“Yé Yin Anadena Gbọn Gbigbọ Wiwe Dali”
“Dọdai ma ko gbọn ojlo gbẹtọ tọn dali wá to ojlẹ depope mẹ gba, ṣigba gbẹtọ lẹ dọho sọn Jiwheyẹwhe dè dile yé yin anadena gbọn gbigbọ wiwe dali do.”—2 PITA 1:21.
NUAGOKUN HE JI MÍ NA LẸNAYIHAMẸPỌN DO LẸ
Aliho tẹlẹ mẹ wẹ gbigbọ wiwe gọalọna mẹhe kàn Biblu lẹ nado mọ owẹ̀n Jiwheyẹwhe tọn yí te?
Kunnudenu tẹlẹ wẹ dohia dọ Biblu yin gbigbọdo sọn Jiwheyẹwhe dè?
Etẹwẹ hiẹ sọgan wà egbesọegbesọ nado hẹn pinpẹn-nutọn-yinyọnẹn towe na Ohó Jiwheyẹwhe tọn sinyẹn deji?
1. Naegbọn mí tindo nuhudo Ohó gbọdo Jiwheyẹwhe tọn?
FIE wẹ mí wá sọn? Naegbọn mí do tin to aigba ji? Fie wẹ mí jei? Naegbọn aihọn lọ do tin to ninọmẹ ehe mẹ? Etẹwẹ nọ jọ do mí go to whenuena mí kú? Lẹdo aihọn pé, gbẹtọ susu nọ jlo nado yọ́n gblọndo kanbiọ ehelẹ tọn. Matin Ohó gbọdo Jiwheyẹwhe tọn, be mí sọgan yọ́n gblọndo kanbiọ ehelẹ po titengbe devo lẹ po tọn ya? Eyin Owe-wiwe lẹ ma ko tin wẹ, numimọ mẹdetiti tọn mítọn lẹ kẹdẹ mẹ wẹ mí na nọ plọnnu sọn. Ṣigba, eyin numimọ mẹdetiti tọn mítọn lẹ kẹdẹ mẹ wẹ mí na nọ plọnnu sọn, e na vẹawu dọ mí ni tindo numọtolanmẹ he nkọ Psalm-kantọ lọ tindo gando “osẹ́n OKLUNỌ tọn” go.—Hia Psalm 19:7.
2. Nawẹ mí sọgan hẹn pinpẹn-nutọn-yinyọnẹn mítọn na Biblu siso dogo gbọn?
2 Ṣigba, e blawu dọ owanyi he mẹdelẹ tindo na nugbo Biblu tọn to tintan whenu ko miọn. (Yijlẹdo Osọhia 2:4 go.) Yé masọ to zọnlinzin to aliho he Jehovah kẹalọyi lọ ji ba. (Isa. 30:21) E ma yin dandan dọ onú mọnkọtọn ni jọ do mí go. Enẹwutu, nuyọnẹnnu wẹ e yin dọ mí ni to vivẹnudo zọnmii nado hẹn pinpẹn-nutọn-yinyọnẹn mítọn na Biblu po nuplọnmẹ etọn lẹ po siso dogọ. Na nugbo tọn, Biblu yin nunina titengbe de sọn Mẹdatọ owanyinọ mítọn dè. (Jak. 1:17) To whelọnu lo, nawẹ mí sọgan hẹn pinpẹn-nutọn-yinyọnẹn mítọn na “ohó Jiwheyẹwhe tọn” siso dogo gbọn? Aliho dopo nado wàmọ wẹ nado nọ lẹnnupọndo lehe Jiwheyẹwhe deanana mẹhe kàn Biblu lẹ do ji. Ehe biọ dọ mí ni nọ flin delẹ to kunnudenu madosọha he dohia dọ Biblu yin gbigbọdo lẹ mẹ. Mọwiwà na whàn mí nado nọ hia Ohó Jiwheyẹwhe tọn egbesọegbesọ bo nọ yí ayinamẹ etọn lẹ do yizan mẹ.—Heb. 4:12.
YÉ YIN “ANADENA GBỌN GBIGBỌ WIWE DALI”—GBỌNNA?
