Mì Gbọ Alọ Mìtọn lẹ Ni Yin Huhlọnnọ
“Mì gbọ alọ mìtọn lẹ ni yin huhlọnnọ; mì [he] sè ohó helẹ to azán helẹ mẹ sọn onù yẹwhegán lẹ lọ tọn mẹ.”—ZEKALIA 8:9.
1, 2. Naegbọn owe Hagai po Zekalia po tọn lẹ jẹna ayidonugo mítọn?
DỌDAI Hagai po Zekalia po tọn lẹ ko yin kinkàn sọn nudi owhe 2 500 die wayi, ṣogan ayihaawe ma tin dọ yé gando gbẹzan towe go. Kandai Biblu tọn he tin to owe awe ehelẹ mẹ lẹ ma yin whenuho tata gba. Yé yin apadewhe ‘onú lẹpo he yè wlan dai na oplọn mítọn’ tọn. (Lomunu lẹ 15:4) Suhugan nuhe mí hia to yé mẹ lẹ tọn nọ hẹn mí lẹnnupọndo ninọmẹ tangan delẹ ji he ko to hẹndi mọyi sọn whenue gbọ́n Ahọluduta lọ yin didoai to olọn mẹ to 1914.
2 To whenuena apọsteli Paulu to alọdlẹndo nujijọ po ninọmẹ he omẹ Jiwheyẹwhe tọn lẹ pehẹ to hohowhenu lẹ po, e dọmọ: “Onú he lẹpo jọ hlan yé gbọn ali ohia tọn dali: yè sọ wlan yé na nukọnamẹ mítọn, mẹhe ji opodo whenu tọn ja.” (1 Kọlintinu lẹ 10:11) Enẹwutu, hiẹ sọgan kanse dọ: ‘Nuhọakuẹ tẹwẹ owe Hagai po Zekalia po tọn lẹ tindo to azán mítọn gbè?’
3. Etẹ ji wẹ Hagai po Zekalia po dọhodo?
3 Dile hosọ he jẹnukọn dohia do, dọdai Hagai po Zekalia po tọn lẹ gando ojlẹ lọ go whenuena Ju lẹ lẹkọyi aigba he Jiwheyẹwhe na yé lọ ji to tundote yetọn sọn kanlinmọgbenu Babilọni tọn godo. Yẹwhegán awe lọ lẹ dọhodo vivọgbá tẹmpli lọ tọn ji. Ju lẹ do dodonu tẹmpli lọ tọn ai to 536 J.W.M. Dile etlẹ yindọ Ju mẹhomẹ delẹ ze ayidonugo do nuhe ko jọ wayi lẹ ji, suhugan gbẹtọ lẹ tọn to “abobo dó na ayajẹ.” Ṣigba, na nugbo tọn, nujijọ he tlẹ yin titengbe humọ de ko jọ to ojlẹ mítọn mẹ. Gbọnna?—Ẹzla 3:3-13.
4. Etẹwẹ jọ to ojlẹ vude to Wẹkẹ-Whàn I godo?
4 Ojlẹ vude to Wẹkẹ-Whàn I godo, mẹyiamisisadode Jehovah tọn lẹ yin tuntundote sọn kanlinmọgbenu Babilọni Daho lọ tọn. Enẹ yin ohia titengbe de dọ yé tindo godonọnamẹ Jehovah tọn. Jẹnukọnna enẹ, e taidi dọ sinsẹ̀ngán lẹ po hagbẹ yetọn tòhódọtọ lẹ po ko doalọtena azọ́n yẹwhehodidọ po mẹpinplọn gbangba tọn po he Biblu Plọntọ lẹ to wiwà. (Ẹzla 4:8, 13, 21-24) Ṣigba, Jehovah Jiwheyẹwhe de aliglọnnamẹnu lẹpo sẹ̀ sọn azọ́n yẹwhehodidọ po mẹhẹnzun devi tọn po ji. Azọ́n Ahọluduta lọ tọn ko to nukọnzindo sọn 1919 gbọ́n bọ nudepope ma ko penugo nado doalọtena nukọnyiyi etọn.
