Mí Ko Plọn Nususu sọn Nuplọnmẹtọ Daho Mítọn Dè to Gbẹzan Mítọn Mẹ

APAJLẸ MẸJITỌ ṢIE LẸ TỌN

To vivọnu owhe 1950 lẹ tọn, mẹjitọ ṣie lẹ sẹtẹn sọn Italie yì Kindersley to Saskatchewan to Canada. Ojlẹ kleun de to enẹgodo, yé plọn nugbo lọ, podọ e lẹzun apadewhe gbẹzan mítọn tọn. N’flindọ whenue n’to pẹvi, n’yí whenu susu zan po whẹndo ṣie po to lizọnyizọn lọ mẹ, enẹwutu whenue n’do owhe ṣinatọ̀n, n’nọ dọ fànfún to whedelẹnu dọ “gbehosọnalitọ alọgọtọ tọn” bayi wẹ n’te!

Mẹjitọ ṣie lẹ ma do alọnu sọmọ; etomọṣo yé ze apajlẹ dagbe dai na nuhe dù avọ́sinsan lẹ bibasi do Jehovah tamẹ. Di apajlẹ, to 1963 yé sà susu to nutindo yetọn lẹ mẹ nado mọ akuẹ he pé nado yì plidopọ akọjọpli tọn de to Pasadena, Californie, États-Unis. To 1972, mí zingbejizọnlin na nudi kilomẹtlu 1000 yì Trail to Colombie-Britannique to Canada nado yì gọalọ to aigba-denamẹ he ji yè nọ do Italie-gbè te. Otọ́ ṣie nọ wazọ́n taidi whégbè-jladotọ. E gbẹ́ dotẹnmẹ hundote lẹ nado jẹ otẹn daho mẹ to agbasazọ́n etọn mẹ dai na e nido penugo bo ze ayiha do onú gbigbọ tọn lẹ ji.

N’yọ́n pinpẹn apajlẹ he mẹjitọ ṣie lẹ zedai na yẹn po nọvi ṣie atọ̀n lẹ po tọn. Enẹ yin dodonu he hẹnai de na azọ́nplọnmẹ yẹwhehọluduta tọn ṣie, he bẹ nuplọnmẹ titengbe de hẹn: Enẹ wẹ yindọ eyin n’dín Ahọluduta lọ whẹ́, Jehovah na penukundo go e.—Mat. 6:33.

WHLA TINTAN HE N’DỌ́ SINSẸ̀NZỌN WHENU-GIGỌ́ TỌN PỌ́N

To 1980, n’wlealọ hẹ Debbie, yèdọ mẹmẹyọnnu whanpẹnọ de he tindo yanwle gbigbọmẹ tọn he họnwun lẹ. Mí jlo na biọ sinsẹ̀nzọn whenu-gigọ́ tọn mẹ, enẹwutu Debbie bẹ gbehosọnalitọ jẹeji osun atọ̀n to alọwle mítọn godo. Owhe dopo to alọwle mítọn godo, mí sẹtẹn yì agun pẹvi he mẹ hudo tin te de, podọ yẹnlọsu hopódona ẹn to sinsẹ̀nzọn gbehosọnalitọ tọn mẹ.

To ojlẹ de godo, mí gbọjọ bo basi dide nado sẹtẹn. Amọ́ jẹnukọn whẹ́, mí dọhodopọ hẹ nugopọntọ lẹdo tọn. E yí owanyi do dọna mí madoadudẹ́ji dọ: “Mìlọsu tọn demẹ. Mì to ayiha zedo adà ylankan ninọmẹ mìtọn tọn ji. Kakatimọ, eyin mì nọ dín adà dagbe lẹ, mì na mọ.” Ayinamẹ he sin hudo mí do pẹẹ niyẹn. (Salm. 141:5) Mí yawu yí i do yizan mẹ, podọ e madẹn bọ mí doayi adà dagbe susu lẹ go na taun tọn. Mẹsusu to agun lọ mẹ jlo na wà susu na Jehovah, ehe bẹ jọja po mẹdelẹ he alọwlemẹ yetọn yin mayisenọ lẹ po hẹn. Nuplọnmẹ dagbe de wẹ enẹ yin na mí. Mí plọn nado nọ ze ayiha do nudagbe lẹ ji bo nọtepọn Jehovah nado jla ninọmẹ he gán taidi avùnnukundiọsọmẹnu lẹ do. (Mika 7:7) Mí gọ̀ ayajẹ mítọn mọyi, podọ nulẹ pọnte.

