Biblu Nọ Diọ Gbẹzan Mẹtọn

NAWẸ atẹṣitọ de he yiwanna nuhiho punk-rock tọn wagbọn do plọn nado yiwanna mẹdevo lẹ bo dovivẹnu nado nọ gọalọna yé? Etẹwẹ whàn dawe Mexique-nu de nado jo gbẹzan fẹnnuwiwa tọn do? Naegbọn mẹhe yin dopo to kẹkẹ-kùntọ agbàwhlẹntọ he tọ́nta hugan to Japon lẹ mẹ do jo aihun enẹ do nado sẹ̀n Jiwheyẹwhe? Gbọ mí ni pọ́n nuhe omẹ ehelẹ dọ.

“To dai, n’ylanhùn bo nọ kla bosọ nọ wadanu.”—DENNIS O’BEIRNE

OWHE HE MẸ N’YIN JIJI: 1958

OTÒ HE MẸ N’WÁ SỌN: ANGLETERRE

OTÀN ṢIE: ATẸṢITỌ HE YIWANNA NUHIHO PUNK-ROCK TỌN

NUHE N’YIN DAI: Irlande-nu wẹ otọ́ ṣie yin, podọ sinsẹ̀n Katoliki Irlande tọn mẹ wẹ n’yin pinplọn whẹ́n te. Dile etlẹ yindọ yẹn doponọ wẹ nọ saba yì ṣọṣi, ṣọṣi yìyì ma nọ jlo mi sọmọ. Etomọṣo, n’tindo ojlo sinsinyẹn na gbigbọnu lẹ. N’nọ hò Odẹ̀ Oklunọ tọn whẹwhẹ, podọ n’flindọ eyin n’mlọnai to zánmẹ to adọzan ṣie ji, n’nọ lẹnnupọndo zẹẹmẹ etọn ji. N’nọ saba lẹnnupọndo adà voovo odẹ̀ lọ tọn lẹ ji bo nọ tẹnpọn nado yọ́n nuhe adà dopodopo zẹẹmẹdo.

To whenue n’biọ owhe aflanmẹ tọn mẹ, n’biọ ogbẹ́ Rasta tọn mẹ. N’sọ doalọ to ogbẹ́ tonudidọ tọn voovo lẹ mẹ, ehe pipli he jẹagọdo Nazi yin dopo to yé mẹ. Ṣigba, n’wá peve to gbigbọ atẹṣiṣi tọn he nuhotọ punk rock tọn lẹ nọ dohia mẹ. N’nọ nù amasin-adínọ lẹ, titengbe marijuana diblayin egbesọegbesọ. N’wleawuna gbigbọ yamakinanu tọn bo nọ ṣì ahànnu, nọ ze ogbẹ̀ ṣie do owù mẹ bo masọ nọ hò mẹdevo lẹ tọn pọ́n sọmọ. N’nọ ṣiatẹ podọ n’ma nọ jlo na dọho hẹ mẹdepope, adavo n’mọdọ nuhe mẹlọ jlo na dọ yin hójọhó. N’ma nọ jlo dọ mẹdepope ni de fọto ṣie. To egbehe, eyin n’lẹnnupọndo gbẹzan he n’zan wayi ji, n’nọ flindọ to dai, n’ylanhùn bo nọ kla bosọ nọ wadanu. Mẹhe n’jẹakọ hẹ lẹ kẹdẹ wẹ n’nọ do homẹdagbe hia bo nọ nanú.

To whenue n’dibla do owhe 20, n’jẹ ojlo tindo to Biblu mẹ ji. Dopo to họntọn ṣie he nọ sà amasin-adínọ lẹ mẹ jẹ Biblu hia ji to gànpamẹ, podọ yẹn po ewọ po dọho yinukọn gando adà he yiwà sinsẹ̀n, Ṣọṣi po Satani po te to aihọn lọ mẹ go. Yẹnlọsu họ̀ Biblu bo jẹ hihia ẹ ji. Yẹn po họntọn ṣie po nọ hia adà delẹ to Biblu mẹ, bo nọ pli nado dọhodo nuhe mí plọn lẹ ji, bosọ nọ wá tadona de kọ̀n. Mí wàmọ na osun susu.

