Be Hiẹ Tindo Ayinamẹtọ de to Gbigbọ-Liho Ya?

UZIA lẹzun ahọlu ahọluduta hùwaji Juda tọn to jọja whenu to owhe 16 mẹvi-yinyin mẹ. E dugán na nuhe hugan owhe 50 sọn 829 jẹ 778 J.W.M. Sọn jọja whenu, Uzia “wà enẹ he yin jijlọ to nukun OKLUNỌ tọn lẹ mẹ.” Etẹwẹ yinuwadeji nado wà nuhe jlọ? Kandai whenuho tọn dọmọ: ‘Uzia sọ ze ede do nado nọ dín Jiwheyẹwhe to azán Zekalia tọn lẹ mẹ, mẹhe yin nuplọnmẹtọ to obu Jiwheyẹwhe nugbo lọ tọn mẹ: podọ dẹn sọle e dín OKLUNỌ, wẹ Jiwheyẹwhe hẹn ẹn nado duale.’—2 Otannugbo lẹ 26:1, 4, 5.

Gbọnvona kandai ehe to Biblu mẹ, mí ma yọ́n nususu gando Zekalia, he yin ayinamẹtọ ahọlu tọn go gba. Ṣogan, taidi ‘nuplọnmẹtọ to obu Jiwheyẹwhe nugbo lọ tọn mẹ,’ Zekalia tindo nuyiwadomẹji dagbe do ahọlu jọja lọ ji nado wà nuhe sọgbe. Owe lọ The Expositor’s Bible dọ dọ Zekalia yin “sunnu he tindo oyọnẹn Owe-wiwe tọn, bo tindo numimọ to gbigbọ-liho taun, bosọ penugo nado plọnmẹ nuhe e yọnẹn.” Weyọnẹntọ Biblu tọn de wá tadona kọ̀n gando Zekalia go dọmọ: “E jẹakọ hẹ dọdai lẹ taun bo . . . yin sunnu wuntuntunnọ, mẹdezejotọ, dodonọ; podọ, e taidi dọ, e nọ yinuwado Uzia ji taun.”

Nugbonọ-yinyin Uzia tọn hẹn dona susu wá na ẹn, podọ e ‘sù to huhlọn mẹ tlala’ na “Jiwheyẹwhe . . . gọalọna ẹn” wutu. Mọwẹ, kọdetọn dagbe etọn to vivẹnudido paa lẹ mẹ sinai do afọdidona aliho Jiwheyẹwhe tọn lẹ “to azán Zekalia tọn lẹ mẹ” po kọdetọn dagbe po ji. (2 Otannugbo lẹ 26:6-8) To whenuena Uzia ko lẹzun kọdetọn dagbenọ godo, e jo nuplọnmẹ ayinamẹtọ etọn, Zekalia tọn lẹ do. Uzia “ze ayiha etọn daga mọ bọ ewọ yí gbigble do wà, ewọ sọ waylando do OKLUNỌ.” Taidi kọdetọn nuyiwa mẹmasi tọn de, e yin hihò po awutuzọ̀n he hiọawu de po, ehe hẹn ẹn zun madogánnọ sọmọ bọ e ma sọgan hẹn azọngban ahọlu tọn etọn lẹ di to gigọ́ mẹ ba.—2 Otannugbo lẹ 26:16-21.

Be hiẹ tindo mẹde he sọgan yin yiylọdọ nuplọnmẹtọ kavi ayinamẹtọ de, he nọ yinuwado jiwe nado “dín Jiwheyẹwhe” ya? Ehe sọgan yinmọ, vlavo hiẹ yin jọja, mẹho, sunnu kavi yọnnu. Wlebòna ayinamẹtọ mọnkọtọn, na ayinamẹ etọn sọgan gọalọna we nado zindonukọn to nuhe jlọ to nukun Jehovah tọn mẹ lẹ wiwà mẹ. Dotoaina Klistiani he whèwhín ehe bo yí nukun nujọnu tọn do pọ́n ayinamẹ etọn lẹ. Ma dovọ́na ohó nuyọnẹn ‘nuplọnmẹtọ to obu Jiwheyẹwhe nugbo lọ tọn mẹ’ mọnkọtọn tọn gbede blo.—Howhinwhẹn lẹ 1:5; 12:15; 19:20.