Aga Hihẹ́ Yì Lopo Saba Tọn Ji

LOPO Saba tọn he tin to gandudu Allemagne tọn glọ ko yinuwa dai taidi bẹtẹn de na jaguda he nọ to gblannu lẹ dín pé gbọ̀n Ohù Caraïbe tọn ji lẹ. To egbehe, lopo pẹvi he tin to kilomẹtlu 240 do whèzẹtẹn-waji Porto Rico tọn ehe bẹ tòvi 1 600 hẹn, he mẹ Kunnudetọ Jehovah tọn 5 tin te. Ṣigba, nuhe họakuẹ tlala hugan gblannu lẹ wẹ devizọnwatọ adọgbotọ ehelẹ to dindin. Yé yí sọwhiwhe do to ‘mẹhe tindo ahunjijlọ he jẹna ogbẹ̀ madopodo lẹ’ dín.—Owalọ lẹ 13:48.

Wẹndagbe Ahọluduta Jiwheyẹwhe tọn jẹ lopo enẹ ji whla tintan to 22 juin 1952, to whenuena tọjihun mẹtlu 18 tọn lọ Sibia he Kunnudetọ Jehovah tọn lẹ to anadena, wá glin do huto Saba tọn. (Matiu 24:14) Gust Maki po Stanley Carter po he yin mẹdehlan lẹ hẹ́ aga gbọ̀n aliho he pèkán etọn lán to 500 ji de yì Bottom, he yin tatọ́-tònọ Saba tọn.a Na owhe kanweko susu lẹ, aliho bibó dopo ehe wẹ jẹ tòmẹnu lopo lọ tọn lẹ dè.

Annuaire des Témoins de Jéhovah 1966 tọn mẹ wẹ kandai tintan lọ sọawuhia te gando azọ́n kunnudide Klistiani tọn go to Saba. Sọgbe hẹ kandai enẹ, Kunnudetọ dopo gee wẹ tin to lopo lọ ji. To nukọnmẹ, whẹndo de wá sọn Canada bo yí owhe susu zan to finẹ nado dọyẹwheho wẹndagbe lọ tọn. To agọe, Russel po Kathy po he yin asu po asi po mẹhomẹ de sọn États-Unis, yì Saba bo tindo mahẹ to yẹwhehodidọ mẹ to finẹ. Mì gbọ mí ni sè otàn yetọn.

Dlapọn Bibasi Yì Saba

Yẹn po asi ṣie po dó agahun wá Ronald dè, yèdọ omẹ dopo gee he yin Kunnudetọ to lopo lọ ji to owhe 1990 lẹ gblamẹ. Ronald wá pé mí to agahun-jlẹtẹn. Homẹ hùn in taun na núdùdù panu mẹ tọn he mí hẹnwa na ẹn lọ, na jinukun de ma nọ yin sisà to lopo lọ ji. Mí biọ agbànbẹhun pẹvi de mẹ bo hẹji gbọ̀n Lẹdo Osó tọn mẹ pànta aganu osó miyọnnọ he ko ṣí lọ tọn.

Mí nọte to gbétatò Hell’s Gate tọn mẹ, bọ Ronald pọ́n owhlẹ nudọnamẹ tòhomẹ tọn ji nado hẹn ẹn diun dọ wema oylọ-basinamẹ tọn na togunmẹho dimanche tọn gbẹsọ tin to e ji. Homẹ mítọn hùn nado mọdọ e gbẹ́ tin to finẹ. E lẹkọ biọ agbànbẹhun lọ mẹ bọ mí zindonukọn kakajẹ gbétatò lopo lọ tọn he klohugan lọ mẹ, enẹ wẹ Windwardside. Dile yinkọ etọn dohia do to Glẹnsigbe mẹ, gbétatò whanpẹnọ ehe tin to adà lopo lọ tọn he ji jẹhọn nọ wá sọn mẹ, bo yí mẹtlu 400 do yiaga hugan jiyiyi ohù tọn. To whenuena ohún mítọn biọ aliho he yì owhé Ronald tọn gbè, mí mọ ohia whanpẹnọ de to họngbo owhé lọ tọn ji he do e hia taidi Plitẹnhọ Ahọluduta Kunnudetọ Jehovah tọn lẹ tọn.

Yẹn fọ́n kanbiọ he hẹn mí wá lọ dote to núdùdù whèmẹ tọn whenu, “Nawẹ a wá lẹzun wẹnlatọ Ahọluduta tọn de to Saba gbọn?”

