Dọnsẹpọ Jiwheyẹwhe
E Yọ́n “Ayiha Ovi Gbẹtọ lẹ Tọn”
MẸNU to mí mẹ wẹ whlepọn po nuhahun gbẹ̀mẹ tọn lẹ po ma ko húagbọ́ pọ́n? To whedelẹnu, e nọ taidi dọ mẹdepope matin ehe sọgan mọnukunnujẹ nuhahun kavi awufiẹsa sinsinyẹn he mẹ jugbọn mí te taun wẹ nkọ. Ṣigba, mẹde tin he nọ mọnukunnujẹ numọtolanmẹ mítọn lẹ mẹ to gigọ́ mẹ—enẹ wẹ Jehovah Jiwheyẹwhe. Hogbe Sọlomọni tọn he tin to 2 Otannugbo lẹ 6:29, 30 mẹ lẹ sọgan miọnhomẹna mí.
Sọlomọni hodẹ̀ de to klandowiwe tẹmpli Jelusalẹm tọn whenu to 1026 J.W.M. Odẹ̀ he Sọlomọni hò lọ sọgan ko dẹn na nukunwhiwhe ao. To odẹ̀ lọ mẹ, e pà Jehovah taidi Jiwheyẹwhe nugbonọ, Mẹhe nọ hẹn opagbe lẹ di podọ Mẹhe nọ sè odẹ̀.—1 Ahọlu lẹ 8:23-53; 2 Otannugbo lẹ 6:14-42.
Sọlomọni biọ to Jiwheyẹwhe si dọ e ni sè ovẹvivẹ sinsẹ̀n-basitọ etọn lẹ tọn. (Wefọ 29) Dile etlẹ yindọ Sọlomọni donù tukla susu go (Wefọ 28), e zinnudeji dọ sinsẹ̀n-basitọ dopodopo wẹ yọ́n “onú dotuklamẹ etọn titi” bosọ nọ tindo numọtolanmẹ ‘awufiẹsa etọn titi.’ Mẹde sọgan to nuhahun sinsinyẹn de mẹ jugbọn bọ nudevo pete na to tuklado mẹdevo to ahun mẹ.
Depope he whẹho lọ yin, budisi Jiwheyẹwhe tọ́ lẹ ma to dandannu glọ nado didá agbàn pinpẹn yetọn lẹ na yede gba. To odẹ̀ he Sọlomọni hò mẹ, sinsẹ̀n-basitọ dopodopo he sọgan yin whinwhàn nado ‘dlẹn alọpahomẹ etọn lẹ jẹgbonu’ nado dọnsẹpọ Jehovah to odẹ̀ ahundopo tọn mẹ wẹ e tindo to ayiha mẹ.a Vlavo Sọlomọni na ko flindọ to whenue otọ́ etọn, Davidi to ayimajai sinsinyẹn mẹ wẹ e dọ dọ: “Ze agbàn towe dlan OKLUNỌ ji.”—Psalm 55:4, 22.
Nawẹ Jehovah na na gblọndo ovẹvivẹ ahundopo tọn na alọgọ gbọn? Sọlomọni vẹ̀ Jehovah dọmọ: “Hiẹ ni sè sọn olọn mẹ otẹn fininọ towe, bo jona, bosọ gọ̀ jo hlan omẹ dopodopo kẹdẹdi aliho etọn lẹpo.” (Wefọ 30) Sọlomọni yọnẹn dọ “[Ewọ] he nọ sè odẹ̀” ma nọ hò sinsẹ̀n-basitọ etọn lẹ tọn pọ́n taidi pipli de poun gba ṣigba e sọ nọ hò dopodopo yetọn tọn pọ́n. (Psalm 65:2) Jehovah nọ wleawu alọgọ he jẹ tọn, bosọ nọ jona ylandonọ he lẹkọwa e dè po ahun lẹpo po.—2 Otannugbo lẹ 6:36-39.
Naegbọn Sọlomọni deji dọ Jehovah na sè odẹ̀ sinsẹ̀n-basitọ he lẹnvọjọ tọn? Sọlomọni zindonukọn to odẹ̀ etọn mẹ dọmọ: “Ayiha mẹhe tọn hiẹ [Jehovah] yọnẹn; (na hiẹ, yèdọ hiẹ ṣokẹdẹ, wẹ yọ́n ayiha ovi gbẹtọ lẹ tọn).” Jehovah yọ́n tukla kavi awufiẹsa he sinsẹ̀n-basitọ nugbo dopodopo sọgan doakọnna, podọ ayimajai etọn nọ duahunmẹna Ẹn.—Psalm 37:4.
Nuhe Sọlomọni dọ to odẹ̀ etọn mẹ sọgan miọnhomẹna mí. Gbẹtọvi hatọ mítọn lẹ sọgan nọma mọnukunnujẹ nuhe pehẹ mí te mẹ to gigọ́ mẹ—enẹ wẹ “onú dotuklamẹ” mítọn titi po ‘awufiẹsa’ mítọn titi po. (Howhinwhẹn lẹ 14:10) Ṣigba Jehovah mọnukunnujẹ ahun mítọn mẹ, podọ onú mítọn sọ nọ duahunmẹna ẹn taun. Ahun mítọn lẹ kinkọ̀n jẹgbonu to odẹ̀ mẹ sọgan hẹn agbàn pinpẹn mítọn lẹ fua. ‘Mì bẹ magbọjẹ mìtọn lẹpo dlan ewọ ji, na e to mìtọn hòpọn wutu,’ wẹ Biblu dọ.—1 Pita 5:7.
[Nudọnamẹ odò tọn]
a To ojlẹ Biblu tọn lẹ mẹ, ‘alọpahomẹ dindlẹn jẹgbonu,’ enẹ wẹ yindọ alọ po alọpahomẹ lẹ dindlẹn do aga po yin ohia dẹ̀hiho tọn de.—2 Otannugbo lẹ 6:13.