Kanbiọ lẹ sọn Wehiatọ lẹ Dè
Nawẹ mí dona mọnukunnujẹ hogbe Paulu tọn lẹ mẹ gbọn dọ asuṣiọsi de dona yin “yọnnu asu doponọ” nado sọgan mọ alọgọ agun Klistiani tọn yí?—1 Timoti 5:9.
To whenuena e yindọ asuṣiọsi de hodọ wẹ apọsteli Paulu te, e họnwun dọ hogbe lọ “yọnnu asu doponọ” dona dlẹnalọdo ninọmẹ he mẹ mẹlọ ko tin te dai whẹpo do wá lẹzun asuṣiọsi. Be ehe sọgan zẹẹmẹdo dọ whladopo gee wẹ asuṣiọsi lọ dona ko wlealọ pọ́n ya? Kavi be nuhe Paulu dọ lẹ sọgan sọ zẹẹmẹdo nudevo wẹ ya?a
Mẹdelẹ ko de linlẹn lọ tọ́n dọ asuṣiọsi he whladopo janwẹ yé ko wlealọ pọ́n lẹ hodọ wẹ Paulu te. Nugbo wẹ dọ to aṣa po lẹdo susu po mẹ, asuṣiọsi he ma vọ́ alọwle nọ yin pinpọnhlan taidi jijọ dagbenọ. Ṣigba, pọndohlan mọnkọtọn ma sọgbe hẹ nuhe Paulu dọ to wekanhlanmẹ etọn devo lẹ mẹ. Di apajlẹ, e hẹn ẹn họnwun na Klistiani Kọlinti tọn lẹ dọ dile etlẹ yindọ linlẹn ewọ lọsu tọn wẹ yindọ asuṣiọsi de na tindo ayajẹ hugan eyin e gbọṣi tlẹnmẹ, “e vò nado yin mẹwlealọna hlan mẹhe jlo e; to Oklunọ mẹ kẹdẹ.” (1 Kọlintinu lẹ 7:39, 40; Lomunu lẹ 7:2, 3) Humọ, to wekanhlanmẹ etọn mẹ hlan Timoti, Paulu dọmọ: “Yẹn jlo dọ yọpọ yọnnu [kavi asuṣiọsi jọja] lẹ ni wlealọ.” (1 Timoti 5:14) Gbọnmọ dali, eyin asuṣiọsi de basi dide nado vọ́ alọwle, mẹde ma na mọhodọdego.
Eyin mọ wẹ, nawẹ mí dona mọnukunnujẹ nuhe Paulu dọna Timoti mẹ gbọn? Wefọ ehe kẹdẹ mẹ wẹ hogbe lọ “yọnnu asu doponọ” sọawuhia te. To ogbè dowhenu tọn lọ mẹ, e zẹẹmẹdo “yọnnu sunnu dopo tọn” to paa mẹ. E jẹna ayidego dọ, hogbe ehe jlo na taidi dehe Paulu yizan whlasusu to wekanhlanmẹ etọn lẹ mẹ, yèdọ “asisunọ yọnnu dopo tọn,” kavi “sunnu yọnnu dopo tọn” to ogbè dowhenu tọn lọ mẹ. (1 Timoti 3:2, 12; Titu 1:6) Paulu yí hogbe godo tọn ehelẹ zan to whenuena e to jẹhẹnu he kọ̀n Klistiani nugopọntọ po devizọnwatọ lizọnyizọnwiwa tọn lẹ po dona jẹ lẹ slẹ. To lẹdo hodidọ enẹ tọn mẹ, zẹẹmẹ tintan hogbe lọ tọn wẹ yindọ whẹpo sunnu he ko wlealọ de na do pegan na azọngban lẹ to agun Klistiani tọn mẹ, e dona yin nugbonọ na asi etọn bo ma nasọ tindo ovlẹ depope to walọyizan-liho.b Eyin mọ wẹ whẹho lọ yin, hogbe he tin to 1 Timoti 5:9 mẹ lọ dona ko to alọdlẹndo nuagokun dopolọ: Whẹpo asuṣiọsi de na do mọ alọgọ agun tọn yí, e dona ko yin asi dejidego podọ mẹdezejotọ de he yin nugbonọ na asu etọn to gbẹwhenu etọn bo masọ dona tindo mọdọ depope to walọyizan-liho. Nubiọtomẹsi he Paulu slẹ bọdego lẹpo wẹ dohia dọ omẹ mọnkọtọn hodọ wẹ e te.—1 Timoti 5:10.
[Nudọnamẹ Odò Tọn]
a Aṣa lọ nado tindo asu susu to ojlẹ dopolọ mẹ ma yin alọkẹyi to omẹ Glẹki po Lomu po tọn lẹ ṣẹnṣẹn to ojlẹ apọsteli lọ tọn mẹ gba. Enẹwutu, e na vẹawu dọ Paulu ni kanwehlan Timoti gando aṣa enẹ go kavi gblewhẹdo mẹdepope he nọ tindo mahẹ to e mẹ.
b Na dogbapọn nuagokun ehe tọn, pọ́n Atọ̀họ̀-Nuhihọ́ Lọ Tọn 1er novembre 1996, weda 10, podọ “Kanbiọ lẹ sọn Wehiatọ lẹ Dè” to zinjẹgbonu 1er janvier 1982 [Flansegbe], weda 31.