Ronald dọmọ: “To whenuena họgbigbá alahọ Kunnudetọ Jehovah tọn lẹ tọn wá vivọnu to Porto Rico to 1993, yẹn po asi ṣie po tindo ojlo nado zindonukọn to azọ́ndenamẹ tògodo tọn de mẹ. Jẹnukọnna enẹ, mí ko basi dlapọn de wá Saba pọ́n, hẹ asu po asi po gbehosọnalitọ de bo mọdọ gbẹtọ 1 400 wẹ tin to lopo enẹ ji bọ Kunnudetọ depope ma tin to yé mẹ. Enẹwutu, mí dọho hẹ Wedegbẹ́ Alahọ Porto Rico tọn gando tẹnsisẹ wáfi mítọn go.

“Tito lẹpo yì ganji bọ mí yin gbeyina to godo mẹ nado sẹtẹn. E blawu dọ to owhe awe godo asi ṣie bẹ azọ̀n sinsinyẹn de, bọ mí lẹkọyi Californie. Yẹn lẹkọwa Saba to okú etọn godo. A mọ, n’ma nọ jlo na wà nude do agbòte.”

Kunnudide Whédegbè jẹ Whédegbè Tọn to Saba

Agbàji owhé hoho Ronald tọn sọ nọ yin yiyizan taidi Plitẹnhọ Ahọluduta tọn de ga.b To whenuena mí to núdùdù afọnnu tọn dù bo to awuwle nado yì kunnudegbe, jikun jẹ jijà ji do adohọsa he ma tindo họta lọ mẹ. To núdùdù lọ godo, mí tọ́nyi nado dekunnu sọn whédegbè jẹ whédegbè to gbétatò lọ mẹ mahopọnna aslọ he súyu lẹ. Ronald nọ dọnudo whétọ lẹ dopodopo po yinkọ yetọn po to ohọ̀n lẹ nukọn. Hodọdopọ mítọn nọ sinai do nujijọ agọe tọn he wá aimẹ to lẹdo lọ mẹ de ji. Suhugan gbẹtọ lẹ tọn yọ́n Ronald ganji bosọ jẹakọhẹ azọ́n etọn, podọ susu yetọn nọ kẹalọyi owe sinai do Biblu ji lẹ po homẹhunhun po.

Kandai mẹhe do ojlo hia to owẹ̀n Ahọluduta lọ tọn mẹ lẹ tọn bibasi sọgan vẹawu na mẹhe ma jẹakọhẹ mẹhe nọ nọ̀ gbétatò lọ mẹ lẹ ganji. Etẹwutu? Na “osẹ́n biọ dọ yè ni sá osẹ̀n dopolọ do owhé lẹpo” wẹ Ronald dọ. Yẹn doayi ehe go to whenuena yẹn yìnnukun gbọn lẹdo lọ mẹ bo mọdọ owhé he tin to Saba lẹpo wẹ yin wéwé bo tindo họta vẹẹ.

To hodọdopọ Biblu tọn mítọn fifo godo, mí nọ basi oylọna whétọ lọ nado wá togunmẹho Biblu tọn he na yin didọ to dimanche to Plitẹnhọ Ahọluduta tọn mẹ lọ tẹnmẹ. Ronald nọ dọ togunmẹho to osẹ lẹpo mẹ eyin e tin to Saba. Plọnmẹ Biblu 17 wẹ to yinyin anadena to alọnu din to Saba. Omẹ 20 wẹ wá Oflin okú Klisti tọn to 2004. Podọ eyin sọha lọ tlẹ taidi nuhe whè, dopo to kanweko ji sọha tòvi Saba tọn lẹpo tọn wẹ ehe yin!

Na nugbo tọn, Kunnudetọ Jehovah tọn lẹ ko dovivẹnu vẹkuvẹku nado jẹ gbẹtọ susu dè dile e sọgan yọnbasi do po owẹ̀n gbẹwhlẹngán tọn Jiwheyẹwhe tọn po. Etlẹ yin to lopo pẹvi de ji taidi Saba kavi to ageklo blebu ji, Kunnudetọ Jehovah tọn lẹ yí nugbonọ-yinyin do to azọ́ndenamẹ lọ hẹndi nado “hẹn akọta lẹpo zun nuplọntọ.”—Matiu 28:19.

E blawu dọ dlapọn mítọn wá vivọnu. To whenuena mí to agahun mítọn mẹ biọ, mí yí alọ do dọ e yì whedevonu. Mí na nọ flin dlapọn he mí basi yì Saba po whenu he mí yizan nado hẹji yì gbétatò Bottom tọn ji po to whepoponu!

[Nudọnamẹ Odò Tọn]

[Yẹdide otò tọn to weda 10]

(Nado mọ nukinkan lọ to gigọ́ mẹ, pọ́n zinjẹgbonu)

PORTO RICO

[Asisa Yẹdide tọn to weda 10]

Background: www.sabatourism.com