Oṣiọ lẹ Na Gọwá Ogbẹ̀!

A na flindọ Gail he yin nùdego wayi dọ dọ emi ma didọ emi sọgan wá duto awubla he okú asu emitọn Robert hẹnwa ji gbede. Etomọṣo, e to nukọnpọnhlan nado mọ asu etọn Robert whladopo dogọ to aihọn yọyọ dopagbe Jiwheyẹwhe tọn mẹ. E dọ dọ “wefọ he n’yiwanna hugan wẹ Osọhia 21:3, 4.” Wefọ lọ hia dọmọ: “Jiwheyẹwhe lọsu na tin po yé po. Ewọ nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.”

Gail dọmọ: “Opagbe ehe nọ miọnhomẹna mi taun. Onú mẹhe mẹyiwanna yetọn ko kú bọ yé ma tindo todido lọ nado vọ́ yé mọ whladopo dogọ lẹ tọn nọ wàlẹblanuna mi taun.” Gail yinuwa sọgbe hẹ nuyise etọn gbọn ede zizejo nado wazọ́n taidi wẹndagbe-jlatọ whenu-gigọ́ tọn dali bo nọ lá opagbe Jiwheyẹwhe tọn he dọ gando sọgodo go dọ “okú ma nasọ tin ba” na kọmẹnu etọn lẹ.

A sọgan lẹndọ ehe ma yọnbasi. Ṣigba, lẹnnupọndo apajlẹ dawe de he nọ yin Jobu tọn ji. E to azọ̀njẹ sinsinyẹn. (Jobu 2:7) Dile etlẹ yindọ Jobu jlo nado kú, e gbẹ́ tindo yise dọ Jiwheyẹwhe do huhlọn nado fọ́n ewọ sọnku nado gọwá nọgbẹ̀ to aigba ji. E dọ po jidide po dọmọ: “Ṣo, hiẹ na ko ze mi whlá do Yọdò mẹ . . . Hiẹ na ylọ, bọ yẹn na siọ we. Hiẹ na tindo ojlo vẹkuvẹku nado mọ azọ́n alọ towe lẹ tọn.” (Jobu 14:13, 15) Jobu tindo jide dọ Jiwheyẹwhe etọn na jẹdò etọn bo na tindo ojlo vẹkuvẹku nado gọ̀ ẹ wá ogbẹ̀.

To madẹnmẹ, nuhe Jiwheyẹwhe na wà na Jobu po gbẹtọ madosọha devo lẹ po niyẹn, to whenue e na diọ aigba ehe zun paladisi de. (Luku 23:42, 43) Biblu na jide mí to Owalọ lẹ 24:15 mẹ dọmọ: “Fọnsọnku . . . de na tin.” Jesu lọsu sọ na jide mí dọmọ: “Ehe paṣa mì blo, na ojlẹ lọ ja, to ehe mẹ mẹhe to yọdò oflin tọn lẹ mẹ lẹpo na sè ogbè etọn bo tọ́njẹgbonu.” (Johanu 5:28, 29) Jobu na mọ hẹndi opagbe enẹ tọn. E na penugo nado “lẹgọ do azán huhlọn jọja whenu tọn etọn mẹ,” bọ agbasalan etọn na “gọjẹ e mẹ hugan jọja whenu tọn” kakadoi. (Jobu 33:24, 25) Nudopolọ wẹ na jọ do mẹhe yọ́n pinpẹn tito lẹblanunọ Jiwheyẹwhe tọn lẹpo go, enẹ wẹ nado fọ́n oṣiọ lẹ sọnku nado wá nọgbẹ̀ to aigba ji.

Eyin a ko jiya awufiẹsa he okú mẹyiwanna de tọn nọ hẹnwa tọn pọ́n, nugbo he ji mí dọhodo ehelẹ sọgan nọma de awufiẹsa towe sẹ̀ mlẹnmlẹn. Ṣigba, eyin a nọ lẹnayihamẹpọn do opagbe Jiwheyẹwhe tọn he tin to Biblu mẹ lẹ ji, a na tindo todido po huhlọn nujọnu tọn po nado zindonukọn.​—1 Tẹsalonikanu lẹ 4:13.

Be e na jlo we nado plọn nususu dogọ gando lehe a sọgan duto awubla ji do go ya? Kavi be kanbiọ delẹ nọ duahunmẹna we taidi, “Naegbọn Jiwheyẹwhe Jotẹnna Ylanwiwa po Yajiji Po?” Jaale yì nọtẹn Intẹnẹt tọn mítọn jw.org ji, bo pọ́n lehe Biblu na gblọndo homẹmiọnnamẹ tọn he yọ́n-na-yizan lẹ do.