Tito-Basina Agun lẹ Nado Dọyẹwheho Ahọluduta Jiwheyẹwhe Tọn
Whenuena Jesu Klisti tin to aigba ji, ewọ dọyẹwheho Ahọluduta Jiwheyẹwhe tọn tọn, bo nọ to yìyì sọn gbetatò de jẹ devo mẹ podọ sọn otò daho de jẹ devo mẹ. Ewọ sọ plọn nuplọntọ etọn lẹ bo do yé hlan nado yì wazọn dopolọ ga. Whẹpo ewọ do hẹaga yì olọn mẹ, e degbena hodotọ etọn lẹ nado hẹn akọta lẹpo zun nuplọntọ lẹ. Sọn bẹjẹeji etọn taun, Agun Klistiani fliflimẹ tọn yin tito-basina nado dọyẹwheho wẹndagbe lọ tọn. Fidepope he nuplọntọ lẹ yì, yè nọ mọ dọ yé to yẹwheho Ahọluduta Jiwheyẹwhe tọn tọn dọ.—Matiu 4:17, 23; 10:1-16; 28:19, 20; Luku 4:43, 44; 8:1; 10:1-9; Owalọ lẹ 1:8; 4:31; 5:42; 8:12; 19:8; 28:23, 30, 31; Lomunu lẹ 10:9, 10, 14.
To dọdai Jesu tọn he yin vivọnu titonu lọ tọn mẹ, ewọ dọmọ: “Yè nasọ dọ yẹwheho wẹndagbe ahọludu tọn he lẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.” Yẹwhehodidọ ehe yin dandannu tintan de na agun Klistiani tọn to egbehe.—Matiu 24:14; Malku 13:10.
Lẹdo aihọn pe, agun Kunnudetọ Jehovah tọn lẹ tọn lẹpo yin tito-basina nado nọ basi dlapọn na aigba-denamẹ yetọn to ninọmẹ tito-basinanu tọn de mẹ po yẹwheho wẹndagbe Ahọluduta Jiwheyẹwhe tọn lọ po. Na nido yin bibasi to ninọmẹ nunọnukannu tọn mẹ, to otò dopodopo mẹ alahọ Ogbẹ́ Watch Tower tọn nọ dè awa de na agun dopodopo na kunnudide. Agun lọ nọ má aigba-denamẹ lọ do pẹvi pẹvi, he nọ yin didena mẹhe na jlo nado ze azọngban lọ nado mọ dọ yé basi dlapọn na gbẹtọ lẹ.—1 Kọlintinu lẹ 14:33, 40.
Kunnudetọ Jehovah tọn lẹ nọ saba jẹ gbẹtọ lẹ de gbọn yìyì sọn whedegbe jẹ whedegbe dali. To opli agun tọn yetọn lẹ mẹ, Kunnudetọ Jehovah tọn lẹ ko nọ yin pinplọn nado basi nuzedonukọnnamẹ kleun lẹ he yin wẹndomẹ Ahọluduta tọn lọ to ohọ̀n lẹ kọn gbọn Biblu yetọn lẹ yiyizan dali. Kunnudetọ lẹ nọ hẹn owe he sinai do Biblu ji lẹ nado jodo na whetọ lọ he jlo na tindo oyọnẹn susu dogọ Ohó Jiwheyẹwhe tọn tọn.
Nado sọgan na mẹdopodopo to aigba-denamẹ lọ ji dotẹnmẹ hundote de nado sè wẹndomẹ nujọnu tọn Ahọluduta tọn lọ, Kunnudetọ lẹ nọ tindo kandai nudọnamẹ tọn de dile ye to yìyì sọn whedegbe jẹ whedegbe, he to didọhia fie gbẹtọ lẹ ma tin to whegbe te kavi fie na whẹwhinwhẹn devo delẹ wutu, e ma yọnbasi nado na kunnudide to gigọmẹ te. Oylọ de na yin bibasi to ojlẹ devo mẹ. To fie ojlo yin didohia te, enẹ nọ yin ayidego, podọ Kunnudetọ lẹ nọ lẹkọwá nado na nudọnamẹ Owe wiwe lẹ tọn dogọ. Plọnmẹ Biblu gbesisọ tọn de na yin bibasi, eyin omẹ lọ jlo. Ehe lẹpo nọ yin wiwà vọnu.
Kunnudetọ Jehovah tọn lẹ sọ nọ yí linlinnamẹwe lẹ do nukọnna mẹhe to wiwáyì to ali lẹ ji. To aliho ehe mẹ yé nọ penugo nado dukosọhẹ gbẹtọ susu lẹ he yé sọgan nọ ma mọ to whegbe. Vivẹnu nujọnu tọn de nọ yin dido nado jẹ omẹ lẹpo he na jlo na sè oho lọ lẹ de.—Owalọ lẹ 17:17; Osọhia 14:6, 7; 22:17.
Etẹwutu Kunnudetọ lẹ nọ to oylọ basi janwẹ to whenue suhugan gbẹtọ lẹ tọn ma do ojlo depope hia? E ko yin ayidego dọ ninọmẹ mẹdopodopo lẹ tọn nọ saba diọ bọ ye nọ yigbe ganji to dlapọn devo whenu, kavi omẹ devo delẹ to owhé lọ gbe sọgan yin kosọduhẹ he na do ojlo hia.
Jesu dọ na nuplọntọ etọn lẹ domọ: “Mì din ahọludu Jiwheyẹwhe tọn, po dódó etọn po whẹ.” Yẹwheho Ahọluduta Jiwheyẹwhe tọn didọ yin ada tangan de to Ahọluduta lọ dindin whẹ mítọn mẹ, podọ Kunnudetọ Jehovah tọn lẹ nọ yi ehe do basi yanwle nujọnu tọn talala de to gbẹ̀zan yetọn lẹ mẹ.—Matiu 6:33; 2 Timoti 4:2.
• Azọ́n Jesu tọn po Klistiani fliflimẹ tọn lẹ tọn po tẹwẹ yin didọdai nado yin wiwà to azan mítọn gbe ga?
• Nawẹ azọ́n kunnudide Kunnudetọ Jehovah tọn lẹ tọn yin tito-basina gbọn?
• Etẹwutu Kunnudetọ lẹ nọ to oylọ basina gbẹtọ lẹ janwẹ to whenue gbẹtọ susu lẹ ma nọ do ojlo hia?
[Yẹdide lẹ to weda 16, 17]
Kunnudetọ Jehovah tọn lẹ to yẹwheho Ahọluduta Jiwheyẹwhe tọn tọn dọ to otò vovo lẹ mẹ
Thaïlande
Mexique
Pays-Bas
Corée
Curaçao
Ghana
Angleterre
Australie