SẸ̀ Ẹ DO
Pọndohlan Owe-Wiwe Tọn Gando Ovi Zizedo Mẹdevo Dè Go
Dopo to hosọ dagbedagbe he sọawuhia to Atọ̀họ̀-Nuhihọ́ lọ Tọn, [Flansegbe] 1er septembre 1988 tọn mẹ lẹ mẹ wẹ “‘Placer’ ses enfants—Est-ce la voie de la sagesse?” (Ovi Zizedo Mẹdevo Dè—Be Nuyọnẹnnu Wẹ E Yin Ya?) Sọn whenue gbọ́n hosọ enẹ yin zinzinjẹgbonu, wẹnlatọ susu he nọ zan Lizọnyizọn Ahọluduta Tọn Mítọn he yin Whèyihọ po Ṣẹnṣẹn Aflika tọn po wẹ ko lẹzun Kunnudetọ Jehovah tọn. Nuagokun delẹ yin didesọn hosọ enẹ mẹ bo yin vivọ́zin do Lizọnyizọn ehe mẹ na mí nido yọ́n pọndohlan Jehovah tọn do whẹho ehe ji.
1. To paa mẹ, etẹwẹ nọ yin pọndohlan gbẹtọ lẹ tọn gando ovi lẹ go?
1 Nuhewutu Mẹjitọ lẹ Nọ Ze Ovi Yetọn Do Mẹdevo Dè. Dile etlẹ yindọ aṣa lẹ to didiọ, pọndohlan mẹhe to Aflika lẹ tọn wẹ yindọ e ma yin mẹjitọ lẹ kẹdẹ wẹ nọ tindo aṣẹ do ovi he yé ji lẹ ji gba. Kakatimọ, hẹnnumẹ lẹ lọsu tindo aṣẹ do yé ji ga. To paa mẹ, pọndohlan lọ wẹ yindọ tanyin lẹ, tavẹ lẹ, mẹjitọ daho lẹ po mọmọ po tindo aṣẹ do ovi lọ lẹ ji. Dile oló Whèyihọ Aflika tọn de dọ do: “Mẹdopo wẹ nọ jivi, ṣigba otò wẹ nọ plọn.”
2, 3. (a) Whẹwhinwhẹ́n tẹlẹ wutu wẹ mẹjitọ lẹ nọ ze ovi yetọn lẹ do hẹnnumẹ lẹ dè? (b) Sọgbe hẹ apotin lọ, dona Jiwheyẹwhe tọn tẹwẹ ovi he to mẹdevo dè ma sọgan duvivi etọn, podọ etẹwutu?
2 Di apajlẹ, eyin mẹjitọ ovi lọ tọn lẹ kú kavi eyin ninọmẹ madonukun devo lẹ wá aimẹ, hẹnnumẹ lẹ nọ wleawufo nado penukundo tọṣiọvi lọ go. Whẹwhinwhẹ́n tangan he wutu mẹjitọ lẹ nọ saba ze ovi yetọn lẹ do hẹnnumẹ lẹ dè wẹ nuhahun akuẹzinzan tọn. Eyin mẹjitọ lẹ yin wamọnọ bo jivi susu, yé nọ mọdọ e na yọ́n dọ dopo to ovi lọ lẹ mẹ kavi humọ ni yì nọ hẹnnumẹ he onú pọnte na de dè. Pọndohlan yetọn wẹ yindọ e na bọawuna hẹnnumẹ lọ nado sú wehọmẹ-kuẹ ovi lọ tọn bo họ̀ avọ́, amasin po núdùdù po na ẹn. Enẹwutu, e ma yindọ mẹjitọ lẹ gbẹwanna ovi yetọn lẹ wẹ zọ́n bọ yé nọ ze yé do mẹdevo lẹ dè gba, kakatimọ yé nọ jlo dọ ovi yetọn lẹ ni mọ nukunpedomẹgo he yọ́n hugan yí.
3 Whẹwhinwhẹ́n devo he wutu yé do nọ wàmọ wẹ yindọ yé nọ jlo dọ ovi yetọn lẹ ni plọnwe ganji. E sọgan yindọ wehọmẹ he sẹpọ yé hugan lọ dẹn taun do fie yé nọ nọ̀. To whenuena e yindọ e na vẹawuna whẹndo lọ blebu nado sẹtẹn, mẹjitọ lẹ nọ mọdọ e na yọ́n hugan nado ze ovi lọ do hẹnnumẹ he owhé etọn sẹpọ wehọmẹ lọ de dè.
4. Nunọwhinnusẹ́n Biblu tọn tangan awe tẹlẹ wẹ na deanana pọndohlan Klistiani lẹ tọn do whẹho ehe ji?
4 Nuhudo Gbigbọmẹ Tọn lẹ Yin Nujọnu. Dagbemẹninọ gbigbọmẹ tọn ovi lẹ tọn wẹ yin nujọnu hugan. Ayinamẹ nuyọnẹn tọn Jiwheyẹwhe tọn na mẹjitọ lẹ wẹ nado penukundo nuhudo gbigbọmẹ tọn ovi yetọn lẹ tọn go na yede. To whenuena Jiwheyẹwhe to ayinamẹ na mẹjitọ Islaelivi lẹ, e dọmọ: “Ohó helẹ, he yẹn degbena we to egbehe, na tin to ayiha towe ji: hiẹ nasọ yí sọwhiwhe do plọn yé ovi towe lẹ, bosọ dọho yetọn whenuena hiẹ sinai to owhé towe gbè, podọ whenuena hiẹ to zọnlinzin to aliho ji, podọ to whenuena hiẹ mlọnai, podọ to whenuena hiẹ fọntite.” (Deut. 6:6, 7) Mọdopolọ, apọsteli Paulu na ayinamẹ otọ́ Klistiani lẹ dọmọ: “Mì ma nọ hẹn homẹgblena ovi mìtọn lẹ blo, ṣigba mì nọ to pinpọn yé go whẹ́n to mẹplọnlọ po anademẹ Jehovah tọn po mẹ.”—Efe. 6:4.