3. Nawẹ yẹwhegán po Biblu-kantọ lẹ po yin “anadena gbọn gbigbọ wiwe dali” gbọn?
3 Biblu yin kinkan gbọn sunnu voovo 40 delẹ dali na ojlẹ he hugan owhe 1 610 lẹ; azọ́n lọ bẹjẹeji to 1513 J.W.M. bo fó to 98 W.M. Delẹ to sunnu enẹlẹ mẹ yin yẹwhegán lẹ he yin “anadena gbọn gbigbọ wiwe dali.” (Hia 2 Pita 1:20, 21.) Hodidọ lọ dọ yé yin “anadena gbọn gbigbọ wiwe dali” zẹẹmẹdo dọ Jiwheyẹwhe dọho hẹ mẹhe kàn Biblu lẹ, yinuwado yé ji bo deanana yé gbọn huhlọn-yido-wazọ́n kavi gbigbọ wiwe etọn gblamẹ. Ehe dohia dọ linlẹn Jiwheyẹwhe tọn lẹ wẹ yé kàn, e ma yin linlẹn yetọn titi lẹ gba. To whedelẹnu, yẹwhegán po Biblu-kantọ lẹ po ma tlẹ nọ mọnukunnujẹ dọdai he yé dọ kavi kandai he yé basi lẹ mẹ. (Dan. 12:8, 9) Ehe dohia dọ “Owe-wiwe lẹpo wẹ yin gbigbọdo sọn Jiwheyẹwhe dè” nugbonugbo. Biblu ma yin awuwlena po linlẹn gbẹtọvi tọn po gba.—2 Tim. 3:16.
4-6. Aliho tẹlẹ mẹ wẹ mẹhe kàn Biblu lẹ mọ owẹ̀n Jehovah tọn yí te? Na apajlẹ.
4 Ṣigba, aliho tẹlẹ mẹ wẹ gbigbọ wiwe gọalọna mẹhe kàn Biblu lẹ nado mọ owẹ̀n Jiwheyẹwhe tọn yí te? Be hogbe he yé na yizan lẹ dopodopo wẹ Jiwheyẹwhe dọna yé ya, kavi linlẹn Etọn lẹ wẹ e dọna yé bo na yé dotẹnmẹ nado yí hogbe yetọn titi lẹ zan nado basi kandai Biblu tọn? Mì gbọ mí ni lẹnnupọndo apajlẹ azọ́ngán he jlo na kàn wekanhlanmẹ de tọn ji. Eyin azọ́ngán lọ jlo dọ wekanhlanmẹ lọ ni yin kinkan to aliho tangan de mẹ, ewọ lọsu sọgan kàn wekanhlanmẹ lọ kavi e na ylọ hogbe lẹ dopodopo tọ́n, na wekantọ etọn nido kàn ẹn dai. To whenue wekantọ lọ ko kàn wekanhlanmẹ lọ fó godo, azọ́ngán lọ wẹ na doalọ wekanhlanmẹ lọ mẹ. To ninọmẹ devo lẹ mẹ, azọ́ngán lọ sọgan dọ linlẹn tangan lọ lẹ na wekantọ etọn bọ wekantọ lọ na yí hogbe etọn titi lẹ zan nado wleawuna wekanhlanmẹ lọ. Enẹgodo, azọ́ngán lọ na hia wekanhlanmẹ lọ bo sọgan biọ to wekantọ lọ si nado basi vọjlado delẹ. To godo mẹ, azọ́ngán lọ wẹ na doalọ wekanhlanmẹ lọ mẹ, podọ enẹ na zọ́n bọ mẹhe na mọ wekanhlanmẹ lọ yí na yọnẹn dọ azọ́ngán lọ dè wẹ wekanhlanmẹ lọ wá sọn.