Nuplọnmẹtọ mítọn lẹ to wehọmẹ gbehosọnalitọ tọn mítọn tintan ko yin azọ́ndena do tògodo pọ́n. Dile yé to yẹdide lẹ dohia bosọ to hodọ gando avùnnukundiọsọmẹnu he yé pehẹ lẹ po dona he yé duvivi etọn lẹ po go, ehe yidogọna ojlo mítọn nado sẹ̀n taidi mẹdehlan lẹ. Enẹwutu, mí magbe nado yí sinsẹ̀nzọn ehe do basi yanwle mítọn.

Nado jẹ yanwle enẹ kọ̀n, to 1984 mí sẹtẹn yì lẹdo Québec tọn mẹ fie yè nọ do Flansegbe te de, ehe to kilomẹtlu 4000 linlán do Colombie-Britannique to Canada. Enẹ zẹẹmẹdo dọ mí ni jẹakọ hẹ aṣa po ogbè yọyọ devo pete po. Avùnnukundiọsọmẹnu devo wẹ yindọ akuẹ nọ saba hán mí. To ojlẹ de mẹ, mí nọ yì ogle glesi de tọn mẹ nado yì ṣinyan wẹli he pò to kọmẹ lẹ bo nọ dà dù. Debbie yọ́n lehe yè nọ yí wẹli lọ lẹ do dà núdùdù wunmẹwunmẹ lẹ do! Mahopọnna avùnnukundiọsọmẹnu lọ lẹ, mí yí ayajẹ do doakọnna ninọmẹ lọ. Humọ, mí mọdọ Jehovah to nukunpedo mí go.—Salm. 64:10.

To gbèdopo, alokan mítọn dọnú to ajiji mẹ. Oylọ nado wá sẹ̀n to Bẹtẹli Canada tọn wẹ. Mí ko doalọwemẹ nado yì Wehọmẹ Giliadi tọn, enẹwutu dile etlẹ yindọ homẹ mítọn hùn, mí jẹflumẹ pẹẹde. Amọ́, mí kẹalọyi oylọ-basinamẹ lọ. Whenue mí jẹ dọ́n, mí kanbiọ Mẹmẹsunnu Kenneth Little he yin hagbẹ Wedegbẹ́ Alahọ tọn dọ, “Bọ alọdowemẹwe Giliadi tọn mítọn lo?” Nuhe e dọ wẹ yindọ “Mí na dasá aná enẹ eyin mí ko jẹ e kọ̀n.”

To osẹ dopo godo mí jẹ aná lọ kọ̀n, na yẹn po Debbie po yin oylọ basina yì Giliadi. Enẹwutu, mí dona basi nudide dopo. Mẹmẹsunnu Little dọna mí dọ: “Depope he mì de, to ojlẹ kleun de godo mì na wá dọ dọ eyin mí ko yọnẹn wẹ, mí na ko de diẹ. De ma yọ́n hú de; Jehovah gán dona awe lẹpo.” Mí kẹalọyi oylọ lọ bo yì Giliadi, podọ to owhe lẹ godo mí wá mọdọ nugbo wẹ ayinamẹ Mẹmẹsunnu Little tọn. Mí nọ saba yí hogbe etọn lẹ zan na mẹhe jlo na basi nudide to azọ́ndenamẹ lẹ ṣẹnṣẹn.

GBẸZAN MÍTỌN TAIDI MẸDEHLAN LẸ

Homẹ mítọn hùn taun nado to wehọmẹvi 24 he yin dide nado yì klasi 83​tọ Wehọmẹ Giliadi tọn lẹ mẹ, ehe yin bibasi to Brooklyn, New York, to avril 1987. Mẹmẹsunnu Ulysses Glass po Jack Redford po wẹ yin mẹplọntọ mítọn tintan lẹ. Osun atọ́n juwayi bleun bọ mí yí gbedewema to 6 septembre 1987. Mí yin azọ́ndena hlan Haïti, to pọmẹ hẹ John po Marie Goode po.

Sọn 1962 gbọ́n he mẹdehlan Giliadi tọn godo tọn lẹ yin yinyan sọn Haïti, mẹdehlan devo lẹ masọ yin didohlan dọ́n ba. Osẹ atọ̀n to gbedewema yíyí mítọn godo, mí mọ míde to Haïti to lẹdo he to olá de mẹ to osó lẹ ṣẹnṣẹn to agun pẹvi he bẹ wẹnlatọ 35 hẹn de mẹ. Mí gbẹ́ yin jọja bo ma do numimọ, podọ mílẹ ṣo wẹ to owhé mẹdehlan tọn lọ gbè. Mẹlẹ jẹhẹ́n taun, podọ suhugan yetọn ma yọ́n wehia. To bẹjẹeji azọ́n mẹdehlan tọn mítọn tọn, mí do numimọ hunyanhunyan otò tọn, gandudu hihòyi tọn, miyọ́n he yin fiflọ nado súali po jẹhọn ahizi tọn lẹ po tọn.

