Hẹn Linlẹn Niyaniya-Yinyin Tọn Towe Go
“Dọyẹwheho ohó lọ tọn, gbọṣi e kọ̀n po niyaniya-yinyin po.”—2 TIM. 4:2.
BE HIẸ SỌGAN NA GBLỌNDO YA?
Naegbọn Klistiani owhe kanweko tintan tọn lẹ dọyẹwheho po linlẹn niyaniya-yinyin tọn po?
Nawẹ mí sọgan hẹn linlẹn niyaniya-yinyin tọn mítọn go gbọn?
Naegbọn yẹwhehodidọ Ahọluduta lọ tọn do yin whẹho niyaniya tọn todin hugan gbede pọ́n?
1, 2. Kanbiọ tẹlẹ wẹ fọndote gando gbedide lọ dọ mí ni ‘gbọṣi azọ́n yẹwhehodidọ tọn kọ̀n’ po niyaniya-yinyin po go?
MẸHE azọ́n yetọn nọ biọ dọ yé ni whlẹn ogbẹ̀ mẹdevo tọn lẹ nọ wazọ́n po linlẹn niyaniya-yinyin tọn po. Di apajlẹ, eyin miyọ́n to núdù to fide, mẹhe nọ ṣimiyọ́n lẹ nọ zọ̀n plaplaji yì filọ na yé yọnẹn dọ ogbẹ̀ gbẹtọ lẹ tọn tin to owù mẹ.
2 Taidi Kunnudetọ Jehovah tọn lẹ, todido mítọn wẹ nado gọalọna gbẹtọ lẹ na yé nido yin whinwhlẹngán. Enẹ wẹ zọ́n bọ mí nọ ylọ azọ́n he yin zizedo alọmẹ na mí nado dọyẹwheho wẹndagbe Ahọluduta lọ tọn dọ nujọnu. Etomọṣo, mí ma nọ zọ̀n plaplaji bo nọ to dindanpe poun gba. Eyin mọ wẹ, etẹ dọ wẹ apọsteli Paulu te to whenue e na ayinamẹ dọmọ: “Dọyẹwheho ohó lọ tọn, gbọṣi e kọ̀n po niyaniya-yinyin po”? (2 Tim. 4:2) Nawẹ mí sọgan dọyẹwheho po linlẹn niyaniya-yinyin tọn po gbọn? Podọ naegbọn azọ́n mítọn dona yin wiwà to niyaniya mẹ sọmọ?
NAEGBỌN MÍ DONA DỌYẸWHEHO TO NIYANIYA MẸ?
3. Etẹwẹ na yin kọdetọn lọ eyin gbẹtọ lẹ kẹalọyi kavi gbẹ́ owẹ̀n Ahọluduta lọ tọn?
3 Eyin hiẹ lẹnnupọndo lehe azọ́n yẹwhehodidọ tọn mítọn sọgan whlẹn ogbẹ̀ mẹdevo lẹ tọn gán do ji, hiẹ na mọdọ wẹndagbe lọ lilá yin whẹho niyaniya tọn. (Lom. 10:13, 14) Ohó Jiwheyẹwhe tọn dọmọ: “Whenuena yẹn sọ dọ hlan mẹylankan, dọ, hiẹ na kú nugbonugbo; eyin ewọ lẹ́ sọn ylando etọn mẹ, bo basi whẹdida po dodo po; . . . ewọ na nọgbẹ̀ nugbonugbo, ewọ ma na kú gba. Depope sọn ylando etọn he ewọ ko wà mẹ ma na yin finflin do ewọ go gba.” (Ezek. 33:14-16) Na nugbo tọn, Biblu dọna mẹhe nọ lá owẹ̀n Ahọluduta lọ tọn lẹ dọmọ: “Hiẹ na whlẹn dewe po mẹhe nọ dotoaina we lẹ po gán.”—1 Tim. 4:16; Ezek. 3:17-21.
