Be A Sọgan Dejido Sinsẹ̀n Go Na Nuhe Dù Walọ Dagbe Ya?

Sylvia he yin doto he nọ penukundo yọnhonọ lẹ go dọmọ: “Susu mẹhe po yẹn po yì wehọmẹ alavọ tọn lẹ tọn wẹ nọ sọalọakọ́n dọ emi yin sinsẹ̀nnọ. Ganṣo, yé nọ finwepọ́n to tẹnpọn lẹ whenu bosọ nọ zan amasin adínọ lẹ. Sinsẹ̀n ma tindo nuyiwadomẹji dagbe depope do gbẹzan yetọn ji.”

Dawe de he nọ yin Lionel dọmọ: “Azọ́nwatọgbẹ́ ṣie lẹ nọ tẹkan hlan bo nọ dolalo dọ emi to azọ̀njẹ to whenue nude ma ka to yé wà. Yé nọ dọ dọ emi yin sinsẹ̀nnọ, amọ́ yé ma nọ wanu di sinsẹ̀nnọ; aṣọ́donu de poun wẹ sinsẹ̀n yin na yé.”

Sinsẹ̀n ma nọ gọalọna suhugan gbẹtọ lẹ tọn nado tẹdo walọ dagbe go to gbẹzan yetọn mẹ. To egbehe, mẹsusu wẹ tindo “awusọhia mẹdezejo na Jiwheyẹwhe tọn” ṣigba bo nọ “mọ́n huhlọn etọn.” (2 Timoti 3:5) Sinsẹ̀ngán yetọn lẹ ma nọ ze apajlẹ dagbe dai, mọ yé masọ nọ yí ayinamẹ Owe-wiwe tọn lẹ do gọalọna yé nado tindo walọ dagbe. Abajọ, mẹsusu do nọ lẹndọ gbẹzan he yé nọ zan ma nọ duahunmẹna Jiwheyẹwhe.

ETẸWẸ BIBLU PLỌN MÍ?

Biblu dohia dọ Jiwheyẹwhe tindo numọtolanmẹ podọ walọyizan mítọn nọ duahunmẹna ẹn taun. Whenue Islaelivi hohowhenu tọn lẹ ṣiatẹ sọta Ewọ, yé “hẹn homẹgble e.” (Psalm 78:40) Etomọṣo, “ayajẹ [daho wẹ nọ tin] to olọn mẹ” to whenue mẹde lẹnvọjọ nugbonugbo bo diọ jijọ. (Luku 15:7) Whenue mẹde wá yọ́n Otọ́ olọn mẹ tọn mítọn ganji, owanyi etọn na ẹn nọ siso deji bọ e nọ wá yiwanna nuhe Jiwheyẹwhe yiwanna bo gbẹwanna nuhe Ewọ gbẹwanna.—Amọsi 5:15.

NAWẸ KUNNUDETỌ JEHOVAH TỌN LẸ NỌ YINUWA GBỌN?

Linlinwe Deseret News sọn Salt Lake City, Utah, to États-Unis dohia dọ Kunnudetọ Jehovah tọn lẹ “nọ gọalọna gbẹtọ lẹ nado hẹn haṣinṣan whẹndo tọn yetọn pọnte, nado jọmẹ podọ nado lẹzun tòvi nugbonọ lẹ.” Linlinwe lọ sọ dọmọ: “Yé ma nọ yí nukunpẹvi do pọ́n nujinọtedo walọ dagbe tọn lẹ. Yé yise dọ azọ̀-nùnù, ahànnunu zẹjlẹgo, amasin adínọ ṣiṣizan, akọhiho, fẹnnuwiwa zanhẹmẹ tọn po zanhẹmẹ to mẹhe tindo vijinu dopolọ lẹ ṣẹnṣẹn po yin walọ he sọgan hẹn haṣinṣan he mẹde tindo hẹ Jiwheyẹwhe gble.”

Nawẹ nupinplọn gando omẹ nankọ he Jiwheyẹwhe yin go nọ gọalọna Kunnudetọ lẹ gbọn? Sylvia he go mí donù to aga dọmọ: “Mẹhodu gbayipe to dotowhé lẹ. E bọawu nado joawuna walọ enẹ. Amọ́, nukunnumimọjẹ nuhe yin linlẹn Jehovaha tọn gando walọ enẹ go mẹ nọ gọalọna mi nado wà nuhe sọgbe. N’tindo ayajẹ podọ jijọho ahun mẹ tọn.” Ewọ kudeji dọ tonusisena nuhe sinsẹ̀n etọn plọn ẹn lẹ ko hẹn gbẹzan etọn pọnte.

[Nudọnamẹ odò tọn]

[Nudọnamẹ tangan lẹ to weda 6]

Be sinsẹ̀ngán lẹ nọ gọalọna gbẹtọ lẹ nado hodo ayinamẹ he Biblu na do walọ dagbe ji lẹ ya?