Mí gán plọn nususu sọn akọndonanu mẹmẹsunnu po mẹmẹyọnnu mítọn ayajẹnọ he to Haïti lẹ po tọn mẹ. Ogbẹ̀ vẹawuna susu yetọn, amọ́ yé yiwanna Jehovah po lizọnyizọn lọ po. Mẹmẹyọnnu mẹhomẹ de ma yọ́n wehia; etomọṣo e yọ́n wefọ 150 do tamẹ. Ninọmẹ egbesọegbesọ tọn lẹ nọ hẹn gbemima mítọn sinyẹn deji nado zindonukọn bo to wẹndagbe Ahọluduta lọ tọn lá taidi pọngbọ dopo gee lọ na nuhahun gbẹtọvi lẹ tọn. Homẹ mítọn nọ hùn taun nado mọdọ mẹhe mí plọn Biblu hẹ wayi delẹ wá to sinsẹ̀n taidi gbehosọnalitọ whepoponu tọn, gbehosọnalitọ titengbe podọ mẹho agun tọn lẹ.

Whenue mí to Haïti, n’dukosọna Trevor, yèdọ jọja de he yin mẹdehlan sinsẹ̀n Mormon tọn, podọ mí tindo dotẹnmẹ lọ nado dọhodopọ do Biblu ji whlasusu. To owhe lẹ godo, n’mọ wekanhlanmẹ madonukun de yí sọn e dè. E wlan dọmọ: “N’na yí baptẹm to plidopọ he ja lọ ji! N’jlo na lẹkọyi Haïti bo sẹ̀n di gbehosọnalitọ titengbe to lẹdo dopolọ mẹ fie n’sẹ̀n te taidi mẹdehlan sinsẹ̀n Mormon tọn.” Podọ, nuhe e wà niyẹn na owhe susu to pọmẹ hẹ asi etọn.

EUROPE—ENẸGODO AFLIKA

Mí yin azọ́ndena nado sẹ̀n to lẹdo Europe tọn de mẹ, fie hudo azọ́n Ahọluduta lọ tọn tin te. To 1992, mí wá Ljubljana to Slovénie sẹpọ fie mẹjitọ ṣie lẹ whẹ́n te whẹpo yé do sẹtẹn yì Italie. Awhàn gbẹ́ to núgbà to lẹdo Yougoslavie hohowhenu tọn lọ mẹ. Wekantẹn alahọ tọn he to Vienne to Autriche gọna azọ́nwatẹn he to Zagreb to Croatie po Belgrade po to Serbie wẹ to nukunpedo azọ́n lọ go to lẹdo lọ mẹ. Todin, otò he ko jẹ yedekannu lẹpo gán tindo Bẹtẹli yetọn titi.

Enẹ zẹẹmẹdo dọ mí dona diọada sọgbe hẹ aṣa devo bosọ plọn ogbè devo. Mẹhe to lẹdo lọ mẹ lẹ na dọ dọ “Jezik je težek,” ehe zẹẹmẹdo “Ogbè lọ vẹawu.” Podọ nugbo taun wẹ enẹ! Mí yiwanna nugbonọ-yinyin mẹmẹsunnu po mẹmẹyọnnu mítọn lẹ po tọn he to gbesisọ mẹ nado kẹalọyi diọdo titobasinanu lọ tọn lẹ, podọ mí doayi lehe Jehovah dona yé do go. Whladopo dogọ, mí mọ lehe Jehovah nọ yí owanyi do penukundo whẹho lẹ go to ojlẹ sisọ mẹ do. Owhe susu he mí yizan to Slovénie lẹ vọ́ huhlọn na nuhe mí plọn lẹ bosọ plọn mí nuyọyọ devo lẹ.

Amọ́, diọdo susu gbẹ́ to nukọn ja. To 2000, mí yin azọ́ndena do Côte d’Ivoire, to Whèyihọ-waji Aflika tọn. Enẹgodo to novembre 2002, na tòwhan de wutu mí yin bibẹ sọyi Sierra Leone. Tòwhan he nọ aimẹ na owhe 11 de ṣẹṣẹ wá vivọnu to finẹ wẹ. E vẹawuna mí nado tọ́n sọn Côte d’Ivoire to ajiji mẹ do mọ. Amọ́, nuhe mí ko plọn lẹ gọalọna mí nado hẹn ayajẹ mítọn go.