5, 6. Nuwadotana daho tẹwẹ Zekalia 4:7 dlẹnalọdo?
5 Mí sọgan deji dọ azọ́n yẹwhehodidọ po mẹpinplọn po tọn he devizọnwatọ tonusetọ Jehovah tọn lẹ to wiwà to ojlẹ mítọn mẹ na zindonukọn po alọgọ etọn po. Mí hia to Zekalia 4:7 mẹ dọmọ: “Ewọ nasọ hẹn zannu aga tọn jẹgbonu wá po abobo didó ojọmiọn, ojọmiọn tọn lẹ po.” Nuwadotana daho tẹwẹ ehe dlẹnalọdo to ojlẹ mítọn mẹ?
6 Zekalia 4:7 to alọdlẹndo ojlẹ lọ whenuena sinsẹ̀n-bibasi nugbo Oklunọ Nupojipetọ tọn na yin hinhẹn jẹ pipé-yinyin kọ̀n to awánu aigba ji tẹmpli gbigbọmẹ tọn etọn tọn lẹ mẹ. Tẹmpli enẹ wẹ tito he Jehovah zedai na dindọnsẹpọ ẹ to sinsẹ̀n-bibasi mẹ to dodonu avọ́sinsan ofligọ Klisti Jesu tọn ji. Nugbo wẹ dọ, tẹmpli gbigbọmẹ tọn daho lọ ko tin sọn owhe kanweko tintan W.M. tọn mẹ gbọ́n. Ṣogan, sinsẹ̀n-bibasi nugbo to awánu aigba ji tọn etọn mẹ na gbẹ́ wá yin hinhẹn jẹ pipé-yinyin kọ̀n to nukọn mẹ. Sinsẹ̀n-basitọ livi susu to devizọnwa todin to awánu aigba ji tẹmpli gbigbọmẹ tọn lọ tọn mẹ. Omẹ ehelẹ po omẹ susugege he yin finfọnsọnku lẹ po na yin hinhẹnwa pipé kọ̀n to Gandudu Owhe Fọtọ́n Jesu Klisti tọn whenu. To vivọnu owhe fọtọ́n lọ tọn, sinsẹ̀n-basitọ nugbo Jiwheyẹwhe tọn lẹ kẹdẹ wẹ na yin jijodo aigba he yin kiklọwé lọ ji.
7. Azọngban tẹwẹ Jesu tindo to sinsẹ̀n-bibasi nugbo hinhẹnwa pipé-yinyin kọ̀n to ojlẹ mítọn mẹ, podọ naegbọn enẹ dona na mí tuli?
7 Togán Zelubabẹli po Yẹwhenọ Daho Jọṣua po tin to finẹ bo mọ tadona azọ́n tẹmpli lọ tọn to 515 J.W.M. Zekalia 6:12, 13 dọ dọdai dogbọn azọngban mọnkọtọn he Jesu tindo to sinsẹ̀n-bibasi nugbo hinhẹnwa pipé-yinyin kọ̀n mẹ dali. E dọmọ: “Le wẹ OKLUNỌ awhànpa lẹ tọn dọho do, dọmọ, Doayi e go, dawe lọ oyín mẹhe tọn nọ yin Alà: podọ ewọ na zẹ̀alà sọn otẹn etọn mẹ, ewọ bo nasọ do tẹmpli OKLUNỌ tọn: yèdọ . . . ewọ bo nasọ hẹn gigo lọ, bo na sinai bo dugán to ofìn etọn ji; yẹwhenọ de nasọ tin to ofìn etọn ji.” To whenuena e yindọ Jesu, he tin to olọn mẹ bo hẹn kúnkàn ahọlu Davidi tọn nado zẹ̀alà, tin to godona azọ́n Ahọluduta lọ tọn to tẹmpli gbigbọmẹ tọn lọ mẹ, be hiẹ lẹndọ mẹde sọgan glọnalina nukọnyiyi etọn ya? Gbede pọ́n! Be ehe ma dona na mí tuli nado zindonukọn to lizọnyizọn mítọn mẹ, bo ma na dike yanwle egbesọegbesọ tọn lẹ ni fẹayihasẹna mí ya?
