Be Hiẹ Flin Ya?

Be a sọgan na gblọndo kanbiọ ehelẹ tọn he sinai do Atọ̀họ̀-Nuhihọ́ lọ Tọn 2019 tọn lẹ ji ya?

Etẹwẹ yin zẹẹmẹ opagbe he Jiwheyẹwhe do tọn dọ: “Adánwanu depope he yin awuwlena sọta we ma na tindo kọdetọn dagbe”? (Isa. 54:17)

Mí sọgan kudeji dọ Jiwheyẹwhe na basi hihọ́na mí sọta huhlọn nuhẹngble tọn delẹ taidi “adi kọgbidinamẹtọ lẹ tọn.” (Isa. 25:4, 5) Kẹntọ mítọn lẹ ma na penugo nado hẹn awugble tẹgbẹ tọn wá na mí.—w19.01, w. 6, 7.

Nawẹ nuyiwa Jiwheyẹwhe tọn hẹ Kenaninu lẹ po Islaelivi tasinyẹntọ lẹ po do whẹdida dodo etọn hia gbọn?

Jiwheyẹwhe hẹn whẹdida ṣẹ do mẹhe nọ doalọ to fẹnnuwiwa zanhẹmẹ tọn he gblezọn lẹ mẹ kavi nọ sayana yọnnu lẹ gọna ovi lẹ ji. Ewọ dona mẹhe nọ setonuna ẹn bosọ nọ yinuwa hẹ mẹdevo lẹ po dodo po lẹ.—w19.02, w. 22, 23.

Etẹwẹ mí dona wà eyin mí tin to fie mayisenọ de to dẹ̀ho te?

Mí sọgan gbọṣi abọẹ po sisi po, ṣigba bo ma na dọ “niṣẹ” kavi hẹn alọ mẹdevo he to otẹn lọ mẹ lẹ tọn go. Mí sọgan hò odẹ̀ mítọn titi do ahun mẹ.—w19.03, w. 31.

Obá tẹ mẹ wẹ ovivu zinzanhẹ ylan jẹ?

Ovivu zinzanhẹ yin ylando de sọta ovi he jiya etọn lọ, agun lọ, aṣẹpatọ lẹ podọ sọta Jiwheyẹwhe. To fie osẹ́n biọ dọ yè ni nọ jẹwhẹ danuwiwa lọ tọn te lẹ, mẹho lẹ nọ kọngbedopọ hẹ.—w19.05, w. 9, 10.

Nawẹ a sọgan diọ huhlọn mẹwhinwhàn apọ̀nmẹ tọn towe kavi hẹn ẹn pọnte dogọ gbọn?

Afọdide titengbe delẹ die: Nọ hodẹ̀ hlan Jehovah. Nọ lẹnayihamẹpọn po yanwle lọ po nado gbeje dewe pọ́n. Nọ de gbẹdohẹmẹtọ towe lẹ po nuyọnẹn po.—w19.06, w. 11.

Etẹwẹ a sọgan wà nado wleawudai todin nado pehẹ homẹkẹn?

Mí dona hẹn haṣinṣan mítọn hẹ Jehovah lodo. Deji dọ ewọ yiwanna mí bo ma na jo mí do gbede. Nọ hia Biblu egbesọegbesọ, bosọ nọ hodẹ̀ whẹwhẹ. Kudeji dọ dona Ahọluduta lọ tọn lẹ na wá nugbonugbo. Nọ plọn wefọ gọna ohàn pipà tọn he a yiwanna lẹ do tamẹ.—w19.07, w. 2-4.

Etẹwẹ mí sọgan wà nado gọalọna hẹnnumẹ mítọn lẹ nado yin whinwhlẹngán?

Nujọnu wẹ e yin nado nọ do mẹtọnhopọn hia bo nọ dike walọyizan dagbe mítọn ni dekunnu, podọ nado nọ fahomẹ bosọ nọ yí zinzin zan.—w19.08, w. 15-17.

Nawẹ mí nọ yin kọfana dile Jesu dopà etọn to Matiu 11:28 mẹ do gbọn?

Mí tindo nugopọntọ owanyinọ lẹ, gbẹdohẹmẹtọ dagbe hugan lẹ, podọ azọ́n dagbe hugan lọ.—w19.09, w. 23.

Nawẹ Jiwheyẹwhe sọgan hẹn mí tindo ojlo bosọ na mí huhlọn nado yinuwa gbọn? (Flp. 2:13)

Dile mí to Ohó Jiwheyẹwhe tọn hia bosọ to ayihamẹlẹnpọn deji, Ewọ sọgan dozolanmẹna mí, whàn mí nado wà ojlo etọn, bosọ na mí huhlọn nado yinuwa. Gbigbọ etọn sọgan hẹn nugopipe mítọn lẹ pọnte dogọ.—w19.10, w. 21.

Afọdide nuyọnẹn tọn tẹlẹ wẹ mí dona ze whẹpo do basi nudide sinsinyẹn de?

Afọdide atọ́n delẹ die: Nọ basi dodinnanu po sọwhiwhe po. Nọ biọ nuyọnẹn to odẹ̀ mẹ. Nọ gbeje mẹwhinwhàn towe lẹ pọ́n. Nọ tindo yanwle tangan lẹ. Nọ yin lẹnpọn dagbenọ.—w19.11, w. 27-29.

Be linlẹn alindọn jọmaku tọn wẹ Satani fọndote to whenue e dọho hẹ Evi ya?

E taidi dọ e ma yinmọ. Satani dọna Evi dọ ewọ ma na kú, e ma dọ dọ ewọ na taidi mẹhe kú poun gba. Nuyise lalo de ma pò to aimẹ to Singigọ lọ godo. E yọnbasi dọ nuyise alindọn jọmaku tọn wá aimẹ whẹpo Jiwheyẹwhe do hẹn mẹhe to atọ̀họ̀ Babẹli tọn gbá lẹ nado vúnvún pé gbọn aigba ji.—w19.12, w. 15.