Naegbọn Mí Dona Nọ Basi Hùnwhẹ Oflin Okú Jesu Tọn?

“MÌ NỌ WÀ EHE TO OFLIN ṢIE MẸ”

Mawusi: Na mì te? Homẹ ṣie hùn taun dọ mì wá Oflin okú Jesu Klisti tọn to osẹ he wayi.a Etẹ go mì doayi gando opli lọ go?

Dona: E vivi na mi dọ n’wá finẹ, amọ́ n’ma mọnukunnujẹ nuhe yin didọ lẹpo mẹ to gigọ́ mẹ. N’nọ sè bọ gbẹtọ lẹ nọ dù jijizan Jesu tọn to Noẹli whenu, podọ fọnsọnku etọn to Paaki whenu, ṣigba n’ma ko sè pọ́n bọ mẹde basi hùnwhẹ nado flin okú etọn.

Mawusi: Nugbo wẹ mì dọ, Noẹli po Paaki po yin owhe he mẹsusu nọ dù lẹdo aihọn pé. Ṣigba, Kunnudetọ Jehovah tọn lẹ mọdọ nujọnu wẹ e yin nado nọ flin okú Jesu tọn. Eyin mì tindo whenu pẹẹde, n’sọgan dọ nuhewutu wẹ na mì.

Dona: E yá bo.

Mawusi: Do glido, Kunnudetọ Jehovah tọn lẹ nọ basi hùnwhẹ okú Jesu tọn na ewọ lọsu wẹ biọ dọ hodotọ emitọn lẹ ni nọ wàmọ. Mì pọ́n nuhe jọ to ozán he jẹnukọnna okú Jesu tọn mẹ. Be mì flin núdùdù vonọtaun he e dù hẹ hodotọ nugbonọ etọn lẹ ya?

Dona: Tenu-Núdùdù Godo tọn lọ hodọ wẹ mì te ya?

Mawusi: Pẹẹ. E sọ nọ yin yiylọdọ Tenu-Núdùdù Oklunọ tọn. To núdùdù lọ whenu, Jesu na anademẹ he họnwun lẹ hodotọ etọn lẹ. Mì jaale, be mì gán hia hogbe etọn ehelẹ to Luku 22:19 mẹ ya?

Dona: Eyọn. “Mọdopolọ, e yí akla de, bo dopẹ́, bosọ wẹ́n ẹn, bo yí i na yé, bosọ dọmọ: ‘Ehe nọtena agbasa ṣie he na yin nina do ota mìtọn mẹ. Mì nọ wà ehe to oflin ṣie mẹ.’”

Mawusi: Mì basi. Mì pọ́n anademẹ Jesu tọn to adà godo tọn wefọ lọ tọn mẹ: “Mì nọ wà ehe to oflin ṣie mẹ.” Podọ whẹpo Jesu do na anademẹ hodotọ etọn lẹ nado nọ flin in, e dọ nuhe yé dona nọ flin gando ewọ go lẹ na yé to aliho he họnwun mẹ. E dọ dọ ogbẹ̀ emitọn na yin nina do ota hodotọ emitọn lẹ tọn mẹ. E sọ do linlẹn mọnkọtọn de hia to Matiu 20:28 mẹ. Wefọ lọ dọmọ: “Visunnu gbẹtọ tọn wá, e ma yin nado yin lizọnyina gba, ṣigba nado yilizọn namẹ bo ze alindọn etọn jo taidi ofligọ de do ota mẹsusu tọn mẹ.” To kleun mẹ, nuhewutu Kunnudetọ Jehovah tọn lẹ nọ pli dopọ to owhe dopodopo mẹ to azán he sọgbe hẹ gbeegbe Jesu kú ji niyẹn, nado flin avọ́sinsan ofligọ tọn he e basi. Okú etọn sọgan hẹn ogbẹ̀ wá na gbẹtọvi he setonu lẹpo.

NAEGBỌN MÍ TINDO NUHUDO OFLIGỌ DE TỌN?

Dona: N’ko sè bọ gbẹtọ lẹ dọ dọ Jesu kú na mí nido sọgan mọ ogbẹ̀. Ṣigba, nado dọ hójọhó, n’ma ko yọ́n lehe enẹ sọgan yọnbasi do.

Mawusi: E ma yin mìwlẹ kẹdẹ wẹ nọ lẹnmọ. Whẹho avọ́sinsan ofligọ Jesu tọn siso taun. Ṣigba, e sọ yin dopo to nugbo Ohó Jiwheyẹwhe tọn he dọnmẹ hugan lẹ mẹ. Mì jaale, be mì do whenu pẹẹde dogọ ya?

Dona: Mọwẹ, n’gbẹ́ do whenu pẹẹde.

Mawusi: Eyọn. N’ko hia onú delẹ do ofligọ ji, podọ n’na tẹnpọn bo basi zẹẹmẹ na mì to aliho he bọawu mẹ.

Dona: Eyọn.