Delẹ to tadona he kọ̀n mí wá lẹ mẹ die: mí to gbẹnọ to azán godo tọn aihọn ehe tọn lẹ mẹ; Klistiani lẹ dona dọyẹwheho wẹndagbe Ahọluduta Jiwheyẹwhe tọn; yé ma dona yin apadewhe aihọn tọn, kavi donù tonudidọ mẹ; podọ Biblu nọ namẹ ayinamẹ dagbe gando walọyizan go. Mí mọnukunnujẹemẹ hezeheze dọ nuhe Biblu dọ lẹ yin nugbo podọ sinsẹ̀n nugbo dopo gee wẹ dona tin. Ṣigba, sinsẹ̀n tẹwẹ? Mí lẹndọ ṣọṣi nukundeji he nọ doaṣọ́na sinsẹ̀n-họ̀ yetọn bo nọ basi hùnwhẹ bosọ nọ donù tonudidọ mẹ lẹ wẹ, ṣigba mí mọdọ Jesu ma wà onú mọnkọtọn depope. Mí yọnẹn dọ Jiwheyẹwhe ma kẹalọyi sinsẹ̀n enẹlẹ gba, podọ mí basi dide nado dindonanu do sinsẹ̀n he ma diyin sọmọ lẹ ji.

Mí nọ yì mọ delẹ to mẹhe to sinsẹ̀n he ma diyin sọmọ enẹlẹ mẹ bo nọ kàn kanbiọ voovo lẹ sè yé. Mí ko yọ́n nuhe Biblu dọ do kanbiọ enẹlẹ dopodopo ji, enẹwutu mí nọ yọnẹn to afọdopolọji eyin gblọndo yetọn sọgbe hẹ Ohó Jiwheyẹwhe tọn. To hodọdopọ mọnkọtọn lẹ godo, n’nọ saba hodẹ̀ hlan Jiwheyẹwhe dọ, ‘Eyin omẹ enẹlẹ wẹ to sinsẹ̀n nugbo lọ basi, jaale hẹn mi tindo ojlo nado gọ̀ yé mọ whladopo dogọ.’ Ṣigba, to whenue mí ko yí osun susu zan do dọhodopọ hẹ omẹ mọnkọtọn lẹ godo, pipli depope ma penugo nado na gblọndo kanbiọ mítọn lẹ tọn sọn Biblu mẹ; enẹwutu e masọ jlo mi nado doafọna depope to sinsẹ̀n enẹlẹ mẹ ba.

To godo mẹ, yẹn po họntọn ṣie po wá dukosọ hẹ Kunnudetọ Jehovah tọn lẹ. Mí kàn kanbiọ dopolọ lẹ sè yé dile mí ko nọ wà do, podọ yé na mí gblọndo sọn Biblu mẹ. Nuhe yé dọ lẹ sọgbe pẹpẹ hẹ nuhe mí ko plọn lẹ. Enẹwutu mí zindonukọn nado kàn kanbiọ he mí ma ko mọ gblọndo na sọn Biblu mẹ lẹ sè yé—di apajlẹ, mí kanhose yé do nuhe yin pọndohlan Jiwheyẹwhe tọn gando azọ̀-nùnù po amasin-adínọ po go ji. Whladopo dogọ, yé yí Ohó Jiwheyẹwhe tọn zan do na gblọndo mí. Mí yigbe nado yì opli de to Plitẹnhọ Ahọluduta tọn mẹ.