4. Naegbọn atẹṣiṣi he na fọ́n to owhe kanweko tintan whenu do hẹn yẹwhehodidọ zun azọ́n niyaniya tọn?
4 Nado mọnukunnujẹ nuhewutu Paulu dotuhomẹna Timoti nado dọyẹwheho po linlẹn niyaniya-yinyin tọn po mẹ, mì gbọ mí ni gbadopọnna lẹdo wefọ he ji hosọ ehe sinai do tọn. Mí hia dọmọ: “Nọ dọyẹwheho ohó lọ tọn, gbọṣi e kọ̀n po niyaniya-yinyin po to ojlẹ he bọawu mẹ podọ to ojlẹ awusinyẹn tọn mẹ, nọ yí linsinsinyẹn po azọ́nyinyọnẹn mẹpinplọn tọn lẹpo po do wọhẹmẹ, do gbẹnunamẹ, do dotuhomẹnamẹ. Na ojlẹ lọ ja whenuena yé ma na nọ tẹdo oplọn he pegan lọ go, ṣigba to kọndopọ mẹ hẹ ojlo yetọn titi lẹ, yé na bẹ mẹplọntọ lẹ pli he na nọ dọ nuhe otó yetọn jlo na sè lẹ na yé; podọ yé na lẹ́ otó yetọn sọn nugbo lọ ji.” (2 Tim. 4:2-4) Jesu dọ dọdai dọ atẹṣiṣi de na wá aimẹ. (Mat. 13:24, 25, 38) Na ojlẹ enẹ to sisẹpọ to whenẹnu wutu, Timoti dona “nọ dọyẹwheho ohó lọ tọn” to niyaniya mẹ etlẹ yin to agun lọ mẹ, na nuplọnmẹ lalo lẹ nikaa hẹn Klistiani lẹ buali. Ogbẹ̀ gbẹtọ lẹ tọn tin to owù mẹ. Egbehe lo?
5, 6. Linlẹn he gbayipe tẹlẹ wẹ mí sọgan sè to lizọnyizọn mítọn mẹ?
5 To egbehe, atẹṣitọ lẹ ko fọ́n to sinsẹ̀n-bibasi nugbo mẹ bosọ sudeji. (2 Tẹs. 2:3, 8) Nuplọnmẹ lalo tẹlẹ wẹ nọ yọ́nsè na gbẹtọ lẹ? To fisusu, gbẹtọ lẹ nọ yí zohunhun do plọnmẹ dọ nulẹ wá aimẹ na yede kẹdẹdile sinsẹ̀nnọ lẹ nọ tindo zohunhun na sinsẹ̀n yetọn do. Dile etlẹ yindọ hogbe lẹnunnuyọnẹn tọn lẹ wẹ nọ yin yiyizan nado basi zẹẹmẹ nuplọnmẹ nulẹ tin yededenu tọn, nuplọnmẹ enẹ ko dibla lẹzun sinsẹ̀n de bo nọ yinuwado nukun he gbẹtọ lẹ do nọ pọ́n Jiwheyẹwhe po mẹdevo lẹ po ji. Nuplọnmẹ lalo devo he sọ gbayipe wẹ yindọ Jiwheyẹwhe ma nọ hò mítọn pọ́n, enẹwutu nuhudo ma tin dọ mí ni plọn nado yọ́n mẹhe ewọ yin. Naegbọn nuplọnmẹ enẹlẹ do nọ dọ̀n gbẹtọ lẹ sọmọ bo nọ hẹn yé nado damlọn to gbigbọ-liho? Na linlẹn de tin to godona yemẹpo, enẹ wẹ ‘Hiẹ sọgan wà nudepope he jlo we, na mẹhe na hẹn we nado dogbè de ma tin.’ Na nugbo tọn, linlẹn enẹ nọ yọ́nsè na mẹsusu.—Hia Psalm 10:4.