Nuhe Dona Tin to Otẹn Tintan mẹ Lẹ
8. Naegbọn mí dona ze azọ́n tẹmpli gbigbọmẹ tọn lọ tọn do otẹn tintan mẹ to gbẹzan mítọn mẹ?
8 Nado tindo godonọnamẹ po dona Jehovah tọn po, mí dona ze azọ́n tẹmpli gbigbọmẹ tọn lọ tọn do otẹn tintan mẹ to gbẹzan mítọn mẹ. To vogbingbọn mẹ na Ju lẹ he dọmọ, “Yè ma hẹn ojlẹ wá . . . gba,” míwlẹ dona flindọ mí ko tin to ‘azán godo tọn lẹ’ mẹ. (Hagai 1:2; 2 Timoti 3:1) Jesu dọ dọdai dọ hodotọ nugbonọ etọn lẹ na dọyẹwheho wẹndagbe Ahọluduta lọ tọn bo hẹn gbẹtọ lẹ zun devi. Mí dona họ́ míde ma nado gbẹkọ lẹblanulọkẹyi sinsẹ̀nzọn tọn he mí tindo go. Azọ́n yẹwhehodidọ po mẹpinplọn po tọn lọ sọ vọ́ bẹjẹeji to 1919 to whenuena agọjẹdomẹtọ aihọn tọn lẹ ko hẹnalọdotena ẹn na ojlẹ gli de godo, ṣigba e ma ko yin tadona gba. Nalete, hiẹ sọgan kudeji dọ e na yin tadona dandan!
9, 10. Etẹwẹ mí dona wà nado mọ dona Jehovah tọn yí, podọ etẹwẹ ehe zẹẹmẹdo na mí?
9 Dopodopo mítọn podọ mímẹpo to pọmẹ na yin didona dile e na dẹnsọ bọ mí na zindonukọn to azọ́n lọ mẹ po zohunhun po. Doayi opagbe Jehovah tọn he sọgan na mí jide go. Tlolo he Ju lẹ lẹkọwa sinsẹ̀n-bibasi alindọn lẹpo tọn kọ̀n bo vọ́ azọ́n dodonu tẹmpli lọ tọn bẹjẹeji po zohunhun po, Jehovah dọmọ: “Sọn azán he gbè wẹ yẹn na dona mì.” (Hagai 2:19) Yé na gọ̀ nukundagbe etọn mọyi to gigọ́ mẹ. Todin, lẹnnupọndo dona he opagbe Jiwheyẹwhe tọn bẹhẹn lẹ ji: “Okún jijọho tọn na tin finẹ; ovẹntin na jo sinsẹ́n etọn, podọ aigba lọ nasọ jo jideji etọn, podọ olọn lẹ na jo ahún yetọn; yẹn bo nasọ hẹn pipotọ omẹ helẹ tọn nado yí onú he lẹpo do dugu.”—Zekalia 8:9-13.
10 Kẹdẹdile Jehovah dona Ju enẹlẹ to gbigbọ-liho podọ to agbasa-liho do, mọ wẹ e na dona mílọsu do eyin mí wà azọ́n he e zedo alọmẹ na mí lọ po ahundopo po. Delẹ to dona ehelẹ mẹ wẹ jijọho to ode awetọ mítọn ṣẹnṣẹn, hihọ́, kọdetọn dagbe, po nukọnyiyi gbigbọmẹ tọn po. Ṣogan, hiẹ yọnẹn dọ eyin mí na to dona Jiwheyẹwhe tọn tindo zọnmii, mí dona zindonukọn to azọ́n tẹmpli gbigbọmẹ tọn lọ tọn mẹ dile Jehovah jlo do.
