Kanbiọ lẹ sọn Wehiatọ lẹ Dè

Be Klistiani de sọgan peve to yẹdide fẹnnuwiwa tọn pinpọn mẹ sọmọ bọ e na yin didesẹ sọn agun mẹ ya?

▪ Mọwẹ. Enẹ do nuhewutu e yin dandannu dọ mí ni dapana yẹdide fẹnnuwiwa tọn wunmẹ lẹpo hia—vlavo yé sọawuhia to owe, linlinwe, sinima, po video po mẹ kavi to Internet ji.

Yẹdide fẹnnuwiwa tọn gbayipe gbọn filẹpo to aihọn mẹ. Internet ko hẹn ẹn bọawu hugan gbede pọ́n nado mọ yẹdide fẹnnuwiwa tọn lẹ podọ ehe ko hẹn sọha mẹhe nọ pọ́n ẹn lẹ tọn jideji taun. Mẹdelẹ nọ mọ yẹdide fẹnnuwiwa tọn lẹ gbọn kosọ dali to nọtẹn Internet tọn lẹ ji. Mẹdevo lẹ nọ desọn ojlo mẹ bo nọ yì pọ́n yẹdide fẹnnuwiwa tọn lẹ to Internet ji. Ehe wiwà sọgan bọawuna yé vlavo na yé tin to owhé yetọn gbè kavi to azọ́nmẹ fie mẹde ma sọgan mọ yé te. Naegbọn whẹho ehe dona duahunmẹna Klistiani lẹ taun?

Mí mọ whẹwhinwhẹ́n tangan de to avase Jesu tọn mẹ dọmọ: “Mẹdepope he zindonukọn nado to yọnnu de pọ́n kaka bo tindo ojlo zogbe de na ẹn ko deayọ hẹ ẹ dote to ahun etọn mẹ.” (Mat. 5:28) Nugbo wẹ dọ asu po asi po lẹ sọgan tindo kọndopọ zanhẹmẹ tọn bosọ mọ awuvivi to e mẹ. (Howh. 5:15-19; 1 Kọl. 7:2-5) Ṣigba, yẹdide fẹnnuwiwa tọn lẹ nọ do zanhẹmẹ he ma sọgbe hia bo nọ do linlẹn mawé he go Jesu na avase gando lẹ do ahun mẹ na gbẹtọ lẹ. E họnwun dọ, owe yẹdide fẹnnuwiwa tọn lẹ hihia kavi yẹdide lọ lẹ pinpọn jẹagọdo gbedide Jiwheyẹwhe tọn he dọmọ: “Mì hù awutugonu mìtọn he to aigba ji lẹ, enẹ wẹ galilọ, mawé, ojlo zogbe zanhẹmẹ tọn, ojlo ylankan po nukunkẹn po, he yin boṣiọ-sinsẹ̀n.”—Kọl. 3:5.

Etẹwẹ sọgan jọ eyin Klistiani de pọ́n yẹdide fẹnnuwiwa tọn whladopo kavi whla awe? Whẹho etọn sọgan yin yiyijlẹdo ninọmẹ ylankan he mẹ Psalm-kantọ Asafu mọ ede te to ojlẹ de mẹ go to whenuena e dọmọ: “Ṣigba eyin yẹn tọn wẹ, afọ ṣie ko blá fẹ́; zọnlin ṣie blá tlẹ́.” Nawẹ Klistiani lọ sọgan tindo ayihadawhẹnamẹnu wiwe de bo tin to jijọho mẹ hẹ Jiwheyẹwhe gbọn eyin e nọ pọ́n yẹdide sunnu kavi yọnnu he to omẹ́ lẹ, kavi omẹ awe he to zinzanhẹ yede tọn? E na tindo numọtolanmẹ dopolọ taidi Asafu he dọmọ: “Na azán popo gbè wẹ yè to yadona mi, hihò ṣie sọ yin afọnnu-afọnnu.”—Ps. 73:2, 14.

Klistiani he nọ pọ́n yẹdide fẹnnuwiwa tọn lẹ dona fọ́n sọn amlọn mẹ bo kẹalọyi alọgọ gbigbọmẹ tọn. E sọgan mọ alọgọ mọnkọtọn yí to agun Klistiani tọn mẹ na Biblu dọmọ: “Eyin omẹ de tlẹ ṣì afọ ze whẹpo do wá yọ́n ẹn, mì mẹhe pegan to gbigbọ-liho lẹ ni tẹnpọn nado gọ̀ omẹ mọnkọtọn do otẹn etọn mẹ to gbigbọ walọmimiọn tọn mẹ, na dopodopo mìtọn ni payi ede go.” (Gal. 6:1) Mẹho agun tọn dopo kavi awe sọgan na ẹn alọgọ he sin nuhudo e tindo. Yé sọgan hodẹ̀ na ẹn po yise lọ po dọ Jehovah “na hẹn mẹhe to azọ̀njẹ jẹgangan,” podọ ylando etọn “na yin jijona ẹn.” (Jak. 5:13-15) Mẹhe dín alọgọ nado duto yẹdide fẹnnuwiwa tọn pinpọn ji lẹ ko wá mọdọ onú dagbe wẹ e yin nado dọnsẹpọ Jiwheyẹwhe, dile Asafu mọ do.—Ps. 73:28.

