Be Hiẹ Sọgan Basi Gbehosọnalitọ Alọgọtọ Tọn Ya?
1. Naegbọn ojlẹ Oflin tọn do yin ojlẹ dagbe de nado gbloada na lizọnyizọn mítọn?
1 Ojlẹ Oflin tọn yin ojlẹ dagbe de nado gbloada na lizọnyizọn mítọn. To ojlẹ enẹ mẹ, mí nọ lẹnnupọndo owanyi daho he Jehovah dohia mí gbọn Visunnu etọn nina mí taidi ofligọ de dali ji. (Joh. 3:16) Mí nọ dopẹ́ taun na Jehovah, na ewọ wleawu ofligọ lọ tọn na mí, podọ ehe nọ yidogọna ojlo mítọn nado dọhona mẹdevo lẹ gando Ewọ po nuhe e to wiwà na gbẹtọvi lẹ po go. (Isa. 12:4, 5; Luku 6:45) E sọ yin ojlẹ de he mẹ mí nọ duvivi nujijla vonọtaun de tọn te bo nọ basi oylọna mẹyọnmẹ mítọn lẹ po mẹhe tin to aigba-denamẹ mítọn ji lẹ po nado wá kọnawudopọ hẹ mí na hùnwhẹ Oflin tọn. Enẹgodo, mí nọ dovivẹnu nado doafọna ojlo mẹhe wá hùnwhẹ lọ tẹnmẹ lẹ tọn. Be hiẹ sọgan gbloada na lizọnyizọn towe gbọn gbehosọnalitọ alọgọtọ tọn bibasi dali to osun mars, avril kavi mai tọn mẹ ya?
2. Naegbọn mars do yin osun vonọtaun de nado basi gbehosọnalitọ alọgọtọ tọn?
2 Yí Mars Do Basi Osun Vonọtaun De: Mars na yin osun titengbe de he mẹ mí sọgan basi gbehosọnalitọ alọgọtọ tọn te. Mẹhe na ze yinkọ dai lẹ sọgan de nado jẹ nubiọtomẹsi gànmẹ 30 kavi 50 tọn kọ̀n. Eyin dlapọn nugopọntọ lẹdo tọn jẹ do mars mẹ, gbehosọnalitọ alọgọtọ tọn lẹ sọgan yì opli he e nọ basi hẹ gbehosọnalitọ whepoponu tọn po titengbe lẹ po bo duvivi tito-to-whinnu lọ blebu tọn. To owhe ehe mẹ, nujijla na oylọ-basinamẹwe Oflin tọn lẹ mimá na dlẹnkan hugan owhe he wayi lẹ bo na bẹjẹeji to 1er mars, podọ hùnwhẹ Oflin tọn na wá aimẹ to Tlatagbe 26 mars 2013. Humọ, sẹfifo atọ́n plipli wẹ mars bẹhẹn. To whelọnu lo, naegbọn hiẹ ma na yí sọwhiwhe do lẹnnupọndo tito towe ji nado sọgan basi gbehosọnalitọ alọgọtọ tọn to osun vonọtaun ehe mẹ?
3. Tito tẹlẹ wẹ mí sọgan basi nado gbloada na lizọnyizọn mítọn?
3 Basi Tito Bẹsọn Din: Nado basi gbehosọnalitọ alọgọtọ tọn to mars mẹ, e na yọ́n dọ hiẹ ni jẹ nulẹnpọn do tito towe lẹ ji bẹsọn din nado yọ́n vọjlado he a sọgan basi lẹ. Gbekọndopọ whẹndo tọn yin nujọnu, enẹwutu to sinsẹ̀n-bibasi whẹndo tọn mìtọn whenu, e na yọ́n dọ mì ni yí whenu zan nado dọhodo yanwle whẹndo mìtọn tọn lẹ ji bo basi tito he jẹ lẹ. (Howh. 15:22) Eyin hiẹ ma sọgan basi gbehosọnalitọ alọgọtọ tọn, ma gbọjọ blo. Ṣigba, be hiẹ sọgan vọ́ tito towe lẹ jlado nado yí whenu susu dogọ zan to azán he ji a nọ tọ́n na sinsẹ̀nzọn kunnudegbe tọn te lẹ ya? Kavi be hiẹ sọgan de azán devo dogọ to osẹ lọ mẹ nado nọ yì kunnudegbe ya?
4. Ale tẹlẹ wẹ mí na mọyi eyin mí gbloada na lizọnyizọn mítọn to mars, avril po mai po mẹ?
4 Dile mí na to yiyidogọna mahẹ mítọn to sinsẹ̀nzọn lọ mẹ to mars, avril po mai po mẹ, mọdopolọ wẹ mí nasọ to yiyidogọna ayajẹ po pekọ he mí nọ mọ sọn Jehovah sinsẹ̀n po alọgigọna mẹdevo lẹ po mẹ do niyẹn. (Joh. 4:34; Owalọ 20:35) Hú popolẹpo, gbigbọ mẹde-yido-sanvọ́ tọn mítọn na hẹn homẹ Jehovah tọn hùn.—Howh. 27:11.