Be Klistiani de Gán Kẹalọyi Nukunpedomẹgo Dotowhé Tọn Ya?
Gblọndo Biblu tọn
Mọwẹ. Jesu dohia dọ hodotọ emitọn lẹ sọgan kẹalọyi nukunpedomẹgo dotowhé tọn whenue e dọ dọ “mẹhe to gángán lẹ ma nọ tindo nuhudo dotozọ́nwatọ tọn gba, adavo mẹhe to azọ̀njẹ lẹ.” (Matiu 9:12) Dile etlẹ yindọ Biblu ma yin owe nukunpedomẹgo dotowhé tọn de sọ, e bẹ nunọwhinnusẹ́n delẹ hẹn he gán deanana mẹhe jlo na hẹn homẹ Jiwheyẹwhe tọn hùn lẹ.
Kanbiọ he a gán kanse dewe lẹ
1. Be n’mọnukunnujẹ nukunpedomẹgo he yin zizedonukọnna mi lọ mẹ ya? Biblu na mí tuli nado dín nudọnamẹ dejidego lẹ kakati nado “yí ohó lẹpo sè.”—Howhinwhẹn lẹ 14:15.
2. Be n’dona kanhose doto devo lẹ wẹ ya? E gán wà dagbe nado kanhose “ayinamẹtọ susu,” titengbe eyin azọ̀n towe sinyẹn.—Howhinwhẹn lẹ 15:22.
3. Be nukunpedomẹgo lọ na biọ dọ ma tùnafọ gbedide Biblu tọn lọ ji nado “nọla . . . na ohùn” wẹ ya?—Owalọ lẹ 15:20.
4. Be mẹgbejepọn kavi nukunpedomẹgo lọ na bẹ afinyọnnuwiwa hẹn wẹ ya? Biblu jẹagọdo “afinyọnnuwiwa.” (Galatianu lẹ 5:19-21) Nado yọnẹn eyin e bẹ afinyọnnuwiwa hẹn, lẹnnupọndo kanbiọ he bọdego lẹ ji:
Be nukunpedomẹgotọ lọ nọ zan afinyọn wẹ ya?
Be nukunpedomẹgo lọ sinai do linlẹn lọ ji dọ azọ̀n lọ ma yin tata, dọ yè hẹn homẹgble numẹsẹ̀n lẹ kavi dọ azétọ lẹ wẹ to godona wẹ ya?
Be e na biọ avọ́sinsan, bogbèsisa, kavi yẹsùdide whẹpo do wleawuna amasin lọ kavi zan ẹn wẹ ya?
5. Be agbasalilo ṣie to ahunmẹduna mi zẹjlẹgo wẹ ya? Biblu na ayinamẹ dọ: “Mì gbọ lẹnpọn dagbenọ-yinyin mìtọn ni yin yinyọnẹn na gbẹtọ lẹpo.” (Filipinu lẹ 4:5) Lẹnpọn dagbenọ-yinyin na gọalọna we nado ze ayiha do ‘nuhe yin nujọnu hugan lẹ ji,’ enẹ wẹ gbigbọnu lẹ ji.—Filipinu lẹ 1:10; Matiu 5:3.