6 Ṣigba nudevo lẹ sọ tin he nọ yọ́nsè na gbẹtọ lẹ. Delẹ to mẹhe nọ yì ṣọṣi lẹ mẹ nọ jlo dọ sinsẹ̀ngán yetọn lẹ ni dọna yé dọ, ‘Mahopọnna nudepope he a wà, Jiwheyẹwhe yiwanna we.’ Yẹwhenọ po sinsẹ̀ngán lẹ po nọ dọ nuhe mẹdevo lẹ nọ jlo na sè na yé gbọn didohia yé dọ hùnwhẹ Ṣọṣi tọn lẹ po boṣiọ lẹ po nọ hẹnmẹ tindo dona Jiwheyẹwhe tọn dali. Ṣọṣi-yitọ ehelẹ sọgan nọma yọnẹn dọ yé tin to ninọmẹ ylankan mẹ. (Ps. 115:4-8) Etomọṣo, eyin mí tẹnpọn nado fọ́n yé sọn amlọn gbigbọmẹ tọn mẹ na yé nido mọnukunnujẹ owẹ̀n nugbo Biblu tọn mẹ, Ahọluduta Jiwheyẹwhe tọn sọgan hẹn ale wá na yé.
ETẸWẸ YẸWHEHODIDỌ PO LINLẸN NIYANIYA-YINYIN TỌN PO ZẸẸMẸDO?
7. Nawẹ mí sọgan do linlẹn niyaniya-yinyin tọn hia gbọn?
7 Doto-mẹzẹtọ he ylọ azọ́n etọn dọ nujọnu de dona ze ayidonugo lẹpo do nuhe wà e te ji, na ogbẹ̀ awutunọ lẹ tọn tin to owù mẹ wutu. Mọdopolọ, to lizọnyizọn Klistiani tọn mítọn mẹ, mí sọgan do linlẹn niyaniya-yinyin tọn hia gbọn ayidonugo nina azọ́n mítọn dali. Mí sọgan wà ehe eyin mí nọ lẹnnupọndo whẹho, kanbiọ kavi nudọnamẹ he na fọnjlodotena mẹhe mí dukosọ hẹ lẹ ji. Linlẹn niyaniya-yinyin tọn tintindo sọgan sọ whàn mí nado vọ́ tito mítọn lẹ jlado nado nọ dla gbẹtọ lẹ pọ́n to whenue alọnu yetọn ma ján sọmọ.—Lom. 1:15, 16; 1 Tim. 4:16.
8. Etẹwẹ nuyiwa po linlẹn niyaniya-yinyin tọn po nọ saba biọ to mí si?
8 Linlẹn niyaniya-yinyin tọn tintindo sọ biọ dọ mí ni nọ wà nuhe yin nujọnu hugan lẹ jẹnukọn. (Hia Gẹnẹsisi 19:15.) Di apajlẹ, mí ni dọ dọ to whenue doto towe ko dindona azọ̀n he jẹ a te godo, e ylọ we biọ họmẹ bo dọna we po ahundopo po dọmọ: “A mọ! Ninọmẹ towe biọ dọ a ni yawu yí nude wà. Osun dopo poun wẹ a tindo nado họ̀nwezun depope.” E họnwun dọ hiẹ ma na bẹ wezun sọn ohọ̀ lọ mẹ taidi mẹhe zọ̀n plaplaji jei miyọ́n ṣí gbé. Ṣigba ayihaawe ma tin dọ hiẹ na dotoaina ayinamẹ etọn lẹ bo na yì whégbè bosọ lẹnnupọndo nuhe a dona wà ji.
