Jọja lẹ Emi—Mì Dike Ohó Jiwheyẹwhe Tọn Ni Nọ Deanana Mì
“Tindo nuyọnẹn, tindo nukunnumọjẹnumẹ.”—HOWH. 4:5, NW.
1, 2. (a) Etẹwẹ gọalọna apọsteli Paulu nado pehẹ nuhahun etọn? (b) Nawẹ hiẹ sọgan tindo nuyọnẹn po nukunnumọjẹnumẹ po gbọn?
“WHENUE yẹn jlo nado wà nuhe sọgbe, nuhe ylan wẹ nọ tin to dè e.” Be a yọ́n mẹhe dọho enẹlẹ ya? E ma yin mẹdevo de hugan apọsteli Paulu. Dile etlẹ yindọ Paulu yiwanna Jehovah, e nọ vẹawuna ẹn to whedelẹnu nado wà nuhe sọgbe. Etẹwẹ yin numọtolanmẹ etọn gando nuhahun ehe go? “Gbẹtọ tapònọ he yẹn yin!” wẹ e wlan. (Lom. 7:21-24) Be a sọgan mọnukunnujẹ numọtolanmẹ Paulu tọn mẹ ya? Be e nọ vẹawuna we to whedelẹnu nado wà nuhe sọgbe ya? Be enẹ nọ hẹn we jẹflumẹ dile e yin do na Paulu wẹ ya? Eyin mọ wẹ, ma gbọjọ blo. Paulu duto nuhahun ehe ji, podọ hiẹ lọsu sọgan wàmọ.
2 Paulu tindo kọdetọn dagbe na e dike “ohó he pegan lẹ” ni deanana ẹn wutu. (2 Tim. 1:13, 14) Taidi kọdetọn de, e mọ nuyọnẹn po nukunnumọjẹnumẹ po he e tindo nuhudo etọn nado pehẹ nuhahun lẹ podọ nado basi nudide dagbe lẹ. Jehovah Jiwheyẹwhe sọgan gọalọna we nado tindo nuyọnẹn po nukunnumọjẹnumẹ po. (Howh. 4:5) E ko wleawuna ayinamẹ he yọ́n hugan do Ohó etọn, Biblu mẹ. (Hia 2 Timoti 3:16, 17.) Mì gbọ mí ni gbadopọnna lehe mì sọgan mọaleyi sọn nunọwhinnusẹ́n Owe-wiwe tọn lẹ yiyizan mẹ do to whenue mì to nuyiwa hẹ mẹjitọ mìtọn lẹ, to akuẹzinzan-liho podọ to whenue mì tin mìde ṣo.
To Whẹndo Mẹ
3, 4. (a) Naegbọn hiẹ sọgan nọ mọ ẹn taidi nuhe vẹawu nado setonuna osẹ́n mẹjitọ towe lẹ tọn? (b) Etẹwutu wẹ mẹjitọ lẹ do nọ ze osẹ́n lẹ dai?
3 Be e nọ vẹawuna we nado setonuna osẹ́n mẹjitọ towe lẹ tọn wẹ ya? Naegbọn e do nọ vẹawuna we? Whẹwhinwhẹ́n dopo wẹ na ko yindọ a jlo na tindo mẹdekannujẹ jẹ obá de mẹ podọ jọwamọnu de wẹ ehe yin. E yin dopo to nuhe dohia dọ a to whinwhẹ́n lẹ mẹ. Ṣigba, to whenue a gbẹ́ pò to whégbè, a to dandannu glọ nado setonuna mẹjitọ towe lẹ.—Efe. 6:1-3.
4 Eyin a mọnukunnujẹ nuhewutu mẹjitọ towe lẹ ze osẹ́n po nubiọtomẹsi delẹ po dai mẹ, e sọgan bọawuna we nado setonuna yé. Nugbo wẹ dọ, to whedelẹnu hiẹ sọgan nọ tindo numọtolanmẹ dopolọ taidi Brielle,a owhe 18 mẹvi he dọ gando mẹjitọ etọn lẹ go dọmọ: “Yé ma tlẹ sọ flin paali dọ emi ko yin jọja pọ́n. Yé ma nọ jlo dọ ma dọ linlẹn ṣie, basi nudide, kavi yin dee.” Taidi Brielle, hiẹ sọgan tindo numọtolanmẹ lọ dọ mẹjitọ towe lẹ to aliglọnna mẹdekannujẹ he hiẹ lẹndọ a tindo jlọjẹ etọn. Ṣigba, onú tintan he wutu mẹjitọ towe lẹ do ze osẹ́n enẹlẹ dai wẹ yindọ onú towe nọ duahunmẹna yé. Humọ, mẹjitọ towe he yin Klistiani lẹ yọnẹn dọ emi na dogbè lehe emi penukundo gowe do tọn na Jehovah.—1 Tim. 5:8.
