HOSỌ OPLỌN TỌN 24
Nọ Họ́ Hoyijlẹdohogo He Sọta Oyọnẹn Jiwheyẹwhe Tọn lẹ Liai!
“Mí to hoyijlẹdohogo agọ̀ lẹ podọ onú dahodaho lẹpo he yin zizedaga sọta oyọnẹn Jiwheyẹwhe tọn họliai.”—2 KỌL. 10:5.
OHÀN 124 Yin Nugbonọ to Whepoponu
BLADOPỌa
1. Avase tẹwẹ apọsteli Paulu na Klistiani yiamisisadode lẹ?
“MÌ HODO titonu ehe ba blo.” (Lom. 12:2) Klistiani owhe kanweko tintan tọn lẹ wẹ apọsteli Paulu na avase enẹ. Naegbọn e do na avase sinsinyẹn mọnkọ sunnu po yọnnu po he ko klan yede do wiwe hlan Jiwheyẹwhe bo yin yiyiamisisadode gbọn gbigbọ wiwe dali lẹ?—Lom. 1:7.
2, 3. Nawẹ Satani nọ tẹnpọn nado sisẹ́ mí nado diọnukunsọ Jehovah gbọn, ṣigba nawẹ mí sọgan họ̀nadọna nuhe ko “hẹnai” to ayiha mítọn mẹ lẹ gbọn?
2 Paulu to nuhà, na e taidi dọ hoyijlẹdohogo he yin hinhẹnflu gọna tamẹnuplọnmẹ he aihọn Satani tọn nọ zedaga lẹ to nuyiwa do Klistiani delẹ ji wutu. (Efe. 4:17-19) Ehe gán jọ do depope mítọn go. Satani, yèdọ yẹwhe titonu ehe tọn to vivẹnudo to aliho egblemaku tọn mẹ nado hẹn mí jẹla sọn Jehovah dè, podọ wlẹnwin voovo lẹ wẹ e nọ yizan. Dopo to yé mẹ wẹ nado yí ojlo zogbe ṣejannabi tọn kavi ayilinlẹn mẹdetiti zizedaga tọn depope he mí sọgan tindo zan. Ewọ tlẹ sọgan yí nuhe ko jọ wayi to gbẹzan mítọn mẹ, oplọn he mí mọyi kavi aṣa mítọn delẹ zan nado hẹn mí lẹnnupọn to aliho etọn nkọ mẹ.
3 Be e yọnbasi nado họ̀nadọna nuhe “hẹnai” to ayiha mítọn mẹ lẹ ya? (2 Kọl. 10:4) Doayi gblọndo Paulu tọn go, e dọmọ: “Mí to hoyijlẹdohogo agọ̀ lẹ podọ onú dahodaho lẹpo he yin zizedaga sọta oyọnẹn Jiwheyẹwhe tọn họliai, podọ mí to linlẹn lẹpo hẹnwa mẹmẹglọ mẹ nado hẹn yé setonuna Klisti.” (2 Kọl. 10:5) Na nugbo tọn, po alọgọ Jehovah tọn po mí sọgan duto hoyijlẹdohogo agọ̀ lẹ ji. Kẹdẹdile amasin de sọgan hù aṣẹ na nuyiwadomẹji adí ylankan de tọn do, mọ wẹ Ohó Jiwheyẹwhe tọn sọgan gọalọna mí nado hù aṣẹ na nuyiwadomẹji aihọn Satani tọn do.
“AYIHA MÌTỌN DIDIỌ”
4. Diọdo tẹlẹ wẹ susu to mí mẹ basi to whenue mí ṣẹṣẹ kẹalọyi nugbo lọ?
4 Lẹnnupọndo diọdo he e biọ dọ a ni basi to whenue a ṣẹṣẹ kẹalọyi nugbo he tin to Ohó Jiwheyẹwhe tọn mẹ lẹ bo de nado sẹ̀n Jehovah lẹ ji. Na susu to mí mẹ, e biọ dọ mí ni jo jijọ ylankan delẹ do. (1 Kọl. 6:9-11) Lehe mí dopẹ́ do sọ dọ Jehovah gọalọna mí nado duto walọ ylankan enẹlẹ ji!
