Apotin Kanbiọ Tọn
◼ Nawẹ dopodopo mítọn sọgan yidogọna ninọmẹ dagbe nupinplọn tọn to opli agun tọn lẹ whenu gbọn? (Deut. 31:12)
Na sisi sisosiso he mí tindo na Jehovah po awuwledainanu etọn he yin opli agun tọn lẹ po wutu, mẹlẹpo yin tulina nado nọ wá do gànmẹ bo nọ tin to gbesisọ mẹ nado yin pinplọn gbọn ewọ dali. Alọgọnamẹnu de wẹ e na yin nado nọ sinai to oján he tin to nukọn to plitẹnhọ lọ mẹ lẹ ji bo nọ jo dehe tin to godo lẹ do na mẹhe tindo ovi pẹvi lẹ po mẹhe na gbọwhenu wá lẹ po. Whẹpo opli lọ na bẹjẹeji, mẹlẹpo dona hẹn ẹn diun dọ alokan apòmẹ tọn po onú mọnkọtọn devo lẹ po ma na fẹayihasẹna mẹplidopọ lẹ. Eyin mẹhe wá opli lọ lẹpo hẹn pọndohlan budisi Jiwheyẹwhe tọn go to opli lọ blebu whenu, ayihafẹsẹnamẹ na depò taun.—Yẹwh. 5:1; Flp. 2:4.
To whenue mẹyọyọ lẹ jẹ opli lẹ wá ji, mẹhe jẹakọ hẹ yé to agun lọ mẹ de sọgan biọ to yé si nado sinai to apá yetọn. Ehe na gọalọ taun eyin yé tindo ovi pẹvi he dona yin nukunpedego lẹ. Opli lẹ yìyì sọgan yin numimọ yọyọ de na whẹndo lọ. Eyin mọ wẹ, yé sọgan jlo nado sinai to godo ma nado fẹayihasẹna mẹdevo lẹ to whenue e na biọ dọ mẹjitọ lẹ ni tọ́n sọn plitẹnhọ lọ mẹ na ojlẹ kleun de nado sọgan penukundo nuhudo ovi pẹvi yetọn lẹ tọn go. (Howh. 22:6, 15) Whẹndo he tindo ovi pẹvi lẹ ma dona nọ de nado sinai to abò plitẹnhọ lọ tọn devo mẹ nado na dotẹnmẹ ovi lọ lẹ nado daihun gba. Kakatimọ, e na yọ́n hugan dọ mẹjitọ lẹ ni nọ yì penukundo nuhudo mẹdetiti tọn ovi yetọn lẹ tọn go kavi domẹplọnlọ yé go to gbonu plitẹnhọ lọ tọn bosọ lẹkọwa plitẹnhọ lọ mẹ po ovi lẹ po to enẹgodo.
Azọngban aisinnunamẹtọ lẹ tọn wẹ nado hẹn ninọmẹ he sọgbe de tin-to-aimẹ to nọtẹn sinsẹ̀n-bibasi tọn. Yé nọ gọalọna whẹndo lẹ po mẹhe na gbọwhenu wá lẹ po nado sinai to fihe sọgbe. Aisinnunamẹtọ lẹ nọ yí zinzin po aṣejininọ po do gọalọna mẹdevo lẹ nado sinai bo vò matin ayihafẹsẹnamẹ he ma yin dandan tọn. Yé nọ yí lẹnpọn dagbe zan to whenue yé to nukunpedo ninọmẹ tukladomẹ tọn madonukun lẹ go. To whenue nuyiwa yọpọvu de tọn jẹ ayihafẹsẹna mẹdevo lẹ ji, aisinnunamẹtọ lẹ sọgan na alọgọ po homẹdagbe po.
Mẹhe wá opli na sinsẹ̀n-bibasi lẹpo sọgan yidogọna ninọmẹ dagbe de nado plọnnu gando Jehovah gọna lẹndai etọn na aihọn yọyọ jijọho po dodo po tọn de go.—Heb. 10:24, 25.