Dọnsẹpọ Jiwheyẹwhe

‘Mẹhe Nọ Sè Odẹ̀’

1 OTANNUGBO LẸ 4:9, 10

BE JEHOVAH Jiwheyẹwhe nọ sè odẹ̀ ahundopo tọn he sinsẹ̀n-basitọ he ze yede jo na ẹn lẹ nọ hò nugbonugbo ya? Kandai Biblu tọn he dọhodo dawe he mí ma yọ́n nususu gandego de ji he yinkọ etọn nọ yin Jabẹzi dohia hezeheze dọ Jehovah wẹ ‘Mẹhe nọ sè odẹ̀.’ (Psalm 65:2) Kandai kleun ehe yin mimọ to fie mẹde ma sọgan lẹn de—yèdọ to ṣẹnṣẹn todohukanji whẹndo tọn he tin to bẹjẹeji owe Otànnugbo Tintan lẹ tọn mẹ. Mì gbọ mí ni gbadopọnna 1 Otannugbo lẹ 4:9, 10.

Nuhe mí yọnẹn gando Jabẹzi go lẹpo tin to wefọ awe ehelẹ mẹ. Sọgbe hẹ wefọ 9tọ, onọ̀ etọn “ylọ oyín etọn [dọ] Jabẹzi, dọmọ, Na yẹn yí awubla do ji i wutu.”a Naegbọn e do dó oyín enẹ na ẹn? Be e mọ awufiẹsa hugan dehe yọnnu de nọ tindo to jọwamọ-liho to whenue e to jiji i wẹ ya? Be vlavo asuṣiọsi de wẹ e yin bo to lewu gando asu etọn he ma tin to finẹ nado dokuavọna viyẹyẹ etọn wá aihọn mẹ go wẹ ya? Biblu ma dọ gba. Ṣigba e wá jọ bọ onọ̀ ehe doawagun to visunnu etọn mẹ na whẹwhinwhẹ́n titengbe de wutu. Nọvi Jabẹzi tọn lẹ sọgan ko yin dodonọ, ṣigba “Jabẹzi sọ yin yẹyinọ daho hú mẹmẹsunnu etọn lẹ.”

Jabẹzi tindo aṣa lọ nado nọ hodẹ̀. E bẹ odẹ̀ etọn jẹeji gbọn dona Jiwheyẹwhe tọn bibiọ dali. Enẹgodo, e biọ onú atọ̀n he dohia dọ e tindo yise he lodo.

Tintan, e vẹ̀ Jiwheyẹwhe dọmọ: “Hẹn agboji [kavi aigba] ṣie klo.” (Wefọ 10) Dawe yẹyinọ ehe ma nọ donukunkẹn do aigba hatọ etọn tọn go gba. E yọnbasi dọ obiọ ahundopo tọn etọn ni gando gbẹtọ go hugan aigba. E na ko to bibiọ dọ aigba etọn ni yin hinhẹn gblodeji to jijọho mẹ na e nido sọgan bẹ sinsẹ̀n-basitọ Jiwheyẹwhe nugbo lọ tọn susu dogọ hẹn.b

Awetọ, Jabẹzi biọ dọ “alọ” Jiwheyẹwhe tọn ni tin hẹ emi. Alọ yẹhiadonu tọn Jiwheyẹwhe tọn wẹ huhlọn etọn he e nọ yizan nado gọalọna sinsẹ̀n-basitọ etọn lẹ. (1 Otannugbo lẹ 29:12) Na Jabẹzi nido mọ gblọndo na obiọ etọn lẹ, e lẹhlan Jiwheyẹwhe mẹhe alọ etọn ma whete nado gọalọna mẹhe nọ do yise hia to ewọ mẹ lẹ.—Isaia 59:1.

Atọ̀ntọ, Jabẹzi hodẹ̀ hlan Jiwheyẹwhe dọmọ: “Whlá mi sọn oylan [kavi adángbòmẹ] mẹ, bọ e ma nado tin hlan awubla ṣie gba.” Hogbe lọ “bọ e ma nado tin hlan awubla ṣie” sọgan zẹẹmẹdo dọ Jabẹzi to bibiọ Jiwheyẹwhe dọ ni basi hihọ́na emi na kọdetọn adángbòmẹ lẹ tọn ni ma hẹn awubla wá emi ji kavi húagbọ́ emi blo, e ma to bibiọ dọ Jiwheyẹwhe ni glọnalina adángbòmẹ lọ lẹ gba.

Odẹ̀ Jabẹzi tọn dohia dọ sinsẹ̀n-bibasi nugbo nọ duahunmẹna ẹn podọ e yise bo dejido Mẹhe nọ sè odẹ̀ go. Nawẹ Jehovah na gblọndo odẹ̀ etọn gbọn? Kandai kleun ehe wá tadona kọ̀n po hogbe ehelẹ po dọmọ: “Jiwheyẹwhe sọ yí enẹ he e biọ na ẹn.”

Mẹhe nọ sè odẹ̀ ma ko diọ. E nọ hùnhomẹ do odẹ̀ sinsẹ̀n-basitọ etọn lẹ tọn go. Mẹhe tindo yise to ewọ mẹ bosọ dejido ewọ go lẹ sọgan tindo jidide lọ dọ: “Nudepope he mí biọ sọgbe hẹ ojlo etọn, ewọ nọ sè mítọn.”—1 Johanu 5:14.

[Nudọnamẹ odò tọn]