11. Nawẹ mí sọgan gbeje mídelẹ pọ́n gbọn?
11 Ojlẹ lọ die nado ‘ze ayiha mítọn do aliho mítọn lẹ ji.’ (Hagai 1:5, 7) Mí dona wlekli bo gbadopọnna nuhe tin to otẹn tintan mẹ to gbẹzan mítọn mẹ lẹ. Obá he mẹ mí to gigopana oyín Jehovah tọn bo to nukọnzindo to azọ́n mítọn mẹ to tẹmpli gbigbọmẹ tọn etọn mẹ jẹ wẹ Jehovah na dona mí jẹ to egbehe. Hiẹ sọgan kanse dewe dọ: ‘Be nuhe tin to otẹn tintan mẹ na mi lẹ ko diọ wẹ ya? Nawẹ zohunhun ṣie na Jehovah, nugbo etọn, po azọ́n etọn po sinyẹn sọ eyin yè yí ì jlẹdo zohunhun he yẹn tindo to baptẹm ṣie whenu go? Be ojlo tintindo to gbẹzan awuvivo tọn mẹ to nuyiwa do ayidonugo he yẹn nọ na hlan Jehovah po Ahọluduta etọn po ji wẹ ya? Be obu gbẹtọ tọn—yèdọ nulinlẹnpọndo nuhe mẹdevo lẹ na lẹn ji—to aliglọnna mi to aliho de mẹ wẹ ya?’—Osọhia 2:2-4.
12. Ninọmẹ he tin to Ju lẹ ṣẹnṣẹn tẹ ji wẹ Hagai 1:6, 9 zinnudo?
12 Mí ma na jlo dọ Jiwheyẹwhe ni doalọtena dona susugege etọn lẹ kinkọndo mí ji na mí gbẹkọ azọ́n gigopipana oyín etọn tọn go wutu gba. Flindọ to whenuena yé ko bẹ azọ́n lọ jẹeji po zohunhun po godo, Ju he lẹkọwa whé lẹ “to wezunhọ̀n omẹ dopodopo jẹ ohọ̀ etọn titi mẹ,” dile Hagai 1:9 dọ do. Yé hẹn alọnu yetọn ján na nuhudo egbesọegbesọ yedetiti tọn lẹ po aliho gbẹzan yetọn tọn po. Taidi kọdetọn de, ‘vude poun wẹ nọ yin hinhẹnwa họmẹ,’ yèdọ whèdomẹ núdùdù po núnùnù dagbe po tọn tin, gọna whèdomẹ avọ̀ he hlá yozò tọn. (Hagai 1:6) Jehovah doalọtena dona etọn do yé ji. Etẹwẹ mí sọgan plọn sọn ehe mẹ?
13, 14. Nawẹ mí sọgan yí nuplọnmẹ he yin mimọyi sọn Hagai 1:6, 9 mẹ do yizan mẹ gbọn, podọ naegbọn ehe do yin nujọnu?
13 Be hiẹ ma yigbe dọ nado to vivi dona Jiwheyẹwhe tọn dù zọnmii, mí dona dapana yanwle mẹdetiti tọn lẹ zize donukọnna sinsẹ̀n-bibasi Jehovah tọn ya? Mí dona wàmọ vlavo nuwiwa kavi yanwle he to ayihafẹsẹna mí lọ yin wezundido to akuẹ godo, tito adọkunnọ lilẹzun to zánto dopo mẹ tọn lẹ, yanwle wepinplọn dogọ tọn lẹ nado sọgan mọ agbasazọ́n dagbe to aihọn ehe mẹ, kavi tito lẹ nado hẹn pekọwana ojlo mẹdetiti tọn lẹ.
