Be Nuhe Mí Na Plọn lẹ Sù Gbau Wẹ Ya?

Mẹdehlan de po asi etọn po sinai to huto de to Whèyihọ Aflika tọn bo to osun he to sisẹ́ to aga lọ pọ́n. “Nawẹ nuhe gbẹtọ yọnẹn gando osun go sù sọ, podọ etẹlẹ wẹ na gbẹ́ yin yinyọnẹn gandego?” wẹ asu lọ kanse.

Asi etọn yigbe dọ: “Lehe e na yọ́n do sọ eyin mí sọgan pọ́n aigba lọsu dole—obá tẹ mẹ wẹ nuhe mí yọnẹn gbloada jẹ to aigba ji, podọ nawẹ nuhe mí na gbẹsọ plọn lẹ sù sọ? Pọ́n bo! E ma yin dọ aigba lọ kẹdẹ wẹ to yìyì lẹdo owhè gba ṣigba planẹti he pò to agblò etọn mẹ lẹpo wẹ to lilẹdo e. Ehe zẹẹmẹdo dọ mí sọgan nọma tin to fie mí te ehe pẹpẹ to wẹkẹ lọ mẹ gbede ba. Na nugbo tọn, owhè po sunwhlẹvu he mí jẹakọ hẹ lẹ po wẹ nọ gọalọna mí nado yọ́n fie mí te to wẹkẹ lọ mẹ. Mí tindo oyọnẹn susu gando onú delẹ go, ṣigba to linlẹn de mẹ, mí ma tlẹ yọ́n fie mí te lọsu!”

LINLẸN enẹlẹ do nugbo dodonu tọn delẹ hia. E taidi dọ nususu wẹ tin he mí sọgan plọn. Nugbo wẹ dọ dopodopo mítọn nọ plọn nuyọyọ lẹ egbesọegbesọ. Ṣigba, mahopọnna obá he mẹ mí ko plọnnu jẹ, e taidi dọ mí ma nọ penugo nado yawu plọn nuhe mí na jlo nado yọnẹn lẹpo dile mí na ko jlo do gba.

Na nugbo tọn, gbọnvona dọ gbẹtọ lẹ sọgan plọn nudọnamẹ yọyọ lẹ, nugopipe yetọn nado bẹ nuhe yé yọnẹn lẹ pli do sẹdotẹnmẹ ko sọ jideji taun. Azọ́n nuyọnẹn wintinwintin tọn ko gọalọna gbẹtọ lẹ nado bẹ nuhe yé yọnẹn susu pli. Agbán ọdinatẹẹ tọn lẹ tindo nugopipe nusẹdo tọn lẹ todin sọmọ bọ hogbe lẹnunnuyọnẹn tọn yọyọ lẹ dona yin awuwlena nado basi zẹẹmẹ yetọn. Agbán CD-ROM tata sọgan hẹn nudọnamẹ susugege; nugopipe etọn nọ yin alọdlẹndo taidi 680 mégaoctets kavi humọ. Agbán DVD sọgan hẹn nudọnamẹ diblayi whla ṣinawe hú CD-ROM, podọ delẹ tlẹ sọ to yinyin awuwlena po nugopipe lọ po nado hẹnnu humọ.

Aliho he mẹ gbẹtọ nọ hẹn nudọnamẹ gbayipe te to egbehe dibla yin nude he zẹ̀ nukunnumọjẹnumẹ mítọn go. Awuyiya maṣinu wezinzin tọn dahodaho he nọ zín linlinwe, linlinnamẹwe, po owe lẹ po jẹgbonu lẹ tọn sẹhundaga. Mẹde sọgan mọ nudọnamẹ madosọha lẹ yí to Internet ji to nukunwhiwhe kleun de poun gblamẹ. To aliho ehe po devo lẹ po mẹ, nudọnamẹ lẹ to yinyin hinhẹn gbayipe po awuyiya po hugan nuhe mẹdepope sọgan hodo. Nudọnamẹ susugege ehe nọ yin yiyijlẹdo ohù go to whedelẹnu, na e gọ́ sọmọ bọ mí dona plọn nado linsin gbọ̀n e mẹ, bo tẹnpọn ma nado yì asá gbede. Na nudọnamẹ he tin-to-aimẹ lẹ sù taun wutu, mí tin to dandannu glọ nado basi nudide po sọwhiwhe po.