Opli lọ yìyì vẹawuna mi taun. Na n’ma nọ voawu to gbẹtọ mẹ wutu, n’ma jlo dọ mẹhe nọ yawudomẹ bo nọ sọnú ganji he n’mọ to finẹ lẹ ni dọnsẹpọ mi. Na n’lẹndọ delẹ to yé mẹ tindo mẹwhinwhàn he ma sọgbe wutu, e masọ jlo mi nado yì opli depope ba. Ṣigba, dile e ko yin aṣa ṣie do, n’hodẹ̀ hlan Jiwheyẹwhe dọ ni gọalọna mi nado wleawuna ojlo lọ nado gọ̀ omẹ ehelẹ mọ whladopo dogọ eyin e yindọ sinsẹ̀n nugbo lọ mẹ wẹ yé te, podọ n’wá tindo ojlo sinsinyẹn nado plọn Biblu hẹ Kunnudetọ lẹ.

LEHE BIBLU DIỌ GBẸZAN ṢIE DO: N’yọnẹn dọ n’dona jo amasin-adínọ lẹ nùnù do, podọ n’penugo bo wàmọ. Nuhe vẹawuna mi hugan nado jodo wẹ siga nùnù. N’tẹnpọn whlasusu nado jo azọ̀-nùnù do, ṣigba e ma pà mi. To whenue n’sè dọ nuhe gọalọna mẹdelẹ ma nado vọ́ siga nù ba wẹ nado ze siga yetọn dlan, n’hodẹ̀ hlan Jehovah do whẹho lọ ji. Enẹgodo, po alọgọ Jehovah tọn po, n’doalọtena siga nùnù. Ehe plọn mi dọ nujọnu wẹ e yin nado nọ hodẹ̀ ahundopo tọn hlan Jehovah.

Diọdo ayidego tọn devo he n’basi gando nusisọ́ po aṣọ́dido po go. Opli tintan he n’yì to Plitẹnhọ Ahọluduta tọn mẹ, oda ṣie gọ́ bo jlọ podọ n’donú sinmẹ juju de e mẹ bọ e taidi ová ohẹ̀ wunmẹ de he nọ yin paon tọn. Enẹgodo, n’donú koklo-jonọ nkọ de e mẹ. N’nọ do ṣokoto klipaklipa po awù ayúnọ he bẹ nukinkan hẹn lẹ po. Mahopọnna dọ Kunnudetọ lẹ yí homẹdagbe do yihojlẹdohogo hẹ mi, n’ma jlo na diọ. Ṣigba to godo mẹ, n’lẹnnupọndo nuhe 1 Johanu 2:15-17 dọ ji dọmọ: “Mì yiwanna aihọn kavi onú he tin to aihọn mẹ lẹ blo. Eyin mẹde yiwanna aihọn, owanyi Otọ́ tọn ma tin to ewọ mẹ.” N’wá mọdọ nusisọ́ ṣie nọ do owanyi na aihọn hia, podọ nado dohia Jiwheyẹwhe dọ n’yiwanna ẹn, n’dona basi diọdo. Nuhe n’wà niyẹn.

To nukọn mẹ, n’wá mọnukunnujẹemẹ dọ e ma yin Kunnudetọ lẹ wẹ jlo dọ ma nọ yì opli Klistiani tọn lẹ gba. Ṣigba, sọgbe hẹ Heblu lẹ 10:24, 25, n’mọdọ nuhe Jiwheyẹwhe jlo dọ ma wà niyẹn. To whenue n’jẹ opli lẹpo yì ji bo jẹakọ hẹ mẹhe nọ wá opli lẹ, n’basi dide nado klan dee do wiwe na Jehovah bo yí baptẹm.