9. Naegbọn mí sọgan dọ dọ Paulu dọyẹwheho po linlẹn niyaniya-yinyin tọn po to whenue e tin to Efesu?
9 Mí sọgan mọnukunnujẹ linlẹn niyaniya-yinyin tọn he Paulu dohia mẹ, eyin mí hia nuhe e dọna mẹho agun Efesu tọn lẹ gando yẹwheho wẹndagbe tọn he e dọ to agbegbe Asia tọn ji go. (Hia Owalọ lẹ 20:18-21.) E họnwun dọ sọn azán tintan he gbè e jẹ finẹ, e hẹn alọnu ján to yẹwheho wẹndagbe lọ tọn didọ na gbẹtọ lẹ sọn whédegbè jẹ whédegbè mẹ. Humọ, na owhe awe, e “nọ dọ togunmẹho egbesọegbesọ to wehọmẹ Tilannusi tọn.” (Owalọ 19:1, 8-10) Na nugbo tọn, linlẹn niyaniya-yinyin tọn Paulu tọn yinuwado nuwiwa egbesọegbesọ tọn etọn lẹ ji. Nuflinmẹ lọ nado ‘gbọṣi lizọnyizọn mítọn kọ̀n po niyaniya-yinyin po’ ma dona hẹn lizọnyizọn lọ zun agbàn pinpẹn de na mí gba. Etomọṣo, mí dona ze azọ́n yẹwhehodidọ tọn lọ do otẹn tintan mẹ to gbẹzan mítọn mẹ.
10. Naegbọn homẹ mítọn dona hùn dọ Klistiani lẹ yinuwa po linlẹn niyaniya-yinyin tọn po to nudi owhe 100 die?
10 Apajlẹ pipli pẹvi Biblu Plọntọ lẹ tọn de he bẹ yẹwheho wẹndagbe lọ tọn didọ jẹeji jẹnukọnna 1914 do nuhe linlẹn niyaniya-yinyin tọn tintindo zẹẹmẹdo hia. Dile etlẹ yindọ yé ma sù sọmọ, yé mọnukunnujẹ niyaniya-yinyin ojlẹ lọ tọn mẹ bo yí zohunhun do bẹ azọ́n yẹwhehodidọ Ahọluduta lọ tọn jẹeji. Yẹwhehodidọ yetọn nọ yin zinzinjẹgbonu to linlinwe kanweko susu lẹ mẹ podọ yé nọ ze tito-to-whinnu de he bẹ yẹdide adógo tọn sinmẹnọ lẹ gọna yẹdide he zọnpọ po hoyidokanji po he nọ yin yiylọdọ “Photo-Drame de la Création” hẹn lẹ donukọnnamẹ. To aliho ehe mẹ, yé nọ hẹn wẹndagbe lọ jẹ gbẹtọ livi susu lẹ dè. Eyin yé ma ko tindo linlẹn niyaniya-yinyin tọn wẹ, be suhugan mítọn na ko sè owẹ̀n Ahọluduta lọ tọn ya?—Hia Psalm 119:60.
PAYI MA NADO HẸN LINLẸN NIYANIYA-YINYIN TỌN TOWE BU
11. Naegbọn mẹdelẹ nọ hẹn linlẹn niyaniya-yinyin tọn yetọn bu?
11 Ayihafẹsẹnamẹnu lẹ sọgan glọnalina mẹde ma nado ylọ azọ́n yẹwhehodidọ tọn dọ nujọnu. Aihọn Satani tọn yin awuwlena nado hẹn alọnu mítọn ján to afọdidona yanwle mẹdetiti tọn po onú ovọ́ lẹ po mẹ. (1 Pita 5:8; 1 Joh. 2:15-17) Mẹhe ze sinsẹ̀nzọn Jehovah tọn do otẹn tintan mẹ to ojlẹ he wayi mẹ delẹ nọ wá hẹn linlẹn niyaniya-yinyin tọn yetọn bu. Di apajlẹ, Klistiani owhe kanweko tintan tọn de he nọ yin Dema ko yin “azọ́nwatọ hatọ” Paulu tọn dai, ṣigba aihọn ylankan lọ fẹayihasẹna Dema. Kakati nado to tulina Paulu to ojlẹ tukla tọn de mẹ, Dema jo e do.—File. 23, 24; 2 Tim. 4:10.
