A Gán Mọaleyi sọn Mẹtọnhopọn Jiwheyẹwhe Tọn Mẹ

Jiwheyẹwhe dá agbasa mítọn po nugopipe vonọtaun lọ po nado nọ hẹn ede gọjẹ gángán. Dodinnanu de dohia dọ to whenue mẹde gbleawu, agbasa etọn “nọ yí onú voovo he gẹdẹ lẹ wà nado hù apà lọ lẹ, pẹvi po daho po.” (Johns Hopkins Medicine) To afọdopolọji, nugonu he to agbasa lọ mẹ lẹ nọ tẹnpọn nado doalọtena hùndidi, hù apà lọ, bo gọ̀ agbasa lọ jẹgangan.

LẸNNUPỌN: Eyin Mẹdatọ lọ dá agbasa mítọn po nugopipe lọ po nado nọ hù apà lẹ, be enẹ ma na mí jide dọ e na hẹn opagbe etọn di bo de nuhe nọ hẹn apọ̀ wá lẹ sẹ̀ ya? Salmu-kantọ wlan dọmọ: “E nọ hẹnazọ̀ngbọna mẹhe ahun yetọn jẹflumẹ lẹ; e nọ blá apà yetọn lẹ.” (Salmu lẹ 147:3) Amọ́, eyin a jẹflumẹ pete kavi apọṣi we, etẹwẹ sọgan na we nujikudo dọ Jehovah na blá kavi hù apà enẹlẹ he to ahun towe mẹ, todin podọ to osọ he ja?

NUHE BIBLU DỌ GANDO OWANYI JIWHEYẸWHE TỌN GO

Jiwheyẹwhe dopagbe dọmọ: “A dibu blo, na yẹn tin hẹ we. A yin magbọjẹnọ blo, na yẹn wẹ Jiwheyẹwhe towe. Yẹn na hẹn we lodo, mọwẹ, n’na gọalọna we.” (Isaia 41:10) Mẹhe yọnẹn dọ Jehovah nọ dọ emitọn nọ tindo jijọho ahun mẹ tọn bo nọ penugo nado pehẹ whlepọn voovo lẹ. Apọsteli Paulu ylọ jijọho ahun mẹ tọn ehe dọ “jijọho Jiwheyẹwhe tọn he yiaga hugan nukunnumọjẹnumẹ lẹpo.” Paulu yidogọ dọmọ: “To nulẹpo mẹ, yẹn tindo huhlọn lọ gbọn mẹlọ he nọ na mi huhlọn dali.”—Filipinu lẹ 4:4-7, 9, 13.

Owe-wiwe lẹ nọ gọalọna mí nado wleawuna yise to opagbe he Jehovah do gando sọgodo gbẹtọvi lẹ tọn go mẹ. Di apajlẹ, Osọhia 21:4, 5 dọ nuhe e na wà podọ nuhewutu mí sọgan deji dọ e na wà ẹ nugbo:

• “Ewọ nasọ súnsún dasin lẹpo sẹ̀” sọn nukun gbẹtọ lẹ tọn mẹ. Jehovah na de yajiji po awufiẹsa mítọn lẹpo po sẹ̀, etlẹ yin nuhahun he gán nọma yin nujọnu to nukun mẹdevo lẹ tọn mẹ lẹ.

• Ahọlu Ganhunupotọ lọ, yèdọ mẹhe dá nulẹpo “sinai to ofìn” gigonọ etọn ji to olọn mẹ bo na yí huhlọn po aṣẹpipa etọn po zan nado glọnalina yajiji bo gọalọna mí.

• Jehovah na mí jide dọ opagbe emitọn lẹ “tindo jidide bo yin nugbo.” Ehe zẹẹmẹdo dọ taidi Jiwheyẹwhe nugbo lọ, e na mí jide gbọn oyín etọn dali dọ opagbe emitọn lẹ na mọ hẹndi dandan.