ALE HE N’MỌYI LẸ: Dotẹnmẹ he Jehovah na mí nado tindo haṣinṣan pẹkipẹki de hẹ ẹ yinuwado ji e taun. Awuvẹmẹ po nukunpedomẹgo etọn po whàn mi nado hodo apajlẹ etọn po Visunnu etọn Jesu Klisti po tọn. (1 Pita 2:21) N’wá mọnukunnujẹemẹ dọ dile n’to vivẹnudo nado wleawuna jẹhẹnu Klistiani tọn, n’dona diọ gbẹtọ-yinyin ṣie. N’tẹnpọn nado nọ do owanyi hia mẹdevo lẹ bo nọ hò yetọn pọ́n. N’dovivẹnu nado nọ hodo apajlẹ Jesu tọn to aliho he mẹ n’nọ yinuwa hẹ asi ṣie po visunnu ṣie po te. Podọ, n’nọ hò mẹmẹsunnu po mẹmẹyọnnu ṣie lẹ tọn po pọ́n taun. Apajlẹ Klisti tọn hihodo gọalọna mi nado nọ do homẹdagbe hia, tindo sisi mẹdetiti tọn podọ nado nọ do owanyi hia mẹdevo lẹ.

‘Yé doyẹyigona mi.’—GUADALUPE VILLARREAL

OWHE HE MẸ N’YIN JIJI: 1964

OTÒ HE MẸ N’WÁ SỌN: MEXIQUE

OTÀN ṢIE: GBẸZAN FẸNNUWIWA TỌN

NUHE N’YIN DAI: N’yin dopo to ovi ṣinawe he mẹjitọ ṣie lẹ ji lẹ mẹ, podọ n’whẹ́n to Mexique to Hermosillo, Sonora, yèdọ lẹdo he mẹ mẹsusu yin hẹntọnọ te de. N’gbẹ́ pò to ovu taun to whenue otọ́ ṣie kú, podọ onọ̀ mítọn nọ wazọ́n nado penukundo mí go. N’nọ saba zọ̀n afọ-vọ́ na mí ma do akuẹ nado họ̀ afọpa wutu. N’gbẹ́ pò to ovu to whenue n’jẹ azọ́nwa ji nado gọalọna whẹndo lọ to akuẹzinzan-liho. Dile e yin do na whẹndo susu, họ̀nù dopo mẹ wẹ mí nọ finyọ́n míde do.

Onọ̀ ṣie ma nọ saba nọ whégbè nado penukundo mí go. To whenue n’tindo owhe 6, dẹpẹ owhe 15 mẹvi de jẹ zinzanhẹ mi ji. E zindonukọn domọ na ojlẹ dindẹn. Taidi kọdetọn de, n’biọ bẹwlu mẹ gando zanhẹmẹ go. N’lẹndọ nuhe sọgbe wẹ e yin nado nọ tindo kọndopọ zanhẹmẹ tọn hẹ sunnu. To whenue n’dín alọgọ doto po sinsẹ̀ngán lẹ po tọn, yé hẹn mi deji dọ nuhe wà n’te ma ylan podọ jọwamọnu wẹ e yin.

To whenue n’do owhe 14, n’de nado nọ sọnú bo nọ yinuwa taidi yọnnu bọ sunnu lẹ nọ tindo kọndopọ zanhẹmẹ tọn hẹ mi. N’wàmọ na owhe 11, bo tlẹ nọpọ́ hẹ sunnu voovo lẹ to whenẹnu. To godo mẹ, n’plọn oda-zọ́n bo hùn ṣọfu de nado nọ doaṣọ́na gbẹtọ lẹ. Etomọṣo, n’ma do ayajẹ. N’nọ saba tindo ayimajai po numọtolanmẹ flumẹjijẹ tọn po. N’nọ mọdọ nuhe wà n’te ma sọgbe. N’jẹ kinkanse dee ji dọ, ‘Be pipli he jọmẹ bọ yè sọgan dejidego de tin ya?’

N’flinnu jẹ mẹdaho ṣie yọnnu ji. Ewọ jẹ Biblu plọn hẹ Kunnudetọ Jehovah tọn lẹ ji bo yí baptẹm to godo mẹ. E nọ dọ nuhe plọn e te lẹ na mi, ṣigba n’ma nọ na ayidonugo nuhe dọ e te. Etomọṣo, gbẹzan etọn gọna lehe ewọ po asu etọn po te nọ jlo mi. N’mọdọ ewọ po asu etọn po yiwanna yede taun bo nọ yinuwa hẹ yedelẹ po sisi po. Yé nọ do homẹdagbe hia yede. To godo mẹ, dopo to Kunnudetọ Jehovah tọn lẹ mẹ jẹ Biblu plọn hẹ mi ji. Tlolo whẹ́, n’nọ plọnnu mọmọ poun—na n’ma tindo ojlo na nupinplọn lọ sọmọ wutu. Ṣigba e ma dẹn bọ ninọmẹ lọ diọ.