5. Afọdide awe tẹlẹ wẹ yin zẹẹmẹ basina to Lomunu lẹ 12:2 mẹ?
5 Ṣigba, mí ma dona lẹzun vọdonanutọ gbede. Dile etlẹ yindọ mí dealọ sọn ylando sinsinyẹn he mí nọ wà jẹnukọnna baptẹm lẹ mẹ, mí gbẹ́ dona to vivẹnudo nado dapana nudepope he na sisẹ́ mí nado lẹkọyi walọyizan hoho enẹlẹ kọ̀n. Nawẹ mí sọgan wàmọ gbọn? Paulu gblọn dọmọ: “Mì hodo titonu ehe ba blo, ṣigba mì yin adàdiọna gbọn ayiha mìtọn didiọ dali.” (Lom. 12:2) Enẹwutu, afọdide awe delẹ yin dandan. Tintan, mí ma dona “hodo titonu ehe ba” kavi dike ni bẹpla mí. Awetọ, mí dona yin “adàdiọna” gbọn ayiha mítọn didiọ dali.
6. Etẹwẹ mí plọn sọn linlẹn he to godona nuhe Jesu dọ to Matiu 12:43-45 mẹ lẹ mẹ?
6 Adàdidiọ he Paulu tindo to ayiha mẹ bẹ nususu hẹn hú diọdo gbangba tọn poun. E gando gbẹtọ-yinyin mítọn blebu go. (Pọ́n apotin lọ “Adàdidiọ kavi Wunmẹdidiọ?”) Mí dona diọ ayiha mítọn—yèdọ ayilinlẹn, numọtolanmẹ gọna ojlo mítọn he whlá lẹ. Enẹwutu, mímẹpo wẹ dona nọ kanse míde dọ, ‘Be diọdo he n’to bibasi nado lẹzun Klistiani lẹ yin nukunta tọn poun wẹ ya kavi n’to lilẹzun Klistiani de to ahun mẹ nugbonugbo?’ Onú awe ehelẹ gbọnvona yede taun. To Matiu 12:43-45 mẹ, Jesu dọ nuhe mí dona wà. (Hia.) Linlẹn he to godona hogbe enẹlẹ zinnudo nugbo titengbe ehe ji: E ma ko pé nado de linlẹn ylankan lẹ sẹ̀; mí dona yí linlẹn he Jiwheyẹwhe kẹalọyi lẹ do diọtẹnna yé.
‘HUHLỌN MẸWHINWHÀN APỌ̀NMẸ TỌN MÌTỌN HINHẸN JẸ YỌYỌ’
7. Nawẹ mí sọgan diọ mẹhe mí yin to homẹ gbọn?
7 Be e yọnbasi nado diọ jijọ kavi mẹhe mí yin to homẹ nugbonugbo ya? Ohó Jiwheyẹwhe tọn dọmọ: “Mì dona nọ to huhlọn mẹwhinwhàn apọ̀nmẹ tọn mìtọn hẹn jẹ yọyọ, bo dona ze gbẹtọ-yinyin yọyọ lọ do, ehe yin didá sọgbe hẹ ojlo Jiwheyẹwhe tọn to dodowiwa nugbo po nugbonọ-yinyin po mẹ.” (Efe. 4:23, 24) Mọwẹ, e yọnbasi nado diọ mẹhe mí yin to homẹ, ṣigba e ma nọ bọawu. Mí dona wà nususu hú ojlo po walọyizan ylankan lẹ po jijodo. Mí dona diọ “huhlọn mẹwhinwhàn apọ̀nmẹ tọn” mítọn. Ehe bẹ ojlo, ayilinlẹn po mẹwhinwhàn mítọn lẹ po didiọ hẹn. E nọ biọ dọ mí ni to mọwà zọnmii.
8, 9. Nawẹ numimọ mẹmẹsunnu de tọn zinnudeji dọ e yin nujọnu nado diọ mẹhe mí yin to homẹ gbọn?
