Mẹsusu to Nudopolọ Biọ Lẹdo Aihọn Pé
YÍ NUKUN homẹ tọn do pọ́n livi kanweko, kavi liva susu gbẹtọ lẹ tọn he to nudopolọ biọ. Yé to bibiọ to mẹhe tindo aṣẹ hugan to wẹkẹ lọ mẹ si nado hẹn pekọwana onú tangan he biọ yé te. Ṣogan, vude poun to yé mẹ wẹ yọ́n nuhe biọ yé te taun. Be onú mọnkọtọn sọgan jọ nugbonugbo ya? Na nugbo tọn, e to jijọ egbesọegbesọ. Etẹwẹ omẹ ehe lẹpo to bibiọ? Yé to bibiọ dọ Ahọluduta Jiwheyẹwhe tọn ni wá!
Sọgbe hẹ sọhayinanú de, nudi sinsẹ̀n 37 000 wẹ tin he ylọ yede dọ Klistiani bo sọalọakọ́n dọ Jesu Klisti wẹ Nukọntọ yetọn. Hagbẹ sinsẹ̀n enẹlẹ tọn hugan liva awe. Susu yetọn wẹ nọ hodẹ̀ he nọ saba yin yiylọdọ Odẹ̀ Oklunọ tọn. Be hiẹ yọ́n odẹ̀ ehe ya? Dile Jesu plọn hodotọ etọn lẹ do, odẹ̀ lọ bẹjẹeji dole: “Otọ́ mítọn he tin to olọn mẹ, hihiọ wẹ oyín towe. Ahọludu towe ni wá. Ojlo towe ni yin wiwà to aigba [ji], dile e te to olọn mẹ.”—Matiu 6:9, 10.
Na owhe kanweko susu lẹ todin, sinsẹ̀nnọ lẹ ko vọ́ hogbe enẹlẹ dọ to sinsẹ̀n-bibasi yetọn mẹ to ṣọṣi mẹ. Dopodopo yetọn, kavi taidi pipli whẹndo tọn de, ko sọ vọ́ hogbe lọ lẹ dọ sọn tamẹ to ojlẹ dagbe po ylankan po tọn lẹ mẹ. Yé ko yí ahundopo po numọtolanmẹ sisosiso po do hodẹ̀ mọnkọtọn. Mẹsusu devo lẹ ko plọn odẹ̀ lọ do tamẹ bo ma tlẹ nọ lẹn nususu kavi nudepope pọ́n do nuhe dọ yé te lẹ ji. Gbọnvona mẹhe sọalọakọ́n nado yin Klistiani ehelẹ, mẹdevo lẹ sọ tin he ko to nukundo Ahọluduta Jiwheyẹwhe tọn bosọ nọ hodẹ̀ dọ e ni wá.
Obiọ de He Ma Nọte do Sinsẹ̀n Klistiani Tọn Kẹdẹ Ji
Odẹ̀ diyin sinsẹ̀n Ju lẹ tọn wẹ odẹ̀ aluẹmẹninọ tọn he nọ yin yiylọdọ Kaddish. Dile etlẹ yindọ odẹ̀ lọ ma dọhodo okú kavi awubla ji tlọlọ, e nọ saba yin hihò to ojlẹ aluẹmẹninọ tọn lẹ whenu. Odẹ̀ lọ nọ biọ dọmọ: “Na e [Jiwheyẹwhe] ni ze Ahọluduta etọn dai to gbẹwhenu towe . . . yèdọ po awuyiya po.”a Odẹ̀ sinagọgu hohowhenu tọn devo sọ dọhodo nukundido Ahọluduta Mẹssia he wá sọn whédo Davidi tọn mẹ ji.
