E Yiwanna Homẹdagbe

MILTON G. HENSCHEL, heyin dopo to Hagbẹ Anademẹtọ Kunnudetọ Jehovah tọn lẹ tọn mẹ na ojlẹ dindẹn, dotana gbẹzan aigba ji tọn etọn to samedi, 22 mars 2003. E yin owhe 82 mẹvi.

Milton Henschel kọnawudopọ hẹ azọ́nwatọ tatọ́-tẹnnọ Kunnudetọ Jehovah tọn lẹ tọn to whenue e gbẹ́ pò to jọja, bo sẹ̀n po nugbonọ-yinyin po na nuhe hugan owhe 60. E yawu yin yinyọnẹn na wuntuntun etọn po ojlo ahundopo tọn tintindo na azọ́n yẹwhehodidọ tọn po. To 1939, e lẹzun wekantọ N. H. Knorr, heyin nugopọntọ wezíntẹn Kunnudetọ Jehovah tọn lẹ tọn to Brooklyn to whenẹnu tọn. To whenuena Mẹmẹsunnu Knorr jẹ anadena Kunnudetọ lẹ ji lẹdo aihọn pé to 1942, e zindonukọn nado to Mẹmẹsunnu Henschel yizan taidi alọgọtọ etọn. Mẹmẹsunnu Henschel wlealọ hẹ Lucille Bennett to 1956, bọ yé sọ má ayajẹ po avùnnukundiọsọmẹ gbẹzan tọn lẹ po dopọ.

Mẹmẹsunnu Henschel wazọ́n afọsu-afọsi hẹ Mẹmẹsunnu Knorr kaka Knorr do kú to 1977. Mẹmẹsunnu Henschel he nọ saba tin to adà Mẹmẹsunnu Knorr tọn mẹ zìn gbejizọnlin yì otò he hugan 150 mẹ, bo dla Kunnudetọ Jehovah tọn lẹ pọ́n lẹdo aihọn pé bosọ na tuli yé, titengbe mẹdehlan lẹ po azọ́nwatọ Bẹtẹli tọn lẹ po. Gbejizọnlin mọnkọtọn lẹ nọ sinyẹn taun, bo tlẹ nọ tindo owù to whedelẹnu. To 1963, dile Mẹmẹsunnu Henschel to plidopọ de dla pọ́n to Libéria, e yin homẹkẹndo sinsinyẹn na e gbẹ́ nado tindo mahẹ to hunwhẹ tonudidọ tọn de mẹ wutu.a Po adọgbigbo po, Mẹmẹsunnu Henschel lẹkọwa Libéria to osun vude godo poun nado dọho hẹ togán otò lọ tọn bo dín mẹdekannujẹ sinsẹ̀n-bibasi tọn dogọ na Kunnudetọ Jehovah tọn he tin to finẹ lẹ.

To nukunpipedo nuhahun po whẹho sinsinyẹn lẹ po go mẹ, Mẹmẹsunnu Henschel yin yinyọnẹn taidi nuyọnẹntọ, mẹhe nọ kẹalọyi ayinamẹ, podọ lẹnpọn dagbenọ. Hagbẹ etọn lẹ yọ́n pinpẹn titojininọ, jlẹkajininọ, po jijọ aslan-yinyin tọn etọn po taun. Na e nọ flinnu taun wutu, e nọ hẹn homẹhun mẹdehlan susu lẹdo aihọn pé gbọn yinkọ yetọn finflin po awubibọ po, hogbe dopo kavi awe didọ to jonọgbè yetọn mẹ, gọna aslan-yinyin etọn—he e nọ dọ po nukiko yẹsẹ po dali.

Mika 6:8 flin mí dọ Jehovah Jiwheyẹwhe jlo dọ mí ‘ni yiwanna homẹdagbe.’ Milton Henschel na yin finflin na apajlẹ dagbe he e zedai to ehe mẹ. Mahopọnna azọngban susu etọn lẹ, e yọ́n dọnsẹpọ, yin jlẹkajinọ, bo jọmẹ. E yiwanna nado dọ, “Eyin a ma yọ́n lehe a na didẹ whẹho de do, flindọ nuyiwa homẹdagbe tọn wẹ nuhe sọgbe lọ.” Dile mí to aluẹmẹ na okú mẹmẹsunnu yiwanna ehe tọn, mí jaya dọ e doakọnnanu po nugbonọ-yinyin po kakajẹ opodo, bo nasọ mọ ahọsumẹ etọn yí, enẹwẹ “jẹgbakun ogbẹ̀ tọn.”—Osọhia 2:10.

[Nudọnamẹ Odò Tọn]

[Yẹdide to weda 31]

M. G. Henschel po N. H. Knorr po

[Yẹdide to weda 31]

Hẹ asi etọn, Lucille