8 Mì gbọ mí ni gbadopọnna apajlẹ mẹmẹsunnu he ko yin danuwatọ wayi de tọn. To whenue e ko doalọtena ahànnumu po avùnhiho po godo, e pegan na baptẹm, podọ ehe yin kunnudide dagbe de to tòpẹvi he mẹ e nọ nọ̀. Ṣigba, to whèjai dopo, ojlẹ vude to baptẹm etọn godo, e pehẹ whlepọn madonukun de. Dawe ahànnumunọ de wá tọ́navùn in to owhé etọn gbè. Tlolo, mẹmẹsunnu mítọn dava ojlo etọn nado hoavùn. Amọ́, to whenue dawe lọ wá zánnu do yinkọ Jehovah tọn go, mẹmẹsunnu yọyọ mítọn gblehomẹ sọmọ bo masọ sọgan dava ede ba. E tọ́n bo hò dawe lọ. Naegbọn e do wàmọ? Dile etlẹ yindọ Biblu pinplọn ko gọalọna ẹn nado jo ayilinlẹn danuwiwa tọn etọn lẹ do, e ma ko penugo nado diọ huhlọn mẹwhinwhàn apọ̀nmẹ tọn etọn. To hogbe devo mẹ, ewọ ma ko diọ mẹhe e yin to homẹ nugbonugbo.
9 Ṣigba, mẹmẹsunnu ehe ma hònúpla. (Howh. 24:16) Po alọgọ mẹho lẹ tọn po, e zindonukọn nado to vọjlado basi. To godo mẹ, e pegan nado yin mẹho agun tọn. Enẹgodo, to whèjai dopo, to Plitẹnhọ Ahọluduta tọn nukọn, e sọ pannukọn ninọmẹ de he taidi dehe e pehẹ to owhe delẹ die wayi. Dawe ahànnumunọ de jlo na hò mẹho agun tọn devo. Etẹwẹ mẹmẹsunnu mítọn wà? E wà dẹẹdẹ bo yí whiwhẹ do hẹn ahànnumunọ lọ lẹnnupọn bo fá ninọmẹ lọ bosọ gọalọna dawe lọ nado lẹkọyi whégbè. Naegbọn ewọ do yinuwa domọ todin? Mẹmẹsunnu mítọn ko diọ huhlọn mẹwhinwhàn apọ̀nmẹ tọn etọn. E ko diọada to aliho nujọnu tọn mẹ bo lẹzun jijọhonọ, podọ whiwhẹnọ—ehe hẹn gigo wá na Jehovah!
10. Etẹwẹ e sọgan biọ nado diọ mẹhe mí yin to homẹ?
10 Diọdo ehelẹ ma nọ wá aimẹ to zánto dopo mẹ; podọ yé ma nọ wá domọ poun. E sọgan biọ dọ mí ni “dovivẹnu vẹkuvẹku” na owhe susu lẹ. (2 Pita 1:5) E ma yindọ mí ko to nugbo lọ mẹ na ojlẹ dindẹn wẹ yin whẹho lọ gba. Mí dona wà nuhe go mí pé lẹpo nado diọ mẹhe mí yin to homẹ. Afọdide titengbe delẹ na gọalọna mí nado basi diọdo ehe. Mì gbọ mí ni gbadopọnna delẹ to yé mẹ.
LEHE MÍ SỌGAN DIỌ HUHLỌN MẸWHINWHÀN APỌ̀NMẸ TỌN MÍTỌN DO
11. Nawẹ dẹ̀hiho nọ gọalọna mí nado diọ huhlọn mẹwhinwhàn apọ̀nmẹ tọn mítọn gbọn?
11 Dẹ̀hiho wẹ yin afọdide nujọnu tọn tintan lọ. Taidi salmu-kantọ lọ, mí dona hodẹ̀ dọmọ: “Jiwheyẹwhe E, dá ahun wiwe-ṣeke de do ohò ṣie mẹ, bosọ yí gbigbọ yọyọ, yèdọ tenọgli tọn de do yẹn mẹ.” (Salm. 51:10) Mí dona kẹalọyi dọ e yin dandan nado diọ huhlọn mẹwhinwhàn apọ̀nmẹ tọn mítọn bosọ biọ alọgọ Jehovah tọn. Nawẹ mí sọgan kudeji dọ Jehovah na gọalọna mí nado basi diọdo enẹ gbọn? To ojlẹ Ezekiẹli tọn mẹ, opagbe he Jehovah do gando Islaelivi ahun sinsinyẹnnọ lẹ go sọgan na mí tuli, e dọmọ: “Yẹn nasọ na yé ahun gbekọndopọ tọn, podọ yẹn na yí gbigbọ yọyọ de do ohò yetọn mẹ . . . bo na na yé ahun agbasalan tọn de [enẹ wẹ, dehe nọ joawuna anademẹ Jiwheyẹwhe tọn].” (Ezek. 11:19, Odò.) Jehovah jlo na gọalọna Islaelivi enẹlẹ nado diọ, podọ ewọ sọ jlo na gọalọna mílọsu.
