Dọnsẹpọ Jiwheyẹwhe

Eyin Jiwheyẹwhe Jonamẹ, Be E Nọ Wọnji E Go Ya?

DO GLIDO, mọwẹ. Jehovah dopagbe na mẹhe tindo nukundagbe etọn lẹ dọmọ: “Yẹn na jona ylanwa yetọn, ylando yetọn wẹ yẹn masọ to na flin ba gba.” (Jelemia 31:34) Gbọnmọ dali, Jehovah hẹn mí deji dọ eyin emi jona ylanwatọ he lẹnvọjọ lẹ, emi ma nọ flin ylando yetọn ba. Ṣigba be enẹ dohia nugbonugbo dọ Didatọ wẹkẹ gblagada lọ tọn ma penugo nado flin ylando he e jonamẹ lẹ wẹ ya? Nuhe Ezekiẹli dọ lẹ tá hinhọ́n do aliho he mẹ Jiwheyẹwhe nọ jonamẹ bo nọ wọnji e go te ji.—Hia Ezekiẹli 18:19-22.

Gbọn yẹwhegán Ezekiẹli yiyizan taidi hoyidọtọ de dali, Jehovah lá whẹdida sọta tòmẹnu Juda po Jelusalẹm po tọn he ma yin nugbonọ lẹ. Akọta lọ blebu ko jo Jehovah sinsẹ̀n do bo hẹn danuwiwa gbayipe to otò lọ mẹ. Jehovah dọ dọdai dọ Jelusalẹm na yin vivasudo gbọn Babilọninu lẹ dali. Ṣigba etlẹ yin to whenue Jehovah to whẹdida lá sọta yé, e ze owẹ̀n todido tọn de donukọnna yé. Mẹdopodopo wẹ dona basi nudide. Mẹdopodopo wẹ na hẹn agbàn kọdetọn nuyiwa etọn lẹ tọn.—Wefọ 19, 20.

Etẹwẹ lo eyin mẹde jo onú ylankan wiwà do bo jẹ dagbe wà ji? Jehovah dọmọ: “Eyin mẹylankan lẹ́ sọn ylando etọn he e ko wà lẹpo mẹ, bosọ yìn osẹ́ndoai ṣie lẹpo, bosọ wà enẹ he yin osẹ́nnọ po ojlọjẹ po, ewọ na nọgbẹ̀ nugbonugbo, ewọ ma na kú gba.” (Wefọ 21) Mọwẹ, Jehovah “wleawu nado jona” ylanwatọ he lẹ́ sọn aliho ylankan etọn ji bo do lẹnvọjọ nujọnu tọn hia.—Psalm 86:5.

Etẹwẹ dogbọn ylando he e ko wà lẹ dali? Jehovah dọmọ: “Depope sọn sẹ́nmẹjijẹ etọn lẹ mẹ he e ko wà ma na yin finflin do e go gba.” (Wefọ 22) Doayi e go dọ ylando mẹhe lẹnvọjọ de tọn lẹ “ma na yin finflin do e go.” Naegbọn ehe do jẹna ayidego?

To Biblu mẹ, hogbe Heblu tọn he yin lilẹdo “finflin” sọgan zẹẹmẹdo nususu hugan nado flin nuhe jọ wayi de poun. Owe alọdlẹndonu tọn de dọ gando hogbe ehe go dọmọ: “Na taun, whlasusu wẹ [e] nọ bẹ nuyiwa hẹn kavi zọnpọ hẹ hogbe nuyiwa tọn lẹ.” Enẹwutu, “nado flin” sọgan zẹẹmẹdo “nado yinuwa.” Gbọnmọ dali, to whenue Jehovah dọ dọ ylando ylanwatọ de tọn “ma na yin finflin do e go,” nuhe dọ Ewọ te wẹ yindọ Emi ma na yinuwa sọta mẹlọ to godo mẹ na ylando enẹlẹ wutu, taidi nado sawhẹdokọna ẹn kavi domẹplọnlọ e go.a

Hogbe Ezekiẹli 18:21, 22 tọn lẹ do obá he mẹ Jiwheyẹwhe nọ jonamẹ jẹ hia to aliho ayidego tọn de mẹ. Eyin Jehovah jo ylando mítọn lẹ na mí, ewọ ma na yinuwa sọta mí to sọgodo na ylando enẹlẹ wutu gbede. Kakatimọ, e nọ ze ylando mẹhe lẹnvọjọ lẹ tọn dlan godona ede. (Isaia 38:17) To linlẹn de mẹ, e nọ súnsún kandai ylando enẹlẹ tọn sẹ̀.—Owalọ lẹ 3:19.

Taidi gbẹtọvi mapenọ lẹ, mí tindo nuhudo lẹblanu Jiwheyẹwhe tọn. To popolẹpo mẹ, whlasusu wẹ mí nọ wà ylando. (Lomunu lẹ 3:23) Ṣigba Jehovah jlo dọ mí ni yọnẹn dọ eyin mí lẹnvọjọ nugbonugbo, emi wleawufo nado jona mí. Podọ eyin ewọ jona mí, e nọ wọnji e go—enẹ wẹ yindọ e ma na vọ́ flin ylando mítọn lẹ po linlẹn lọ po nado sawhẹdokọna mí kavi domẹplọnlọ mí go. Be linlẹn enẹ ma miọnhomẹnamẹ ya? Be lẹblanu Jiwheyẹwhe tọn ma whàn we nado dọnsẹpọ ewọ dogọ ya?

[Nudọnamẹ odò tọn]