12. Dotẹnmẹ hundote tẹwẹ mí tindo todin, podọ dotẹnmẹ hundote tẹlẹ wẹ mí na tindo to sọgodo?
12 Eyin mí na hẹn linlẹn niyaniya-yinyin tọn mítọn go, mí dona hoavùn sọta mẹwhinwhàn lọ nado duvivi nuhe aihọn nọ zedonukọnnamẹ lẹ tọn to gigọ́ mẹ. Mí dona dovivẹnu nado “tẹdo ogbẹ̀ nujọnu tọn lọ go gligli.” (1 Tim. 6:18, 19) Matin ayihaawe, hiẹ yise dọ ogbẹ̀ madopodo to aigba ji to Ahọluduta Jiwheyẹwhe tọn glọ na hùn dotẹnmẹ dote na we nado duvivi nuwiwa he a yiwanna lẹ tọn zọnmii. Ṣigba todin, dotẹnmẹ hundote lọ nado gọalọna mẹdevo lẹ nado lùn Amagẹdọni tọ́n ma pé awe.
13. Todin he mí ko lẹzun Klistiani, nawẹ mí sọgan hẹn linlẹn niyaniya-yinyin tọn mítọn go gbọn?
13 To whenuena e yindọ suhugan mẹhe tin to aihọn lọ mẹ lẹ tọn wẹ to amlọndọ to gbigbọ-liho, etẹwẹ sọgan gọalọna mí ma nado hẹn linlẹn niyaniya-yinyin tọn mítọn bu? Mí dona flindọ ojlẹ de ko tin bọ mílọsu ma yọ́n Jiwheyẹwhe bo ma tindo todido. Ṣigba, mí wá plọn nugbo lọ gando Jehovah po Jesu po go bo tindo lẹblanulọkẹyi lọ nado nọ plọn nugbo lọ mẹdevo lẹ. (Hia Efesunu lẹ 5:14.) Paulu wlan dọmọ: “Mì nọ payi tlala dọ lehe mì to zọnlinzin do ni ma yin taidi nulunọ blo ṣigba taidi nuyọnẹntọ lẹ, mì nọ fli ojlẹ he jẹ lẹ na mìde, na ylankan wẹ azán lẹ wutu.” (Efe. 5:15, 16) To aihọn ylankan ehe mẹ, mì gbọ mí ni nọ “fli ojlẹ” na nuwiwa he sọgan hẹn mí gbọṣi nukle to gbigbọ-liho lẹ.
MÍ TO GBẸNỌ TO OJLẸ AYIDEGO TỌN DE MẸ
14-16. Naegbọn yẹwhehodidọ Ahọluduta lọ tọn do yin whẹho niyaniya tọn todin hugan gbede pọ́n?
14 Lizọnyizọn Klistiani tọn ko yin azọ́n niyaniya tọn sọn dowhenu, ṣigba e biọ ayidonugo taun todin hugan gbede pọ́n. Sọn 1914 gbọ́n, ohia tintin tofi Klisti tọn he yin zẹẹmẹ basina to Ohó Jiwheyẹwhe tọn mẹ ko họnwun hezeheze. (Mat. 24:3-51) Ogbẹ̀ gbẹtọ lẹ tọn tin to owù mẹ hugan gbede pọ́n. Mahopọnna gbekọndopọ jijọho tọn he otò huhlọnnọ lẹ basi to agọe, yé gbẹ́ tindo bọmbu nuzanusẹvaun tọn 2 000 he sọgan yin dide to fidepope to aigba ji. Whlasusu wẹ aṣẹpatọ lẹ na linlin dọ awhànfunnu lẹ to búbú. Be e yọnbasi dọ delẹ ni tin to nukunbianamẹtọ lẹ si wẹ ya? Mẹdelẹ dọ dọ gbẹtọvi lẹpo sọgan yin vivasudo po awubibọ po to awhàn he nukunbianamẹtọ de fọndote mẹ. Ṣigba, e ma yin awhàn kẹdẹ wẹ to ogbẹ̀ gbẹtọvi lẹ tọn zedo owù mẹ gba.
