zinzan dali. Podọ Jiwheyẹwhe doayi lehe asuṣiọsi Zalefatinu he mayin Islaelivi de má núdùdù vude he e tindo hẹ yẹwhegán Elija do go. Jehovah sọ nọ doayi nuwiwa yise tọn mítọn lẹ go ga.—1/5, weda 28-31.

• Naegbọn e sọgan yin didọ dọ to Pẹntikọsti owhe 33 W.M. godo, Ju he lẹzun Klistiani lẹ dona basi klandowiwe mẹdetiti tọn hlan Jiwheyẹwhe?

To owhe 1513 J.W.M., Islaelivi hohowhenu tọn lẹ biọ haṣinṣan alẹnu tọn de mẹ hẹ Jehovah. (Eksọdusi 19:3-8) Sọn ojlẹ enẹ mẹ sọyi, Ju lẹ nọ yin jiji do akọta klandowiwe enẹ mẹ to alẹnu Osẹ́n tọn glọ. Ṣigba Jehovah de alẹnu Osẹ́n tọn lọ sẹ gbọn okú Klisti tọn gblamẹ to owhe 33 W.M. (Kọlọsinu lẹ 2:14) Enẹgodo, Ju he jlo na sẹ̀n Jiwheyẹwhe po alọkẹyi po lẹ dona klan yede do wiwe hlan ẹn bo yin bibaptizi to oyín Jesu Klisti tọn mẹ.—15/5, weda 30-1.

• Be nuwhẹ́nwan-mimẹ̀ tindo otẹn de to sinsẹ̀n-bibasi nugbo mẹ to egbehe ya?

Yizan nuwhẹ́nwan tọn yin apadewhe sinsẹ̀n-bibasi nugbo tọn to Islaeli hohowhenu tọn mẹ. (Eksọdusi 30:37, 38; Levitiku 16:12, 13) Ṣigba alẹnu Osẹ́n tọn, gọna yizan nuwhẹ́nwan tọn, wá opodo po okú Klisti tọn po. Klistiani lẹ sọgan de nado yí nuwhẹ́nwan zan na lẹndai he mayin sinsẹ̀n tọn lẹ, ṣigba e mayin apadewhe sinsẹ̀n-bibasi nugbo tọn to egbehe. Numọtolanmẹ mẹdevo lẹ tọn sọ dona yin hihopọn ga ma nado hẹn yé dahli.—1/6, weda 28-30.

• Linlin agọe tọn tẹlẹ wẹ ko whàn mẹsusu nado vọ́ nulẹnpọndo nugbo lọ ji dọ Jesu nọ̀ aigba ji pọ́n?

Nususu ko yin didọ gando apotin de, yèdọ apotin he mẹ ohú mẹkuku lẹ tọn nọ yin bibẹdo, heyin mimọ to Islaeli go. E taidi apotin owhe kanweko tintan whenu tọn de, podọ nukinkan de tin to e go he dọmọ: “Jakobu, visunnu Josẹfu tọn, nọvisunnu Jesu tọn.” Mẹdelẹ pọ́n ehe hlan taidi “kunnudenu whenuho-kinkàn dòkunkun tọn he ko dẹn-to-aimẹ hugan he ma wá sọn Biblu mẹ” he dohia dọ Jesu nọ̀ aigba ji pọ́n.—15/6, weda 3-4.

• Nawẹ gbẹtọ nọ plọn nado do owanyi hia gbọn?

Sọn apajlẹ po azọ́nplọnmẹ mẹjitọ yetọn lẹ tọn po mẹ wẹ gbẹtọ lẹ nọ plọn sọn jẹnukọn nado do owanyi hia. Eyin asu po asi po nọ do owanyi hia bo nọ na sisi yede, ovi lẹ sọgan plọn nado do owanyi hia. (Efesunu lẹ 5:28; Titu 2:4) Eyin mẹde ma tlẹ wá sọn whẹndo he nọ do owanyi hia de mẹ, e sọgan plọn nado yiwannamẹ gbọn alọkikẹyi anademẹ he taidi otọ́ nkọtọn Jehovah tọn, alọgọ gbigbọ wiwe tọn mimọyi, po alemimọyi sọn godonọnamẹ zohunhunnọ mẹmẹsunnu-yinyin Klistiani tọn po dali.—1/7, weda 4-7.

• Mẹnu wẹ Eusèbe yin, podọ etẹwẹ mí sọgan plọn sọn gbẹzan etọn mẹ?

Eusèbe yin whenuho-kàntọ fliflimẹ tọn de he dotana owe bladopọ-ao tọn lọ he hosọ etọn yin Histoire de l’Église chrétienne (Glẹnsigbe) to owhe 324 W.M. Dile etlẹ yindọ e yise dọ Otọ́ lọ ko tin jẹnukọnna Ovi lọ, Eusèbe kẹalọyi pọndohlan he gbọnvo de to opli Nicée tọn ji. E họnwun dọ e gbẹ́ nubiọtomẹsi Jesu tọn dai dọ hodotọ Etọn lẹ ‘ma dona yin apadewhe aihọn tọn.’ (Johanu 17:16)—15/7, weda 29-31.

• Be pọndohlan Jehovah tọn gando yọnnu-bibẹpli go ko diọ wẹ ya?

Lala, Jehovah ma ko diọ pọndohlan etọn gando yọnnu-bibẹpli go gba. (Malaki 3:6) Tito Jiwheyẹwhe tọn na sunnu tintan lọ wẹ yindọ e ni ‘tẹdo asi etọn go’ bo lẹzun agbasalan dopo hẹ ẹ. (Gẹnẹsisi 2:24) Jesu dọ dọ mẹhe gbẹ́ asi etọn dai bo vọ́ alọwle bọ e mayin na galilọ wutu deayọ. (Matiu 19:4-6, 9) Alọkikẹyi yọnnu-bibẹpli gbọn Jehovah dali doalọte to agun Klistiani tọn didoai whenu.—1/8, weda 28.