GBLỌNDO NA KANBIỌ SINAI DO BIBLU JI LẸ

Be ylando mítọn lẹ gán yin jijona ya?

Sọgbe hẹ nuhe Biblu dọ, gbẹtọvi lẹpo wẹ yin ylandonọ. Mí ko dugu ayilinlẹn ylanwiwa tọn sọn sunnu tintan lọ Adam dè. Enẹwutu, to whedelẹnu mí nọ wà nuylankan lẹ, ehe gán nọ wá vẹna mí to godo mẹ. Amọ́, Visunnu Jiwheyẹwhe tọn Jesu Klisti ko kú do ota mítọn mẹ nado suahọ ylando mítọn lẹ tọn. Avọ́sinsan ofligọ tọn etọn wẹ hùnali na mí nado mọ jona ylando mítọn lẹ tọn yí. Nunina de wẹ ehe yin sọn Jiwheyẹwhe dè.—Hia Lomunu lẹ 3:23, 24.

Mẹdelẹ ko wà ylando he sinyẹn taun lẹ bo nọ hanú eyin vlavo Jiwheyẹwhe gán jona yé. Ayajẹnu wẹ e yin dọ Ohó Jiwheyẹwhe tọn dọ dọ: “Ohùn Jesu Visunnu etọn tọn nọ klọ́ mí wé sọn ylando lẹpo mẹ.” (1 Johanu 1:7) Jehovah nọ jona ylando mítọn lẹ sọn ojlo mẹ wá, etlẹ yin dehe sinyẹn taun lẹ, eyin mí yinuwa to aliho he sọgbe mẹ bo lẹnvọjọ nugbonugbo.—Hia Isaia 1:18.

Etẹwẹ mí dona wà nado yin jijona?

Eyin mí jlo dọ Jehovah Jiwheyẹwhe ni jona mí, mí dona plọn nado yọ́n ewọ—enẹ wẹ nado nọ mọnukunnujẹ aliho nuyiwa tọn etọn lẹ, ayinamẹ etọn lẹ po nubiọtomẹsi etọn lẹ po mẹ. (Johanu 17:3) Jehovah nọ gbọn alọtútlú dali jona mẹhe lẹnvọjọ sọn nuṣiwa yetọn mẹ bosọ dovivẹnu nado diọ jijọ yetọn lẹ.—Hia Owalọ lẹ 3:19.

Nukundagbe Jiwheyẹwhe tọn mimọyi ma yin nude he vẹawu gbau na mí. Jehovah nọ mọnukunnujẹ madogán mítọn lẹ mẹ. Homẹdagbenọ podọ lẹblanunọ wẹ ewọ. Be owanyi nugbo etọn ma whàn we nado plọn nususu dogọ gando lehe a gán hẹn homẹ etọn hùn do go ya?—Hia Salmu lẹ 103:13, 14.