Oylọ-Basinamẹwe Oflin Tọn lẹ Na Yin Mimá Lẹdo Aihọn Pé!
1. Tito nujijla lẹdo aihọn pé tọn vonọtaun tẹwẹ yin bibasi jẹnukọnna Oflin lọ?
1 “Mì nọ wà ehe to oflin ṣie mẹ.” (Luku 22:19) To tonusisena gbedide Jesu tọn ehe mẹ, sinsẹ̀n-basitọ Jehovah tọn lẹ na pli dopọ hẹ jlodotọ lẹ to 30 mars 2010 nado basi hùnwhẹ oflin okú Jesu tọn. Oylọ-basinamẹwe vonọtaun de na Oflin lọ na yin mimá lẹdo aihọn pé bẹsọn 13 mars jẹ 30 mars.
2. Nawẹ mí sọgan ze oylọ-basinamẹwe lọ donukọnnamẹ gbọn?
2 Lehe E Na Yin Bibasi Do: Hiẹ sọgan yí oylọ-basinamẹwe dopo na whétọ lọ bo do yẹdide he tin to wepa lọ ji hia ẹ bosọ dọmọ: “To 30 mars whèjai, livi susu gbẹtọ lẹ tọn lẹdo aihọn pé na pli dopọ nado basi hùnwhẹ oflin okú Jesu tọn. Oylọ-basinamẹwe hiẹ po whẹndo towe po tọn die. Hiẹ sọ sọgan plan họntọn towe lẹ wá. Jaale doayi gànmẹ gọna fie oflin lọ na wá aimẹ te to lẹdo mítọn mẹ go.” Sọgbe hẹ ninọmẹ lẹ, hiẹ sọgan de nado hia Luku 22:19 sọn Biblu mẹ nado do gbedide Owe-wiwe tọn lọ hia. Ṣigba, hẹn do ayiha mẹ dọ na ojlẹ vude wẹ mí tindo nado wazọ́n gbọn aigba-denamẹ lọ blebu ji wutu, e na yọ́n hugan nado nọ nọ̀ glido.
3. Mẹnu wẹ mí sọgan basi oylọna?
3 Eyin aigba-denamẹ agun mìtọn tọn gblo, mẹho agun tọn lẹ sọgan na mì ayinamẹ nado nọ ze oylọ-basinamẹwe lọ dai na mẹhe ma tin to whégbè lẹ to dlapọn tintan whenu. Mì nọ ze linlinnamẹwe lẹ donukọnnamẹ to pọmẹ hẹ oylọ-basinamẹwe lọ to fie e sọgbe te. Mì hẹn ẹn diun dọ mì basi oylọna gọyìpọn, plọnmẹ Biblu, azọ́nwatọgbẹ́, wehọmẹvigbẹ́, hẹnnumẹ, kọmẹnu, po mẹyọnmẹ mìtọn devo lẹ po.
4. Etẹwẹ pinpẹn-nutọn-yinyọnẹn mítọn na owanyi he Jehovah dohia to awuwiwlena ofligọ lọ mẹ dona whàn mí nado wà?
4 Wleawu Nado Tindo Mahẹ Gigọ́: Ojlẹ Oflin tọn yin dotẹnmẹ hundote dagbe de nado yidogọna lizọnyizọn mítọn. Be hiẹ sọgan vọ́ tito towe lẹ jlado nado basi gbehosọnalitọ ya? Be hiẹ tindo ovi kavi plọnmẹ Biblu he to nukọnyiyi dagbe basi lẹ ya? Eyin mọwẹ, dọnsẹpọ mẹho lẹ na yé nido dindona eyin mẹyọyọ lọ lẹ pegan nado tindo mahẹ to nujijla vonọtaun ehe mẹ taidi wẹnlatọ he ma ko yí baptẹm lẹ. Pinpẹn-nutọn-yinyọnẹn mítọn na owanyi he Jehovah dohia to awuwiwlena ofligọ lọ mẹ ma dona whàn mí nado tin to Oflin lọ tẹnmẹ kẹdẹ gba, ṣigba nado basi oylọna mẹsusu dile e sọgan yọnbasi do nado wá kọnawudopọ hẹ mí.—Joh. 3:16.