12, 13. (a) Sọgbe hẹ Salmu lẹ 119:59, etẹ ji wẹ mí dona nọ lẹnayihamẹpọn do? (b) Kanbiọ tẹlẹ wẹ mí dona nọ kanse míde?
12 Ayihamẹlinlẹnpọn wẹ yin afọdide titengbe awetọ. Dile mí yí sọwhiwhe do to Ohó Jiwheyẹwhe tọn hia egbesọegbesọ, mí dona nọ yí whenu zan nado nọ lẹnayihamẹpọn kavi lẹnnupọn sisosiso do linlẹn po numọtolanmẹ he mí dona diọ lẹ po ji. (Hia Salmu lẹ 119:59; Heb. 4:12; Jak. 1:25) Mí dona nọ doayi ayilinlẹn depope he sọgan sisẹ́ mí nado tindo ojlo to tamẹnuplọnmẹ gbẹtọ tọn lẹ mẹ go. Mí dona yí ahundopo do kẹalọyi awugbopo mítọn lẹ bo dovivẹnu sinsinyẹn nado duto yé ji.
13 Di apajlẹ, kanse dewe dọ: ‘Be nuvẹun kavi awuwhàn kẹnnẹ-kẹnnẹ de gbẹ́ pò to ahun ṣie mẹ ya?’ (1 Pita 2:1) ‘Be n’nọ yigo pẹẹde na fie n’wá sọn, oplọn he n’yí kavi na onú pọnte na mi wutu wẹ ya?’ (Howh. 16:5) ‘Be n’nọ yí nukunpẹvi do pọ́n mẹdevo lẹ na yé ma do nuhe n’do lẹ kavi na yé wá sọn akọ̀ devo mẹ wutu wẹ ya?’ (Jak. 2:2-4) ‘Be nuhe aihọn Satani tọn nọ zedonukọnnamẹ lẹ nọ dọ̀n mi wẹ ya?’ (1 Joh. 2:15-17) ‘Be n’nọ yiwanna ayidedai gblewa po danuwiwa po tọn lẹ wẹ ya?’ (Salm. 97:10; 101:3; Amọ. 5:15) Gblọndo kanbiọ mẹdetiti tọn enẹlẹ tọn sọgan do adà he ji a dona wazọ́n do delẹ hia. Gbọn nuhe sọgan taidi hoyijlẹdohogo he “hẹnai” to ahun mítọn mẹ lẹ hihọliai dali, mí na hẹn homẹ Otọ́ olọn mẹ tọn mítọn tọn hùn.—Salm. 19:14.
14. Naegbọn gbẹdohẹmẹtọ dagbe lẹ dide do yin nujọnu?
14 Gbẹdohẹmẹtọ dagbe lẹ dide wẹ yin afọdide dandan tọn atọ̀ntọ. Vlavo mí yọnẹn kavi lala, mẹhe mí nọ dogbẹ́ hẹ lẹ nọ yinuwado mí ji sinsinyẹn. (Howh. 13:20) To azọ́nmẹ kavi to wehọmẹ, e yọnbasi dọ mẹhe ma na gọalọna mí nado wleawuna pọndohlan Jiwheyẹwhe tọn lẹ wẹ lẹdo mí. Ṣigba, mí sọgan mọ gbẹdohẹmẹtọ dagbe hugan lẹ to opli Klistiani tọn mítọn lẹ ji. To finẹ, mí sọgan yin whinwhàn kavi yin zodolanmẹna hlan “owanyi po azọ́n dagbe lẹ po” kọ̀n.—Heb. 10:24, 25, Odò.
YIN “HINHẸN LODO TO YISE MẸ”
15, 16. Nawẹ Satani nọ tẹnpọn nado diọ pọndohlan mítọn gbọn?
15 Flindọ Satani ko magbe nado diọ pọndohlan mítọn. E nọ yí hoyijlẹdohogo wunmẹ lẹpo zan nado hù aṣẹ na nuyiwadomẹji he nugbo Ohó Jiwheyẹwhe tọn nọ tindo.
