Kanbiọ Wehiatọ Mítọn lẹ Tọn

Be Kunnudetọ Jehovah Tọn lẹ Nọ Kẹalọyi Nukunpedomẹgo Dotowhé Tọn Ya?

▪ Jesu dọ dọ “mẹhe to gángán lẹ ma nọ tindo nuhudo dotozọ́nwatọ tọn gba, adavo mẹhe to azọ̀njẹ lẹ.” (Matiu 9:12) E gbọnmọ dali dohia dọ Biblu ma gbẹ́ alọkikẹyi nukunpedomẹgo doto azọ́nyọnẹntọ lẹ tọn. Enẹwutu, Kunnudetọ Jehovah tọn lẹ nọ hùnhomẹ nado kẹalọyi amasin po nukunpedomẹgo dotowhé tọn lẹ po. Ojlo yetọn wẹ nado tindo agbasalilo dagbe bo nọgbẹ̀ dẹn. Na nugbo tọn, taidi Luku he yin Klistiani owhe kanweko tintan tọn de, Kunnudetọ Jehovah tọn delẹ yin doto.—Kọlọsinu lẹ 4:14.

Etomọṣo, Kunnudetọ Jehovah tọn lẹ ma nọ kẹalọyi nukunpedomẹgo he jẹagọdo nunọwhinnusẹ́n Biblu tọn lẹ gba. Di apajlẹ, yé ma nọ kẹalọyi hùndido, na Biblu jẹagọdo ohùn yiyizan nado hẹn ogbẹ̀ dote. (Gẹnẹsisi 9:4; Levitiku 17:1-14; Owalọ lẹ 15:28, 29) Ohó Jiwheyẹwhe tọn sọ jẹagọdo pọngbọ kavi aliho nukunpedomẹgo tọn he bẹ yizan “huhlọn he dazi” kavi afinyọnnuwiwa tọn hẹn lẹ.—Isaia 1:13, NW; Galatianu lẹ 5:19-21.

Doto azọ́nyọnẹntọ susu nọ ze nukunpedomẹgo he ma jẹagọdo nujinọtedo Biblu tọn lẹ donukọnnamẹ. Nukunpedomẹgo mọnkọtọn he Kunnudetọ susu nọ kẹalọyi lẹ nọ saba yọ́n hugan dehe jẹagọdo nubiọtomẹsi Jiwheyẹwhe tọn lẹ.

Na nugbo tọn, linlẹn voovo wẹ gbẹtọ lẹ nọ tindo gando whẹho agbasalilo tọn go. Nukunpedomẹgo he wà dagbe na mẹde sọgan nọma yọ́n na mẹdevo. Enẹwutu, eyin mẹde jlo na yọ́n azọ̀n tangan he jẹ e te po nukunpedomẹgo he sọgbe na azọ̀n etọn po, e na yọ́n dọ ni sè linlẹn doto devo tọn.—Howhinwhẹn lẹ 14:15.

E ma yin Kunnudetọ lẹpo wẹ na basi nudide nukunpedomẹgo tọn dopolọ gba. To whenue osẹ́n Biblu tọn depope ma gando whẹho de go tlọlọ, Ohó Jiwheyẹwhe tọn na dotẹnmẹ Klistiani lẹ nado yí ayihadawhẹnamẹnu yetọn zan. (Lomunu lẹ 14:2-4) Enẹwutu, mẹdopodopo dona basi dodinnanu do nukunpedomẹgo he yin zizedonukọnna ẹn lẹ ji bo hẹn ẹn diun dọ e ma jẹagọdo ayihadawhẹnamẹnu etọn he yin pinplọn gbọn Biblu dali.—Galatianu lẹ 6:5; Heblu lẹ 5:14.

Kunnudetọ de na nọ pọ́n nudide dopodopo bibasi taidi húnkùntọ he to sisẹpọ aliklan he ján de nkọ. Eyin ewọ hodo mọto he to nukọnna ẹn lẹ poun bo họ̀nwezun gbọn aliklan lọ, e sọgan hẹn kọdetọn ylankan wá. Húnkùntọ de he yọnnuin na zọ̀n dẹẹdẹ bo na pọ́n lehe mọto lẹ to yìyì do whẹpo do zindonukọn. Mọdopolọ, Kunnudetọ lẹ ma nọ nọ̀ plaplaji do basi nudide nukunpedomẹgo dotowhé tọn lẹ, mọjanwẹ yé ma nọ hodo linlẹn gbẹtọ lẹ tọn to wunvi mẹ do niyẹn. Kakatimọ, yé nọ gbeje nuzedonukọnnamẹ he yé tindo lẹ pọ́n bo nọ gbadopọnna nunọwhinnusẹ́n Biblu tọn lẹ whẹpo do basi nudide.

Na nugbo tọn, Kunnudetọ Jehovah tọn lẹ nọ yọ́n pinpẹn azọ́n sinsinyẹn po mẹdezejo mẹhe nọ wleawu nukunpedomẹgo dotowhé tọn lẹ po tọn. Yé sọ nọ yọ́n pinpẹn kọgbọ he omẹ enẹlẹ nọ gọalọna yé nado mọ sọn azọ̀n si tọn.