5. Nuhahun tẹwẹ ovi zizedo mẹdevo dè sọgan hẹnwa to gbigbọ-liho?
5 Ṣigba, nawẹ ovi de sọgan yin pinplọn whẹ́n “to mẹplọnlọ po anademẹ Jehovah tọn po mẹ” gbọn, eyin mẹjitọ lẹ do e hlan nado yì nọ hẹnnumẹ mayisenọ de dè? Lehe e yin nulunu nado dike nuhudo agbasa tọn lẹ kavi wepinplọn ovi de tọn ni yitẹn sọn gbigbọnu lẹ si do sọ!
6. Be ovi zizedo Klistiani de dè na didẹ nuhahun lẹpo wẹ ya? Etẹwutu?
6 Etẹwẹ dogbọn ovi zizedo yisenọ hatọ de dè dali? Dile etlẹ yindọ e pọnte hú zize e do mayisenọ de dè, enẹ lọsu ylan to aliho susu mẹ. E yọnbasi dọ ovi lọ ni pehẹ ninọmẹ tangan delẹ to lẹdo he mẹ e wá lọ, kavi dọ e ni pehẹ ninọmẹ sinsinyẹn to numọtolanmẹ-liho podọ to apọ̀nmẹ. Taidi kọdetọn de, ehe ko hẹn ovi delẹ jẹflumẹ bọ devo lẹ ko lẹzun gbévun kavi jẹ ogbẹ́ ylankan do ji. Mọjanwẹ, ovi devo lẹ masọ tindo ojlo na gbigbọnu lẹ paali ba do niyẹn.
7. (a) Etẹwẹ e nọ biọ to mẹjitọ jọnun ovi lẹ tọn si nado do owanyi Jehovah tọn do ahun mẹ na yé? (b) Na taun, etẹwẹ mẹjitọ lẹ to zizedo owù mẹ eyin yé ze ovi yetọn do mẹdevo dè?
7 Dile mẹjitọ lẹ yọnẹn do, e nọ biọ azọ́nyinyọnẹn, homẹfa po whenu susu po nado do owanyi na Jehovah do ahun ovi lẹ tọn mẹ. Eyin e nọ vẹawuna mẹjitọ lẹ nado penukundo ovi he yelọsu ji bo yọ́n yé ganji lẹ go, nẹmunẹmu wẹ e na yin na asu po asi po he ma yin mẹjitọ jọnun ovi lọ lẹ tọn! Ma nado ze ogbẹ̀ madopodo ovi de tọn do owù mẹ, mẹjitọ lẹ dona lẹnnupọn sisosiso podọ to odẹ̀ mẹ nado yọnẹn eyin e sọgbe nado ze ovi yetọn do mẹdevo dè.
8. Sọgbe hẹ 1 Timoti 5:8, azọngban tẹwẹ mẹjitọ Klistiani lẹ ma dona họ̀nna?
8 Etomọṣo, nudide mẹjitọ Klistiani lẹ tọn wẹ e yin nado basi dide lehe yé na setonuna ayinamẹ he tin to 1 Timoti 5:8 mẹ do tọn dọmọ: “Na nugbo tọn, eyin mẹdepope ma wleawudaina mẹhe yin etọn titi lẹ, podọ titengbe na mẹhe yin hagbẹ whédo etọn tọn lẹ, ewọ ko mọ́n yise lọ bosọ ylanhu mayisenọ.” Eyin mẹjitọ lẹ ma tlẹ penugo nado wleawuna nuhudo agbasa tọn ovi yetọn lẹ tọn tlọlọ, yé dona hẹn ẹn diun dọ nuhudo gbigbọmẹ tọn ovi yetọn lẹ tọn yin nukunpedego ganji mahopọnna ninọmẹ lẹ.
9. Dona tẹlẹ wẹ mẹjitọ Klistiani lẹ sọgan mọyi eyin yé tẹdo nunọwhinnusẹ́n Biblu tọn lẹ go?
9 Ovi lẹ yin nunina de sọn Jehovah Jiwheyẹwhe dè. (Ps. 127:3) Enẹwutu, mì wlebòna ovi mìtọn lẹ bo nọ dọ̀n yé dogo. Mì nọ dike yé ni yọnẹn dọ mì yiwanna emi podọ yelọsu na yiwanna mì. Eyin mì gọalọna ovi mìtọn lẹ nado whèwhín to gbigbọ-liho, enẹ na dekọtọn do dona mavọmavọ mẹ na yé. Whenẹnu mì sọgan dọ nuhe Johanu dọ gando ovi gbigbọmẹ tọn etọn lẹ go dọmọ: “Yẹn ma tindo onú devo de he nọ hẹn mi jaya hú ehelẹ, dọ yẹn ni to sisè dọ ovi ṣie lẹ to zọnlinzin zọnmii to nugbo lọ mẹ.”—3 Joh. 4.