Ṣigba, apọsteli Paulu dọ dọ mẹhe waylando delẹ ma lẹnvọjọ sọn “mawé yetọn po galilọ po gọna wantuntun he yé ko basi lẹ” mẹ.a (2 Kọl. 12:21) Weyọnẹntọ Marvin R. Vincent wlanwe gando hogbe Glẹkigbe tọn he yin lilẹdo “mawé” tofi go dọ e bẹ “linlẹn dihó he hiọawu” tọn hẹn. E blawu dọ yẹdide fẹnnuwiwa tọn delẹ nọ ylan taun hugan yẹdide mẹhe to omẹ́ lẹ kavi sunnu po yọnnu po he to zinzanhẹ yede tọn. Yẹdide fẹnnuwiwa tọn he ylan bo hiọawu taun delẹ nọ do zanhẹmẹ to mẹhe tindo vijinu dopolọ lẹ ṣẹnṣẹn, zanhẹmẹ pọmẹ tọn, zanhẹmẹ gbẹtọ po kanlin po tọn, mẹho he to zinzanhẹ yọpọvu lẹ, zanhẹmẹ gánnugánnu pọmẹ tọn, kanyinylan do yọnnu lẹ go, yọnnu he yè blá bo to zinzanhẹ lẹ, kavi yasanamẹ po kanyinylan po hia. Paulu basi zẹẹmẹ mẹdelẹ tọn to ojlẹ etọn mẹ taidi mẹhe tin “to zinvlu aliho nulẹnpọn tọn mẹ” podọ “na yé jẹgló wutu, yé jo yede na wantuntun nado yí nukunkẹn do wazọ́n mawé wunmẹ lẹpo.”—Efe. 4:18, 19.

Paulu sọ donù “mawé” go to Galatianu lẹ 5:19 mẹ. Weyọnẹntọ Grande-Bretagne tọn de dọ dọ “mawé” he yin nùdego tofi dlẹnalọdo ojlo zogbe he ma yin jọwamọ tọn. Klistiani lẹpo wẹ na yigbe dọ wunmẹ yẹdide fẹnnuwiwa tọn he yin nùdego to aga lẹ hiọawu taun bo nọ hẹn gbẹtọ lẹ nado tindo ojlo zogbe he ma yin jọwamọ tọn lẹ. Paulu dotana to Galatianu lẹ 5:19-21 mẹ dọ “mẹhe nọ wà” onú mawé mọnkọtọn lẹ “ma na dugu ahọluduta Jiwheyẹwhe tọn.” Etẹwẹ na jọ eyin mẹde tindo aṣa lọ, vlavo na ojlẹ dindẹn, nado nọ pọ́n yẹdide fẹnnuwiwa tọn he kudiho bo hiọawu lẹ? Eyin ewọ ma lẹnvọjọ bo jo aṣa ehe do, e na yin didesẹ sọn agun mẹ nado sọgan hẹn wiwejininọ po gbigbọ dagbe agun lọ tọn po go.—1 Kọl. 5:5, 11.

E jẹna pipà nado mọdọ mẹdelẹ he nọ pọ́n yẹdide fẹnnuwiwa tọn he hiọawu lẹ ko yì mọ mẹho lẹ bo kẹalọyi alọgọ gbigbọmẹ tọn he sin nuhudo yé tindo nado basi diọdo he jẹ lẹ. Jesu dotuhomẹna Klistiani lẹ to agun Sadi hohowhenu tọn mẹ dọmọ: “Hẹn nuhe pò he ko dibla kú lẹ lodo, . . . nọ flin lehe hiẹ mọyi do podọ lehe hiẹ sè do to whepoponu, bo zindonukọn nado nọ payi e go, bosọ lẹnvọjọ. Na nugbo tọn, eyin hiẹ ma fọ́n, . . . hiẹ ma na yọ́n ogàn he mẹ yẹn na wá oji we te gba.” (Osọ. 3:2, 3) Mẹhe nọ pọ́n yẹdide fẹnnuwiwa tọn lẹ sọgan lẹnvọjọ bo yin hihò yí sọn miyọ́n mẹ to yẹhiadonu-liho.—Juda 22, 23.

Ṣigba, nuhe yọ́n hugan wẹ yindọ dopodopo mítọn ni magbe sinsinyẹn ma nado jẹ owù ylankan mọnkọtọn mẹ. Mọwẹ, mì gbọ mí ni dapana yẹdide fẹnnuwiwa tọn wunmẹ lẹpo!

[Nudọnamẹ odò tọn]

[Nudọnamẹ tangan lẹ to weda 30]

Klistiani he nọ pọ́n yẹdide fẹnnuwiwa tọn lẹ dona fọ́n sọn amlọn mẹ bo kẹalọyi alọgọ gbigbọmẹ tọn