5. Nawẹ tonusisena mẹjitọ towe lẹ sọgan hẹn ale wá na we gbọn?
5 Na nugbo tọn, tonusisena osẹ́n mẹjitọ towe lẹ tọn sọgan yin yiyijlẹdo ahọ́ he mẹde dù do akuẹsẹdotẹn de súsú go—lehe mẹlọ nọ yawu suahọ lọ do, mọ wẹ akuẹsẹdotẹn lọ na nọ yàn akuẹ na ẹn dogọ do niyẹn. Mọdopolọ, a duahọ sisi po tonusise po tọn do mẹjitọ towe lẹ. (Hia Howhinwhẹn lẹ 1:8.) Lehe a nọ setonu sọ, mọ wẹ mẹjitọ towe lẹ na nọ na we mẹdekannujẹ dogọ do niyẹn. (Luku 16:10) Ṣigba, eyin a nọ gbà osẹ́n lọ lẹ whẹwhẹ, ni ma paṣa we blo dọ mẹjitọ towe lẹ na dekanpona mẹdekannujẹ towe kavi tlẹ súali etọn do we pete.
6. Nawẹ mẹjitọ lẹ sọgan gọalọna jọja lẹ nado nọ setonu gbọn?
6 Dopo to aliho he mẹ mẹjitọ lẹ sọgan gọalọna jọja yetọn lẹ nado nọ setonuna osẹ́n he yé zedai lẹ te mẹ wẹ gbọn apajlẹ zizedai na yé dali. Tonusise yetọn sọn ojlo mẹ wá na nubiọtomẹsi Jehovah tọn lẹ dona nọ dohia dọ osẹ́n Jiwheyẹwhe tọn lẹ sọgbe hẹ lẹnpọn dagbe. Ehe na gọalọna jọja lẹ nado nọ yí nukun dopolọ do pọ́n osẹ́n mẹjitọ yetọn lẹ tọn. (1 Joh. 5:3) Humọ, Biblu donù nujijọ delẹ go he whenu Jehovah tlẹ na dotẹnmẹ devizọnwatọ etọn lẹ nado dọ linlẹn yetọn lẹ gando whẹho tangan delẹ go. (Gẹn. 18:22-32; 1 Ahọ. 22:19-22) Be mẹjitọ lẹ sọgan nọ na dotẹnmẹ ovi yetọn lẹ to whedelẹnu nado nọ dọ nuhe yé lẹn do whẹho delẹ ji ya?
7, 8. (a) Avùnnukundiọsọmẹnu tẹwẹ jọja delẹ nọ pehẹ? (b) Etẹ yinyọnẹn wẹ na gọalọna we nado mọaleyi sọn mẹplọnlọdidomẹgo mẹ?
7 Jọja lẹ sọ sọgan nọ pehẹ nuhe yé nọ pọnhlan taidi homọdọdomẹgo agọ̀ sọn mẹjitọ yetọn lẹ dè. To whedelẹnu, a sọgan tindo numọtolanmẹ dopolọ taidi visunnu jọja he nọ yin Craig, mẹhe dọ dọ, “Onọ̀ ṣie nọ taidi ponọ dodinnanutọ de he nọ to ṣiṣọ́ mi whepoponu nado mọ nuwayindo ṣie lẹ.”
8 Hokọnamẹ kavi mẹplọnlọdidomẹgo nọ saba taidi homọdọdomẹgo. Biblu dohia dọ mẹplọnlọ he tlẹ sọgbe mlẹnmlẹn nọ vẹawu nado kẹalọyi. (Heb. 12:11) Etẹwẹ sọgan gọalọna we nado mọaleyi sọn mẹplọnlọ he a mọyi mẹ? Onú titengbe dopo he a dona flin wẹ yindọ owanyi wẹ na ko nọ whàn mẹjitọ towe lẹ nado nọ na we ayinamẹ. (Howh. 3:12) Yé jlo na gọalọna we ma nado wleawuna jijọ ylankan lẹ kakatimọ nado wleawuna walọ dagbe. Vlavo mẹjitọ towe lẹ na ko yọnẹn dọ eyin emi ma gbẹnuna we kavi domẹplọnlọ gowe, be emi gbẹwanna we niyẹn! (Hia Howhinwhẹn lẹ 13:24.) Sọ flindọ mí nọ plọnnu sọn nuhe mí ṣiwà lẹ mẹ. Enẹwutu, eyin mẹjitọ towe lẹ kọhona we, plọnnu sọn nuhe yé dọna we mẹ bo yí yé do yọnnuin. “Ajọ́ [nuyọnẹn tọn, NW] hú ajọ́ fataka tọn, ale etọn hú sika dagbedagbe tọn.”—Howh. 3:13, 14.