5 Mọdopolọ, adà Biblu tọn delẹ yin kinkan tlọlọ gbọn “alọviyẹyẹ Jiwheyẹwhe tọn” dali. (Eks. 31:18) Humọ, Jehovah sọ ylọ hogbe he dona yin kinkan lẹ dopodopo tọ́n to whenue e mọdọ enẹ yin dandan. Di apajlẹ, to Eksọdusi 34:27 mẹ, mí hia dọmọ: ‘OKLUNỌ lọ sọ dọhlan Mose dọmọ, Hiẹ ni wlan ohó ehelẹ: na kẹdẹdile yinyọnẹn ohó ehelẹ lọ tọn yẹn ko do basi alẹnu de hẹ we podọ hẹ Islaeli.’ Mọdopolọ, Jehovah dọna yẹwhegán Jelemia dọmọ: ‘Wlan na we ohó he yẹn ko dọ hlan we lẹpo do owe de mẹ.’—Jel. 30:2.
6 Etomọṣo, to whẹho susu mẹ, Jiwheyẹwhe gbọn azọ́njiawu dali yí linlẹn etọn lẹ do ahun po ayiha mẹhe kàn Biblu lẹ po tọn mẹ, bo na yé dotẹnmẹ nado yí hogbe yetọn titi lẹ zan nado basi kandai linlẹn Etọn lẹ tọn. Yẹwhehodọtọ 12:10 dọmọ: “Yẹwhehodọtọ dindona nado mọ ohó vivi, ehe yè ko wlan, onú jijlọ wẹ, yèdọ ohó nugbo tọn lẹ.” Wẹndagbe-kantọ Luku “dindona onú lẹpo po gbesisọ po sọn bẹjẹeji, nado basi kandai yetọn to aliho whinnuwhinnu tọn de mẹ.” (Luku 1:3) Jiwheyẹwhe yí gbigbọ wiwe etọn zan nado hẹn ẹn diun dọ mape gbẹtọvi tọn ma bẹpla owẹ̀n etọn.
7. Nawẹ gbẹtọvi lẹ yiyizan nado wlan Biblu do nuyọnẹn Jiwheyẹwhe tọn hia gbọn?
7 Gbẹtọvi lẹ yiyizan nado wlan Biblu do nuyọnẹn madodogbó Jiwheyẹwhe tọn hia. To paa mẹ, e ma yin nudọnamẹ lẹ kẹdẹ wẹ hogbe lẹ nọ bẹhẹn gba, ṣigba yé sọ nọ do numọtolanmẹ lẹ hia. Be e na bọawu nado mọnukunnujẹ Biblu mẹ eyin angẹli lẹ wẹ Jehovah ko yizan nado kàn ẹn ya? Be angẹli lẹ na penugo nado basi zẹẹmẹ numọtolanmẹ lẹ taidi obu, awubla po flumẹjijẹ po tọn to jọwamọ-liho dile gbẹtọvi lẹ sọgan basi do ya? Na Jiwheyẹwhe na dotẹnmẹ gbẹtọvi mapenọ lẹ nado yí hogbe yetọn titi lẹ zan nado basi kandai linlẹn Etọn lẹ tọn to huhlọn gbigbọ wiwe Etọn tọn glọ wutu, owẹ̀n he tin to Biblu mẹ nọ jẹ ahun gbẹtọ wunmẹ lẹpo tọn mẹ!
