Etẹwẹ Mẹdevo lẹ Nọ Plọn sọn Apajlẹ Towe Mẹ
1 Jesu dọmọ: ‘Mì biọ zẹgẹ ṣie glọ hẹ mi bosọ plọnnu sọn dè e.’ (Mat. 11:29) E họnwun dọ Jesu ma plọn mẹdevo lẹ gbọn ohó etọn lẹ kẹdẹ dali gba, ṣigba e sọ ze apajlẹ dagbe de dai na yé. Lẹnnupọndo nuhe devi lẹ na ko plọn ji dile yé to ayido nuyiwa Jesu tọn lẹ go. E jọmẹ, bo yọ́n dọnsẹpọ bosọ nọ do owanyi hia. (Mat. 8:1-3; Malku 6:30-34) E nọ do whiwhẹ nujọnu tọn hia. (Joh. 13:2-5) Dile devi lẹ to hihodo Jesu to lizọnyizọn lọ mẹ, yé mọdọ azọ́n sinsinyẹn watọ he nọ tindo kọdetọn dagbe to nugbo lọ pinplọn mẹdevo lẹ mẹ wẹ ewọ yin. (Luku 8:1; 21:37, 38) Nawẹ apajlẹ mítọn nọ yinuwado mẹdevo lẹ ji to whenue yé to ayido nuyiwa mítọn lẹ go to lizọnyizọn lọ mẹ gbọn?
2 Whétọ Lẹ: Nusisọ́ jlẹkaji tọn po walọ dagbe mítọn po, gọna ojlo ahundopo tọn he mí nọ dohia gbẹtọ lẹ sọgan yinuwado whétọ lẹ ji taun. (2 Kọl. 6:3; Flp. 1:27) Yé nọ doayi e go dọ mí nọ yawu yí Biblu zan. Homẹ nọ hún mẹdevo lẹ taun dọ mí nọ dotoaina yé po sisi po to whenue yé to hodọ. Ma yí nukunpẹvi do pọ́n lehe apajlẹ dagbe zizedai to adà ehelẹ mẹ sọgan dọ̀n gbẹtọ lẹ wá owẹ̀n Ahọluduta lọ tọn kọ̀n do gbede blo.
3 Mẹmẹsunnu Mítọn Lẹ: Sọ lẹnnupọndo nuyiwadomẹji dagbe he mí sọgan tindo do mẹmẹsunnu mítọn lẹ ji. Zohunhun mítọn to lizọnyizọn lọ mẹ nọ whàn mẹdevo lẹ nado wà nudopolọ. Dile ogàn nọ gàn ogàn do, eyin mí nọ wleawuna nuzedonukọnnamẹ mítọn lẹ ganji, e na sisẹ́ mẹdevo lẹ nado hẹn aliho he mẹ yé nọ dọyẹwheho te pọnte dogọ. (Howh. 27:17) Vivẹnudido nado basi kandai mẹhe do ojlo hia lẹ tọn to aliho he sọgbe mẹ, po kọlilẹ yì yé dè domẹwhenu po sọgan whàn mẹdevo lẹ nado nọ wà nudopolọ. Eyin mí nọ hẹn lizọnyizọn mítọn di to gigọ́ mẹ, mí na tindo nuyiwadomẹji dagbe do azọ́nwatọgbẹ́ mítọn lẹ ji.—2 Tim. 4:5.
4 Naegbọn hiẹ ma na nọ lẹnnupọn sọn ojlẹ de mẹ jẹ devo mẹ do nuhe a nọ wà po nuhe a nọ dọ lẹ po ji gọna lehe apajlẹ towe nọ yinuwado mẹdevo lẹ ji do? Apajlẹ dagbe mítọn na hẹn homẹ Jehovah tọn hùn bo nasọ hẹn mí penugo nado tindo numọtolanmẹ apọsteli Paulu tọn nkọ to whenuena e dọmọ: “Mì nọ hodo apajlẹ ṣie, yèdọ dile yẹn nọ hodo Klisti tọn do.”—1 Kọl. 11:1.
[Kanbiọ Oplọn tọn lẹ]
1. Etẹwẹ devi Jesu tọn lẹ plọn dile yé to ayido nuyiwa etọn lẹ go?
2. To lizọnyizọn lọ mẹ, nawẹ awusọhia po walọ dagbe mítọn po sọgan yinuwado whétọ lẹ ji to aliho dagbe mẹ gbọn?
3. Nuyiwadomẹji dagbe tẹwẹ mí sọgan tindo do mẹmẹsunnu mítọn lẹ ji?
4. Naegbọn mí dona nọ lẹnnupọndo apajlẹ he mí nọ zedai ji sọn ojlẹ de mẹ jẹ devo mẹ?