Kanbiọ lẹ sọn Wehiatọ lẹ Dè

To whenue Satani dọna Evi dọ ewọ ma na kú eyin e dù sọn sinsẹ́n atin oyọnẹn dagbe po oylan po tọn lọ tọn mẹ, be linlẹn alindọn jọmaku tọn he gbayipe to egbehe lọ wẹ e fọndote ya?

E taidi dọ e ma yinmọ. Lẹgba ma dọna Evi dọ eyin e dù atin-sinsẹ́n he Jiwheyẹwhe dosẹ́n etọn lọ, ewọ na taidi mẹhe kú bọ adà mayinukundomọ agbasa etọn tọn de (ehe mẹdelẹ nọ ylọ to egbehe dọ alindọn jọmaku) na pò togbẹ̀ to fide gba. Satani yí odàn de zan, bo dọna Evi dọ eyin ewọ dù sinsẹ́n atin enẹ tọn, ‘na jide tọn, e ma na kú paali gba.’ Nuhe dọ e te wẹ yindọ Evi na to gbẹnọ zọnmii, bo na duvivi gbẹzan he pọnte de tọn to aigba ji, podọ e ma na do hudo Jiwheyẹwhe tọn.—Jen. 2:17; 3:3-5.

Eyin nuyise lalo alindọn jọmaku tọn he nọ yin pinplọnmẹ to egbehe lọ ma bẹjẹeji to jipa Edẹni tọn mẹ, whetẹnu wẹ e wá aimẹ te lo? Mí ma sọgan dọ po nujikudo po. Nuhe mí yọnẹn wẹ yindọ sinsẹ̀n lalo wunmẹ lẹpo wẹ yin kúnsúdona to Singigọ azán Noa tọn gbè tọn whenu. Mẹhe tindo nuyise agọ̀ depope ma pò togbẹ̀ to Singigọ lọ godo, na Noa po whẹndo etọn po he yin sinsẹ̀n-basitọ nugbo lẹ kẹdẹ wẹ luntọ́n.

Enẹwutu, nuplọnmẹ alindọn jọmaku tọn he tin to egbehe lọ dona ko wá aimẹ to Singigọ lọ godo. Whenue Jiwheyẹwhe wlu ogbè lẹ to Babẹli, bọ gbẹtọ lẹ vúnvún pé “gbọn aigba blebu nukunmẹ,” ayihaawe ma tin dọ yé na ko hẹn linlẹn lọ dọ gbẹtọvi tindo alindọn jọmaku de gbayipe ga. (Jen. 11:8, 9) Mahopọnna whenue linlẹn agọ̀ enẹ bẹjẹeji te, mí sọgan kudeji dọ “otọ́ lalo tọn” Satani Lẹgba wẹ to godona ẹn podọ homẹ etọn sọ hùn dọ ehe gbayipe.—Joh. 8:44.