“Be A Gan Jaale bo De Fọto Na Mí?”

To vivọnu azán awetọ plidopọ agbegbe de tọn, Josué he yin dopo to hagbẹ whẹndo Bẹtẹli Mexique tọn lẹ mẹ to sadi gbọn tòdaho Querétaro tọn mẹ. Javier po Maru po, yèdọ asu po asi po Colombie-nu de basi dlapọn wá tòdaho lọ mẹ bo biọ to Josué si nado de fọto na yé. Na ewọ po Kunnudetọ he zọ̀n hẹ ẹ lẹ po sọnú ganji bo do kalti akọ́nnu tọn yetọn wutu, asu po asi po lọ kanse yé eyin nuwiwa gbedewema yíyí tọn kavi nuwiwa vonọtaun devo tẹnmẹ wẹ yé lẹkọ sọn. Josué basi zẹẹmẹ dọ plidopọ agbegbe Kunnudetọ Jehovah tọn lẹ tọn de tẹnmẹ wẹ yé lẹkọ sọn bosọ basi oylọna asu po asi po lọ nado wá to dimanche.

Asu po asi po lọ mọdọ winyan na hù emi gbau nado biọ gbẹtọ lẹ mẹ, na yé ma hẹn avọ̀ he yé sọgan do yì nuwiwa mọnkọtọn tẹnmẹ. Etomọṣo, Josué dọ yinkọ etọn na yé bosọ na yé sọha alokan wekantẹn alahọ Mexique tọn.

E paṣa Josué nado sè ogbè Javier tọn to osun ẹnẹ godo. Asu po asi po lọ yì plidopọ lọ nugbo bo jlo dọ Kunnudetọ Jehovah tọn lẹ ni wá dla yé pọ́n to Tòdaho Mexique tọn mẹ, fie yé nọ nọ̀ to ojlẹ enẹ mẹ. To madẹnmẹ, Javier po Maru po jẹ Biblu plọn ji bosọ jẹ opli lẹ yì ji hadopo. To osun ao godo, yé lẹzun wẹnlatọ. Dile etlẹ yindọ yé dona sẹtẹn yì Toronto to Canada, yé gbẹ́ to nukọnyi to gbigbọ-liho bo wá yí baptẹm.

To godo mẹ, Javier kanwehlan Josué bo basi zẹẹmẹ nuhe whàn ẹn nado kẹalọyi nugbo lọ tọn. E dọmọ: “Whẹpo yẹn po asi ṣie po do yì plidopọ lọ, mí ko dọhodopọ dọ mí tindo nuhudo anademẹ Jiwheyẹwhe tọn. To whenue mí mọ lehe mì sọnú do to gbenẹgbe, mí lẹndọ opli vonọtaun de wẹ mì na ko yì. To plidopọ lọ ji, lehe yè plan mí yì fihe mí na sinai do, alọgọ he mí mọyi nado hodo wefọ he yin hihia sọn Biblu mẹ lẹ, po walọ dagbe mẹplidopọ lẹ tọn po yinuwado mí ji taun. E taidi dọ mẹde ma tlẹ na ayidonugo awusọhia mítọn.”

Lehe hogbe Ahọlu Sọlomọni nuyọnẹntọ lọ tọn lẹ yin nugbo to whẹho Josué tọn mẹ do sọ! Sọlomọni wlan dọmọ: “Donú towe to afọnnu fuu, podọ to whèjai a hẹn alọ towe dote blo: na hiẹ ma yọ́n ehe na wà dagbe, ehe kavi dọ́n tọn, kavi eyin yé omẹ awe lẹ na yọ́n do zẹnzẹn.” (Yẹwh. 11:6) Be hiẹ lọsu sọgan do okún nugbo lọ tọn gbọn dotẹnmẹ hundote lẹ yiyizan nado basi oylọna mẹdevo lẹ wá plidopọ agbegbe tọn kavi togunmẹho he to nukọn ja de tẹnmẹ dali ya? Jehovah sọgan yí we zan nado dọ̀n mẹhe to anademẹ etọn dín taidi Javier po Maru po lẹ.—Isa. 55:1.

[Yẹdide to weda 32]

Sọn amiyọn mẹ yì adusi: Alejandro Voeguelin, Maru Pineda, Alejandro Pineda, Javier Pineda, po Josué Ramírez po to alahọ Mexique tọn