KUNNUDENU HE DOHIA DỌ BIBLU YIN GBIGBỌDO SỌN JIWHEYẸWHE DÈ LẸ
8. Naegbọn mí sọgan dọ dọ Biblu gbọnvo na owe sinsẹ̀n tọn devo depope?
8 Kunnudenu susu wẹ dohia dọ Biblu yin gbigbọdo sọn Jiwheyẹwhe dè. Gbọnvona Biblu, owe sinsẹ̀n tọn devo depope ma sọgan gọalọna mí nado yọ́n Jiwheyẹwhe ganji. Di apajlẹ, owe sinsẹ̀n Hindu tọn lẹ dọho gando hùnwhẹ, tamẹnuplọnmẹ, otangblo po nujinọtedo walọ dagbe tọn sinsẹ̀n lọ tọn lẹ po go. Owe sinsẹ̀n Bouddha tọn lẹ basi zẹẹmẹ osẹ́n he yẹwhenọ pamẹnọtọ po yẹwhenọ-yọnnu pamẹnọtọ lẹ po dona hodo lẹ tọn. Owe lọ lẹ sọ basi zẹẹmẹ nuyise Bouddha-sẹ̀ntọ lẹ tọn gọna nuplọnmẹ voovo sinsẹ̀n lọ tọn lẹ. Bouddha ma sọalọakọ́n nado yin yẹwhe de, mọjanwẹ e masọ dọho susu gando Jiwheyẹwhe go do niyẹn. Owe sinsẹ̀n Confucius tọn lẹ dọhodo nuhe ko jọ to hohowhenu lẹ, nujinọtedo walọ dagbe tọn lẹ po afinyọnnuwiwa po ji bosọ bẹ ohàn lẹ hẹn. Podọ owe sinsẹ̀n Malenu lẹ tọn plọnmẹ dọ Jiwheyẹwhe dopo wẹ tin he yọ́n sọgodo, ṣigba e ma tlẹ de oyín Jiwheyẹwhe tọn he yin Jehovah hia. Oyín enẹ sọawuhia whla fọtọ́n susu lẹ to Biblu mẹ.
9, 10. Etẹwẹ Biblu plọn mí gando Jiwheyẹwhe go?
9 To vogbingbọn mẹ na suhugan owe sinsẹ̀n tọn lẹ tọn he ma nọ plọnmẹ nususu gando Jiwheyẹwhe go, Biblu nọ gọalọna mí nado yọ́n Jehovah Jiwheyẹwhe po azọ́n etọn lẹ po. Biblu nọ gọalọna mí nado yọ́n jẹhẹnu etọn lẹ. Biblu ma do Jiwheyẹwhe hia taidi ganhunupotọ, nuyọnẹntọ po dodonọ po kẹdẹ gba, ṣigba e sọ dohia dọ Ewọ yiwanna mí. (Hia Johanu 3:16; 1 Johanu 4:19.) Humọ, Biblu sọ plọn mí dọ: “Jiwheyẹwhe ma yin mẹnukuntahopọntọ gba, ṣigba to akọta lẹpo mẹ, mẹhe nọ dibusi i bo nọ wazọ́n dodo tọn wẹ nọ yin alọkẹyi to e dè.” (Owalọ 10:34, 35) Obá he mẹ Biblu gbayipe jẹ dohia dọ hogbe enẹlẹ yin nugbo. Weyọnẹntọ he nọ plọnnumẹ gando ogbè go lẹ dohia dọ to nudi ogbè 6 700 he nọ yin dido lẹdo aihọn pé to egbehe lẹ mẹ, nudi ogbè 100 poun wẹ gbayipe hugan. Etomọṣo, Biblu blebu kavi apadewhe etọn ko yin lilẹdo ogbè he hugan 2 400 lẹ mẹ. Diblayin mẹlẹpo wẹ tindo Biblu kavi e whè gbau apadewhe etọn.
10 Jesu dọmọ: “Otọ́ ṣie zindonukọn to azọ́nwiwa mẹ kakajẹ din, yẹnlọsu sọ to nukọnzindo to azọ́nwiwa mẹ.” (Joh. 5:17) ‘Sọn madopodo jẹ madopodo, Jehovah wẹ Jiwheyẹwhe.’ Enẹwutu, yí nukun homẹ tọn do pọ́n lehe nuwadotana Jiwheyẹwhe tọn lẹ sù do sọ! (Ps. 90:2) Biblu kẹdẹ wẹ plọnnu mí gando nuhe Jiwheyẹwhe ko wà wayi lẹ, nuhe wà e te to alọnu din lẹ po dehe e na wà to sọgodo lẹ po go. Biblu sọ plọnnu mí dogbọn nuhe nọ hẹn homẹ Jiwheyẹwhe tọn hùn po nuhe e gbẹwanna lẹ po dali bo do lehe mí sọgan dọnsẹpọ ẹ do hia mí. (Jak. 4:8) Enẹwutu, mí ni ma dike ahunmẹdunamẹnu kavi yanwle mítọn titi lẹ ni hẹn mí nado dovọ́na haṣinṣan mítọn hẹ Jiwheyẹwhe gbede blo.
