Wekanhlanmẹ de sọn Hagbẹ Anademẹtọ Dè
Kunnudetọ Jehovah Tọn Hatọ Vivẹ lẹ Emi:
Lẹblanulọkẹyi nankọ die e yin na mí taidi akọta de nado tindo oyín Jehovah, Nupojipetọ Wẹkẹ lọ tọn to ota! Oyín enẹ na nọte kakadoi podọ e ma pé awe. Jehovah lọsu wẹ na mí yinkọ enẹ, podọ na titengbe tọn, sọn 1931 wẹ mí ko yin yinyọnẹn po yinkọ vonọtaun enẹ po. (Isa. 43:10) Mí nọ yí awagundido do do mídelẹ hia taidi Kunnudetọ Jehovah tọn lẹ.
Lẹgba to Kanván madoalọte nado de oyín Jiwheyẹwhe tọn sẹ̀. To anademẹ etọn glọ, akọta lẹ nọ gbẹ́ oyín Jehovah tọn dai. Babilọni Daho lọ, ahọluigba aihọn tọn he yin sinsẹ̀n lalo tọn, gbẹwanna oyín Jiwheyẹwhe tọn bo ko sọ de e sẹ̀ sọn lẹdogbedevomẹ Biblu tọn susu mẹ. To vogbingbọn mẹ, Jesu yí nukun nujọnu tọn do pọ́n oyín Otọ́ etọn tọn, bosọ ze e do otẹn tintan mẹ to odẹ̀ apajlẹ tọn he e plọn devi etọn lẹ mẹ. E dọmọ: “Lehe mìwlẹ dona nọ hodẹ̀ do die: ‘Otọ́ mítọn he tin to olọn mẹ, na oyín towe ni yin kinklandowiwe.’” (Mat. 6:9) To nukọn mẹ, to odẹ̀ ahundopo tọn de mẹ hlan Otọ́ etọn, e dọmọ: “Yẹn ko do oyín towe hia mẹhe hiẹ na mi sọn aihọn mẹ lẹ.” (Joh. 17:6) To apajlẹ dagbe Jesu tọn hihodo mẹ, míwlẹ ko magbe hugan gbede pọ́n tọn nado yí zohunhun do lá oyín Jehovah tọn gbọn aigba lọ blebu ji.
Hosọ owhe 2009 tọn, ‘Dekunnu wẹndagbe lọ tọn mlẹnmlẹn,’ whàn mí nado hẹn lizọnyizọn mítọn di to gigọ́ mẹ. (Owalọ 20:24) Ayihaawe ma tin dọ Jehovah ko dona vivẹnudido mítọn lẹ susugege to owhe sinsẹ̀nzọn tọn he wayi ehe lọ mẹ. Kunnudide mayọnjlẹ de ko yin nina lẹdo aihọn pé na gigo po gbégbò oyín Jehovah tọn po. Agayiyi yọyọ wẹnlatọ 7 313 173 tọn wẹ yí ogbè dopo do dọyẹwheho na mẹlẹpo bosọ plọnnu ahundoponọ he to pọngbọ dín na nuhahun susu he yé nọ pannukọn egbesọegbesọ lẹ. Sọha gbẹtọ 18 168 323 he wá Oflin okú Klisti tọn tẹnmẹ lẹ tọn yin dohia de dọ gbẹtọ livi susu devo lẹ gbẹsọ sọgan ylọ oyín Jehovah tọn whẹpo opodo titonu ylankan ehe tọn nido wá.
Dile Jehovah na na dotẹnmẹ etọn dẹnsọ, mí na zindonukọn nado to yẹwheho wẹndagbe Ahọluduta lọ tọn dọ po zohunhun po, bo nọ wà nuhe go mí pé lẹpo nado jẹ gbẹtọ lẹ dè to aigba-denamẹ mítọn ji. (Mat. 24:14; Malku 13:10) Vlavo mí to yẹwhehodọ sọn họndekọn jẹ họndekọn, to alihogbó lẹ ji, gbọn wekanhlanmẹ dali, to alokan ji, kavi to aliho mayin aṣa tọn mẹ, mì gbọ mí ni nọ dovivẹnu nado hẹn oyín Jehovah tọn po lẹndai etọn po zun yinyọnẹn na mẹsusu dile e sọgan yọnbasi do.
Mí tindo whẹwhinwhẹ́n lẹpo nado yise dọ Jehovah na yinuwa to madẹnmẹ nado klan oyín etọn do wiwe. (Ezek. 36:23) Ojlẹ he mẹ Jehovah na bọnùdo na mẹhe nọ de yẹyi sọn oyín etọn go lẹ te to sisẹpọ po awuyiya po. Azán jiawu nankọ die e na yin na devizọnwatọ nugbonọ Jehovah tọn lẹpo he na ko hẹn oyín Jehovah tọn zun yinyọnẹn bosọ nọgodona nupojipetọ-yinyin etọn!
Nukunpedomẹgo owanyinọ Jehovah tọn na omẹ etọn lẹ sọawuhia to aliho he họnwun mẹ to Plidopọ Agbegbe gọna Akọjọpli tọn “Mì to Alihọ́!” tọn he yin bibasi lẹdo aihọn pé to 2009 lẹ tẹnmẹ. Plidopọ enẹlẹ yin nujijọ titengbe lẹ to whenuho yẹwhehọluduta tọn mítọn mẹ, bosọ whàn mí nado tin to aṣeji dogọ na azán Jehovah tọn.—Malku 13:37; 1 Tẹs. 5:1, 2, 4.
Na nugbo tọn, Jehovah ko wà dagbe susu na mí; e hẹn ahun mítọn gọ́ na ayajẹ. E hẹn mí mlọnai to danji fie amamú kikọ te; e sọ plan mí yì agbàdo osin mimiọn tọn lẹ kọ̀n.—Ps. 23:1, 2; 100:2, 5.
Mì deji dọ Jehovah na zindonukọn nado to didona mì dile mì hẹn alọnu mìtọn ján to sinsẹ̀n-bibasi hlan Ẹn mẹ to osun he ja lẹ mẹ!
Mì kẹalọyi owanyi zohunhunnọ Klistiani tọn mítọn
Mẹmẹsunnu mìtọn lẹ,
Hagbẹ Anademẹtọ Kunnudetọ Jehovah Tọn lẹ Tọn