Whẹwhinwhẹ́n devo he wutu mí dona yí sọwhiwhe do basi nudide wẹ yindọ nudọnamẹ susugege he tin-to-aimẹ lẹ ma nọ yọn-na-yizan to whepoponu gba. Na nugbo tọn, delẹ to yé mẹ ma tlẹ jẹ na yinyọnẹn lọsu. Flin dọ oyọnẹn nọ dlẹnalọdo nudọnamẹ—vlavo dagbe kavi ylankan, mẹjlọdote tọn kavi mẹhẹngbọjọ tọn. Nado dọ̀n ninọmẹ lọ lẹ wlú dogọ, delẹ to nuhe mẹsusu nọ pọnhlan taidi nugbo lẹ mẹ ma sọgan yin jide-dego paali. Mẹnu wẹ sọgan hia whla nẹmu he hodidọ aṣẹpatọ nukundeji lẹ tọn lọsu nọ wá sọawuhia to godo mẹ nado yin lalo? Di apajlẹ, lẹnnupọndo tòwekantọ tòdaho Efesu hohowhenu tọn ji, he ayihaawe ma tin dọ mẹsusu nọ pọ́n ẹn hlan to otò lọ mẹ taidi ahọluzọnwatọ wesetọ de. E dọmọ: “Gbẹtọ tẹwẹ tin bo ma yọ́n le tòdaho Efesunu lẹ tọn yin Diana vodun-asi daho sẹ̀ntọ do, po boṣiọ he flẹ́ sọn [olọn] po tọn?” (Owalọ lẹ 19:35, 36) Dile etlẹ yindọ ehe taidi nuhe mẹlẹpo yọnẹn—bo ma tlẹ sọgan yin agọjẹdo, wẹ mẹsusu na dọ—lalo wẹ yin alọsọakọ́n lọ dọ boṣiọ lọ flẹ́ sọn olọn. Abajọ Biblu Wiwe lọ na avase Klistiani lẹ nado họ́ yede sọta ‘oyọnẹn he yè yí lalo do ylọ dọ mọ.’—1 Timoti 6:20.

Whẹwhinwhẹ́n titengbe he wutu mí dona yí sọwhiwhe do ṣinyankẹ́nna nudọnamẹ he yin zizedonukọnna mí lẹ wẹ yindọ ojlẹ gli de poun wẹ mí nọ nọgbẹ̀ na. Mahopọnna owhe he a tindo, onú susu wẹ tin he a na jlo nado dindona, ṣigba hiẹ lọsu yọnẹn dọ a ma na nọgbẹ̀ dẹn sọmọ nado wà ehe gba.

Be nuhahun tangan ehe na wá mọ pọngbọ to gbèdopo ya? Be adà nuplọnmẹ tọn de na wá tin he na hẹn ẹn yọnbasi nado nọgbẹ̀ kakadoi ya? Kavi be nuplọnmẹ mọnkọtọn ko tin todin wẹ ya? Eyin mọwẹ, be e na yọnbasi na mẹlẹpo nado duvivi etọn ya? Be ai de na họ́n to gbèdopo bọ nudọnamẹ he yin zizedonukọnnamẹ lẹpo na yin nugbo ya? Mẹdehlan asu po asi po he yin nùdego to bẹjẹeji ko mọ gblọndo pekọhẹnwanamẹ tọn hlan kanbiọ enẹlẹ, podọ hiẹ lọsu sọgan wàmọ ga. Jaale hia hosọ he bọdego, ehe na gọalọna we nado yọnẹn dọ e yọnbasi nado plọnnu kakadoi.