Mawusi: Nado mọnukunnujẹ ofligọ lọ mẹ, mí dona yọ́n ninọmẹ he wá aimẹ to whenue Adam po Evi po waylando to jipa Edẹni tọn mẹ. Nado yọ́n nuhe whẹho lọ bẹhẹn lẹ, mì gbọ mí ni hia Lomunu lẹ 6:23. Be mì gán jaale bo hia wefọ lọ ya?

Dona: Gbau. E dọmọ: “Ale ylando tọn wẹ okú, ṣigba nunina he Jiwheyẹwhe nọ namẹ wẹ ogbẹ̀ madopodo gbọn Klisti Jesu Oklunọ mítọn dali.”

Mawusi: Mì wanu. Mì gbọ mí ni gbadopọnna wefọ ehe. Tintan, mì pọ́n lehe wefọ lọ bẹjẹeji do: “Ale ylando tọn wẹ okú.” Osẹ́n he Jiwheyẹwhe zedai to bẹjẹeji whenuho gbẹtọvi tọn niyẹn: ale kavi sẹ́nba he jẹna ylando wẹ okú. Nugbo wẹ dọ to bẹjẹeji, mẹdepope ma yin ylandonọ. Adam po Evi po yin mẹpipe, podọ ovi yetọn lẹpo wẹ na ko yin mẹpipe. Enẹwutu, whẹwhinwhẹ́n de ma na ko tin dọ mẹde ni kú. Adam po Evi po, gọna kúnkan yetọn lẹpo wẹ tindo todido nado nọgbẹ̀ kakadoi to ayajẹ mẹ. Ṣigba, dile mí yọnẹn do, nulẹ ma wá yì do mọ ba, kavi na?

Dona: Mọwẹ. Adam po Evi po dù atin-sinsẹ́n he Jiwheyẹwhe dosẹ́n etọn lọ.

Mawusi: Nugbo wẹ. Podọ gbọnmọ dali, na yé de nado vẹtolina Jiwheyẹwhe wutu, yé waylando. To aliho de mẹ, yé de nado lẹzun mapenọ, podọ ylandonọ. Nudide enẹ hẹn kọdetọn vẹadi lẹ wá na Adam po Evi po, gọna kúnkan yetọn lẹpo.

Dona: Gbọnna?

Mawusi: Eyọn, ma yí apajlẹ de do basi zẹẹmẹ na mì. Mì yiwanna owọ́ didà maa?

Dona: Ganji! N’nọ dà ’wọ́ taun.

Mawusi: Eyọn, mí ni dọ dọ mì họ̀ panu yọyọ de he mẹ mì na nọ kán owọ́ do. Amọ́ whẹpo mì na tlẹ jẹ panu lọ zan ji, e flẹ jẹ kọmẹ bo wán do kẹdopo. Todin, eyin mì kán owọ́ do panu lọ mẹ, be owọ́ lọ lọsu ma na wán do kẹdopo ya?

Dona: Gbau!

Mawusi: To linlẹn de mẹ, whenue Adam po Evi po de nado vẹtolina Jiwheyẹwhe, yé taidi panu he wán do kẹdopo lọ nkọ, kavi tindo oblọ ylando po mape po tọn. Podọ na yé lẹzun ylandonọ whẹpo do jẹ viji ji wutu, ovi yetọn lẹpo wẹ “wán” kavi tindo oblọ dopolọ. Yemẹpo wẹ yin jiji po ylando po. To Biblu mẹ, hogbe lọ “ylando” ma nọ gando walọ kẹdẹ go gba, e sọ nọ dlẹnalọdo ninọmẹ he sin ogú mí dù. Enẹwutu, dile etlẹ yindọ yẹn po mì po ma doalọ to ylando lọ mẹ, na mí ma tlẹ ko yin jiji to whenue Adam po Evi po waylando wutu, nulọ wẹ yindọ yé tlọ míwlẹ po kúnkan sọgodo tọn yetọn lẹpo po do mape po ylando po mẹ, he nọ wá dekọtọn do okú mẹ. Dile mí hia do to Lomunu lẹ 6:23 mẹ, ale ylando tọn wẹ okú.

Dona: Enẹ ma sọgbe nẹ. Naegbọn gbẹtọvi lẹpo na jiya kakadoi na ylando Adam po Evi po tọn wutu?

Mawusi: Hójọhó wẹ, e ma sọgbe. Ṣigba, nususu devo lẹ gando whẹho enẹ go. Jiwheyẹwhe he nọ dawhẹ dodo magbe dọ Adam po Evi po dona kú na ylando yetọn lẹ wutu, ṣigba todido na tin na kúnkan yetọn. Jiwheyẹwhe wleawuna tito de nado de mí sọn nuhahun enẹ mẹ. Enẹ wẹ zọ́n bọ mí tindo nuhudo avọ́sinsan ofligọ Jesu tọn. Mì vọ́ pọ́n Lomunu lẹ 6:23. To whenue wefọ lọ dọ dọ “ale ylando tọn wẹ okú” godo, e yidogọ dọ: “Ṣigba nunina he Jiwheyẹwhe nọ namẹ wẹ ogbẹ̀ madopodo gbọn Klisti Jesu Oklunọ mítọn dali.” Enẹwutu, okú Jesu tọn wẹ hùnali na mí nado gán sọn ylando po okú po si.b

OFLIGỌ LỌ YIN NUNINA DAHO HUGAN JIWHEYẸWHE TỌN

Mawusi: Nuagokun devo tin to wefọ lọ mẹ ehe ji n’jlo na dọ̀n ayiha mìtọn wá.