9. Kakati nado to nulẹnpọn do nuhe taidi whẹdida mawadodo ji, etẹwẹ jọja lẹ sọgan wà?
9 Nalete, Mẹjitọ lẹ lọsu nọ ṣinuwa. (Jak. 3:2) To whedelẹnu, eyin yé to mẹplọnlọ do gowe, yé sọgan nọ dọ nuhe ma sọgbe hẹ lẹnpọn dagbe. Etẹwẹ na ko nọ sisẹ́ mẹjitọ towe lẹ nado yinuwa domọ? E sọgan yindọ yé jẹflumẹ, kavi nọ pọ́n nuṣiwa towe lẹ hlan taidi awugbopo yetọn nado domẹplọnlọ gowe. Kakati nado to nulẹnpọn do nuhe a lẹndọ e yin whẹdida mawadodo ji, naegbọn hiẹ ma na do pinpẹn-nutọn-yinyọnẹn hia na ojlo ahundopo tọn yetọn nado gọalọna we? Nugopipe lọ nado nọ kẹalọyi ayinamẹ na gọalọna we taun eyin a whẹ́n.
10. Etẹwẹ sọgan gọalọna we nado setonuna osẹ́n po hokọnamẹ mẹjitọ towe lẹ tọn po dogọ bo mọaleyi sọn yé mẹ?
10 Be e na jlo we nado setonuna osẹ́n po hokọnamẹ mẹjitọ towe lẹ tọn po dogọ bo mọaleyi sọn yé mẹ ya? Eyin mọ wẹ, hiẹ dona hẹn aliho hodọdopọ tọn towe pọnte dogọ. Nawẹ a sọgan wà enẹ gbọn? Afọdide tintan wẹ nado nọ dotoai. Biblu dọ dọ, “Nọ yawu nado sè, whleawu nado dọho, bo whleawu nado gblehomẹ.” (Jak. 1:19) Kakati nado nọ yawu suwhẹna dewe, tẹnpọn nado nọ dava numọtolanmẹ towe lẹ bo dotoaina nuhe mẹjitọ towe lẹ jlo na dọ. Nọ na ayidonugo nuhe yé dọ, e ma yin aliho he mẹ yé dọ ẹ te. Enẹgodo, yigbena nuṣiwa towe po sisi po bo gbọnmọ dali dohia yé dọ emi mọnukunnujẹ nuhe yé dọ mẹ. Mọwiwà na vọ́ jide na yé dọ a sè nuhe yé dọ. Etẹwẹ lo eyin a jlo na basi zẹẹmẹ nuhe a dọ kavi nuhe a wà lẹ tọn? To whẹho susu mẹ, nuyọnẹnnu wẹ e na yin nado ‘hẹn nùflo towe dote’ kakajẹ whenue a kọngbedopọ hẹ ojlo mẹjitọ towe lẹ tọn. (Howh. 10:19) Eyin mẹjitọ towe lẹ mọdọ a sè nuhe emi dọ, e na bọawuna yé nado sè nuhe a jlo na dọ. Nuyiwa to aliho he whèwhín mọnkọtọn mẹ na dohia dọ Ohó Jiwheyẹwhe tọn nọ deanana we.
To Akuẹzinzan-Liho
11, 12. (a) Etẹwẹ Ohó Jiwheyẹwhe tọn na mí tuli nado wà gando akuẹ go, podọ etẹwutu? (b) Nawẹ mẹjitọ towe lẹ sọgan gọalọna we nado dowe na akuẹ gbọn?
