N’Dọnsẹpọ Jiwheyẹwhe bo Mọaleyi

TO WHENUE n’tindo owhe ṣinẹnẹ, n’masọ dite dogọ ba. Enẹ jọ to owhe 34 die to Côte d’Ivoire, podọ kakajẹ egbé n’ma dite hú mẹtlu dopo. To whenue e wá họnwun dọ n’ma sọgan dite dogọ ba, mẹjitọ ṣie lẹ na tuli mi nado nọ wazọ́n sinsinyẹn, ehe na zọ́n bọ n’ma na nọ lẹnnupọn mapote do awusọhia ṣie ji. N’basi tafo de do owhé mítọn nukọn bo nọ tẹ́ atin-sinsẹ́n do e ji. Podọ n’nọ wlebòna agbàn ṣie bọ e nọ dọ̀n nuhọ̀tọ lẹ.

Azọ́n sinsinyẹn he n’nọ wà ma diọ nulẹpo. N’gbẹ́ whègli taun podọ e nọ vẹawuna mi nado wà onú delẹ, taidi nado ze nude to agbàn ji. E taidi dọ nulẹpo wẹ yin bibasina mẹhe dite hú mi whla awe lẹ. Onú dee tọn nọ blawuna mi, amọ́ nulẹ diọ to whenue n’tindo owhe 14.

To gbèdopo, yọnnu Kunnudetọ Jehovah tọn awe delẹ wá họ̀ atin-sinsẹ́n, bọ enẹgodo yé jẹ Biblu plọn mi ji. N’wá mọdọ nado yọ́n Jehovah po lẹndai etọn po yin nujọnu hugan awusọhia ṣie. Enẹ na mi tuli. Wefọ he n’yiwanna hugan wẹ Psalm 73:28. Adà tintan etọn dọmọ: “E yọ́n na mi nado sẹpọ Jiwheyẹwhe.”

Whẹndo mítọn sẹtẹn yì Burkina Faso to whenue n’ma donukun etọn podọ gbẹzan ṣie diọ taun. To whenue mí to Côte d’Ivoire, kọmẹnu mítọn he ko nọ mọ mi to agbàn ṣie kọ̀n lẹ ko jẹakọ hẹ awusọhia ṣie. Amọ́ to fie mí jẹ din, n’yin mẹyọyọ bọ awusọhia ṣie nọ paṣa mẹsusu. Gbẹtọ lẹ nọ bọnukundona mi. To ojlẹ de mẹ, n’gbọ bo nọ họmẹ na osẹ susu. N’wá flin ale he n’mọyi to whenue n’dọnsẹpọ Jehovah. N’kanwehlan alahọ Kunnudetọ Jehovah tọn lẹ tọn bọ yé do mẹhe jẹ lọ hlan mi, enẹ wẹ Nani, mẹdehlan de he nọ hẹn zokẹkẹ.

Ali okọ́ vẹẹ tọn he to lẹdo mítọn mẹ lẹ nọ saba dídí, bo nọ gọ́ na ogbọ̀n to jikun whenu. Whlasusu wẹ Nani jai po zokẹkẹ etọn po to whenue e ja nuplọn hẹ mi gbé, amọ́ e ma gbọjọ. E wá dọ dọ emi na nọ ze mi yì opli lẹ. N’mọdọ enẹ na biọ dọ n’ma nọ tọ́n sọn whégbè bọ gbẹtọ lẹ nasọ nọ bọnukundona mi. Humọ, kẹkẹ lọ kùnkùn ma nọ bọawu podọ e na pẹ̀n dogọ eyin n’sin e ji. Amọ́, n’yigbe na n’flin adà awetọ wefọ he n’yiwanna lọ tọn he dọmọ: “Yẹn ko sọ hẹn OKLUNỌ Jiwheyẹwhe zun fibẹtado ṣie.”