“‘Ewọ nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.’ Podọ Mẹhe sinai to ofìn ji lọ dọmọ: ‘Pọ́n! Yẹn to nulẹpo hẹn zun yọyọ.’ Humọ, e dọmọ: ‘Kanwe, na ohó ehelẹ tindo jidide bo yin nugbo wutu.’”​—Osọhia 21:4, 5.

Wẹkẹ yinukundomọ mítọn po Biblu po nọ de mẹhe nkọ Otọ́ olọn mẹ tọn mítọn yin gọna jẹhẹnu etọn lẹ hia. Nudida lẹ nọ basi oylọna mí to aliho ma yin tlọlọ tọn mẹ nado yọ́n Jiwheyẹwhe taidi Họntọn vivẹ́ de, amọ́ Biblu basi oylọna mí tlọlọ dọmọ: “Mì dọnsẹpọ Jiwheyẹwhe, ewọ nasọ dọnsẹpọ mì.” (Jakọbu 4:8) “Ewọ ma dẹn do dopodopo mítọn,” wẹ Owalọ lẹ 17:27 dọ.

Eyin a nọ yí whenu zan nado yọ́n Jiwheyẹwhe, e na wá họnwun na we vudevude dọ, ‘e to towe hòpọn.’ (1 Pita 5:7) Ale tẹlẹ wẹ jidide do Jehovah go nọ hẹnwa?

Pọ́n apajlẹ Toru he wá sọn Japon tọn. E yin pinplọn whẹ́n gbọn onọ̀ Klistiani de dali, amọ́ e wá jẹ awukọndopọ hẹ danuwa-gbẹ́ Japon tọn he nọ yin yiylọdọ yakuza ji. E dọmọ: “N’nọ lẹndọ Jiwheyẹwhe gbẹwanna mi, bosọ nọ mọdọ okú mẹhe lẹdo mi lẹ tọn, titengbe mẹvivẹ ṣie lẹ tọn yin sayanamẹ de sọn ewọ dè.” Toru yigbe dọ ninọmẹ po aliho nulẹnpọn tọn ylankan enẹ po zọ́n bọ emi lẹzun “danuwatọ he ma do lẹblanu.” E flin yanwle he e tindo to whenẹnu dọmọ: “Ojlo ṣie wẹ nado hù mẹhe diyin hú mi de bọ yẹnlọsu na kú azán mape to enẹgodo bo gbọnmọ dali diyin taun.”

Amọ́, to whenue Toru po asi etọn Hannah po plọn Biblu, Toru diọ gbẹzan po aliho nulẹnpọn tọn etọn po pete. Hannah dọmọ: “N’mọ diọdo he asu ṣie bayi lẹ.” Todin, Toru dọ madoadúdẹji dọmọ: “Jiwheyẹwhe de tin he nọ dọ dopodopo mítọn lẹ tọn. E ma jlo dọ mẹde ni dọ̀n, podọ e nọ jona mẹhe lẹnvọjọ nugbonugbo lẹ. Eyin mí to nue to ahun ji na mí bọ mí ma tlẹ gán dọna mẹdevo bọ yé na mọnukunnujẹemẹ lẹ dọna ẹn, ewọ nọ dotoai bo nọ mọnukunnujẹemẹ. To madẹnmẹ, Jehovah na sukúndona nuhahun, yajiji, po awufiẹsa lẹpo po. E tlẹ nọ gọalọna mí todin to aliho he mí ma donukun paali lẹ mẹ. E yiwanna mí bo nọ gọalọna mí to whenue mí jẹflumẹ.”—Salmu lẹ 136:23.

Dile apajlẹ Toru tọn dohia do, yinyọnẹn dọ Jiwheyẹwhe sọgan de yajiji lẹpo sẹ̀ bo súnsún dasin mítọn lẹpo to madẹnmẹ, nọ na mí jide gando sọgodo go bosọ nọ gọalọna mí nado do ayajẹ todin. Mọwẹ, dile etlẹ yindọ a to gbẹnọ to aihọn he gọ́ na yajiji de mẹ, a gán mọaleyi sọn mẹtọnhopọn owanyinọ Jiwheyẹwhe tọn mẹ.