14 Onú mọnkọtọn lẹ sọgan nọma yin ylando. Etomọṣo, eyin yè na yí yé jlẹdo ogbẹ̀ mavọmavọ go, be hiẹ ma mọ dọ “azọ́n kúkú” lẹ wẹ yé yin ya? (Heblu lẹ 9:14) To aliho tẹ mẹ? Yé yin onú kúkú, ovọ́, he ma doale depope to gbigbọ-liho. Eyin mẹde to dindin yé mapote, azọ́n mọnkọtọn lẹ sọgan hẹn okú gbigbọmẹ tọn wá na ẹn. Enẹ jọ do Klistiani yiamisisadode delẹ go to azán apọsteli lẹ tọn gbè. (Filippinu lẹ 3:17-19) E ko sọ jọ do mẹdelẹ go to ojlẹ mítọn mẹ. Vlavo hiẹ yọ́n mẹdelẹ he yin ayihafẹsẹna vudevude sọn nuwiwa Klistiani tọn lẹ kọ̀n podọ sọn agun mẹ; todin yé ma nọ do ojlo depope hia nado lẹkọ do sinsẹ̀nzọn Jehovah tọn kọ̀n. Na jide tọn, todido mítọn wẹ yindọ omẹ mọnkọtọn lẹ na lẹkọwa Jehovah dè, ṣigba nuhe họnwun wẹ yindọ afọdidona “azọ́n kúkú” lẹ sọgan dekọtọn do nukundagbe po dona Jehovah tọn po hinhẹnbu mẹ. Pọ́n lehe enẹ na blawu do sọ! E na zẹẹmẹdo hẹnbu ayajẹ po jijọho he gbigbọ Jiwheyẹwhe tọn nọ wleawuna po tọn. Sọ yí nukun homẹ tọn do pọ́n nuhẹngu he e na yin ma nado mọaleyi sọn zohunhun mẹmẹsunnu-yinyin Klistiani tọn mẹ!—Galatianu lẹ 1:6; 5:7, 13, 22-24.
15. Nawẹ Hagai 2:14 do nujọnu-yinyin sinsẹ̀n-bibasi mítọn tọn hia gbọn?
15 Whẹho titengbe de wẹ ehe yin. Mì gbọ mí ni gbadopọnna Hagai 2:14 nado pọ́n nukun he Jehovah yí do pọ́n Ju he gbẹkọ ohọ̀ sinsẹ̀n-bibasi etọn tọn go nado sọgan gbá ohọ̀ ozànọ yetọn titi lẹ, vlavo to paa mẹ kavi to yẹhiadonu-liho. “Mọ omẹ helẹ te, podọ mọ akọta he te to nukọn ṣie, wẹ OKLUNỌ dọ; podọ mọ wẹ azọ́n alọ yetọn lẹ tọn dopodopo te; podọ enẹ he yé do sanvọ́ finẹ yin mawé.” Dile e na dẹnsọ bọ Ju lẹ na gbẹkọ sinsẹ̀n-bibasi nugbo go, avọ́ depope he yé sán to agbà whenu gli tọn he to Jelusalẹm ji ma na yin alọkẹyi gba.—Ẹzla 3:3.
Jide Godonọnamẹ Tọn
16. Sọgbe hẹ numimọ he Zekalia mọyi lẹ, jide tẹwẹ Ju lẹ sọgan tindo?
16 Jide yin nina Ju tonusetọ he wazọ́n to tẹmpli Jiwheyẹwhe tọn vivọgbá mẹ lẹ gando godonọnamẹ Jiwheyẹwhe tọn go, dile Jiwheyẹwhe dohia gbọn numimọ debọdo-dego ṣinatọ̀n he Zekalia mọ lẹ dali do. Numimọ tintan namẹ jide dọ tẹmpli lọ na yin tadona bọ Jelusalẹm po Juda po na yin didona dile e na dẹnsọ bọ Ju lẹ na gbọn tonusise dali zindonukọn to azọ́n lọ mẹ. (Zekalia 1:8-17) Awetọ dopagbe vivọnu gandudu he jẹagọdo sinsẹ̀n-bibasi nugbo lẹpo tọn. (Zekalia 1:18-21) Numimọ he pò lẹ na yé jide dọ Jiwheyẹwhe na basi hihọ́na yé to azọ́n lọ kọ̀n, gbẹtọ lẹ sọn akọta susu mẹ na wọ̀ biọ ohọ̀ sinsẹ̀n-bibasi Jehovah tọn he yin tadona lọ mẹ, jijọho po hihọ́ nujọnu tọn po na tin, aliglọnnamẹnu he taidi osó yiaga he to aliglọnna azọ́n he Jiwheyẹwhe dena yé lẹ na yin didesẹ, kanyinylan na doalọte, podọ nukunpedonugo po hihọ́ angẹli lẹ tọn po na tin. (Zekalia 2:5, 11; 3:10; 4:7; 5:6-11; 6:1-8) Po jide godonọnamẹ tọn mọnkọtọn he Jiwheyẹwhe na yé po, hiẹ sọgan mọ nuhe zọ́n bọ tonusetọ lẹ basi vọjlado na gbẹzan yetọn bo lẹ́ ayidonugo yetọn do azọ́n he wutu Jiwheyẹwhe tún yé dote ji.