LEHE BIBLU DIỌ GBẸZAN ṢIE DO: Kunnudetọ lẹ basi oylọna mi nado wá dopo to opli yetọn lẹ tẹnmẹ, podọ n’yì. E jiawu do mi to whenue n’yì. To paa mẹ, gbẹtọ lẹ nọ ṣàn mi kò ṣigba Kunnudetọ lẹ ma wàmọ. Yé yawu do mi bosọ doyẹyigona mi. Enẹ whàn mi taun.

Owanyi ṣie na Kunnudetọ lẹ sinyẹn deji to whenue n’yì plidopọ yetọn de. N’mọdọ etlẹ yin to pipli daho lẹ tẹnmẹ, omẹ ehelẹ nọ yinuwa taidi mẹdaho ṣie yọnnu—enẹ wẹ yindọ yé nọ do homẹdagbe po owanyi ahundopo tọn po hia yedelẹ. N’kanse dee dọ be e ma yin omẹ ehelẹ wẹ pipli he jọmẹ bọ yè sọgan dejidego he n’ko to dindin sọn whenu dindẹn die nẹ. Pọninọ yetọn, lehe yé yiwanna yede bo nọ yí Biblu zan nado na gblọndo kanbiọ dopodopo tọn do jiawu do mi taun. N’mọdọ nuhe Biblu dọ lẹ wẹ nọ yinuwado gbẹzan yetọn ji. Humọ, n’mọdọ n’dona basi diọdo susu whẹpo do lẹzun dopo to yé mẹ.

Na nugbo tọn, n’mọdọ n’dona diọ gbẹzan ṣie mlẹnmlẹn, na gbẹzan yọnnusi tọn wẹ n’nọ zan dai. N’dona basi diọdo gando lehe n’nọ dọho, nọ yinuwa, nọ sọnú, nọ basi oda do, po gbẹdido ṣie po go. Họntọn ṣie dai tọn lẹ jẹ ṣinṣàn mi ko ji dọmọ: “Etẹ wà a ka te niyẹn? Lehe a te dai ma ka ylan nẹ. Jo Biblu pinplọn do. Nude ma whè do we.” Ṣigba, nuhe vẹawuna mi hugan nado jodo wẹ gbẹzan fẹnnuwiwa tọn he n’yí do dó aṣa.

Nalete, n’yọnẹn dọ diọdo daho mọnkọtọn lẹ sọgan yọnbasi, na nuhe Biblu dọ to 1 Kọlintinu lẹ 6:9-11 yinuwado ji e taun. E dọmọ: “Etẹ nkọ! Be mì ma yọnẹn dọ mawadodonọ lẹ ma na dugu ahọluduta Jiwheyẹwhe tọn wẹ ya? Yè klọ mì blo. Galọtọ lẹ, kavi boṣiọ-sẹ̀ntọ lẹ, kavi ayọdetọ lẹ, kavi sunnu he nọ yin hihla dai na lẹndai zanhẹmẹ he jẹagọdo jọwamọ tọn lẹ, kavi sunnu he nọ zanhẹ sunnu lẹ . . . ma na dugu ahọluduta Jiwheyẹwhe tọn. Ṣogan, nuhe delẹ to mì mẹ yin dai niyẹn. Ṣigba, mì ko yin kiklọ́we.” Jehovah gọalọna gbẹtọ lẹ nado basi diọdo lẹ to hohowhenu, podọ e gọalọna yẹnlọsu ga. E biọ vivẹnudido vẹkuvẹku to asi e na owhe susu, ṣigba ayinamẹ po owanyi Kunnudetọ lẹ tọn po gọalọna mi taun.