15 Linlinwe lẹ dọho gando azán mítọn go to 2009 dọmọ: “Ninọmẹ aimẹ tọn he fọ́n bo to didiọ wẹ nuhahun he ze ogbẹ̀ gbẹtọ lẹ tọn do owù mẹ hugan to owhe kanweko 21tọ mẹ. Nuyiwadomẹji etọn lẹ na bẹpla dagbemẹninọ suhugan gbẹtọ lẹ tọn to owhe he na bọdego lẹ mẹ bo nasọ ze ogbẹ̀ po agbasalilo liva susu gbẹtọ lẹ tọn po do owù daho mẹ.” (The Lancet po University College London po) Podọ agayiyi ohù tọn, akúdido, singigọ, azọ̀n-bẹplamẹ, jẹhọn-ahizi, po awhànfunfun do adọkunnu jọwamọ tọn he to vivọ̀ lẹ tamẹ po sọgan hẹn lẹdo susu gble. Na nugbo tọn, awhàn po nugbajẹmẹji lẹ po to ogbẹ̀ gbẹtọ lẹ tọn zedo owù mẹ taun.
16 Mẹdelẹ sọgan lẹndọ owù he awhànfunnu nuzanusẹvaun tọn lẹ yiyizan bẹhẹn lẹ na dekọtọn do nujijọ delẹ mẹ he na hẹn dọdai Jesu tọn gando azán godo tọn lẹ go di. Ṣigba, suhugan gbẹtọ lẹ tọn ma yọ́n nuhe dọdai lọ zẹẹmẹdo na taun tọn. Na owhe susu todin, mí ko mọ nujijọ voovo lẹ he dohia dọ Klisti ko tin tofi podọ opodo titonu ehe tọn ko sẹpọ. (Mat. 24:3) Nujijọ mọnkọtọn lẹ ma ko sù sọmọ pọ́n to whenuho mẹ. Din wẹ ojlẹ lọ na gbẹtọ lẹ nado fọ́n sọn amlọn gbigbọmẹ tọn mẹ. Lizọnyizọn mítọn sọgan gọalọ nado fọ́n yé.
17, 18. (a) Nawẹ “ojlẹ he mẹ mí tin te ehe” nọ yinuwado mí ji gbọn? (b) Etẹlẹ wẹ sọgan whàn gbẹtọ lẹ nado diọ pọndohlan yetọn gando owẹ̀n Ahọluduta lọ tọn go?
17 Whenu vude poun wẹ mí tindo nado do owanyi mítọn na Jehovah hia bo dotana azọ́n yẹwhehodidọ tọn he yin zizedo alọmẹ na mí nado wà to azán godo tọn lẹ mẹ lọ. Nuhe Paulu dọna Klistiani owhe kanweko tintan tọn lẹ to Lomu tindo zẹẹmẹ taun to egbehe, na e dọmọ: “Mìwlẹ yọ́n ojlẹ he mẹ mí tin te ehe, dọ ojlẹ lọ ko wá na mì nado fọ́n sọn amlọn mẹ, na whlẹngán mítọn ko sẹpọ hugan ojlẹ he mẹ mí lẹzun yisenọ te.”—Lom. 13:11.
18 Nujijọ he Biblu dọ dọdai etọn gando azán godo tọn lẹ go sọgan gọalọna mẹdelẹ nado mọdọ yé tindo nuhudo gbigbọmẹ tọn. Mẹdevo lẹ nọ wá doayi e go dọ gbẹtọvi lẹ tindo nuhudo alọgọ tọn dile yé to nulẹnpọn do awugbopo gandudu gbẹtọvi lẹ tọn nado pehẹ nuhahun akuẹzinzan tọn lẹ, owù he awhànfunnu lẹ nọ hẹnwa, danuwiwa, kavi husudo lẹdo tọn ji. Podọ nujijọ whẹndo mẹ tọn lẹ, taidi azọ̀n, gbẹdai, kavi okú mẹyiwanna de tọn nọ hẹn mẹdevo lẹ nado yọnẹn dọ yé tindo nuhudo gbigbọmẹ tọn. Enẹwutu, eyin mí nọ tindo mahẹ to lizọnyizọn lọ mẹ, mí sọgan gọalọna omẹ mọnkọtọn lẹ.