Mẹhe ma tin to sinsẹ̀n Klistiani tọn mẹ lẹ lọsu tindo ojlo to Ahọluduta Jiwheyẹwhe tọn mẹ. Sọgbe hẹ linlinwe The Times of India, nukọntọ sinsẹ̀n Inde tọn he diyin to owhe kanweko 19tọ mẹ bo jlo dọ sinsẹ̀n Hindu, Malenu, po Klistiani lẹ po tọn ni yin kinkọndopọ de dọmọ: “Ahọluduta Jiwheyẹwhe tọn ma na wá adavo whèzẹtẹn po whèyihọ po yin kinkọndopọ.” Podọ wehọmẹ-gán wehọmẹ Malenu lẹ tọn de to Strathfield, Australie, wlanwe hlan linlinwe-kàntẹn de to agọe dọmọ: “Taidi Malenu lẹpo, n’yise [dọ] Jesu na lẹkọwa bo na ze Ahọluduta Jiwheyẹwhe tọn dai.”
Matin ayihaawe, mẹhe to nukundo Ahọluduta Jiwheyẹwhe tọn bo to bibiọ dọ e ni wá lẹ ko yì liva susu todin. Ṣigba lẹnnupọndo onú fọnjlodotenamẹ de ji.
Vlavo hiẹ yọnẹn dọ mí Kunnudetọ Jehovah tọn lẹ he nọ zín linlinnamẹwe ehe jẹgbonu, nọ yì sọn whédegbè jẹ whédegbè to lẹdo towe mẹ nado dọhodo Biblu ji hẹ gbẹtọ lẹ. Dile mí to owe lẹ zinjẹgbonu, mí sọ to azọ́n mẹpinplọn tọn ehe wà lẹdo aihọn pé, to nudi aigba 236 ji podọ to ogbè he lán to 400 ji mẹ. Hosọ tangan yẹwhehodidọ mítọn tọn wẹ Ahọluduta Jiwheyẹwhe tọn. Na nugbo tọn, doayi e go dọ yinkọ linlinnamẹwe ehe tọn wẹ Atọ̀họ̀-Nuhihọ́ Lọ Tọn He To Ahọluduta Jehovah Tọn Lá. Mí nọ saba kanse gbẹtọ lẹ vlavo eyin yé nọ hodẹ̀ na Ahọluduta enẹ. Mẹsusu nọ yigbe dọ mọwẹ. Ṣigba, eyin mí kàn nuhe Ahọluduta enẹ yin sè, suhugan gbẹtọ lẹ tọn nọ yigbe dọ, “N’ma yọnẹn,” kavi yé sọgan na gblọndo he ma họnwun.
Naegbọn mẹsusu sọmọ nọ biọ nuhe yé ma yọnẹn? Be na Ahọluduta Jiwheyẹwhe tọn yin hosọ he gẹdẹ bo ma họnwun wutu wẹ ya? Lala. Ahọluduta lọ yin zẹẹmẹ basina hezeheze to Biblu mẹ. Humọ, owẹ̀n Biblu tọn gando Ahọluduta lọ go sọgan na we todido nujọnu tọn to ojlẹ hunyanhunyan tọn ehelẹ mẹ. To hosọ he bọdego mẹ, mí na mọ lehe Biblu basi zẹẹmẹ todido enẹ tọn do. Enẹgodo, mí na mọ whenue Ahọluduta lọ na wá sọgbe hẹ odẹ̀ he Jesu hò.
[Nudọnamẹ odò tọn]
a Taidi odẹ̀ apajlẹnọ he Jesu zedai, odẹ̀ aluẹmẹninọ tọn lọ, Kaddish, sọ biọ dọ oyín Jiwheyẹwhe tọn ni yin kinklandowiwe. Dile etlẹ yindọ mẹdelẹ dọnnu gando Kaddish go, vlavo eyin e ko tin sọn ojlẹ Klisti tọn mẹ gbọ́n kavi jẹnukọnna ẹn, aliho he mẹ e yí hogbe delẹ zan te taidi odẹ̀ apajlẹnọ lọ ma dona paṣa mí gba. Jesu ma ze odẹ̀ apajlẹnọ lọ dai po linlẹn lọ po nado wleawuna odẹ̀ yọyọ he gbọnvo de gba. Obiọ dopodopo yin zize sinai gligli do Owe-wiwe he tin-to-aimẹ to whenẹnu na Ju lẹpo ji. Jesu to tulina Ju hatọ etọn lẹ nado hodẹ̀ na nuhe yé dona ko to dẹ̀hona lẹ whẹpo ewọ do wá aigba ji.