11. Ayinamẹ yọ́n-na-yizan tẹlẹ wẹ Biblu bẹhẹn?
11 Nuyọnẹn dejidego susugege he tin to Biblu mẹ lẹ sọ dohia dọ mẹhe yin Asisa owe enẹ tọn yiaga taun hugan gbẹtọ. Apọsteli Paulu wlan dọmọ: “Mẹnu wẹ ko yọ́n ayiha Jehovah tọn, na e nido sọgan plọnnu in?” (1 Kọl. 2:16) Wefọ enẹ sinai do nuhe yẹwhegán Isaia kanbiọ mẹhe nọgbẹ̀ to azán etọn gbè lẹ ji dọmọ: “Mẹnu wẹ ko hiali gbigbọ OKLUNỌ tọn, kavi bo yin hónamẹtọ etọn, bo plọn ẹn?” (Isa. 40:13) Gblọndo lọ wẹ yindọ mẹde ma tin. Abajọ ayinamẹ Biblu tọn he gando alọwle, ovi lẹ, ayidedai, gbẹdido, azọ́n sinsinyẹn wiwà, nugbodidọ, po walọ dagbe po go lẹ yíyí-do-yizan mẹ do nọ hẹn kọdetọn dagbe hugan lẹ wá! Ayinamẹ Biblu tọn lẹ nọ yin alenu na mí to whepoponu. Ṣigba na nuhe dù gbẹtọvi lẹ, yé ma tindo nuyọnẹn sọmọ nado nọ dọ nuhe na hẹn kọdetọn dagbe wá to whepoponu. (Jel. 10:23) Yé nọ to ayinamẹ yetọn lẹ diọ to whepoponu na yé nọ saba doayi e go dọ ayinamẹ he yé na wayi lẹ ma wazọ́n. Biblu dọmọ: “Linlẹn gbẹtọ tọn . . . ovọ́ wẹ yé.”—Ps. 94:11.
12. Nawẹ gbẹtọvi lẹ ko dovivẹnu to whenuho gblamẹ nado sukúndona Biblu gbọn?
12 Kunnudenu devo he dohia dọ Jiwheyẹwhe nugbo lọ wẹ yin Dowatọ Biblu tọn wẹ yindọ gbẹtọvi lẹ ma penugo nado sukúndona ẹn mahopọnna vivẹnudido yetọn lẹpo to whenuho gblamẹ. To 168 J.W.M., ahọlu Silia tọn Antiochus IV dín owe gbọdo Osẹ́n lọ tọn lẹ nado fiọ yé. To 303 W.M., Dioclétien, Ahọluigba-gán Lomu tọn, de gbedide lọ tọ́n dọ nọtẹn sinsẹ̀n-bibasi tọn Klistiani lẹ tọn ni yin hihọliai podọ Owe-wiwe yetọn lẹ ni yin fifiọ. Nuvasudo mọnkọtọn zindonukọn na owhe ao. To owhe kanweko 11tọ godo, Papa lẹ glọnalina oyọnẹn Biblu tọn hinhẹn gbayipe gbọn nukundidiọsọ lẹdogbedevomẹ Owe-wiwe lẹ tọn bibasi do ogbè he suhugan gbẹtọ lẹ tọn nọ do lẹ mẹ dali. Mahopọnna vivẹnudido Satani po godonọnamẹtọ etọn lẹ po tọn enẹlẹ, Biblu yin hihọ́-basina kakajẹ azán mítọn gbè. Jehovah ma dike nunina enẹ he e basi na gbẹtọvi lẹ ni yin didesẹ sọn aimẹ.
