Ojlẹ Oflin Tọn—Dotẹnmẹ Hundote de Nado Wà Susu Dogọ!
1. Naegbọn mí dona lẹnnupọndo lehe mí sọgan wà susu dogọ to mars, avril po mai po mẹ do ji?
1 Be hiẹ sọgan wà susu dogọ to lizọnyizọn lọ mẹ to ojlẹ Oflin tọn he ja whenu ya? Wẹnlatọ delẹ he yin azọ́nwatọ kavi wehọmẹvi na tin to gbọjẹ mẹ to whenẹnu nado sọgan tindo mahẹ to lizọnyizọn lọ mẹ. Bẹsọn 2 avril, nujijla vonọtaun de na tin nado basi oylọna jlodotọ lẹ wá Oflin lọ tẹnmẹ to 17 avril. Enẹgodo, mí na dovivẹnu nado doafọna jlodotọ he wá Oflin lọ tẹnmẹ lẹ bo basi oylọna yé wá hodidọ vonọtaun he na yin nina to osẹ 25 avril tọn gblamẹ. Na nugbo tọn, whẹwhinwhẹ́n susu tin nado lẹnnupọndo lehe mí sọgan wà susu dogọ to mars, avril po mai po mẹ do ji.
2. Etẹwẹ yin dopo to aliho he yọ́n hugan lẹ mẹ nado wà susu dogọ to lizọnyizọn mítọn mẹ?
2 Gbehosọnalitọ Alọgọtọ Tọn Bibasi: Dopo to aliho he yọ́n hugan nado wà susu dogọ lẹ mẹ wẹ nado basi gbehosọnalitọ alọgọtọ tọn. To whenuena e yindọ alọnu mímẹpo tọn wẹ ján, e na biọ dọ mí ni basi tito jẹnukọn bo basi diọdo delẹ. (Howh. 21:5) Vlavo e sọgan biọ dọ mí ni sẹ̀ azọ́n he ma yin dandan tọn delẹ wiwà do nukọn. (Flp. 1:9-11) Naegbọn hiẹ ma na dọ ojlo towe nado basi gbehosọnalitọ na mẹdevo lẹ to agun towe mẹ nado yọnẹn eyin yé sọgan kọnawudopọ hẹ we nado basi gbehosọnalitọ alọgọtọ tọn?
3. Nawẹ whẹndo lẹ sọgan basi tito nado wà susu dogọ to lizọnyizọn lọ mẹ gbọn?
3 To Sinsẹ̀n-Bibasi Whẹndo tọn mìtọn he na bọdego whenu, e na yọ́n dọ mì ni dọhodo yanwle mìtọn lẹ ji. (Howh. 15:22) Eyin mẹhe tin to whẹndo lọ mẹ lẹpo kọngbedopọ, vlavo hagbẹ whẹndo lọ tọn delẹ sọgan basi gbehosọnalitọ alọgọ tọn na osun dopo kavi humọ. Etẹwẹ lo eyin mì mọdọ e na vẹawu? Hagbẹ whẹndo lọ tọn lẹ gbẹsọ sọgan basi tito nado yidogọna mahẹ yetọn to lizọnyizọn lọ mẹ gbọn mahẹ tintindo to lizọnyizọn lọ mẹ to whèjai delẹ kavi ojlẹ susu yiyizan to sẹfifo lẹ dali.
4. Dona tẹlẹ wẹ mí na mọyi eyin mí wà susu dogọ to lizọnyizọn lọ mẹ to ojlẹ Oflin tọn ehe mẹ?
4 Jehovah nọ doayi nuhe wà mí te nado sẹ̀n ẹn lẹpo go bosọ nọ yọ́n pinpẹn avọ́sinsan mítọn lẹ tọn. (Heb. 6:10) Nado nanú Jehovah po mẹdevo lẹ po wẹ nọ namẹ ayajẹ hugan. (1 Otan. 29:9; Owalọ 20:35) Be hiẹ sọgan wà susu dogọ to lizọnyizọn lọ mẹ to ojlẹ Oflin tọn ehe whenu bo duvivi ayajẹ po dona susu he nọ wá sọn e mẹ po tọn lẹ ya?