Kanbiọ Sinai Do Biblu Ji

Nawẹ Jiwheyẹwhe Nọ Yin?

Hagbẹ whẹndo mítọn tọn lẹ dopodopo wẹ tindo yinkọ yetọn. Mẹdelẹ tlẹ nọ do yinkọ na whékanlin yetọn lẹ! Be e ma sọgbe dọ Jiwheyẹwhe lọsu ni tindo yinkọ de ya? Nado dlẹnalọdo Jiwheyẹwhe, Biblu nọ yí hogbe delẹ zan taidi Jiwheyẹwhe Ganhunupotọ, Oklunọ Nupojipetọ kavi Mẹdatọ. Ṣigba Biblu sọ dohia dọ Jiwheyẹwhe tindo yinkọ etọn titi.—Hia Eksọdusi 6:3.

Lẹdogbedevomẹ Biblu tọn susu wẹ yí yinkọ Jiwheyẹwhe tọn zan to Psalm 83:18. Di apajlẹ, to Biblu Wiwe lọ—Gun Alada mẹ, wefọ enẹ dọmọ: “Hiẹ, oyín mẹhe tọn dopo kẹdẹ nọ yin Jehovah, wẹ Gigogán to wẹkẹ lẹpo ji.”

Naegbọn mí dona nọ yí yinkọ Jiwheyẹwhe tọn zan?

Jiwheyẹwhe jlo dọ mí ni nọ yí yinkọ emitọn titi zan. To whenue mí to hodọ hẹ mẹde, titengbe họntọn vivẹ́ mítọn, mí nọ saba ylọ yinkọ etọn titi nado do ewọ hia dovo na mẹdevo lẹ. Be e ma yin nudopolọ wẹ mí dona wà eyin mí to hodọ hẹ Jiwheyẹwhe ya? Humọ, to whenue Jesu tin to aigba ji, e na tuli gbẹtọ lẹ nado nọ yí yinkọ Jiwheyẹwhe tọn zan.—Hia Matiu 6:9; Johanu 17:26.

Ṣigba, nado lẹzun họntọn Jiwheyẹwhe tọn, mí dona yọ́n nususu devo lẹ gando ewọ go gbọnvona yinkọ etọn. Di apajlẹ, omẹ nankọ wẹ Jiwheyẹwhe yin? Be mí sọgan dọnsẹpọ Jiwheyẹwhe nugbonugbo ya? Hiẹ sọgan mọ gblọndo na kanbiọ enẹlẹ to Biblu mẹ.