KUNNUDENU VOOVO HE DUTO MẸSUSU JI
13. Kunnudenu devo tẹlẹ wẹ dohia dọ Biblu yin gbigbọdo?
13 Kunnudenu devo lẹ sọ dohia dọ Biblu yin gbigbọdo sọn Jiwheyẹwhe dè: owe Biblu tọn voovo lẹ sọgbe hẹ yede, kandai etọn lẹ sọgbe to lẹnunnuyọnẹn-liho, dọdai etọn lẹ nọ mọ hẹndi, wekantọ Biblu tọn lẹ donù nuṣiwa yetọn lẹ go, Biblu nọ diọ gbẹzan gbẹtọ lẹ tọn, e sọgbe to whenuho-liho podọ e na gblọndo pekọhẹnwanamẹ tọn lẹ gando kanbiọ he yin sislẹ to hukan tintan mẹ lẹ go. Todin, mì gbọ mí ni lẹnnupọndo nuhe gọalọna mẹdelẹ nado kudeji dọ Jiwheyẹwhe wẹ yin Dowatọ Biblu tọn lẹ ji.
14-16. (a) Etẹwẹ whàn Malenu de, mẹhe nọ basi sinsẹ̀n Hindu tọn de po mẹhe yise dọ Jiwheyẹwhe dablu de po nado kudeji dọ Biblu yin gbigbọdo sọn Jiwheyẹwhe dè? (b) Kunnudenu tẹlẹ wẹ hiẹ nọ saba yizan to lizọnyizọn lọ mẹ nado dohia dọ Biblu yin gbigbọdo sọn Jiwheyẹwhe dè?
14 Anwara yin pinplọn whẹ́n taidi Malenu to otò Ṣẹnṣẹn Whèzẹtẹn tọn de mẹ. To whenue e wá nọ Agewaji Amelika tọn na ojlẹ de, Kunnudetọ Jehovah tọn lẹ wá húhúhọ̀n na ẹn to gbèdopo. Anwar dọmọ: ‘Nuylankan he Ṣọṣi lẹ wà wayi zọ́n bọ n’gbẹwanna sinsẹ̀n Klistiani tọn lẹ. Ṣigba, na n’yiwanna nupinplọn wutu, n’kẹalọyi plọnmẹ Biblu de.’ To enẹgodo, e ma dẹn bọ Anwar lẹkọyi otò etọn mẹ bo masọ tindo kanṣiṣa depope hẹ Kunnudetọ lẹ ba. To owhe lẹ godo, e sẹtẹn yì Europe bo vọ́ Biblu pinplọn etọn bẹ whladopo dogọ. E dọ to godo mẹ dọmọ: ‘N’wá kudeji dọ Ohó Jiwheyẹwhe tọn wẹ Biblu, na n’mọdọ dọdai Biblu tọn lẹ nọ mọ hẹndi, hosọ tangan dopo ji wẹ Biblu sinai do sọn bẹjẹeji jẹ vivọnu, nuhe tin to Biblu mẹ lẹ ma jẹagọdo yede to aliho depope mẹ, podọ sinsẹ̀n-basitọ Jehovah tọn lẹ nọ yiwanna ode awetọ.’ Anwar yí baptẹm to 1998.
15 Asha he tindo owhe 16 yin pinplọn whẹ́n gbọn mẹjitọ Hindu akonka lẹ dali. E dọmọ: “To whenue n’yì tẹmpli mẹ kavi to jujugbọn ninọmẹ sinsinyẹn lẹ mẹ kẹdẹ wẹ n’nọ hodẹ̀, ṣigba n’ma nọ flin Jiwheyẹwhe to whenue nulẹpo to yìyì ganji.” E yidogọ dọmọ: “Ṣigba, to whenue Kunnudetọ Jehovah tọn lẹ wá húhúhọ̀n na mi godo, gbẹzan ṣie diọ pete.” Asha jẹ Biblu plọn ji bo wá yọ́n Jiwheyẹwhe taidi Họntọn de. Etẹwẹ hẹn Asha kudeji dọ Biblu yin gbigbọdo sọn Jiwheyẹwhe dè? E basi zẹẹmẹ dọmọ: “Biblu na gblọndo kanbiọ he nọ duahunmẹna mi lẹpo tọn. Biblu gọalọna mi nado tindo yise to Jiwheyẹwhe mẹ eyin n’ma tlẹ nọ mọ ẹn—enẹ wẹ yindọ yise ṣie masọ sinai do boṣiọ he n’nọ mọ to tẹmpli mẹ ji ba.”