11 “Akuẹ yin agbó” kavi hihọ́ wẹ Biblu dọ. Ṣigba, wefọ ehe dopolọ sọ dohia dọ nuyọnẹn yin nujọnu tlala hugan akuẹ. (Yẹwh. 7:12) Ohó Jiwheyẹwhe tọn na mí tuli nado yọ́n nujọnu-yinyin akuẹ tọn, e ma yin nado yiwanna ẹn. Naegbọn hiẹ ma dona yiwanna akuẹ? Lẹnnupọndo apajlẹ ehe ji: To alọ núdùdù-datọ azọ́nyọnẹntọ de tọn mẹ, ohí didá yin azọ́nwanu he họakuẹ de. Ṣigba ohí dopolọ sọgan gbleawunamẹ taun eyin e yin yiyizan gbọn wunvinọ kavi mẹhe ma tin to aṣeji de dali. Mọdopolọ, eyin akuẹ yin yiyizan ganji, e sọgan hẹn ale wá. Ṣigba, mẹhe “magbe nado yin adọkunnọ lẹ” nọ saba yí haṣinṣan yetọn hẹ mẹdevo lẹ, haṣinṣan whẹndo tọn yetọn podọ haṣinṣan he yé tlẹ tindo hẹ Jiwheyẹwhe do sanvọ́. Taidi kọdetọn de, ‘yé nọ yí awufiẹsa susu do sọwhán yede gbọn filẹpo.’—Hia 1 Timoti 6:9, 10.
12 Nawẹ a sọgan plọn nado nọ yí akuẹ zan po nuyọnẹn po gbọn? Naegbọn hiẹ ma na dín ayinamẹ mẹjitọ towe lẹ tọn do lehe a na zan akuẹ towe do ji? “Na nuyọnẹntọ nido sè, bosọ sudeji to nupinplọn mẹ; podọ na zinzintọ nido yì jẹ hónamẹ whinwhẹ́n lẹ kọ̀n,” wẹ Sọlomọni wlan. (Howh. 1:5) Anna, viyọnnu jọja de he dín anademẹ dagbe sọn mẹjitọ etọn lẹ dè dọ dọ, “Otọ́ ṣie plọn mi lehe n’na nọ basi titona akuẹzinzan ṣie lẹ do, podọ e sọ do lehe e yin nujọnu nado nọ dowe na akuẹ ṣie do hia mi.” Mọdopolọ, onọ̀ etọn lọsu na ẹn ayinamẹ yọ́n-na-yizan delẹ. “E dohia mi dọ nuyọnẹnnu wẹ e yin nado nọ deahinanu to ofi voovo whẹpo do họ̀,” wẹ Anna dọ. Nawẹ enẹ hẹn ale wá na Anna do? E gblọn dọmọ: “N’penugo todin nado nọ penukundo akuẹzinzan ṣie lẹ go. N’nọ pọ́n akuẹ do zan taun bo nọ dapana ahọ́ he ma yin dandan tọn lẹ, enẹ zọ́n bọ n’tindo mẹdekannujẹ po jijọho ahun mẹ tọn po.”
13. Na nuhe dù whẹho akuẹzinzan tọn, nawẹ a sọgan domẹplọnlọ dewe go gbọn?
13 A sọgan yawu tlọ biọ ahọ́ mẹ eyin a nọ zọ̀n plaplaji nado họnú kavi zan akuẹ kiki nado hẹn awuji họntọn towe lẹ. Etẹwẹ sọgan gọalọna we nado dapana omọ̀ ehelẹ? Na nuhe dù whẹho akuẹzinzan tọn, a dona plọn nado nọ domẹplọnlọ dewe go. Nuhe Ellena he tindo owhe 20 linlán wà niyẹn. E dọ dọ, “Eyin n’tọ́n hẹ họntọn lẹ, n’ko nọ basi tito akuẹ he n’na zan tọn jẹnukọn bo nọ ze dogbó de dai. . . . N’sọ mọdọ nuyọnẹnnu wẹ e yin nado nọ yì họ̀nú kiki hẹ họntọn ṣie he nọ dowe na akuẹ bo nọ na mi tuli nado nọ deahinanu to ofi voovo whẹpo do họ̀ bo ma nọ họ̀ onú tintan he n’mọ lẹ.”
14. Naegbọn a dona họ́ dewe sọta “huhlọn mẹkiklọ adọkunnu lẹ tọn”?
14 Nado dín akuẹ po nado yí i zan po yin adà tangan de to gbẹ̀mẹ. Etomọṣo, Jesu dọ dọ “mẹhe yọnẹn dọ yé tindo nuhudo gbigbọmẹ tọn lẹ” wẹ nọ tindo ayajẹ nujọnu tọn. (Mat. 5:3) E na avase dọ “huhlọn mẹkiklọ adọkunnu lẹ tọn” sọgan fẹayihasẹnamẹ sọn gbigbọnu lẹ ji. (Malku 4:19) To whelọnu lo, lehe e yin nujọnu dọ a ni dike Ohó Jiwheyẹwhe tọn ni nọ deanana we bosọ tindo pọndohlan he sọgbe gando akuẹ go do sọ!