16 Satani zindonukọn nado to kanbiọ dopolọ he e kanse Evi to jipa Edẹni tọn mẹ kanse dọ, “Be nugbo wẹ dọ Jiwheyẹwhe ko dọ dọ . . . ?” (Jen. 3:1) To aihọn he tin to anademẹ Satani tọn glọ ehe mẹ, mí nọ saba sè kanbiọ he nọ fọ́n ayihaawe dotenamẹ delẹ taidi: ‘Be nugbo wẹ dọ Jiwheyẹwhe ma kẹalọyi alọwle to mẹhe tindo vijinu dopolọ lẹ ṣẹnṣẹn ya? Be nugbo wẹ dọ Jiwheyẹwhe ma jlo dọ a ni dù hùnwhẹ Noẹli po jijizan po tọn ya? Be nugbo wẹ dọ Jiwheyẹwhe nọ donukun dọ a ni gbẹ́ hùndido ya? Be nugbo wẹ dọ Jiwheyẹwhe owanyinọ de na donukun dọ a ni dapana gbẹdido hẹ mẹyiwanna he yin didesẹ sọn agun mẹ lẹ ya?’
17. Etẹwẹ mí dona wà to whenue mí tindo ayihaawe gando nuyise mítọn lẹ go, podọ etẹwẹ Kolosinu lẹ 2:6, 7 dohia dọ e sọgan yin kọdetọn lọ?
17 Mí dona nọ kudo nuyise mítọn lẹ ji. Eyin mí ma dín gblọndo na kanbiọ titengbe he gando nuyise mítọn lẹ go, yé sọgan zọ́n bọ mí na jẹ ayihaawe sinsinyẹn tindo ji. To nukọn mẹ, ayihaawe mọnkọtọn lẹ sọgan wá slokọna nulẹnpọn mítọn bo hù yise mítọn sudo. To whelọnu lo, etẹwẹ mí dona wà? Ohó Jiwheyẹwhe tọn dọna mí nado diọ ayiha mítọn, nado sọgan mọdona “ojlo Jiwheyẹwhe tọn he yọ́n, bo yin alọkẹyi bosọ yin pipé lọ.” (Lom. 12:2) Gbọn nupinplọn whẹwhẹ dali, mí sọgan mọdona nugbo he mí ko plọn sọn Biblu mẹ lẹ. Mí sọgan kudeji mlẹnmlẹn dọ nujinọtedo Jehovah tọn lẹ wẹ sọgbe. To whenẹnu, taidi atin de he doadọ̀do gligli, mí na yin “hinhẹn lodo to yise mẹ.”—Hia Kolosinu lẹ 2:6, 7.
18. Etẹwẹ na gọalọna mí nado hù aṣẹ na adí nuyiwadomẹji aihọn Satani tọn?
18 Mẹdevo ma sọgan hẹn yise towe lodo do otẹn towe mẹ. Enẹwutu, zindonukọn nado nọ hẹn huhlọn mẹwhinwhàn apọ̀nmẹ tọn towe jẹ yọyọ. Nọ hodẹ̀ to gbesisọ mẹ; nọ vẹ̀ Jehovah nado gọalọna we po gbigbọ etọn po. Nọ lẹnayihamẹpọn sisosiso; zindonukọn nado nọ gbeje nulẹnpọn po mẹwhinwhàn towe lẹ po pọ́n. Nọ dín gbẹdohẹmẹtọ dagbe lẹ; nọ kọnawudopọ hẹ mẹhe na gọalọna we nado diọadana aliho nulẹnpọn tọn towe. Gbọn mọwiwà dali, a na hù aṣẹ na adí nuyiwadomẹji aihọn Satani tọn bo na họ́ “hoyijlẹdohogo agọ̀ lẹ podọ onú dahodaho lẹpo he yin zizedaga sọta oyọnẹn Jiwheyẹwhe tọn” liai.—2 Kọl. 10:5.
OHÀN 50 Odẹ̀ Klandowiwe Ṣie Tọn
a Lẹdo po aṣa he mẹ mí wá sọn po gọna oplọn he mí yí sọgan nọ yinuwado nulẹnpọn mítọn ji to aliho dagbe kavi ylankan mẹ. Mí sọgan wá mọdọ pọndohlan agọ̀ delẹ ko lẹzun apadewhe gbẹtọ-yinyin mítọn tọn pete. Hosọ ehe na dohia mí lehe mí sọgan nọ duto ayilinlẹn agọ̀ depope he mí gán ko wleawuna lẹ ji do.