ALE HE N’MỌYI LẸ: Gbẹzan he sọgbe de zan wẹ n’te todin. N’ko wlealọ, podọ yẹn po asi ṣie po nọ plọn nunọwhinnusẹ́n Biblu tọn lẹ visunnu mítọn. Gbẹzan ṣie dai tọn gbọnvo taun na dintọn, podọ n’to vivi gbigbọnu po lẹblanulọkẹyi susu lẹ po tọn dù. N’to sinsẹ̀n taidi mẹho agun tọn, podọ n’ko gọalọna mẹdelẹ nado plọn nugbo Ohó Jiwheyẹwhe tọn. Diọdo he n’basi to gbẹzan ṣie mẹ lẹ hẹn homẹ hùn onọ̀ ṣie sọmọ bọ e kẹalọyi plọnmẹ Biblu de bo ko lẹzun Klistiani he yí baptẹm de sọn whenu dindẹn die. Humọ, nọviyọnnu ṣie de he nọ zan gbẹzan fẹnnuwiwa tọn dai ko lẹzun dopo to Kunnudetọ Jehovah tọn lẹ mẹ.

Delẹ to mẹhe tlẹ nọ na mi tuli nado zindonukọn to gbẹzan ṣie dai tọn mẹ lẹ mẹ mọdọ n’ko diọ. Podọ n’yọ́n nuhe gọalọna mi nado basi diọdo enẹlẹ. To dai, n’din ayinamẹ sọn mẹhe to otẹn dagbe mẹ nado gọalọna mi lẹ dè ṣigba ayinamẹ he ma sọgbe lẹ kẹdẹ wẹ yé na mi. Etomọṣo, Jehovah gọalọna mi taun. Dile etlẹ yindọ n’nọ tindo numọtolanmẹ nuvọ́nọ-yinyin tọn, Jehovah doayi go e bo yí owanyi po homẹfa po do yinuwa hẹ mi. Na Jiwheyẹwhe jiawu, nuyọnẹntọ po owanyinọ lọ po doayi go e bo jlo dọ ma hẹn gbẹzan ṣie pọnte wutu, enẹ whàn mi nado basi diọdo.

“N’nọ tindo numọtolanmẹ pekọ matindo, ṣokẹdẹninọ po nuvọ́nọ-yinyin po tọn.”—KAZUHIRO KUNIMOCHI

OWHE HE MẸ N’YIN JIJI: 1951

OTÒ HE MẸ N’WÁ SỌN: JAPON

OTÀN ṢIE: KẸKẸ-KÙNTỌ AGBÀWHLẸNTỌ DE

NUHE N’YIN DAI: Tòpẹvi he to abọẹ to bato-glintẹn he tin to lẹdo Shizuoka tọn de mẹ wẹ n’whẹ́n te to Japon, podọ mí mẹ ṣinatọ̀n he to whẹndo mítọn mẹ lẹ nọ nọ̀ owhé pẹvi de gbè. Otọ́ ṣie hùn ṣọfu de nado nọ sà kẹkẹ bo nọ jlado yé do. Sọn ovu gbọ́n wẹ otọ́ ṣie nọ plan mi yì agbàwhinwhlẹn kẹkẹ-kùnkùn tọn lẹ tẹnmẹ bo hẹn mi nado tindo ojlo na aihun enẹ. Yanwle otọ́ ṣie tọn wẹ yindọ ma lẹzun kẹkẹ-kùntọ akonka de. Whenue n’gbẹ́ pò to wehọmẹ dokọ̀ tọn, e jẹ kẹkẹ-kùnkùn plọn mi ji klinkán-klinkán. To whenue n’biọ wehọmẹ daho, whla atọ̀n wẹ n’tọ́nta debọdo-dego to agbàwhinwhlẹn he nọ yin bibasi to whemẹwhemẹ lẹ mẹ. N’mọ gbedewema yí nado yì wehọmẹ alavọ tọn, ṣigba n’basi dide nado yì wehọmẹ kẹkẹ-kùnkùn tọn tlọlọ. To whenue n’do owhe 19, n’lẹzun kẹkẹ-kùntọ akonka de.

