“Yẹwheho Wẹndagbe Ahọluduta lọ Tọn Ehe Na Yin Didọ”
“Yẹwheho wẹndagbe ahọluduta lọ tọn ehe na yin didọ to aigba fininọ lẹpo ji taidi okunnu de na akọta lẹpo; podọ whenẹnu wẹ opodo lọ na wá.”—MATIU 24:14.
Nuhe E Zẹẹmẹdo: Wẹndagbe-kantọ Luku na linlin dọ Jesu “zingbejizọnlin sọn tòdaho de mẹ jẹ tòdaho de mẹ podọ sọn gbétatò de mẹ jẹ gbétatò de mẹ, bo to yẹwhehodọ bosọ to wẹndagbe ahọluduta Jiwheyẹwhe tọn lá.” (Luku 8:1) Jesu lọsu dọmọ: “Yẹn dona . . . lá wẹndagbe ahọluduta Jiwheyẹwhe tọn, na ehe wutu wẹ yẹn do yin didohlan.” (Luku 4:43) E do devi etọn lẹ hlan nado dọyẹwheho to tòpẹvi po gbétatò lẹ po mẹ bo dọna yé to enẹgodo dọmọ: “Mìwlẹ na yin kunnudetọ ṣie . . . kaka yì awà he dẹn hugan aigba tọn lẹ ji.”—Owalọ lẹ 1:8; Luku 10:1.
Lehe Klistiani Dowhenu Tọn lẹ Jẹ Nubiọtomẹsi Enẹ Kọ̀n Do: Devi Jesu tọn lẹ ma dọngbàn nado wà nuhe Jesu dọna yé. “Egbesọegbesọ to tẹmpli mẹ podọ sọn whédegbè jẹ whédegbè, yé zindonukọn nado to mẹplọn bo to wẹndagbe lọ lá mapote gando Klisti Jesu go.” (Owalọ lẹ 5:42) Hodotọ Jesu tọn lẹpo wẹ tindo mahẹ to azọ́n yẹwhehodidọ tọn lọ mẹ. Whenuho-kantọ Neander wlan dọ “Celsus, wekantọ tintan he jẹagọdo sinsẹ̀n Klistiani tọn, wlanwe to aliho mẹṣanko tọn mẹ gando nugbo lọ go dọ sekanfun-gbẹ̀ntọ lẹ, afọpa-jladotọ lẹ, kanlinyú-zọ́nwatọ lẹ, yèdọ mẹhe yin agblinọ hugan to gbẹtọ lẹ ṣẹnṣẹn lẹ nọ dọyẹwheho wẹndagbe lọ tọn po zohunhun po.” To owe etọn Les premiers siècles de l’Eglise mẹ, Jean Bernardi wlan dọmọ: “[Klistiani lẹ] dona tọ́n bo dọho to filẹpo podọ na mẹlẹpo. To alihogbó lẹ ji podọ to tòdaho lẹ mẹ, to nọtẹn gbangba tọn lẹ podọ to owhé lẹ gbè. Eyin gbẹtọ lẹ yí yé kavi lala. . . . Kaka yì fie dẹn hugan to aigba lọ ji lẹ.”
Mẹnu lẹ Wẹ Jẹ Nubiọtomẹsi Enẹ Kọ̀n to Egbehe? Yẹwhenọ sinsẹ̀n Anglicane tọn de he nọ yin David Watson wlan dọmọ: “Awugbopo ṣọṣi tọn nado ylọ yẹwhehodidọ po mẹpinplọn po dọ nujọnu yin dopo to nuhewutu mẹsusu ma tindo ojlo to Jiwheyẹwhe sinsẹ̀n mẹ to egbehe lẹ mẹ.” To owe etọn Pourquoi les catholiques s’en vont-ils? (esp.) mẹ, José Luis Pérez Guadalupe dọhodo azọ́n sinsẹ̀n Evangelisti, Adventiste po devo lẹ po tọn ji bo dohia dọ “yé ma nọ yì sọn whédegbè jẹ whédegbè.” Ṣigba, e wlan gando Kunnudetọ Jehovah tọn lẹ go dọmọ: “Aṣa yetọn wẹ nado nọ yì sọn whédegbè jẹ whédegbè.”
Ayidonugo Jonathan Turley tọn he sọgbe hẹ lẹnpọn dagbe bosọ fọnjlodotenamẹ de sọawuhia to owe lọ Cato Supreme Court Review, 2001-2002 mẹ dọmọ: “Eyin yè zan hogbe lọ Kunnudetọ Jehovah tọn lẹ, onú tintan he nọ wá ayiha mẹ na mẹsusu wẹ yẹwhehodọtọ he nọ dla omẹ pọ́n to whégbè to ogàn he ma sọgbe lẹ mẹ. Na Kunnudetọ Jehovah tọn lẹ, nado yì sọn họndekọn-jẹ-họndekọn nado hẹnmẹ zun devi ma yin dohia yise tọn kẹdẹ gba, ṣigba nuhe ji yise yetọn sinai do niyẹn.”
[Apotin to weda 9]
Mẹnu lẹ Wẹ Hiẹ Mọdọ Yé Tindo Ohia Voovo Enẹlẹ?
Po ohia he mí gbadopọnna to hosọ debọdo-dego ehelẹ mẹ lẹ po, mẹnu lẹ wẹ hiẹ mọdọ yé tindo ohia voovo sinsẹ̀n Klistiani nugbo tọn lọ lẹ? Dile etlẹ yindọ pipli po ṣọṣi fọtọ́n susu lẹ po wẹ tin he nọ sọalọakọ́n nado yin Klistiani, flindọ Jesu dọna hodotọ etọn lẹ dọmọ: “E ma yin mẹlẹpo he to didọna mi dọ, ‘Oklunọ, Oklunọ,’ wẹ na biọ ahọluduta olọn tọn mẹ gba, ṣigba ewọ he to ojlo Otọ́ ṣie he tin to olọn mẹ tọn wà.” (Matiu 7:21) Nado yọ́n mẹhe to ojlo Otọ́ lọ tọn wà lẹ—yèdọ mẹhe tindo ohia voovo sinsẹ̀n Klistiani nugbo tọn lọ lẹ—bo kọnawudopọ hẹ yé sọgan hẹn dona mavọmavọ lẹ wá na we to Ahọluduta Jiwheyẹwhe tọn glọ. Na nudọnamẹ dogọ gando Ahọluduta Jiwheyẹwhe tọn po dona he e na hẹnwa lẹ po go, hiẹ sọgan kanhose Kunnudetọ Jehovah tọn he yí linlinnamẹwe ehe na we lẹ.—Luku 4:43.