17. To pọndohlan mẹ na jide he yin nina mí, etẹwẹ mí dona kanse mídelẹ?
17 Mọdopolọ, jide he yin nina mí dọ sinsẹ̀n-bibasi nugbo na tindo kọdetọn dagbe dandan dona whàn mí nado yinuwa bo dozolanmẹna mí nado lẹnnupọn po sọwhiwhe po dogbọn ohọ̀ sinsẹ̀n-bibasi Jehovah tọn dali. Kanse dewe dọ: ‘Eyin yẹn yise dọ ojlẹ lọ die nado wà azọ́n yẹwhehodidọ wẹndagbe Ahọluduta lọ tọn bo hẹn gbẹtọ lẹ zun devi, be yanwle po gbẹzan ṣie po nọ dohia dọ yẹn tindo yise mọnkọtọn ya? Be yẹn nọ yí whenu he pé zan nado plọn Ohó dọdai Jiwheyẹwhe tọn, bo nọ yí ì do basi yanwle, bosọ nọ dọhodeji hẹ Klistiani hatọ lẹ podọ hẹ mẹhe yẹn dukosọ hẹ lẹ ya?’
18. Sọgbe hẹ Zekalia weta 14, etẹwẹ na jọ to sọgodo?
18 Zekalia dlẹnalọdo vasudo Babilọni Daho lọ tọn po awhàn Amagẹdọni tọn he na bọdego po. Mí hia dọmọ: “E na yin azán dopo he yin yinyọnẹn hlan OKLUNỌ; okle ma gba, ozán ma gba: ṣigba e na wá jọ, dọ hinhọ́n na tin finẹ to whèjai jlẹmẹ.” Mọwẹ, azán Jehovah tọn na yin azán he dózin, bo blawu de na kẹntọ etọn lẹ to aigba ji! Ṣigba e na zẹẹmẹdo hinhọ́n mapote po nukundagbe po na sinsẹ̀n-basitọ nugbonọ Jehovah tọn lẹ. Zekalia sọ basi zẹẹmẹ lehe onú lẹpo to aihọn yọyọ lọ mẹ na lá wiwe-yinyin Jehovah tọn do. Sinsẹ̀n-bibasi nugbo to tẹmpli daho gbigbọmẹ tọn Jiwheyẹwhe tọn mẹ wẹ na yin aliho sinsẹ̀n-bibasi tọn dopo akàn lọ to aigba ji. (Zekalia 14:7, 16-19) Jidenamẹ nankọtọn die! Mí na mọ hẹndi nuhe ko yin didọdai lẹ tọn bo na mọ nupojipetọ-yinyin Jehovah tọn yin whẹsuna. Lehe azán Jehovah tọn enẹ na yin vonọtaun do sọ!
Dona Mavọmavọ Lẹ
19, 20. Naegbọn hiẹ do mọ nuhe Zekalia 14:8, 9 dọ taidi tulinamẹnu?