To Whenue A Tin Dewe Ṣo
15. Whetẹnu wẹ e yọnbasi dọ nugbonọ-yinyin towe na Jiwheyẹwhe ni yin whiwhlepọn hugan?
15 Whetẹnu wẹ a lẹndọ nugbonọ-yinyin towe na Jiwheyẹwhe na yin whiwhlepọn hugan—whenue a tin to mẹdevo lẹ mẹ wẹ ya kavi whenue a tin dewe ṣo? Whenue hiẹ tin to wehọmẹ kavi to azọ́nmẹ, hiẹ nọ tin to aṣeji taun gando nudepope he sọgan hẹn haṣinṣan towe hẹ Jiwheyẹwhe gble go. Whenue hiẹ to ayidedai bọ aṣejininọ towe depò wẹ hiẹ nọ tin to owù mẹ hugan nado tùnafọ nujinọtedo walọ dagbe tọn towe lẹ ji.
16. Naegbọn hiẹ dona desọn ojlo mẹ nado nọ setonuna Jehovah etlẹ yin to whenue a tin dewe ṣo?
16 Naegbọn hiẹ dona desọn ojlo mẹ nado nọ setonuna Jehovah etlẹ yin to whenue a tin dewe ṣo? Flindọ a sọgan hẹn awugble Jehovah to numọtolanmẹ-liho kavi hẹn ahun etọn jaya. (Gẹn. 6:5, 6; Howh. 27:11) Nuhe a nọ wà lẹ nọ yinuwado Jehovah ji na ‘e nọ hò towe pọ́n wutu.’ (1 Pita 5:7) E nọ jlo dọ a ni setonuna emi na e nido yin ale na we. (Isa. 48:17, 18) To whenue delẹ to devizọnwatọ Jehovah tọn lẹ mẹ gbẹkọ ayinamẹ etọn go to Islaeli hohowhenu tọn, yé hẹn awusinyẹn ẹn. (Ps. 78:40, 41) Ṣigba, Jehovah tindo owanyi sisosiso na yẹwhegán Daniẹli, na angẹli de ylọ ẹ dọ “Omẹ yiwanna tlala.” (Dan. 10:11) Etẹwutu? Na Daniẹli gbọṣi nugbonọ-yinyin mẹ na Jiwheyẹwhe to whenue e tin edeṣo, e ma yin to whenue e tin hẹ mẹdevo lẹ kẹdẹ gba.—Hia Daniẹli 6:10.
17. Kanbiọ tẹlẹ wẹ a sọgan kanse dewe to whenue a to nudide basi gando ayidedai go?
17 Eyin a na gbọṣi nugbonọ-yinyin mẹ na Jiwheyẹwhe to whenue a tin dewe ṣo, a dona wleawuna “huhlọn wuntuntun tọn [towe] nado nọ yọ́n vogbingbọn to dagbe po oylan po ṣẹnṣẹn” podọ enẹgodo, plọn huhlọn enẹlẹ ‘gbọn yíyí yé zan dali’ nado wà nuhe a yọnẹn dọ e yin dagbe lẹ. (Heb. 5:14) Di apajlẹ, to whenue a to nudide basi gando húnhiho he a nọ sè, sinima he a nọ pọ́n kavi nọtẹn Internet tọn he ji a nọ yì lẹ go, kanbiọ he bọdego ehelẹ na gọalọna we nado de nuhe yin dagbe bo dapana dehe ylan. Kanse dewe dọ: ‘Be ehe na na mi tuli nado nọ do awuvẹmẹ sisosiso hia ya kavi e na yinuwado ji e nado nọ jaya to “tukla” kavi adángbòmẹ mẹdevo tọn mẹ?’ (Howh. 17:5) ‘Be e na gọalọna mi nado “yiwanna dagbe” ya kavi e na hẹn ẹn vẹawuna mi nado “gbẹwanna oylan”?’ (Amọ. 5:15) Nuhe a nọ wà to whenue a tin dewe ṣo nọ do nuhe yin nujọnu hugan na we hia.—Luku 6:45.