LINLẸN NIYANIYA-YINYIN TỌN WHÀN MẸSUSU
19, 20. Nawẹ linlẹn niyaniya-yinyin tọn tintindo ko whàn Klistiani susu nado ze yanwle devo lẹ donukọnna yede gbọn?
19 Linlẹn niyaniya-yinyin tọn tintindo ko whàn Klistiani susu nado hẹn lizọnyizọn yetọn gblodeji. Di apajlẹ, asu po asi po Équateur-nu de basi dide nado hẹn gbẹzan yetọn bọawu to whenue yé dotoaina tito-to-whinnu azán plidopọ vonọtaun tọn 2006 tọn he hosọ etọn yin “Hẹn Nukun Towe Yin Dopo” godo. Yé basi kandai nuhe yé ma tindo nuhudo etọn lẹ tọn, podọ to osun atọ̀n gblamẹ, yé sẹtẹn sọn owhé yetọn he tindo abò atọ̀n mẹ yì owhé he tindo abò dopo mẹ, sà delẹ to nutindo yetọn lẹ mẹ bosọ sú ahọ́ he yé dù lẹpo. To ojlẹ vude godo, yé bẹ gbehosọnalitọ alọgọtọ tọn jẹeji bo kẹalọyi ayinamẹ nugopọntọ lẹdo tọn nado yì sẹ̀n to agun de he mẹ nuhudo sù te.
20 Mẹmẹsunnu he wá sọn agewaji Amelika tọn de wlan dọmọ: “Yẹn po asi ṣie po yí baptẹm e ko pé owhe 30 to whenue mí yì plidopọ de to 2006. To whenue mí lẹkọ jei whé to tito-to-whinnu lọ godo, mí dọhodo lehe mí sọgan yí ayinamẹ lọ nado hẹn gbẹzan mítọn bọawu zan do ji. (Mat. 6:19-22) Mí tindo owhé atọ̀n, aigba, mọto vẹnpẹn lẹ, tọjihun dopo, po mọto he tindo adọtẹn de po. Na mí mọdọ mí ko dovọ́na gbigbọnu lẹ taun wutu, mí basi dide nado biọ sinsẹ̀nzọn whenu-gigọ́ tọn mẹ. To 2008, mí lẹzun gbehosọnalitọ whepoponu tọn bo kọnawudopọ hẹ viyọnnu mítọn to azọ́n lọ mẹ. Ayajẹ nankọ die nado wazọ́n to kọndopọ pẹkipẹki mẹ hẹ mẹmẹsunnu lẹ! Mí ko penugo nado sẹ̀n to fihe nuhudo sù te. Humọ, mí ko dọnsẹpọ Jehovah pẹkipẹki na mí nọ wà susu dogọ to lizọnyizọn lọ mẹ wutu. Ale daho hugan he mí mọyi wẹ nado mọ lehe homẹ nọ hùn gbẹtọ lẹ do to whenue yé sèhó gando nugbo Ohó Jiwheyẹwhe tọn go bo mọnukunnujẹemẹ.”
21. Oyọnẹn tẹwẹ nọ whàn mí nado yinuwa?
21 Mí yọ́n nuhe to tepọn aihọn ylankan ehe—enẹ wẹ “azán whẹdida tọn po vasudo omẹ jijọ-madi-Jiwheyẹwhe tọn lẹ tọn po.” (2 Pita 3:7) Oyọnẹn he mí tindo gando Ohó Jiwheyẹwhe tọn go nọ whàn mí nado yí zohunhun do lá nukunbibia daho he ja lọ po aihọn yọyọ he na bọdego po. Mí gbẹ́ tindo numọtolanmẹ lọ dọ whẹho niyaniya tọn wẹ e yin nado lá todido nujọnu tọn na gbẹtọ lẹ gando sọgodo go. Gbọn mahẹ gigọ́ tintindo to azọ́n niyaniya tọn ehe mẹ dali, mí nọ dohia dọ mí yiwanna Jiwheyẹwhe po kọmẹnu mítọn lẹ po nugbonugbo.