19 To nuwadotana jiawu enẹ godo, Satani po aovi etọn lẹ po na yin ginglọndo odò mapote nudemayiwà tọn mẹ. (Osọhia 20:1-3, 7) Enẹgodo dona lẹ na yin kinkọndo gbẹtọvi lẹ ji to Gandudu Owhe Fọtọ́n Klisti tọn whenu. Zekalia 14:8, 9 dọmọ: “E nasọ wá jọ to azán nẹ mẹ, wẹ osin ogbẹ̀nọ lẹ na jẹgbonu yì sọn Jelusalẹm mẹ; odaa yetọn hlan ohù whèzẹtẹn ji tọn dali, podọ odaa yetọn hlan ohù whèyihọ ji tọn dali: alunlun mẹ po afò mẹ po wẹ e na tin. OKLUNỌ bo nasọ yin ahọlu to aigba lẹpo ta: to azán nẹ mẹ wẹ OKLUNỌ na yin dopo, podọ oyín etọn dopo.”
20 “Osin ogbẹ̀nọ lẹ,” kavi “otọ̀ osin ogbẹ̀ tọn,” he nọtena awuwledainanu Jehovah tọn nado namẹ ogbẹ̀, na to sisà madoalọte sọn aisintẹn Ahọluduta Mẹssia tọn. (Osọhia 22:1, 2) Gbẹtọ susugege he yin sinsẹ̀n-basitọ Jehovah tọn he ko lùn Amagẹdọni tọ́n lẹ na mọaleyi gbọn yinyin tuntundote sọn whẹgbledomẹ okú Adam tọn mẹ dali. Mẹhe tlẹ ko kú lẹ lọsu na mọaleyi sọn e mẹ gbọn yinyin finfọnsọnku dali. Gbọnmọ dali, adà yọyọ gandudu Jehovah tọn do aigba lọ blebu ji tọn de na bẹjẹeji. Gbẹtọvi lẹpo lẹdo aihọn pé na kẹalọyi Jehovah taidi Nupojipetọ Wẹkẹ tọn, yèdọ omẹ dopo gee lọ he dona yin sinsẹ̀n.
21. Etẹwẹ dona yin gbemima mítọn?
21 Eyin mí pọ́n dọdai he Hagai po Zekalia po dọ lẹpo po dehe ko mọ hẹndi lẹpo po, mí tindo whẹwhinwhẹ́n he lodo nado zindonukọn to azọ́n he Jiwheyẹwhe ko zedo alọmẹ na mí nado wà to awánu aigba ji tẹmpli gbigbọmẹ tọn etọn tọn lẹ mẹ. Kakajẹ whenue sinsẹ̀n-bibasi nugbo na yin hinhẹn jẹ pipé-yinyin etọn kọ̀n, mì gbọ mímẹpo ni vánkan nado ze dagbenu Ahọluduta lọ tọn lẹ do otẹn tintan mẹ. Zekalia 8:9 dotuhomẹna mí dọmọ: “Mì gbọ alọ mìtọn lẹ ni yin huhlọnnọ; mì [he] sè ohó helẹ to azán helẹ mẹ sọn onù yẹwhegán lẹ lọ tọn mẹ.”
Be Hiẹ Flin Ya?
• Nujijọ he sọgbe hẹ azán mítọn tẹwẹ zọ́n bọ owe Hagai po Zekalia po tọn lẹ do yọn-na-yizan to egbehe?
• Etẹwẹ owe Hagai po Zekalia po tọn lẹ plọn mí gando nuhe dona tin to otẹn tintan mẹ lẹ go?
• Naegbọn dogbigbapọnna dọdai Hagai po Zekalia po tọn na mí whẹwhinwhẹ́n nado deji gando sọgodo go?
[Caption on page 26]
Hagai po Zekalia po na tuli Ju lẹ nado wazọ́n po alindọn lẹpo po na yé nido mọ dona yí
[Caption on page 27]
Be hiẹ ‘to wezunhọ̀n na ohọ̀ towe titi’ wẹ ya?
[Caption on page 28]
Jehovah dopagbe dona de tọn, podọ e ko hẹn ẹn wá