16 Paula yin pinplọn whẹ́n taidi Katoliki de, ṣigba to whenue e wá whẹ́n, e nọ mọdọ Jiwheyẹwhe dablu. Enẹgodo, nude jọ. E dọmọ: ‘N’dukosọ hẹ họntọn ṣie de he n’masọ mọ na osun susu. To ojlẹ lọ mẹ, sunnu susu nọ jo oda yetọn do bọ e nọ dite taun podọ yé sọ nọ zan amasin adínọ lẹ. To whenue n’mọ ẹn, n’doayi e go dọ e diọ pete. E whlẹ́ ogbì etọn lẹ, pada etọn ganji bosọ yin ayajẹnọ. Enẹwutu, n’kanbiọ ẹ dọ etẹwẹ jọ bọ e do diọ dole podọ fie wẹ e yì. E dọna mi dọ Biblu pinplọn hẹ Kunnudetọ Jehovah tọn lẹ wẹ diọ emi, podọ e dekunnuna mi.’ Na Paula he yise dai dọ Jiwheyẹwhe dablu mọ obá he mẹ nugbo Biblu tọn diọ họntọn etọn jẹ wutu, e tindo ojlo to owẹ̀n Biblu tọn mẹ bo wá kẹalọyi dọ Biblu yin gbigbọdo sọn Jiwheyẹwhe dè.
“OHÓ TOWE WẸ ZÒGBÁN DE HLAN AFỌ ṢIE”
17. Ale tẹwẹ Ohó Jiwheyẹwhe tọn hihia egbesọegbesọ po ayihamẹlinlẹnpọn do e ji po sọgan hẹnwa na we?
17 Biblu yin nunina jiawu de he Jehovah wleawuna gbọn gbigbọ wiwe etọn gblamẹ. Nọ mọ awuvivi to Ohó Jiwheyẹwhe tọn hihia mẹ egbesọegbesọ, podọ owanyi towe na owe enẹ po Dowatọ etọn po nasọ sinyẹn deji. (Ps. 1:1, 2) Whedepopenu he a jlo na hia Biblu, nọ biọ Jiwheyẹwhe nado gọalọna we gbọn gbigbọ wiwe etọn gblamẹ na hiẹ nido mọnukunnujẹ nuhe hiẹ jlo na hia lọ mẹ. (Luku 11:13) Biblu bẹ linlẹn Jiwheyẹwhe tọn lẹ hẹn; enẹwutu ayihamẹlinlẹnpọn do nuhe tin to e mẹ lẹ ji na gọalọna we nado nọ pọ́n nulẹ hlan dile Jiwheyẹwhe nọ wà do.
18. Naegbọn hiẹ jlo na zindonukọn to nugbo Biblu tọn pinplọn mẹ?
18 Dile nukunnumọjẹnumẹ he a tindo gando nugbo Biblu tọn go to susudeji, nọ tẹnpọn nado nọgbẹ̀ sọgbe hẹ nuhe plọn a te lẹ. (Hia Psalm 119:105.) Nọ yí Owe-wiwe lẹ zan taidi mẹpọ́nnu de. Podọ eyin hiẹ doayi e go dọ emi dona basi vọjlado, ma whleawu nado wàmọ blo. (Jak. 1:23-25) Nọ yí Ohó Jiwheyẹwhe tọn zan taidi ohí de nado yiavùnlọna nuyise towe lẹ podọ nado họ̀nadọna nuplọnmẹ lalo lẹ sọn ahun gbẹtọ whiwhẹnọ lẹ tọn mẹ. (Efe. 6:17) Dile hiẹ to mọwà, nọ dopẹ́ dọ yẹwhegán po sunnu he kàn Biblu lẹ po yin “anadena gbọn gbigbọ wiwe dali” nugbonugbo.
[Nudọnamẹ odò tọn]
a Yinkọ delẹ ko yin didiọ.
[Nudọnamẹ tangan lẹ to 29]
Nọ hia Biblu egbesọegbesọ, podọ owanyi towe na Dowatọ etọn na sinyẹn deji
[Yẹdide to weda 26]
Alọdowemẹ mẹhe tọn sọawuhia to odò na wekanhlanmẹ de nọ do mẹhe dè e wá sọn hia