Dọnsẹpọ Jiwheyẹwhe

Whenue Yọnhonọ lẹ Na Lẹzun Jọja

MẸNU to mí mẹ wẹ yiwanna nuyiwadomẹji yọnhowhe tọn lẹ—yèdọ agbasa wiwlo, nukun he dózin, nuhahun hosise tọn po afọ he to sisọsisọ lẹ po? Hiẹ sọgan kanse dewe dọ, ‘Naegbọn Jiwheyẹwhe dá gbẹtọvi lẹ nado duvivi huhlọn jọja-whenu tọn bo nọ wá jiya nuyiwadomẹji yọnhowhe tọn lẹ tọn to godo mẹ?’ Wẹndagbe wẹ e yin nado yọnẹn dọ e ma yin nuhe Jiwheyẹwhe jlo na mí niyẹn. Kakatimọ, e ko gbọn owanyi dali wleawu lẹndai de tọn nado de mí sọn nuyiwadomẹji yọnhowhe tọn glọ! Doayi nuhe yin didọna tọgbo Job, to Job 33:24, 25 mẹ go.

Lẹnnupọndo ninọmẹ Job, yèdọ dawe nugbonọ he Jehovah yiwanna de tọn ji. Whẹho de tin ehe mẹ Job ma mọnukunnujẹ, enẹ wẹ yindọ Satani fọ́n ayihaawe dote gando tenọgli etọn go bo dọ dọ e to Jiwheyẹwhe sẹ̀n kiki na yanwle ṣejannabi tọn lẹ wutu. Na Jehovah dejido Job go bo yọnẹn dọ Emi tindo huhlọn nado vọ́ ninọmẹ etọn jlado wutu, e na dotẹnmẹ Satani nado whlé Job pọ́n. Enẹwutu, Satani “yí nutitẹ̀ fifiẹ lẹ do hò Job, sọn afọgbẹn afọ etọn tọn jẹ ahọ̀ndòmẹ etọn.” (Job 2:7) Owé lẹ gọ́ agbasa na Job, podọ ayú etọn lẹ húhán, diyuu bosọ jofló. (Job 7:5; 30:17, 30) Be hiẹ sọgan yí nukun homẹ tọn do pọ́n awufiẹsa he mẹ e na ko jugbọn ya? Etomọṣo, Job gbọṣi nugbonọ-yinyin mẹ bo dọmọ: “Kaka yẹn [nado] kú yẹn ma na de walọ pipé ṣie sọn dè e gba.”—Job 27:5.

Mahopọnna enẹ, Job ṣì onú sinsinyẹn de wà. To whenue e mọdọ emi sẹpọ kúdonu, e mọ dodo lánkan na ede bo ‘suwhẹna ede hú Jiwheyẹwhe.’ (Job 32:2) Ṣigba, Elihu, hoyidọtọ Jiwheyẹwhe tọn wọhẹ Job. Humọ, Jiwheyẹwhe gbọdo Elihu nado dowẹn mẹjlọdote tọn de Job dọmọ: “Whlẹn ẹn [Job] sọn tejẹ yì jẹ odò lọ kọ̀n [yọdò paa] mẹ, yẹn ko mọ ofligọ de. Agbasalan etọn na yin jẹemẹ hú ovi de tọn; e lẹgọ do azán ovu etọn tọn lẹ kọ̀n.” (Job 33:24, 25) Hogbe enẹlẹ na ko hẹn Job tindo todido. E ma dona to yaji kaka do kú gba. Eyin Job lẹnvọjọ, homẹ na hùn Jiwheyẹwhe nado kẹalọyi ofligọ de do ota etọn mẹ bo de e sọn adán he to gbigbò e lẹ mẹ.a

Job gbọn whiwhẹ dali kẹalọyi wọhẹ lọ bo lẹnvọjọ. (Job 42:6) E họnwun dọ Jehovah kẹalọyi ofligọ de do ota Job tọn mẹ bo dike ofligọ lọ ni ṣinyọnnudo nuṣiwa etọn, podọ enẹ hùn dotẹnmẹ dotena Jiwheyẹwhe nado hẹn ẹn jẹgangan bo suahọ ẹ. Jehovah “dona ogbẹ̀ godo Job tọn sù hú whẹwhẹwhenu etọn.” (Job 42:12-17) Yí nukun homẹ tọn do pọ́n lehe Job na ko mọ kọgbọ to whenue azọ̀nylankan etọn gbọ bọ agbasalan etọn “jẹemẹ hú ovi de tọn” bosọ mọ dona devo lẹ yí do sọ!

Ofligọ he Jiwheyẹwhe kẹalọyi do ota Job tọn mẹ ma dẹn-to-aimẹ, na Job gbẹ́ gbọṣi mapenọ-yinyin mẹ bo wá kú to godo mẹ. Ofligọ he yọ́n hugan enẹ tlala de tin-to-aimẹ na mí. Jehovah gbọn owanyi dali ze Visunnu etọn, Jesu jo na mí taidi ofligọ de. (Matiu 20:28; Johanu 3:16) Mẹhe do yise hia to ofligọ enẹ mẹ lẹpo tindo todido lọ nado nọgbẹ̀ to paladisi aigba ji tọn de mẹ. To aihọn yọyọ he ja enẹ mẹ, Jiwheyẹwhe na de gbẹtọvi nugbonọ lẹ sọn nuyiwadomẹji yọnhowhe tọn mẹ. Naegbọn hiẹ ma na plọnnu dogọ nado yọ́n nuhe a na wà nado mọ ojlẹ he mẹ agbasalan yọnhonọ lẹ tọn na “jẹemẹ hú ovi de tọn”?

[Nudọnamẹ odò tọn]