Pinpẹn-Nutọn-Yinyọnẹn Didohia Na Nunina Daho Hugan Jiwheyẹwhe Tọn
1. Whẹwhinwhẹ́n titengbe tẹ wutu wẹ mí nọ dopẹna Jehovah?
1 To “nunina dagbe” susu Jehovah tọn lẹ mẹ, ofligọ he e wleawuna gbọn Ovi yiwanna etọn gblamẹ wẹ yin daho hugan lọ. (Jak. 1:17) Ehe hùnalina dona susu, etlẹ yin jona ylando mítọn lẹ tọn. (Efe. 1:7) Mí nọ dopẹ́ whepoponu na ehe tọn wutu. Mí nọ yí whenu zan nado lẹnayihamẹpọn do nunina họakuẹ enẹ ji titengbe to ojlẹ Oflin tọn whenu.
2. Nawẹ dopodopo mítọn sọgan wleawuna pinpẹn-nutọn-yinyọnẹn na ofligọ lọ bosọ gọalọna whẹndo mítọn nado wà nudopolọ gbọn?
2 Wleawuna Pinpẹn-Nutọn-Yinyọnẹn: Nado gọalọna whẹndo towe nado wleawuna pinpẹn-nutọn-yinyọnẹn, naegbọn hiẹ ma na yí Sinsẹ̀n-Bibasi Whẹndo tọn zan nado vọ́ dogbapọnna nudọnamẹ he gando ofligọ lọ go lẹ to osẹ he jẹnukọnna Oflin lọ he na wá aimẹ to 30 mars lẹ mẹ? To yidogọ mẹ, mì nọ gbadopọnna Biblu hihia vonọtaun Oflin tọn to azán dopodopo ji to whẹndo mẹ. Lẹnayihamẹpọn do lehe ofligọ lọ ko hẹn ale wá na we do ji podọ lehe e ko yinuwado pọndohlan towe gando Jehovah, hiẹ lọsu, mẹdevo lẹ, po sọgodo po go ji do. Hiẹ nasọ mọ ẹn taidi alọgọnamẹnu nado plọn ohàn yọyọ awe he na yin yiyizan to Oflin lọ whenu lẹ, enẹ wẹ sọha 8 po 109 po, eyin ohanwe yọyọ lọ tin-to-aimẹ to agun mìtọn mẹ.—Ps. 77:12.
3. Nawẹ mí sọgan do pinpẹn-nutọn-yinyọnẹn mítọn hia gbọn?
3 Dohia Pinpẹn-Nutọn-Yinyọnẹn Tọn Lẹ: Pinpẹn-nutọn-yinyọnẹn na ofligọ lọ nọ whàn mí nado dọhona mẹdevo lẹ gando Jehovah po owanyi daho he ewọ dohia gbọn Ovi etọn didohlan dali po go. (Ps. 145:2-7) To osun mars, avril po mai po tọn mẹ, whẹndo delẹ nọ do pinpẹn-nutọn-yinyọnẹn yetọn hia gbọn tito bibasi na e whè gbau dopo to hagbẹ whẹndo tọn yetọn lẹ mẹ nido basi gbehosọnalitọ alọgọtọ tọn dali. Eyin ehe ma yọnbasi janwẹ, be hiẹ sọgan “fli ojlẹ” nado gbloada na mahẹ tintindo towe to lizọnyizọn lọ mẹ ya? (Efe. 5:16) Pinpẹn-nutọn-yinyọnẹn nasọ whàn mí nado gọalọna mẹdevo lẹ nado wá kọnawudopọ hẹ mí to Oflin lọ whenu. (Osọ. 22:17) Jẹ todohukanji gọyìpọn, plọnmẹ Biblu, hẹnnumẹ, azọ́nwatọgbẹ́, po kọmẹnu he hiẹ jlo na basi oylọna lẹ po tọn basi ji, podọ to enẹgodo, tindo mahẹ gigọ́ to nujijla vonọtaun oylọ-basinamẹ Oflin tọn lọ mẹ.
4. Aliho tẹlẹ mẹ wẹ mí sọgan yí ojlẹ Oflin tọn lọ zan po nuyọnẹn po te?
4 Ojlẹ Oflin tọn lọ nọ hùn dotẹnmẹ yọyọ lẹ dotena mí nado dohia Jehovah obá he mẹ mí yọ́n pinpẹn nunina he ewọ basi na gbẹtọvi lẹ tọn jẹ. Mì gbọ mí ni yí ojlẹ ehe zan nado wleawuna pinpẹn-nutọn-yinyọnẹn na ofligọ lọ po “dona susugege mayọnjlẹ Klisti tọn” po bosọ do ehe hia.—Efe. 3:8.