Mí na ayidonugo aigba-denamẹ he to kọdetọn dagbe tindo lọ gọna mẹmẹsunnu po mẹmẹyọnnu owanyinọ mítọn lẹ po, yèdọ mẹhe ko doakọnna awhàn na owhe susu lẹ. Yé ma do alọnu sọmọ, amọ́ yé nọ jlo na má nuhe yé tindo lẹ. Mẹmẹyọnnu dopo tlẹ na avọ̀ delẹ Debbie. Whenue Debbie whleawu nado kẹalọyi, mẹmẹyọnnu lọ tẹkudeji bo dọ dọ: “To awhàn whenu, mẹmẹsunnu he to otò devo mẹ lẹ nọgodona mí. Din mílẹ ji wẹ e jẹ nado gọalọ.” Mí yí do basi yanwle nado hodo apajlẹ yetọn.

Mí wá lẹkọyi Côte d’Ivoire, amọ́ hunyanhunyan sọ fọ́n to finẹ whladopo dogọ. Enẹwutu to novembre 2004, agahun pẹvi de wá ze mí bọ mí họ̀n po saki dopodopo po, ehe zínpinpẹn etọn ma hugan kilo 10 poun. Mí mlọn kọmẹ to fie awhànfuntọ France tọn lẹ te to ozán lọ mẹ, bọ to aihọngbè, mí họnyi Suisse. Whenue mí jẹ wekantẹn alahọ tọn to nudi ogàn wiawe zánmẹ tọn mẹ, Wedegbẹ́ Alahọ tọn po Mẹplọntọ Wehọmẹ Azọ́nplọnmẹ Devizọnwiwa tọn lẹ po to pọmẹ hẹ asi yetọn lẹ yí zohunhun do dokuavọna mí bo gbò mí fán whlasusu, bosọ de núdùdù miyọ́nawu po chocolat Suisse tọn susu po tọ́n. E yinuwado mí ji taun.

Mí yin azọ́ndena do Ghana na ojlẹ de, podọ to enẹgodo mí lẹkọwa Côte d’Ivoire to whenue hunyanhunyan tonudidọ tọn lọ ko depò godo. Homẹdagbe pipli mẹmẹsunnu lẹ tọn gọalọna mí to ojlẹ he mẹ mí họ̀n po ayimajai po te enẹlẹ, podọ to azọ́ndenamẹ ojlẹ gli tọn lẹ whenu. Yẹn po Debbie po wá tadona kọ̀n dọ dile etlẹ yindọ owanyi mọnkọ he to pipli mẹmẹsunnu lẹ tọn ṣẹnṣẹn gbayipe to titobasinanu Jehovah tọn mẹ, mí ma na yí i do mọ jlọjẹ gbede. Nado dọ hójọhó, ojlẹ hunyanhunyan tọn enẹlẹ lọsu tlẹ wá lẹzun apadewhe azọ́nplọnmẹ họakuẹ he mí mọyi lẹ tọn.

TO ṢẸNṢẸN WHÈZẸTẸN TỌN

To 2006, wekanhlanmẹ de wá sọn tatọ-tẹnnọ he mẹ mí mọ azọ́ndenamẹ yọyọ de yí te hlan Ṣẹnṣẹn Whèzẹtẹn tọn. Whladopo dogọ, ehe na biọ dọ mí ni bẹ gbejizọnlin devo jẹeji, pehẹ avùnnukundiọsọmẹnu yọyọ lẹ bo jẹakọ hẹ ogbè po aṣa yọyọ lẹ po. Nususu wẹ mí dona plọn to lẹdo he mẹ tonudidọ po sinsẹ̀n po hẹnai te ehe. E nọ vivi na mí nado mọdọ mẹhe nọ do ogbè voovo lẹ tin to agun lẹ mẹ, podọ homẹ mítọn nọ hùn nado mọ pọninọ he nọ wá sọn anademẹ yẹwhehọluduta tọn lẹ hihodo mẹ. Mí yiwanna mẹmẹsunnu lẹ taun, na susu yetọn yí adọgbigbo do doakọnna nukundiọsọmẹ sọn hagbẹ whẹndo tọn, klasigbẹ́, azọ́nwatọgbẹ́ po kọmẹnu lẹ po dè wutu.

Mí yì plidopọ vonọtaun 2012 tọn to Tel-Aviv to Israël. Sọn Pẹntikọsti owhe 33 W.M. gbọ́n, whla tintan die he omẹ Jehovah tọn lẹ basi plidopọ de to lẹdo lọ mẹ he bẹ omẹ susu sọmọ hẹn. Ojlẹ ayidego tọn nankọ die!