18. Etẹwẹ a dona wà eyin a ko to alọdo to walọ ylankan de mẹ to nuglọ, podọ etẹwutu?
18 Etẹwẹ a dona wà eyin a ko to alọdo to walọ he a yọnẹn dọ e ylan de mẹ to nuglọ? Flindọ, “ewọ he ṣinyọnnudo ylanwa etọn ma na wà dagbe: ṣigba mẹdepope he yigbe bosọ jo e dai na mọ lẹblanu.” (Howh. 28:13) Lehe e na yin nulunu nado zindonukọn to ylanwiwa mẹ bo to ‘homẹ hẹngblena gbigbọ wiwe Jiwheyẹwhe tọn’ do sọ! (Efe. 4:30) Dandannu wẹ e yin ma nado whlá ylando depope he a wà do Jiwheyẹwhe po mẹjitọ towe lẹ po. Eyin a wàmọ, e na yin dagbe na we podọ “sunnu mẹho agun tọn lẹ” sọgan gọalọna we taun. Devi Jakọbu dọmọ: “Na yé ni hodẹ̀ do [ylanwatọ lọ] ji, bo sá amisisa na ẹn to oyín Jehovah tọn mẹ. Podọ odẹ̀ yise tọn na hẹn mẹhe to azọ̀njẹ jẹgangan, podọ Jehovah na jlọ ẹ dote. Humọ, eyin e ko wà ylando lẹ, e na yin jijona ẹn.” (Jak. 5:14, 15) Nugbo wẹ dọ ehe sọgan hẹn winyan plá mẹlọ podọ vlavo hẹn kọdetọn vẹadi delẹ wá. Ṣigba eyin a tindo adọgbigbo lọ nado biọ alọgọ, a na whlẹn dewe sọn nugbajẹmẹji depope he na wá sọawuhia to nukọn mẹ si bo mọ kọgbọ he nọ wá sọn ayihadawhẹnamẹnu wiwe de tintindo mẹ.—Ps. 32:1-5.
Nọ Hẹn Homẹ Jehovah Tọn Hùn
19, 20. Etẹwẹ yin ojlo Jehovah tọn na we, podọ etẹwẹ a dona wà?
19 Jehovah yin “Jiwheyẹwhe ayajẹnọ,” podọ ojlo etọn wẹ yindọ hiẹ lọsu ni yin ayajẹnọ. (1 Tim. 1:11) E nọ tindo ojlo nujọnu tọn to hiẹ mẹ. Eyin mẹdevo lẹ ma tlẹ doayi vivẹnu he do a te nado wà nuhe sọgbe go, ewọ nọ yọ́n vivẹnudido towe. Nudepope ma whlá do Jehovah. E nọ to nupọn, e ma yin nado dín nuṣiwa towe lẹ gba, ṣigba nado gọalọna we na a nido wà dagbe. “Nukun [Jiwheyẹwhe] tọn lẹ to godo po nukọn po yì lẹdo aigba lẹpo pete, nado do ede hia huhlọnnọ na ayiha yé mẹhe tọn yin pipé hlan e dè lẹ tọn.”—2 Otan. 16:9.
20 Enẹwutu, dike Ohó Jiwheyẹwhe tọn ni nọ deanana we, bo nọ yí ayinamẹ etọn lẹ do yizan mẹ. Gbọnmọ dali, hiẹ na tindo nuyọnẹn po nukunnumọjẹnumẹ po he a tindo nuhudo etọn nado duto nuhahun sinsinyẹn lẹ ji podọ nado basi nudide sinsinyẹn gbẹ̀mẹ tọn lẹ. E ma yindọ a na hẹn homẹ mẹjitọ towe lẹ po Jehovah po tọn hùn poun wẹ gba, ṣigba a nasọ tindo gbẹzan ayajẹ nujọnu tọn.
[Nudọnamẹ odò tọn]
a Yinkọ lẹ ko yin didiọ.
Nawẹ Hiẹ Na Na Gblọndo Gbọn?
• Etẹwẹ jọja lẹ sọgan wà nado setonuna osẹ́n po hokọnamẹ mẹjitọ yetọn lẹ tọn po bo mọaleyi sọn yé mẹ?
• Naegbọn e yin nujọnu nado tindo pọndohlan he sọgbe gando akuẹ go?
• To whenue a tin dewe ṣo, nawẹ a sọgan gbọṣi nugbonọ-yinyin mẹ na Jehovah gbọn?
[Yẹdide to weda 6]
Be a na gbọṣi nugbonọ-yinyin mẹ na Jiwheyẹwhe to whenue a tin dewe ṣo ya?