Dona: Etẹ niyẹn?

Mawusi: Mì doayi e go dọ wefọ lọ dọ dọ: “Nunina he Jiwheyẹwhe nọ namẹ wẹ ogbẹ̀ madopodo gbọn Klisti Jesu Oklunọ mítọn dali.” Eyin Jesu wẹ mẹhe jiya bo kú na mí, yèdọ mẹhe ze ogbẹ̀ etọn jo do ota mítọn mẹ, naegbọn wefọ lọ dlẹnalọdo ofligọ lọ taidi “nunina he Jiwheyẹwhe nọ namẹ,” bọ e ma yin “nunina he Jesu nọ namẹ”?c

Dona: Un-un? N’ma yọnẹn.

Mawusi: Jiwheyẹwhe wẹ dá Adam po Evi po, podọ ewọ wẹ yé waylando sọta to whenue yé vẹtoli to jipa Edẹni tọn mẹ. E na ko vẹna ẹn taun to whenue ovi etọn awe tintan lẹ to aigba ji ṣiatẹ sọta ẹ. Ṣigba, afọdopolọji wẹ Jehovah dọ nuhe e na wà nado jla ninọmẹ lọ do.d E basi tito dọ dopo to nudida gbigbọ tọn etọn lẹ mẹ na wá aigba ji nado nọgbẹ̀ taidi gbẹtọvi pipé de, bo na wá ze ogbẹ̀ etọn jo taidi avọ́sinsan ofligọ tọn de. Enẹwutu, tito ofligọ lọ tọn to blebu mẹ yin nunina de sọn Jiwheyẹwhe dè. Ofligọ lọ sọ yin nunina Jiwheyẹwhe tọn to aliho devo mẹ. Be mì ko lẹnnupọndo nuhe na ko yin numọtolanmẹ Jiwheyẹwhe tọn to whenue Jesu yin hùhù ji ya?

Dona: Eyeo.

Mawusi: N’mọ aihundanu delẹ tofi. E taidi dọ mì do ovi.

Dona: Mọwẹ, n’do ovi awe, sunnu dopo yọnnu dopo.

Mawusi: Taidi mẹjitọ de, mì pọ́n nuhe na ko yin numọtolanmẹ Jehovah Jiwheyẹwhe tọn, yèdọ Otọ́ olọn mẹ tọn Jesu tọn, to gbeegbe Jesu kú. Nuhe dọ n’te wẹ yindọ numọtolanmẹ tẹwẹ e na ko tindo to whenue e to Visunnu vivẹ́ etọn pọ́n sọn olọn mẹ bọ yè wle e, bo ṣàn ẹn kò bosọ lì akotokún in? Podọ numọtolanmẹ tẹwẹ Otọ́ lọ tindo to whenue yè whè Visunnu lọ do potin go bo jo e do finẹ bọ e mọ awufiẹsa kaka bo kú?

Dona: E na ko mọ awufiẹsa taun. N’ma ko lẹnnupọn yì finẹ dai!

Mawusi: Nado dọ hójọhó, mí ma sọgan dọ numọtolanmẹ he Jiwheyẹwhe tindo taun to gbenẹgbe. Ṣigba, mí yọnẹn dọ Jiwheyẹwhe nọ tindo numọtolanmẹ, podọ mí sọ yọ́n nuhewutu e na dotẹnmẹ onú enẹ lẹpo nado jọ. Wefọ he mẹsusu yọnẹn de basi zẹẹmẹ etọn to aliho he dọnmẹdogo taun de mẹ, enẹ wẹ Johanu 3:16. Mì jaale, be mì gán hia ẹ ya?

Dona: E dọmọ: “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.”

Mawusi: Mì wanu. Mì vọ́ pọ́n bẹjẹeji wefọ lọ tọn. E dọmọ: “Jiwheyẹwhe yiwanna aihọn lọ.” Nuagokun lọ niyẹn: owanyi. Owanyi wẹ whàn Jiwheyẹwhe nado do Visunnu etọn hlan aigba ji nado kú do ota mítọn mẹ. Nugbonugbo, avọ́sinsan ofligọ lọ tọn wẹ dohia daho hugan owanyi tọn. Podọ enẹ wẹ Kunnudetọ Jehovah tọn lẹ nọ pli dopọ nado flin to whemẹwhemẹ to azán he sọgbe hẹ gbeegbe Jesu kú ji. Be dogbapọn ehe gọalọna mì ya?

Dona: Mọwẹ. Mì wanu taun na whenu he mì yizan nado basi zẹẹmẹ ehe lẹpo na mi.