To owhe enẹlẹ gblamẹ, mí yin didohlan nado yì dla otò he mẹ azọ́n mítọn yin alọhẹndotena te de pọ́n. Mí hẹn delẹ to owe mítọn lẹ mẹ, tindo mahẹ to lizọnyizọn lọ mẹ bosọ yì plidopọ kleunkleun lẹ. Awhànfuntọ he sọawhànnu taun lẹ po fie yè nọ gbòali namẹ te lẹ po to filẹpo, amọ́ mí nọ to hihọ́ glọ dile mí yí zinzin do to yìyì to pọmẹ hẹ wẹnlatọ kleun delẹ.

MÍ LẸKỌWA AFLIKA

To 2013, mí mọ azọ́ndenamẹ devo lao de yí, enẹ wẹ nado sẹ̀n to alahọ Congo Kinshasa tọn mẹ, yèdọ otò de he klo bo yọ́npọ́n taun to jọwamọ-liho, amọ́ ohẹ́n kloklo hẹnnugble to fine, podọ awhàn nọ saba gbànú to finẹ. To tintan whenu, mí dọna míde dọ, “Mí yọ́n Aflika; mí ko to gbesisọ mẹ.” Amọ́, nususu gbẹ́ pò bọ mí na plọn titengbe whenue e biọ dọ mí ni zingbejizọnlin yì lẹdo he mẹ ali ma yì lẹ. Mí mọ nudagbe susu he ji mí nọ ze ayiha do, ehe bẹ owanyi mẹmẹsunnu lẹ tọn na lizọnyizọn lọ, vivẹnudido yetọn nado yì opli po plidopọ lẹ po gọna linsinsinyẹn po ayajẹ yetọn po hẹn mahopọnna nuhahun akuẹzinzan tọn. To tintan whenu, mí mọ lehe azọ́n Ahọluduta lọ tọn to nukọnyi do kiki po godonọnamẹ Jehovah tọn gọna dona etọn po. Owhe he mí yizan to sinsẹ̀nzọn whenu-gigọ́ tọn mẹ to Congo lẹ zọ́n bọ mí do oflin dagbe lẹ bosọ jihọntọn susu devo lẹ bọ mí taidi whẹndo.

To vivọnu owhe 2017 tọn, mí sọ yì azọ́ndenamẹ devo mẹ to Afrique du Sud. Alahọ ehe wẹ yin dehe klohugan to dehe mẹ mí ko sẹ̀n te pọ́n lẹ mẹ, podọ azọ́ndenamẹ Bẹtẹli tọn mítọn lẹ tlẹ sọ di nuyọyọ na mí. Whladopo dogọ, nususu wẹ mí dona plọn, amọ́ nuhe mí plọn wayi lẹ gọalọna mí. Mí yiwanna mẹmẹsunnu po mẹmẹyọnnu susu lẹ po he ko to akọndonanu na owhe susu. Podọ, e jiawu nado mọ whẹndo Bẹtẹli tọn to azọ́nwa to kọndopọ mẹ mahopọnna dọ yé wá sọn aṣa po akọ̀ voovo lẹ po mẹ. E họnwun dọ Jehovah ko yí jijọho do dona omẹ etọn lẹ, dile yé to gbẹtọ-yinyin yọyọ lọ zedo ogo bo to nunọwhinnusẹ́n Biblu tọn lẹ yido yizan mẹ.

To owhe lẹ gblamẹ, yẹn po Debbie po ko mọ azọ́ndenamẹ he whànmẹ lẹ yí, bo diọada sọgbe hẹ aṣa voovo lẹ bosọ plọn ogbè yọyọ lẹ. E ma bọawu to whelẹponu, amọ́ mí mọ owanyi nugbo Jehovah tọn to whepoponu gbọn titobasinanu etọn po pipli mẹmẹsunnu lẹ tọn po gblamẹ. (Salm. 144:2) Mí kudeji dọ azọ́nplọnmẹ he mí mọyi to sinsẹ̀nzọn whenu-gigọ́ tọn mítọn mẹ ko zọ́n bọ mí lẹzun devizọnwatọ Jehovah tọn he pọnte dogọ lẹ.

N’yọ́n pinpẹn oplọn he mẹjitọ ṣie lẹ na mi; godonọnamẹ asi vivẹ́ ṣie Debbie tọn; gọna apajlẹ dagbe he whẹndo gbigbọmẹ tọn lẹdo aihọn pé tọn mítọn zedai tọn taun. Dile mí ze nukun mítọn do sọgodo ji, mí magbe nado to nuplọn sọn Nuplọnmẹtọ Daho mítọn dè.