ETẸWẸ BIBLU PLỌN MÍ?

Etẹwẹ nọ jọ eyin mí kú?

MẸDELẸ YISE dọ mí nọ nọgbẹ̀ to ninọmẹ devo mẹ, podọ mẹdevo lẹ yise dọ okú wẹ opodo nulẹpo tọn. Etẹwẹ hiẹ yise?

NUHE BIBLU DỌ

“Oṣiọ lẹ ma yọ́n nude.” (Yẹwhehodọtọ 9:5) To whenue mí kú, mí masọ nọ tin ba.

NUDEVO HE MÍ PLỌN SỌN BIBLU MẸ

• Sunnu tintan, Adam lẹkọyi kọ́gudu mẹ to okú etọn godo. (Gẹnẹsisi 2:7; 3:19) Mọdopolọ, kọ́gudu mẹ wẹ mẹhe kú lẹpo nọ lẹkọyi.​—Yẹwhehodọtọ 3:19, 20.

• Mẹhe kú lẹ ko yin whẹsuna sọn ylando mẹ kavi mọ jona ylando yetọn lẹ tọn yí. (Lomunu lẹ 6:7) To whenue mẹde kú, e ma nasọ yin yasana na ylando wutu ba.

Be oṣiọ lẹ sọgan gọwá ogbẹ̀ ya?

ETẸWẸ A NA DỌ?

• Mọwẹ

• Lala

• N’ma yọnẹn

NUHE BIBLU DỌ

“Fọnsọnku . . . de na tin.”​—Owalọ lẹ 24:15.

NUDEVO TẸWẸ MÍ SỌGAN PLỌN SỌN BIBLU MẸ?

• Biblu nọ saba yí okú jlẹdo amlọn go. (Johanu 11:11-14) Jiwheyẹwhe sọgan fọ́n oṣiọ lẹ, kẹdẹdile mí sọgan fọ́n mẹde he to amlọndọ do.​—Job 14:13-15.

• Biblu bẹ kandai fọnsọnku tọn voovo delẹ hẹn, ehe na mí whẹwhinwhẹ́n dolido nado yise dọ oṣiọ lẹ na wá yin finfọnsọnku.​—1 Ahọlu lẹ 17:17-24; Luku 7:11-17; Johanu 11:39-44.