Eyin yẹn po Nani po jei opli mí nọ jai jẹ ogbọ̀n mẹ to whedelẹnu, amọ́ opli lẹ yìyì nọ hẹn ale wá. Lehe gbẹtọ lẹ nọ konu yẹsẹ do mi do to Plitẹnhọ Ahọluduta tọn mẹ gbọnvo taun na nukun he mẹdevo lẹ do nọ pọ́n mi to gbonu! To osun ṣinẹnẹ godo, n’yí baptẹm.

Adà atọ̀ntọ wefọ he n’yiwanna lọ tọn wẹ, “Na yẹn nido nọ dọho azọ́n towe lẹpo tọn.” N’yọnẹn dọ yẹwhehodidọ wẹ na vẹawuna mi hugan. N’gbẹ́ flin whla tintan he n’yì dọyẹwheho sọn whédegbè jẹ whédegbè. Mẹlẹpo wẹ bọnukundona mi bo to hihodo mi, podọ yé tlẹ sọ vlẹ zọnlinzinzin ṣie. Ehe vẹna mi taun, amọ́ n’nọ flinnu dee dọ yé tindo nuhudo Paladisi tọn taidi yẹnlọsu; enẹwutu n’ma gbọjọ.

Nado hẹn nulẹ bọawu, n’họ̀ kẹkẹ tata afọ atọ̀nnọ he yè nọ yí alọ do kùn de. Wẹnlatọ he po yẹn po zọ̀n nọ sisẹ́ mi eyin mí jlo na hẹ opó ji, bo nọ lọ́n hẹ kẹkẹ lọ ji eyin mí jlo na biọ dòdòmẹ. Azọ́n yẹwhehodidọ tọn he nọ vẹawuna mí dai nọ hẹn ayajẹ wá na mi todin, sọmọ bọ n’bẹ azọ́n gbehosọnalitọ tọn jẹeji to 1998.

N’deanana plọnmẹ Biblu susu, bọ ẹnẹ to yé mẹ yí baptẹm. Podọ dopo to nọviyọnnu ṣie lẹ mẹ sọ kẹalọyi nugbo lọ! Eyin n’sè lehe mẹdevo lẹ to nukọnyi do, e nọ na mi tuli titengbe to whenue n’tindo nuhudo etọn. To gbèdopo he n’to ovà jẹ, n’mọ wekanhlanmẹ de yí sọn Côte d’Ivoire. N’jẹ Biblu plọn ji hẹ wehọmẹvi alavọ tọn de to Burkina Faso, bo wá zejo na mẹmẹsunnu de. Wehọmẹvi lọ wá sẹtẹn yì Côte d’Ivoire. Homẹhun mi taun nado sè dọ e ko lẹzun wẹnlatọ he ma ko yí baptẹm!

Nawẹ n’nọ penukundo dee go gbọn? Ogbẹ́ he nọ gọalọna mẹhe tindo oblọ lẹ plọn mi avọ̀-titọ̀. Nuplọnmẹtọ dopo doayi lehe n’nọ vánkan do go bo dọmọ: “Mí dona plọn we adí didà.” Yé wàmọ nugbo. Bọ to whégbè, n’nọ dà adí avọ̀ yinyan po nukiklọ po tọn. Gbẹtọ lẹ yiwanna adí ṣie bo nọ dekunnu etọn to mẹdevo lẹ dè. N’nọ zan zokẹkẹ afọ atọ̀nnọ de nado má ẹn na ahisinọ lẹ.

E blawu dọ to 2004, awufiẹsa nẹgbéhú ṣie he ko gbán dai tọn sọ jẹeji sọmọ bọ n’doalọtena azọ́n gbehosọnalitọ tọn. Amọ́, n’gbẹ́ nọ tindo mahẹ gigọ́ to lizọnyizọn lọ mẹ.

Gbẹtọ lẹ dọ dọ n’yin yinyọnẹn na nukiko ṣie he nọ dọnmẹdogo. N’tindo whẹwhinwhẹ́n lẹpo nado jaya na n’dọnsẹpọ Jiwheyẹwhe bo mọaleyi wutu.​—Dile e yin didọ gbọn Sarah Maiga dali.