Dọnsẹpọ Jiwheyẹwhe

“Yè Na Mọ Ẹn sọn Dè We”

1 OTANNUGBO LẸ 28:9

BE A yọ́n Jiwheyẹwhe ya? Gblọndo kanbiọ enẹ tọn gbloada hú nuhe mẹsusu nọ lẹn. Na nugbo tọn, nado yọ́n Jiwheyẹwhe zẹẹmẹdo nado jẹakọ hẹ ojlo etọn po nujinọtedo etọn lẹ po ganji. Gbọnmọ dali, mí na wleawuna haṣinṣan pẹkipẹki de hẹ ẹ he na yinuwado gbẹzan mítọn blebu ji sinsinyẹn. Be e yọnbasi nado tindo haṣinṣan pẹkipẹki mọnkọtọn hẹ ẹ nugbonugbo ya? Eyin mọ wẹ, etẹwẹ na gọalọna mí nado wàmọ? Mí sọgan mọ gblọndo lọ to ayinamẹ he Ahọlu Davidi na visunnu etọn Sọlomọni to 1 Otannugbo lẹ 28:9 mẹ.

Yí nukun homẹ tọn do pọ́n nujijọ lọ. Davidi dugán do Islaeli ji na nudi owhe 40 podọ akọta lọ vò to gandudu etọn glọ. Sọlomọni he na jẹ otẹn etọn mẹ to madẹnmẹ gbẹ́ pò to ovu taun to whenẹnu. (1 Otannugbo lẹ 29:1) Sẹpọ vivọnu gbẹzan Davidi tọn, ayinamẹ godo tọn tẹwẹ e na visunnu etọn?

Po numimọ susu he Davidi tindo taidi sinsẹ̀n-basitọ Jiwheyẹwhe tọn po, e dọmọ: “Hiẹ, Sọlomọni visunnu ṣie, hiẹ ni yọ́n Jiwheyẹwhe otọ́ towe tọn.” Nuhe dọ Davidi te ma yin nado yọ́n nugbo delẹ gando Jiwheyẹwhe go poun gba. Sọlomọni ko nọ sẹ̀n Jiwheyẹwhe Davidi tọn, Jehovah dote. Nudi madatọ̀n Owe-wiwe Heblu tọn lẹ ko yin tadona, podọ ayihaawe ma tin dọ Sọlomọni na ko jẹakọ hẹ nuhe kandai wiwe ehelẹ dọ gando Jiwheyẹwhe go. Weyọnẹntọ dopo dọ dọ hogbe Heblu tọn he yin lilẹdo “yọ́n” sọgan zẹẹmẹdo “haṣinṣan pẹkipẹki.” Mọwẹ, Davidi jlo dọ visunnu etọn ni wleawuna nuhe ewọ lọsu ko wlebòna—enẹ wẹ haṣinṣan pẹkipẹki de tintindo hẹ Jiwheyẹwhe tlọlọ.

Haṣinṣan pẹkipẹki mọnkọtọn dona yinuwado pọndohlan Sọlomọni tọn po gbẹzan etọn po ji sinsinyẹn. Davidi dotuhomẹna visunnu etọn dọmọ: “Nọ yí [ahun] pipé de do sẹ̀n [Jiwheyẹwhe] po otù jijlo tọn de po.” Doayi e go dọ gbedide lọ nado yọ́n Jiwheyẹwhe jẹnukọnna nado sẹ̀n ẹn. Eyin mẹde yọ́n Jiwheyẹwhe nugbonugbo, enẹ na hẹn ẹn nado nọ sẹ̀n ẹn. Ṣigba eyin mẹde na wàmọ, e dona yin sọn ahun mẹ wá, e ma dona yin po ayihaawe po. (Psalm 12:2; 119:113) Davidi biọ to visunnu etọn si nado sẹ̀n Jiwheyẹwhe po ahun lẹpo po podọ sọn ojlo mẹ wá.

Naegbọn Davidi dotuhomẹna visunnu etọn nado yí mẹwhinwhàn po pọndohlan dagbe po do sẹ̀n Jiwheyẹwhe? Davidi basi zẹẹmẹ dọmọ: “Na OKLUNỌ to ayiha lẹpo mẹ dinpọn, bosọ tunwun aṣàvà linlẹn tọn lẹ.” Sọlomọni ma dona sẹ̀n Jiwheyẹwhe kiki nado hẹn homẹhun otọ́ etọn Davidi wutu poun gba. Mẹhe na sẹ̀n ẹn po ahundopo po lẹ wẹ e nọ dín.

Be Sọlomọni na hodo apajlẹ otọ́ etọn tọn bo dọnsẹpọ Jehovah ya? Enẹ pò to Sọlomọni lọsu si. Davidi dọna visunnu etọn dọmọ: “Eyin hiẹ dín in, yè na mọ ẹn sọn dè we: ṣigba eyin hiẹ gbẹ́ ẹ dai, e na dlan we hlan doidoi.” Eyin Sọlomọni na lẹzun sinsẹ̀n-basitọ de he dọnsẹpọ Jiwheyẹwhe, e dona dovivẹnu vẹkuvẹku nado yọ́n Jehovah.a

Ayinamẹ enẹ he Davidi na taidi otọ́ de na mí jide dọ Jehovah jlo dọ mí ni tindo haṣinṣan pẹkipẹki de hẹ emi. Ṣigba eyin mí na wleawuna haṣinṣan pẹkipẹki mọnkọtọn, mí dona “dín in” gbọn dodinnanu sisosiso bibasi to Owe-wiwe lẹ mẹ dali po vivẹnudido lọ po nado yọ́n ẹn dogọ. Tintẹnpọn nado yọ́n ẹn dona nọ whàn mí nado sẹ̀n ẹn po ahun lẹpo po podọ sọn ojlo mẹ wá. Lehe Jehovah jlo dọ mí ni nọ sẹ̀n emi do niyẹn—podọ e ma biọ nude hugan mọ to sinsẹ̀n-basitọ etọn lẹ si.—Matiu 22:37.

[Nudọnamẹ odò tọn]