To whenẹnu, yanwle ṣie wẹ nado lẹzun kẹkẹ-kùntọ he tọ́nta hugan to Japon. Linlẹn ṣie wẹ nado jẹ adọkun na whẹndo ṣie nido vò. N’ylọ kẹkẹ-kùnkùn lọ dọ azọ́n. Eyin n’pehẹ apọṣimẹnu kavi aliglọnnamẹnu de to whenue n’to kẹkẹ-kùnkùn lọ plọn, n’nọ dọna dee whlasusu dọ azọ́n he n’dona wà to gbẹ̀mẹ niyẹn podọ n’dona zindonukọn! Vivẹnudido ṣie lẹ zọ́n bọ n’jẹ kọdetọn dagbe tindo ji. To owhe tintan he n’biọ wehọ lọ mẹ, n’yin tọ́ntlọ́ngbọ́n to mẹhe ṣẹṣẹ jẹ kẹkẹ-kùnkùn plọn ji lẹ mẹ. To owhe awetọ mẹ, n’pegan na agbàwhinwhlẹn he na yin bibasi nado yọ́n mẹhe na yin tọ́ntlọ́ngbọ́n to Japon blebu. Whla ṣidopo wẹ n’tọ́nta taidi omẹ awetọ.

Na n’yin dopo to mẹhe tọ́nta lẹ mẹ wutu, hagbẹ lẹ nọ ylọ mi dọ afọ sinsinyẹnnọ Tokai tọn, yèdọ lẹdo de to Japon. N’nọ whlẹnagbà taun. Dile ojlẹ to yìyì, hagbẹ ṣie lẹ nọ dibuna mi, na n’nọ kùn kẹkẹ egblemaku bo ma nọ gbẹ́ nuhe na jọ. Akuẹ he n’nọ dù tli taun, podọ n’mọdọ n’sọgan họ̀ nudepope he jlo mi. N’họ̀ owhé he tindo họ̀nù de he mẹ maṣinu he yọ́n na aihundida lanmẹyiya tọn lẹ tin te bosọ họ̀ ohún vẹnpẹn de he dibla vẹahi sọ owhé de. Na obu lọ dọ yẹn nikaa gọjẹ ohẹ́n mẹ wutu, n’jẹ akuẹ và do ohọ̀ po aigba po gọna ajọwiwa pọmẹ tọn mẹ ji.

Etomọṣo, n’nọ tindo numọtolanmẹ pekọ matindo, ṣokẹdẹninọ po nuvọ́nọ-yinyin po tọn. N’ko wlealọ to whenẹnu bo ko jivi, ṣigba n’ma nọ saba yinuwa hẹ whẹndo ṣie po homẹfa po. N’nọ yawu gblehomẹ do asi ṣie po ovi ṣie lẹ po go na numadinu lẹ. Eyin yé mọdọ nukunmẹ ṣie diọ, yé nọ yọnẹn dọ n’ko to homẹgble niyẹn.

Ṣigba to nukọn mẹ, asi ṣie jẹ Biblu plọn hẹ omẹ Jehovah tọn lẹ ji. Ehe hẹn diọdo susu wá. E dọ dọ emi jlo na jẹ opli yetọn lẹ yì ji, enẹwutu n’basi dide dọ whẹndo lọ blebu wẹ na nọ yì. N’gbẹ́ flin whèjai he mẹho agun tọn de wá owhé ṣie gbè bo jẹ nuplọn hẹ mi ji. Nuhe n’plọn yinuwado ji e taun.

LEHE BIBLU DIỌ GBẸZAN ṢIE DO: N’ma sọgan wọn lehe Efesunu lẹ 5:5 yinuwado ji e do gbede. E dọmọ: “Galọtọ kavi omẹ mawé kavi nukunkẹnnọ—enẹ wẹ nado yin boṣiọ-sẹ̀ntọ de—ma tindo ogú depope to ahọluduta Klisti tọn po Jiwheyẹwhe tọn po mẹ.” N’mọdọ agbàwhinwhlẹn enẹ yin nudopolọ po akọhiho po podọ e sọ nọ nọgodona nukunkẹn. Ayihadawhẹnamẹnu ṣie hoapa. N’wá mọdọ eyin n’na hẹn homẹ Jehovah tọn hùn, n’dona jo aihundida enẹ do. Ṣigba, nudide enẹ vẹawuna mi taun.

Owhe he mẹ n’tindo kọdetọn dagbe te hugan ṣẹṣẹ fó bọ n’sọ to jejeji na devo. Ṣigba n’mọdọ Biblu gọalọna mi nado tindo jijọho ahun mẹ tọn—yèdọ nude he gbigbọ agbàwhinwhlẹn tọn ma nọ namẹ paali! Whla atọ̀n poun wẹ n’tindo mahẹ to agbàwhinwhlẹn lọ mẹ to whenue n’jẹ Biblu plọn ji godo, ṣigba to ahun ṣie mẹ, n’ma ko jodo pete. Humọ, n’biọ bẹwlu mẹ gando lehe n’na penukundo whẹndo ṣie go do. Enẹ hẹn ayimajai wá na mi bọ n’ma yọ́n nuhe n’na wà, podọ hẹnnumẹ ṣie lẹ jẹ tuklado mi ji gando sinsẹ̀n yọyọ he mẹ n’biọ go. Otọ́ ṣie jẹflumẹ taun. Na apọṣi mi zẹjlẹgo wutu, n’tindo ayimajai sinsinyẹn bọ enẹ hẹn azọ̀n apà-to-homẹ tọn plá mi.

Biblu pinplọn po opli omẹ Jehovah tọn lẹ tọn yìyì po wẹ gọalọna mi to ojlẹ enẹ mẹ. Vudevude, yise ṣie lodo dogọ. N’biọ Jehovah dọ ni sè odẹ̀ ṣie lẹ bosọ gọalọna mi nado kudeji dọ e nọ sè odẹ̀ nugbonugbo. Ayimajai he n’tindo depò taun to whenue asi ṣie na mi jide dọ e ma yin dandan dọ emi ni nọ owhé whanpẹnọ de mẹ whẹpo do tindo ayajẹ gba. Gbọnmọ dali, n’jẹ nukọnzindo ji vudevude.

ALE HE N’MỌYI LẸ: N’mọ nugbo-yinyin nuhe Jesu dọ to Matiu 6:33 mẹ tọn. E dọmọ: “Enẹwutu, mì zindonukọn nado to ahọluduta lọ po dodowiwa etọn po dín whẹ́, podọ onú devo ehe lẹpo na yin yiyidogọ na mì.” Mí ma jẹdò “onú devo” he go Jesu donu lẹ tọn—yèdọ dandannu gbẹ̀mẹ tọn lẹ tọn pọ́n gbede. Dile etlẹ yindọ akuẹ he nọ biọ whégbè na mi todin yin mado 30 dehe n’nọ dù dai tọn, yẹn po whẹndo ṣie po ma jẹdò nudepope tọn sọn owhe 20 die gbọ́n.

Nuhe tlẹ sọ nọ hẹn ayajẹ wá na mi hugan wẹ yindọ, eyin n’tindo mahẹ to nuwiwa Klistiani tọn lẹ mẹ hẹ yisenọ hatọ ṣie lẹ, n’nọ mọ ayajẹ po pekọ po hugan gbede pọ́n. Azán lẹ nọ yawu juyi. Gbẹzan whẹndo tọn ṣie ko pọnte dogọ todin. Visunnu ṣie atọ̀n lẹ po asi yetọn lẹ po ko lẹzun sinsẹ̀n-basitọ Jehovah tọn lẹ.